Matius Uram 17

Er Yesus miliramnyi asing dinmai uca, Er Yesus milil atonyi kibmou ura, Er Imtamnyi biryi Erti, “Ni Mi Ni boukwe weik kununyi kurur,” eboka lak kibmou uram

17:1-13

1Ura, uki nabaryi kubmai ura, Er Yesus biryi Er miliramnyi nang Petrus ab, Yakobus ab, Yakobus er weit Yohanes ab asi inibdobmou ura, imtam ereboka bukamwe mutuk kon tentok asi tonkwa welebinmai. A mutuk kon ara sun yuk bindoka kunmai. 2Ura, sunci dinmai uca, Er Yesus urasin ab nong nirya ab ara kiting asing ulul atonyi kibmou. Tonda, Er Yesus ongon aling ara milil ararkarerande to iya kait kibmou. 3Ato kubmou asi dinmai uca, minob kurandei nang si Musa ab Elia ab yandoka Er Yesus ab tonkwa uram sisingmai.

4Uca, Petrus biryi Er Yesus bisi ato ebmou, “Nai, nun Eteresurumnyi, nun a yandoka kunmab ara iya teleb. Ati, Kan teleb tenebminyi ura, niryi ukuryok keis ol ai winiryi dobkwinsin. Tonda, ‘Nai Kanti,’ tenen dobkwinkin ba, tonda, ‘Musa biti,’ tenen dobkwan ba, tonda, ‘Elia biti,’ tenen dobkwan,” ebmou.

5Ura, Petrus uram tuba enmou ba, kait duwa bum tentok yandoka sunsi libdongobmou ba, sunci kekenmai uca, a duwa umbura aryi kuboka Er Imtamnyi biryi ato ebmou, “Anyi bira Ni Mi, Ni boukwe kununyi kurur. Erda Ni kanya namin kunurur. Sunci Er ebmaci uram asi diboka kekebkwandarur,” ebmou.

6Ura, Er Yesus miliramnyi nang ara Er ab tonkwa weleyanmai nang winiryi aryi a uram kekebmai uca, sun ilil mitik kum kubmou ba, kisok dakdongoboka tukwe ai marbinmai. 7Ura, Er Yesus biryi sun dam yandoka kamubdeibmouci, ato ebmou, “Tikokdarur, sun ilil kusina mem!” ebmou. 8Uca, sunci bukoka kisok ereboka diramnyi uca, Musa ab Elia ab ara sirya bindobmarei. Eda, Er Yesus Er yuk kubmou asi eibmai.

9A sirya ukubmou ura, a mutuk kon dam aryi kuboka yurbinmaici, Er Yesus biryi Er miliramnyi nang winiryi nang asi ato ebmou, “A kunubmar ba, asing eibmarum dinyi ara yuk nang asi nukdongobde yibana mem. Ura, Ni Ninyi Dasinyi dibmanyi ani, sirya kam bukokmanyi ura, sunci a asing eiboka kekebmarum to ur ebkarebdarur,” ebmou.

10Ura, Er miliramnyi nang winiryi aryi Er Yesus bisi ato ebmai, “Ato ebmarim bok, sun Musa kerek sengna eterenung nang aryi, ‘Sirya kobdob uki tum kum yaci ba, Er Imtamnyi Uram ebdeibmaca bobaramunyi si Elia minob tamuryankwandur,’ enung. Ara, unato ati ato enung do?” Ato eboka asibdenmai. 11Uca, Er Yesus biryi sunsi ato ebmou, “Diba. Sirya kobdob uki tum kum berekci ba, Elia bitonyi yankwande. Ara, Elia bitonyi yaci ura, erci utotoa nirya bitabdeiboka teleb kibdeibkwande. Ara, minob talak aryi utotoa nirya teleb kuamwe to, Elia biryi yandoka utotoa nirya asi tamuboka teleb kubdeibkwande. 12Bok, Niryi sunsi ebkwinsin uram diboka kekebdarur. Ninyi aryi, ‘Elia yarur,’ tenen dibde buraming bok, Elia bitonyi sirya yanmou. Elia bitonyi sirya yanmou asi ninyi aryi, ‘Mambul kibdeibtibyi,’ teneramnyi tok, sunci ersi mambul kibdeiboka obmai. Ura, Ni Ninyi Dasinyi bira aminda aryi yase asi ninyi aryi neiktoto kuboka mambul kibdeibkwaning,” ebmou. 13Ato ebmou uca, Er Yesus miliramnyi nang winiryi aryi, “Er Yesus biryi ato enmasir ara Yohanes ninyi me dongoramunyi biti ato enmasir,” tenen bikdobmai.

