Mateo 25

Ti ite sin tjarisoá

1 # Lc. 12:35. *Ndá chꞌin Jesús ndáchro:

―Ti kjuachaxin kuènté Díos mé yóhe̱ éxi ite sin tjarisoá sátsji ti tso̱te̱he ijnko chojni la chuénko sin lámpara tjiá aceite la chóhen sin ti nkexro tso̱te̱he. 2Inꞌó sin la chojni tóxakuenhña la tsíkóyaxíenhña sin la inꞌó sin la chojni tóxakohen la ó tsíkóyaxíhin sin. 3Ti sin tóxakuenhña la kuákja sin ti lámpara kuènté sin, kjánchó tsíkákjahya sin yeé aceite kixin tsikia ínaá. 4A̱ndá ti sin tóxakohen la tsíkákja sin ti ixro̱ tjiá aceite la ko ti lámpara kuènté sin. 5A̱ndá ti nkexro tso̱te̱he la tjokahya ikui, ndá jehe sin la imá kui̱hi̱ sin kotáchrin la tsíkꞌejójua sin kaín sin. 6Ndá ti ó kꞌaxrotjen la kuíhin sin tꞌéya ijnko chojni ndáchro: “Ó ikui ti nkexro tso̱te̱he, tꞌaxrjéra ndója tsoxétara chꞌan.” 7Ndá kaín ti sin tjarisoá la kꞌuàya sin la kjuasiyóxin sin ti lámpara kuènté sin. 8A̱ndá inꞌó ti sin tóxakuenhña la ndáche sin ti sin tsíkóyaxíhin: “Chje̱héni intsí ti aceite kuèntá kixin ó kꞌuànka̱ ti aceite tjiá lámpara kuènténi”, ichro sin. 9A̱ndá ti sin tsíkóyaxíhin la ndáchro: “Náhí, ti tsjajoni ti aceite la tsjachahya tsicháxi̱hini. Ícha jína sátjikꞌènehé ti sin nchekji”, ichro sin. 10Ndá na̱xa̱ tjihya ti sin sákjuikꞌe̱na ti aceite la ikui ti nkexro tso̱te̱he. La ti inꞌó sin ó tsíkóyaxíhin tjejóchóhen mé kꞌuixenko sin chꞌan ti kia, la kꞌuikjehe̱ chꞌan ti puerta. 11#Lc. 13:25.*Ndá chrꞌéxi̱n ikui inꞌó ti sin tjarisoá tsíkóyaxíenhña la tꞌinka sin puerta, ndáchro sin: “Ó ikjuini, Taki̱tjehé tsꞌixenheni.” 12Ndá jehe chꞌan kjuáte̱he chꞌan ndáchro chꞌan: “Chaxín ndáxrja̱n kixin chonhña ti jahara.”

13Ndá ndáchro chꞌin Jesús ínaá:

―Mé xi̱kaha jahara chrókꞌuejotsjehera kixin noahñara nkeña̱o la ko nkehora itsi ti Xje̱en Díos kꞌóna Chojni ―ichro chꞌan.

Kjuíncheyóe̱xin Jesús kuènté chichaon

14 # Lc. 19:11-27. *Ndá ndáchro chꞌin Jesús:

―Ti kjuachaxin kuènté Díos mé yóhe̱ éxi ijnko chojni sákjuí ikjín, la kꞌuéye̱he̱ chꞌan ti sin chꞌexín xra̱, la nkojnko sin chjéhe chꞌan chichaon kixin tsꞌayakohen sin.

15’Ijnko sin la kꞌuáyéhe̱ inꞌó mil chichaon, íjnko la kꞌuáyéhe̱ yaá mil, íjnko la kꞌuáyéhe̱ ijnko mil. Ti nkexro kjuajon ti chichaon la nohe nkexro ti tsjacha sichꞌe nkojnko ixra̱. Ndá ti ó kjuixin, la sákjuí chꞌan ikjín. 16A̱ndá ti nkexro kꞌuáyéhe̱ inꞌó mil chichaon la kjuíchꞌeko chꞌan ixra̱ ti chichaon kuákja chꞌan, la kjuacha chꞌan íjnko inꞌó mil. 17La kja̱xin ti nkexro kꞌuáyéhe̱ yaá mil chichaon la xíkjacha chꞌan í yaá mil. 18A̱ndá ti nkexro kꞌuáyéhe̱ ijnko mil chichaon la sákjuí la kjuíchꞌéna ijnko tòye̱ la kjua̱vá ti chichaon kuènté ti lamo.

