ዛካሪያሴ ማፃኣፖ 12

ዬሩሳላሜኮ ሞርካ ዖሎና ኩዳንዳያ ማዒፃ ኬኤዚንቴሢ

1ጫሪንጮ ዼጊዲ ዳሬሢ፥ ሳዖ ቦኦኮልቂ ማዤሢ፥ ዓሲማኣ ሼምፖ ዑኡሲ ዒንጌ ናንጊና ናንጋ ጎዳሢ ሂዚ ጋዓኔ፦ 2«ዬሩሳላሜ ታኣኒ ዒዞኮ ኮይላ ዓኣ ሜሌ ዴራ ዒዞፓ ዑሽኪ ማሢንታ ዑሺ ዓንጊ ማሃንዳኔ፤ ዬሩሳላሜ ዖላ ዓሳ ሙኪ ማንጋኣና ዪሁዳኣ ማንጊንታንዳኔ። 3ዬኖ ኬሎና ዬሩሳላሜ ታኣኒ ዴሮ ቢያሢም ዓጊፁዋ ዼኤፒ ላሌ ማሃንዳኔ፤ ዒዞ ቡጊ ሺኢሻኒ ኮዓይ ቢያ ፔኤሮ ማኣሳናንዳኔ፤ ዓጮ ቢያይዳ ዓኣ ዴራ ጉቤ ዒዞ ዖላኒ ሙካንዳኔ፤ 4ዒማና ታኣኒ ፓራሢ ቢያ ዲቃሣንዳኔ፥ ፓራሢ ቶጊ ዖላ ዓሶዋ ታኣኒ ዣኣሻንዳኔ፤ ፓራሢኮ ታኣኒ ዓኣፖ ባይዛንዳኔ፤ ጋዓንቴ ዪሁዳ ዴሮ ታኣኒ ታ ዓኣፖና ዛጊ ዛጊ ካፓንዳኔ። 5ዬያሮ ዪሁዳ ዓጮ ሱኡጋ ፔ ዒኖና፦ ‹ቢያ ባኮ ዎይሣ ጎዳ ዔያቶኮ ፆኦዛሢ ማዔሢሮ ዬሩሳላሜይዳ ናንጋ ዒዛ ዴራ ዒዛና ዎልቄ ዴንቃኔ› ጋዓንዳኔ።

6«ዬኖ ዓቦ ታኣኒ ዪሁዳ ዴሮ ሱኡጎ ናኣቦይዳ ዳኪ ዔኤሦ ሃንፂሌ፥ ጮኦሪ ጌሦና ናኣራኮ ባኣኪዳ ዓይሢንቴ ኩሻ ማሃንዳኔ፤ ዬያሮ ዔያታ ዔያቶኮ ኮይላ ዓኣ ሜሌ ዴሮ ሙዒ ባይዛንዳኔ፤ ዬሩሳላሜ ዴራ ጋዓንቴ ፔቴታዖ ዔኤቢ ዔያቶ ቆኦዹዋንቴ ካታሞይዳ ኮሺ ዴዓንዳኔ።

7«ታኣኒ፥ ናንጊና ናንጋ ጎዳሢ ቤርታሳዖ ዪሁዳ ዴራ ሞርኮ ባሻንዳጉዲ ማሃንዳኔ፤ ታኣኒ ዬያ ማዻንዳሢ ዳውቴ ናኣቶ ቦንቾንታ ዬሩሳላሜይዳ ናንጋ ዴሮኮ ቦንቻ ሃንጎ ዪሁዳ ፃጶይዳፓ ባሼ ማዒ ዼግ ዼጊ ጎውዋጉዲኬ። 8ዬኖ ዎዶና ታኣኒ፥ ናንጊና ናንጋ ጎዳሢ ዬሩሳላሜይዳ ናንጋ ዓሶም ጊቲማ ማዓንዳኔ፤ ዔያቶ ባኣካ ላቤያኬ ጌይንቴሢታዖ ዳውቴጉዲ ዶዲ ማዓንዳኔ፤ ዳውቴ ናኣታ ታና፥ ናንጊና ናንጋ ጎዳሢጉዲ፤ ጊንሣ ሃሣ ፆኦሲ ኪኢታንቻሢጉዲ ሶሮፒ ማዒ ዴሮ ዔኪ ዓኣዻንዳኔ። 9ታኣኒ ዒማና ዬሩሳላሜይዳ ሞርኬ ማዒ ዔቃ ዴሮ ካኣቶ ቢያ ዖላኒ ጊኢጊንቲ ኬስካንዳኔ።

10«ዬኖ ዎዶና ታኣኒ ዳውቴ ዜርፆንታ ዬሩሳላሜይዳ ናንጋ ዓሶንታም ሚጪንታ ዓያናና ሺኢጲሢ ዓያና ሚርጊሺ ዒንጋንዳኔ፤ ዬያ ታኣኒ ማዻንዳሢ ሜቴ ናይ፥ ሃሣ ጊንሣ ቶይዲ ናይ ሃይቃዛ ዒናፓ ዬኤኮ ጎይሢ ዔያታ ጫርጌሢ ሚጪንቲ ዬኤካንዳጉዲኬ። #ዮሃ. 19፡37፤ ዮሃ. ፆፔዻ 1፡7። 11ዒማና ዬሩሳላሜይዳ ዬኤኪንታንዳ ዬኤፓ ሜጊዶ ቦኦሎይዳ ሃዳዲሪሞኔ ዬኤኮና ጎይፆጉዲ ማዓንዳኔ። 12ዬኖ ሳዔሎይዳ ፔቴ ፔቴ ቶኦካ ፔ ማኣሮ ዓሶማ ዓሶማ ዬኤካንዳኔ፤ ዓቲንቃ ዒማና ዔያቶኮ ላኣላፓ ዱማዺ ዴይ ዬኤካንዳኔ፤ ያዺዲ ዬኤካንዳ ማኣራ፦ ዳውቴ ማኣሮ፥ ናኣታኣኔ ማኣሮ፥ 13ሌዊ ማኣሮንታ ሺምዒ ማኣሮንታ ፔ ቶኦኮና ቶኦኮና ፓቂንቲ ዬኤካንዳኔ፤ 14ዬያጉዲ ሃንጎ ዓቴ ማኣሮ ዓሳኣ ፓቂንቲ ፓቂንቲ ዬኤካንዳኔ፤ ላኣላ ዔያቶኮ ዱማዺ ዴዒ ዖዪ ዬኤካንዳኔ።» #ማቲ. 24፡30፤ ዮሃ. ፆፔዻ 1፡17።

Currently Selected:

ዛካሪያሴ ማፃኣፖ 12: ጌኤ.ማፃ

Highlight

Copy