Er Yesus biryi isa kanya wekamwe mi ara diblalak-diblalak kimdamwe mi asi kwetebmou uram

17:14-21

14Ura, Er Yesus ab Er miliramnyi nang winiryi ab mutuk kon aryi kuboka yuryanmaici, ninyi ilinto bulubmai nang dam yanmai. Yanmai ba, ninyi tentok ara Er Yesus dam yandoka er kutam ikdongoboka buryanmou. 15Ura, anyi biryi Yesus bisi ato ebmou, “Nai se, Kanci ni mi asi boukwe kiboka kwetebdeibdum se. Ni mi ara muldamnyi amangyangarur ba, mambul mitik kum dororur. Er kanya wanikci ura, talyi bukman-bukman ani, uk kalurongbarur. Ba, yibaronmaci ura, kanya kum danaroci ura, me kalurongbarur. 16Ura, niryi, ‘Ni mi kwetebdeibting,’ tenen ni mi asi Kan miliranking nang dam boyanman bok, sunci, ‘Kwetebkwayeb,’ tenen ukubdenmang bok, ni mi asi kum kwetebdeibmang,” ebmou.

17Uca, Er Yesus biryi Er dam yanmai nang asi ato ebmou, “Sunda ukuryok kurandum nang ara diboka kum tenendarur cok, malyi dinyi akwe kurandum nang kundarur nang se. Sun kurandum to disununa ara Niti boubmanir ati Niryi sunti, ‘A nang ab tonkwa iya kubibyei,’ tenebmasin. Tonda, Niryi sunti, ‘A nang aryi dib kum teneraming ati Nira tanglona kum uca namin kanya bobnyei,’ tenebmasin.” Ato enmou cok, Er Yesus biryi sun a buluryanmai nang asi, “A mi a boyandarur,” ebmou. 18Uca, anyi biryi er mi boyanmou ura, Er Yesus biryi isa kanya asi, “Anabkaboka bindobdum!” eboka erekdobmou. Uca, a mi kanyatam wekamwe isa kanya ara anabkaboka bindobmou ba, a talak aryok a mi u yiramwe dinyi ara lobdobmou.

19Ura, Er miliramnyi nang Er Yesus dam yanmaici, sun yuk ai aryi kubmai cok, ato eboka asibmai, “Nunda, ‘Isa yakdonokwayeb,’ tenen ukubdenmabiryok, kum yakdonokmab. Ara, nun unatoa ati a isa kanya asi yakdonokman kum kubmab do?” eboka asibmai. 20Uca, Er Yesus biryi sunsi ato ebmou, “Sunci Er Imtamnyi bisi dib tenendarur cok, katabum eboka dib kum tenendarur deyok aryi, sunci a mi asi kwetebmana kum kubmarum. Ura, Niryi sunsi dib en uram ton ebkwinsin ati sunci diboka kekebnindarur. Sunci katabum eboka Er Imtamnyi bisi mitiktoto dib tenebmunyi ababyi, Er Imtamnyi biryi sun molobmunyi tok kunubsute. Ara, sun dib tenen dinyi ara keibyi du mitika ato sun kanya dam kuansici ura, Er Imtamnyi biryi sun molobmunyi tok kunubdeibsute. Ati, sunci a mutuk kon asi, ‘Anabkaboka yuk tam burbirum!’ ebdaute ura, a mutuk kon ara anabkaboka yuk tam burbite. Ati, sun kanya dam aryi dib tenen dinyi ara mitiktoa akwe kuansici ababyi, ukubman kum dinyi ton sunti kum kubsute,” ebmou. 21“Tonda, ato isa kanya yangdonongna ara yina si teboka Er Imtamnyi bisi, ‘Yakdonokdum,’ eboka molobtibiryok, yakdonokman kubsute,” ebmou.

