Mateo 22
22
Jesús kjuíncheyóe̱xin ti kia kóte̱he̱ chojni
1Ndá chꞌin Jesús kjuankíxin nixja chꞌan ínaá la kjuíncheyóe̱xin chꞌan nkehe, ndáchro chꞌan:
2―Ti kjuachaxin kuènté Díos mé yóhe̱ éxi ijnko rey kjuasin ijnko kia kixin tso̱te̱he ti xje̱en. 3La kꞌue̱tue̱hen chꞌan ti sin chꞌexín ixra̱ kixin tsíkákjín sin ti sin kꞌuéyehe chꞌan, kjánchó jehe sin la tjinkakonhña sin tso̱chjina sin. 4Ndá xíkꞌe̱tue̱hen chꞌan íso ti sin chꞌexín xra̱, ndáchro chꞌan: “Chenkara ti sin kꞌue̱ya̱ha̱ kixin kaín ti nkehe sinieni la ó tjechóhen. Ó kuéto̱an ikꞌuén ti koxinta imá tsa̱nka̱ la kaín nkehe ó síchóhen. Méxra̱ chróxrakoa sin ti siín kia”, mé xi̱kaha ichro chꞌan. 5Kjánchó ti sin kꞌuéye̱he̱ chꞌan la ándo̱sén sin. Ijnko sin la sákjuí sin no̱nte̱e sin, íjnko sin la sákjuí sin íjnko ixra̱ chónta sin. 6A̱ndá íso sin la itsé sin ti sin kjuíjikꞌèya la kjuate sin hasta kꞌóñá sin. 7Ndá ti ó kuíhin ti rey xi̱kaha la imá kónínkaon chꞌan la kꞌue̱tue̱hen chꞌan ti soldado kuènté chꞌan kixin tsjikꞌóñá sin ti chojni kjuaya la ko tsjaka sin ti chjasén ti sin a. 8Ndá chrꞌéxi̱n kꞌuéye̱he̱ chꞌan ti sin chꞌexín xra̱ la kꞌue̱to̱an chꞌan ínaá, ndáchro chꞌan: “Kaín nkehe la ó síchóhen kixin ti nkexro tso̱te̱he, la kaín ti sin kꞌue̱ya̱ha̱ la kuítekakonhña sin la kjuihya sin. 9Méxra̱ sátjira ti nti̱a ijié la tꞌéye̱héra kaín ti nkexro tsoxétara kixin itsji sin ti kia”, ichro chꞌan. 10Mé xi̱kaha ti sin chꞌexín xra̱ la sákjuí sin la kꞌuéye̱he̱ sin kaín ti nkexro tꞌatsínka nti̱a, chojni jína la ko chojni jínahña la kaón ti nchia siín kia.
11’A̱ndá ti ó kꞌuíxehen ti rey kixin tsochóxin chꞌan kaín ti nkexro kjuíji ti kia la kꞌuíkon chꞌan kixin ijnko ti nkexro itjen ntiha la chóntahya ti ika jína kuènté kia. 12A̱ndá nixje̱he̱ chꞌan, ndáchro chꞌan: “Jaha, ¿nkexrín kꞌuixe̱hén ti kia i, ti tsíkꞌítsa̱hya ti ika kuènté kia?”, ichro chꞌan. Ndá ti nkexro a la kjuáte̱hya ninkehó. 13#Mt. 8:12; 25:30; Lc. 13:28.*A̱ndá ti rey la kꞌuéye̱he̱ ti sin chꞌexín xra̱ la ndáche chꞌan sin: “Nchentetora to̱té chꞌan la ko itja chꞌan la itéra chꞌan ndója ti sítie, ti tsotsjánka chojni la ko sinietaón chojni ñeno.”
14Ndá ndáchro chꞌin Jesús:
―Nchónhña chojni kꞌue̱ya̱ha̱, kjánchó tsjéhya ti chojni tóchjinehe ti janhan ―ichro chꞌin Jesús.