19’A̱ndá kꞌuatsínka iso nánó ndá ikjan ti làmoé sin la kjuanchia kixin tsoxrentoá kuentá. 20Ndá ikjui sa̱o ti nkexro kꞌuáyéhe̱ inꞌó mil la kjuajon chꞌan íjnko inꞌó mil, la ndáchro chꞌan: “Jaha la chje̱héni inꞌó mil la jeheni kjuachani íjnko inꞌó mil. Tákjá, ntihi itjen ti kjuachani”, ichro chꞌan. 21Ndá ti lamo la ndáchro: “Ncho̱xon. Jaha la ijnko chojni jína ichꞌe ixra̱. La jína kjui̱nchexiteyá, kjónté jehya ixra̱ ijié. Méxra̱ tsotjahá ijnko ixra̱ a̱ntsí ijié. Ndá ijie la tjakꞌe tso̱chéhe̱ni.” 22Ndá chrꞌéxi̱n ikui ti nkexro kꞌuáyéhe̱ yaá mil la ndáchro chꞌan: “Jaha la kjuánjua yaá mil la kjuachani íjnko yaá mil. Tákjá, ntihi tjejó ti chichaon”, ichro chꞌan. 23Ndá ti lamo la ndáchro: “Ncho̱xon jaha la ijnko nkexro jína ichꞌe ixra̱ la ó kjui̱nchexiteyá, kjónté jehya ijnko ixra̱ imá jié. Méxra̱ ijie la tsotjahá íjnko ixra̱ a̱ntsí ijié. Tjakꞌe ntihi tso̱chéhe̱ni”, ichro chꞌan. 24A̱ndá ikui ti nkexro kꞌuáyéhe̱ ijnko mil la ndáchro chꞌan: “Ó noheni kixin jaha la ijnko chojni imá jie̱he la itja̱a ti nonte jahya tènka la ko tákjá ti nkehe jehya kuèntá. 25Méxra̱ jeheni la imá chrákoni la sákjuini la kjuakimáni ti chichaon chrínkí inche. Tákjá ti chi̱cha̱ko̱an tjihin”, ichro chꞌan. 26A̱ndá ti lamo kjuáte̱he, ndáchro: “Jaha la ijnko chojni jínahña tjenka̱yáxin la ko séhe. Ti noha kixin janhan la itja̱a ti nonte kꞌuénka̱hya la ko tákjá ti nkehe jehya kuénta̱na, 27la, ¿nkekuènté chrꞌaxénhña ijnko banco ti chichaon? Ntiha la chrókjuíchꞌexín ixra̱ la ti ó ikjan janhan la chrókꞌuayáha̱ íso ti chichaon chrókjuacha”, ichro ti lamo. 28Ndá ndáche chꞌan ti sin tjejó ntiha: “Takítsjehéra chꞌan ti mil chónta chꞌan la chje̱héra ti nkexro chónta ite mil, 29#Mt. 13:12; Mr. 4:25; Lc. 8:18.*kixin ti nkexro chónta itsjé la a̱ntsí tsꞌáyéhe̱, a̱ndá ti nkexro chóntahya ninkehó, la kjónté ti intsí chónta, la tsꞌaxrjehe. 30#Mt. 8:12; 22:13; Lc. 13:28.*Ndá ti nkexro chꞌehya ixra̱ í, la takítsjexinra ntihi, sátsji chꞌan ndója ti sítie la ntiha tsotsjánka chꞌan la ko sinietaón chꞌan ñeno chꞌan.”

