SAM 24
24
മഹത്ത്വത്തിന്റെ രാജാവ്
ദാവീദിന്റെ ഒരു സങ്കീർത്തനം
1ഭൂമിയും അതിലുള്ള സമസ്തവും;
ഭൂതലവും അതിലെ സർവനിവാസികളും സർവേശ്വരൻറേതത്രെ.
2സമുദ്രങ്ങളുടെമേൽ അവിടുന്ന് അതിനെ സ്ഥാപിച്ചു;
പ്രവാഹങ്ങളുടെമേൽ അവിടുന്ന് അതിനെ ഉറപ്പിച്ചു.
3സർവേശ്വരന്റെ #24:3 പർവതത്തിൽ = ദേവാലയം സ്ഥാപിച്ചിരിക്കുന്ന സീയോൻ പർവതം.പർവതത്തിൽ ആർ കയറും?
അവിടുത്തെ വിശുദ്ധസ്ഥലത്ത് ആർ നില്‌ക്കും?
4ചിന്തയിലും പ്രവൃത്തിയിലും നിർമ്മലനായവൻ.
മിഥ്യാമൂർത്തികളെ ആരാധിക്കാത്തവനും
കള്ളസ്സത്യം ചെയ്യാത്തവനുംതന്നെ.
5സർവേശ്വരൻ അവനെ അനുഗ്രഹിക്കും,
രക്ഷകനായ ദൈവം അവൻ നിർദോഷി എന്നു പ്രഖ്യാപിക്കും.
6ഇങ്ങനെയുള്ളവരാണു ദൈവത്തെ ആരാധിക്കുന്ന ജനം.
യാക്കോബിന്റെ ദൈവമേ, അവിടുത്തെ
ദർശനം ആഗ്രഹിക്കുന്നവർ ഇവർതന്നെ.
7പടിവാതിലുകളേ, നിങ്ങൾ തലകൾ ഉയർത്തുവിൻ;
പുരാതന കവാടങ്ങളേ, ഉയർന്നു നില്‌ക്കുവിൻ.
മഹത്ത്വപൂർണനായ രാജാവ് പ്രവേശിക്കട്ടെ.
8ആരാണ് മഹത്ത്വപൂർണനായ രാജാവ്?
ശക്തനും വീരനുമായ സർവേശ്വരൻ,
യുദ്ധവീരനായ അവിടുന്നുതന്നെ.
9പടിവാതിലുകളേ, നിങ്ങൾ തലകൾ ഉയർത്തുവിൻ,
പുരാതനകവാടങ്ങളേ, ഉയർന്നു നില്‌ക്കുവിൻ;
മഹത്ത്വപൂർണനായ രാജാവ് പ്രവേശിക്കട്ടെ.
10ആരാണു മഹത്ത്വപൂർണനായ രാജാവ്?
സർവശക്തനായ സർവേശ്വരൻതന്നെ.
അവിടുന്നാണു മഹത്ത്വപൂർണനായ രാജാവ്.
Currently Selected:
SAM 24: malclBSI
Highlight
Share
Copy
Want to have your highlights saved across all your devices? Sign up or sign in
Malayalam C.L. Bible, - സത്യവേദപുസ്തകം C.L.
Copyright © 2016 by The Bible Society of India
Used by permission. All rights reserved worldwide.