Kuènté ti nkehe tsje̱nke̱he sin gobierno
(Mr. 12:13-17; Lc. 20:20-26)
15Ndá ti sin fariseo mé sákjuí sin ókjé la nkoko̱a kjuénka̱yáxin sin nkexrín tsja̱cha̱xi̱n sin ti chꞌin Jesús kixin áchꞌe ichrén nkehe nduáhya tsonixja chꞌan ndá tsjanchia sin ijie̱. 16Ndá ichrꞌán sin iso ti sin chꞌexín ixra̱ la ko iso ti sin chꞌehe ixra̱ ti chꞌin Herodes la nixje̱he̱ sin ti chꞌin Jesús, ndáchro sin:
―Maestro, noheni kixin ti nkehe ndáchrua la chaxín, la ko ndoá tjàkua ti nti̱e Díos, la jehya tsjejia nkexrín tjenka̱yáxin chojni kixin á jína sin o̱ náhí. 17Chro̱nka nkehe tjénka̱yáxian. ¿Á jína chrókjue̱nke̱heni ti gobierno romano ní, o̱ náhí? ―ichro sin kjuanchankí sin.
18Ndá chꞌin Jesús ó nohe chꞌan kixin nkojinxónhña tjenka̱yáxin sin, la ndáchro chꞌan:
―Jahara nduáhya tjénka̱yáxinra. ¿Nkekuènté chrókjuácha̱xi̱nrani? 19Tjákora ijnko ti chichaon tjènka̱ra ―ichro chꞌin Jesús.
Ndá kjua̱ko̱he̱ sin chꞌin Jesús ti chichaon. 20Ndá chꞌin Jesús kjuanchankí, ndáchro:
―¿Nkexro tjenkáni ti chichaon i, la ko nkexro ihni̱é chónta? ―ichro chꞌan.
21Ndá jehe sin kjuáte̱he sin:
―Kuènté César ―ichro sin.
Ndá ndáchro chꞌin Jesús:
―Ti xi̱kaha la chje̱héra César ti nkehe kuènté, a̱ndá ti nkehe kuènté Díos la chje̱héra Díos ―ichro chꞌin Jesús.
22Ndá ti ó kuíhin sin xi̱kaha la chrákon sin la komá sin chꞌan, ndá sákjuí sin.
Kuènté ti tsoxechón chojni
(Mr. 12:18-27; Lc. 20:27-40)
23 #
Hch. 23:8. *A̱ndá ti ña̱o a, la kóchjina iso ti sin saduceo, jehe sin mé titekakonhña sin kixin tsoxechón ti chojni tsíkꞌen la xi̱kaha tjinkaon sin chrókjua̱cha̱xi̱n sin chꞌin Jesús la ndáchro sin:
24 #
Dt. 25:5. *―Maestro, tsíndáchro Moisés kixin ti itsꞌen ijnko chojni la na̱xa̱ itjen ti ichjién la tsíkꞌikonhña xjan, la ti kícho ti nkexro ikꞌuén mé tsákja ti tjan kꞌán, a̱ndá ti tsochónta sin ijnko ixjan mé tíha la tsꞌóna éxi xje̱en ti nkexro sa̱o ikꞌuén. 25Ndá ntihi kꞌuejó yato sin nkoko̱a kícho sin. La ti chꞌin sa̱o mé kóte̱he̱ chꞌan la ikꞌuén chꞌan. La kóchóntahya sin xjan landá ti tjan chjin mé kóte̱he̱ tjan ti chꞌin yaáxin. 26A̱ndá ti chꞌin yaáxin la kja̱xin ikꞌuén la ti chꞌin níixin a kuákja chꞌan ti tjan a, la xi̱kaha kóhen ínaá. La kaín ti yato sin a kóte̱he̱ ti tjan a, la kaín sin ikꞌuén sin. 27A̱ndá chrꞌéxi̱n la kja̱xin tjan ikꞌuén tjan. 28Ndá ti ó tsoxechón kaín ti chojni tsíkꞌen, ¿la nkexro tsꞌóna xìi tjan kixin kaín ti yato sin la kóte̱he̱ tjan? ―ichro sin kjuanchankí sin.
