SAM 19
19
ദൈവത്തിന്റെ മഹത്ത്വം
ഗായകസംഘനേതാവിന്; ദാവീദിന്റെ ഒരു സങ്കീർത്തനം
1ആകാശം ദൈവത്തിന്റെ മഹത്ത്വത്തെ വർണിക്കുന്നു,
ആകാശമണ്ഡലം അവിടുത്തെ കരവേലയെ വിളംബരം ചെയ്യുന്നു.
2ദൈവത്തിന്റെ മഹത്ത്വത്തെക്കുറിച്ച്,
പകൽ പകലിനോടു നിരന്തരം സംസാരിക്കുന്നു;
രാത്രി രാത്രിക്ക് ആ അറിവു പകരുന്നു.
3വാക്കുകളില്ല, ഭാഷണമില്ല, ശബ്ദം കേൾക്കാനുമില്ല.
4എങ്കിലും അവയുടെ സ്വരം ഭൂമിയിലെങ്ങും വ്യാപിക്കുന്നു;
അവയുടെ വാക്കുകൾ ഭൂമിയുടെ അറുതിവരെ എത്തുന്നു;
അവിടുന്നു സൂര്യന് ആകാശത്ത് ഒരു കൂടാരം സ്ഥാപിച്ചിരിക്കുന്നു.
5മണവറയിൽനിന്നു മണവാളനെപ്പോലെ
പുലർകാലത്ത് സൂര്യൻ അതിൽനിന്നു പുറത്തുവരുന്നു;
ബലശാലിയെപ്പോലെ പ്രസന്നചിത്തനായി ഓടാൻ തുടങ്ങുന്നു.
6ആകാശത്തിന്റെ ഒരറ്റത്തുനിന്ന് അതു പുറപ്പെടുന്നു,
മറ്റേ അറ്റംവരെ അതു യാത്ര ചെയ്യുന്നു;
അതിന്റെ ചൂടിൽനിന്ന് ഒന്നിനും ഒളിക്കാനാവുകയില്ല.
7സർവേശ്വരന്റെ ധർമശാസ്ത്രം തികവുള്ളത്;
അത് ആത്മാവിനു നവജീവൻ നല്‌കുന്നു.
സർവേശ്വരന്റെ പ്രബോധനങ്ങൾ വിശ്വാസ്യമായത്;
അത് അറിവില്ലാത്തവരെ ജ്ഞാനികളാക്കുന്നു.
8സർവേശ്വരന്റെ കല്പനകൾ നീതിനിഷ്ഠം;
അവ ഹൃദയത്തെ ആനന്ദിപ്പിക്കുന്നു.
അവിടുത്തെ പ്രമാണങ്ങൾ പവിത്രമായത്;
അവ കണ്ണുകളെ പ്രകാശിപ്പിക്കുന്നു.
9സർവേശ്വരനോടുള്ള ഭക്തി നിർമ്മലമായത്;
അത് എന്നേക്കും നിലനില്‌ക്കുന്നു.
അവിടുത്തെ വിധികൾ സത്യമായവ;
അവ തികച്ചും നീതിയുക്തമാണ്.
10അവ പൊന്നിനെയും തങ്കത്തെയുംകാൾ അഭികാമ്യം;
തേനിനെയും തേൻകട്ടയെയുംകാൾ മധുരമുള്ളവ.
11ഈ ധർമശാസ്ത്രമാണ് അവിടുത്തെ ദാസനു പ്രബോധനം നല്‌കുന്നത്.
ഇതു പാലിക്കുന്നതുകൊണ്ട് എനിക്കു വളരെ പ്രതിഫലം ഉണ്ട്.
12സ്വന്തം തെറ്റുകൾ ഗ്രഹിക്കാൻ ആർക്കു കഴിയും?
അറിയാതെ ചെയ്തുപോകുന്ന തെറ്റുകളിൽ നിന്ന് എന്നെ രക്ഷിക്കണമേ.
13ബോധപൂർവം ചെയ്യുന്ന പാപങ്ങളിൽനിന്ന്
ഈ ദാസനെ കാത്തുകൊള്ളണമേ.
അവ എന്റെമേൽ ആധിപത്യം പുലർത്തരുതേ;
അങ്ങനെ ഞാൻ കുറ്റമറ്റവനായിരിക്കും.
അതിക്രമങ്ങളിൽനിന്നു വിമുക്തനുമായിരിക്കും.
14എന്റെ അഭയശിലയും വിമോചകനുമായ സർവേശ്വരാ,
എന്റെ വാക്കുകളും എന്റെ ചിന്തകളും
തിരുസന്നിധിയിൽ സ്വീകാര്യമായിരിക്കേണമേ.
Currently Selected:
SAM 19: malclBSI
Highlight
Share
Copy
Want to have your highlights saved across all your devices? Sign up or sign in
Malayalam C.L. Bible, - സത്യവേദപുസ്തകം C.L.
Copyright © 2016 by The Bible Society of India
Used by permission. All rights reserved worldwide.