Tsíto̱exín iji̱é kaín chojni chjasintajni

31 # Mt. 16:27; Mt. 19:28. *’Ti ó tsokjan ti Xje̱en Díos kꞌóna Chojni la tsi̱ka̱o chꞌan ijnko kjuachaxin ijié kixin imá tꞌe̱to̱an chꞌan la tsi̱ka̱o chꞌan kaín ti sin ángel kuènté chꞌan la tsjakꞌetja̱xi̱n chꞌan ti trono kuènté chꞌan. 32La kaín ti chojni tsi̱xi̱n kaín nación la tso̱chjina ti itjen chꞌan, la jehe chꞌan tsakítsjekjan chꞌan ijnko la íjnko chojni. Éxi ti nkexro tꞌayakohen kolélo takítsjekjan ti kolélo kixin ókjé tsꞌixin va, la ti kotèntso̱ la ókjé. 33Tsjasin chꞌan ti kolélo a ti itja chꞌan chjina, a̱ndá ti kotèntso̱ la ti itja chꞌan ikjon. 34Ndá ti Rey tsonixje̱he̱ ti nkexro tjejó ti itja chjina tsondáchro: “Xrákira jahara kixin Tꞌaná ó kjuíncheñao ti jahara, Tꞌayéhéra ti nonte kjuíchꞌéna Tꞌaná, ti na̱xa̱ kꞌónahña chjasintajni, 35kixin ikꞌuén kjinta la kjuájonra nkehe kjonié. Ikꞌuén ìnta̱ la kjuájonra ìnta̱ ikꞌuia, kꞌuájia éxi ijnko chojni kjui̱xi̱n ókjé la kjuájonra nketí ko̱kꞌánaxian. 36Kꞌuéchontahya ika la kjuájonra ika kꞌuítsa̱, kónína la kjuínki̱tsara ti janhan, ti kjuakꞌéchji̱na la kjuasántsjehéra.” 37A̱ndá ti sin jína la tsjanchankí sin: “Ìnchéni, ¿nkesá kꞌuíkoni kixin ikꞌuén kjinta ndá kjuajoni nkehe kjónté? ¿Xá nkesá kꞌuíkoni kixin ikꞌuén ìnta̱ ndá kjuajoni ìnta̱ ikꞌuia? 38O̱, ¿xá nkesá kꞌuíkoni kixin ókjé kjuíxian ndá kjuajoni nketí kokꞌáxián? ¿Xá nkesá kꞌuíkoni kixin chontahya iká la kjuajoni ika kꞌuítsa̱? 39O̱, ¿xá nkesá kꞌuíkoni kixin kóníha o̱ kjuakꞌéchji̱na ndá kjuíjitsjeheni?”, tsixro sin. 40A̱ndá ti Rey tsondáchro: “Ti ó kjuínki̱tsara ijnko kíchóni, kjónté ijnko chojni imá nóa, la éxi janhan kjuínki̱tsara xi̱kaha.”

41’A̱ndá tsjixin la ti Rey tꞌe̱to̱an mé tsonixje̱he̱ ti nkexro tjejó ti itja ikjon tsondáchro: “Sátjira jahara tsjasótiara ti siín xrohi nunca tsꞌankahya. Ti xrohi kjíchóhen tsochexín ti Jínahña la ko kaín ti ángel kuènté. 42Kixin ikꞌuén kjinta la kjuájonhñara nkehe kjonié, ikꞌuén ìnta̱ la kjuájonhñara ìnta̱ ikꞌuia. 43Kjuakꞌé éxi ijnko nkexro tsíkji̱xi̱n ókjé la kjuájonhñara nketí ko̱kꞌánaxian, kꞌuéchontahya ika tsꞌítsa̱ la kjuájonhñara ika, ti kónína la ko ti kjuakꞌéchji̱na la kjuasántsjehyara ti janhan.” 44Ndá jehe sin kja̱xin sin tsjanchankí sin: “Ìnchéni, ¿nkesá kꞌuíkoni ikꞌuén kjinta la o̱ ikꞌuén ìnta̱ la ko kjuixian ókjé o̱ chontahya iká la ko níha o̱ kjuakꞌéchji̱na ndá kjuínki̱tsahyani?”, tsixro sin. 45A̱ndá ti Rey la tsjate̱he tsondáchro: “Ti kjuínki̱tsahyara ijnko chojni nóa la éxi janhan kjuínki̱tsahyara xi̱kaha.” 46#Dn. 12:2.*Méxra̱ sátsjira tsjasótiara nkochríxín. A̱ndá ti chojni jína la tsꞌáyéhe̱ ti kjuachón nkochríxín ―mé xi̱kaha ichro chꞌin Jesús.

Currently Selected:

Mateo 25: poeNTplus

Highlight

Copy