29Ndá kjuáte̱he chꞌin Jesús, ndáchro:
―Jahara la nduáhya tjénka̱yáxinra kixin noahñara nkehe ichro ti xroon itén Díos la ko chonhñara ti kjuachaxin kuènté Díos. 30Ti ó tsoxechón ti chojni tsíkꞌen la ninkexró í tso̱te̱ehya kixin kaín ti sin tsíkꞌen la tsꞌejó sin éxi ti sin ángel kuènté Díos itjen nkaya nka̱jní. 31Méxra̱ kaín ti chojni tsíkꞌen la tsoxechón, ¿á kjui̱nchekuáxinhñara ti nkehe ndáchro Díos ní? Kixin ntiha la ndáchro: 32#Ex. 3:6.*“Janhan mé ti Díos kuènté Abraham la ko Isaac la ko Jacob.” Ti Díos i, la jehya Díos kuènté chojni tsíkꞌen. Náhí. Ti Díos i, la Díos kuènté ti chojni tjejóchón ―ichro chꞌin Jesús.
33Ndá ti ó kuíhin sin nkexrín kjuako chꞌan la chrákon sin.
Ti nkehe imá tjetoan
(Mr. 12:28-34)
34Ndá ti sin fariseo ti ó kuíhin sin kixin ninkehó kjuáte̱hya ti sin saduceo ti kjuako chꞌin Jesús, la kónkotsé sin la sákjuichréhe̱ sin chꞌan. 35La ijnko ti sin tjako ley mé tjinkaon chꞌan chrókjua̱cha̱xi̱n chꞌan ti chꞌin Jesús la kjuanchankí chꞌan:
36―Maestro, ¿nkexéhe ti nkehe a̱ntsí tjetoan kuènté ti ley?
37 #
Dt. 6:5. *Ndá chꞌin Jesús ndáchro:
―“Chrotjue̱héra Ìnchéni Díos kaín a̱sánra la ko kaín kjuaxrexinkaon kuèntára.” 38Tíhi ti ley imá tjetoan la ko ti sa̱oxín kꞌue̱to̱an Díos. 39#Lv. 19:18.*A̱ndá ti yaáxin la tóyóhe̱ la ndáchro: “Chrotjue̱héra kichuara éxi tju̱éxinra a̱sánra.” 40#Lc. 10:25-28.*Yaá ti nkehe i mé a̱ntsí tjetoan kuènté ti ley tsíkꞌe̱to̱an Moisés la ko ti nkehe kjuako ti sin kꞌuéchronka itén Díos ósé.
¿Xá nkexro itꞌé ti Cristo?
(Mr. 12:35-37; Lc. 20:41-44)
41A̱ndá na̱xa̱ nkoko̱a tjejó ti sin fariseo 42la chꞌin Jesús kjuanchankí ndáchro:
―¿Nkehe tjénka̱yáxinra jahara? ¿Nkexro tsíkꞌaxrjeníxin ti Cristo?
Ndá jehe sin ndáchro sin:
―Ti Cristo la tsíkꞌaxrjeníxin ti chꞌin David.
43Ndá ndáchro chꞌin Jesús:
―¿Ndá nkexrín kixin Ncha̱kuén Díos chrónkaxín David kixin Ìnché chꞌan ti Cristo? Ndáchro chꞌin David xi̱kihi:
44 #
Sal. 110:1. *Ìnchéni Díos ndáche ti Ìnchéni:
“Tjakꞌétja̱xian ti tjaná chjina,
hasta tsjixin tsjachahya kaín ti sin nínkakohan la tsondáchro sin kixin jahuá tsꞌéto̱an.”
45A̱ndá David ndáchro kixin Ìnché chꞌan ti Cristo la, ¿xá nkexrín kixin ti Cristo la chrókꞌóna xje̱en chꞌan? ―ichro chꞌin Jesús.
46A̱ndá ninkexró kjuáte̱hya ti nkehe ndáchro chꞌan, ndá ndesi ti ña̱o a la chrákon sin la í ninkexró kjuanchankíhya ninkehó.
Currently Selected:
Mateo 22: poeNTplus
Highlight
Share
Copy
Want to have your highlights saved across all your devices? Sign up or sign in
© 2016, Wycliffe Bible Translators, Inc. All rights reserved.