Er Yesus biryi, “Ninyi aryi Nisi iya mambul kibdeibningnyi uca, Ni dibkwan,” ebmou ara liki bitinyi dinyi ato eboka lak ebmou uram

17:22-23

22Ura, Er Yesus ab Er miliramnyi nang amolbaryi ab tonkwa Galilea mutuk bindoka buluboka kunmaici, Erci sunsi ato ebmou, “Ni Ninyi Dasinyi bisi ninyi aryi, ‘Obting,’ tenen yuk nang taruk dam dobkarebkwaning. 23Sirya dobkarebningnyi uca, ninyi aryi Nisi obkwaning. Sirya dibmanyi ani, uki winiryi tum berekci ura, Er Imtamnyi biryi Nisi tubto kam bukeibkwanir,” ebmou. Ato ebmou uca, Er miliramnyi nang ara engen kanya bobmai.

Sun Er Imtamnyi ai wa irmiliramnyi nang aryi, “Dengna si pajak kareboka dekeibsindarur,” eboka molorandei asi sun Yahudi yala nang aryi kareramnyi to, Er Yesus bibabyi karebmou uram

17:24-27

24Ura, Er Yesus ab Er miliramnyi nang amolbaryi ab banmai ani, Kapernaum atei dam binmai. Ura, “Er Imtamnyi ai dengna si pajak dekoka keil uang si dirham bitinyi karebsindarur,” molormiliramnyi nang ton aryi yandoka Petrus bisi ato eboka asibdenmai. “Sun eteresinanyi bibabyi Er Imtamnyi ai dam dengna dinyi karerande do kum do?” eboka asibdenmai.

25Uca, Petrus biryi ato ebmou, “Dib, a dengna dinyi karerande,” ebmou.

Ura, Petrus Er Yesus kunmou ai wengbau uca, Er Yesus biryi minob uram ebmouci, Petrus bisi ato eboka asibdenmou, “Simon Petrus, Niryi asirdena ton asibdenkwinkin ati kanci tenenmarim to uram dekeiboka lak ebnurum. Sun tukwetam aryi kuboka weik sien nang ara, ‘Dengna si pajak dekeibsiting,’ tenen moloraming. Ara, unato nang asi, ‘Dengna si pajak dekeibsindarur,’ eboka moloraming do? Sun mabwe asi ato eboka molonung do? Sun dam kuna kum nang asi molonung do?” Ato eboka asibdenmou.

26Uca, Petrus biryi ato ebmou, “Sun dam kuna kum nang asi dengna molonung,” ebmou. Ura, Er Yesus biryi ersi ato ebmou, “Dib ebmarim. Ati, sun weik sien nang dam kun nang ara dengna dinyi si pajak kum dengnaming. Ura, nunda Er Imtamnyi dam kun nang kunub deyok aryi, nunbabyi neiktoto Er Imtamnyi ai dengna dinyi kum dekeibtibyi,” ebmou. 27Enmou cok, Er Yesus biryi ato ebmou, “Ato ebman cok, kanci a nang aryi molobmasing to dekoka karebdum. Ara, ‘A nang aryi nunti, “Er Imtamnyi ai dengna dinyi kum dekmang ati manmalibmang se,” tenebsingnyei,’ tenen kanci a nang aryi molobmasing to dekoka karebdum. Ati, kanci ilila me kwan katum dam bindoka mekinaia te dongorbirum. Te dongoabminyi ani, yuma youbminyi mekinaia asi doboka si kwerekoka dirdeminyi ba, dengna keil uang tentok ara mekinaia si umbura mabmaci asi eibkwamarim. Ura, a keil uang si dirham dumbaryi dinyi dobdobminyi ura, kanci yandoka a nang asi dekeibdum. Ara, ‘Ni eterenanyi ab ni ab ati dekeiboka nisintum karebmasin,’ eboka dengyarum!” ebmou.

Currently Selected:

Matius Uram 17: MTG

Highlight

Copy