Lucas 11

Chꞌin Jesús tjako nkexrín tsonixje̱he̱ni Díos

(Mt. 6:9-15; 7:7-11)

1A̱ndá ijnko ña̱o chꞌin Jesús tjenixje̱he̱ Díos ijnko nketí. Ndá kjuixin la ijnko ti sin xriko chꞌan mé ndáchro:

―Ìnchéni, tjákohéni nkexrín tsonixje̱he̱ni Díos éxi chꞌin Juan kjua̱ko̱he̱ chꞌan ti sin kꞌuájiko chꞌan.

2Ndá chꞌin Jesús ndáchro:

―Ti ó tsonixjehéra Díos la ndáchrora:

Itꞌéni Díos itjen nkaya nka̱jní, jaha imá tjóá.

Chrokui ti kjuachaxin kuèntá.

Chrokjui̱chꞌe ti nkehe tóxrínhan ntihi chjasintajni éxi tjechꞌe nkaya nka̱jní.

3Tsjánjua ti nio̱tja̱ sinieni nkojnko ña̱o.

4La tꞌóxika ti nkehe jínahña kjuíchꞌeni kixin kja̱xini tsꞌitjáñeheni ti nkehe kjuíchꞌehe chojni ti jeheni.

Ti̱to̱éhyani kixin xra̱hya chrókjuasini ijie̱.

Nchekaáni kixin chrókꞌuenhñani nkojín nkehe jínahña.

5Kja̱xin ndáchro chꞌin Jesús:

―Ti nkojinra chontara ijnko chojni choxián, ndá ti itsjira ndo̱e ti nkexro a kꞌaxrotjen chróndáchera: “Kíchóni, nchekjeni iyꞌá nio̱tja̱ 6kixin na̱ntá ó kui ijnko chojni chóxini kui̱xi̱n ikjín la chóntahyani nkehe tsochjéheni chꞌan.” 7A̱ndá ti nkexro choxián itjen nkaxehen chrókjuate̱he, chróndáchro: “Chje̱éhyani ixra̱. Ti ndója ndo̱eni la ó tekjehe̱. La ti xje̱eni la tjejótꞌo̱kꞌékoni xjan, la xitjahya tsꞌayani tsotjáhani.” 8Chaxín ndáxrja̱n kixin kjónté tjinkakonhña chꞌan chrókꞌuaya chꞌan kjónté chóxin chꞌan, la kjá tsꞌaya chꞌan tsjajon chꞌan kaín nkehe tichánxi̱han kixin í tjinkakonhña chꞌan na̱xa̱ tsjakꞌekán nchia tsꞌèya. 9Méxra̱ ndáxrja̱n: Tjánchíára la Díos tso̱tjáhara; tjéyára la tsꞌitjára; tꞌinkara puerta la tsoxitje̱he̱. 10Kixin ti nkexro tjanchia la tsꞌáyéhe̱; la ko ti nkexro tjeyá la tsꞌitja; la ko ti nkexro tꞌínka puerta la tsoxitje̱he̱.

11’¿Xá nkojinra chontara ixjan ti chrókjuanchia xjan nio̱tja̱ la chrókjuájonra ijnko ixro̱ ní? O̱ ti chrókjuanchia xjan koche la, ¿chróchje̱héra xjan ijnko konche ní? 12O̱ ti chrókjuanchia xjan ko̱ja̱ la, ¿chrókjuájonra ijnko konchi̱a̱ ní? 13Kixin jahara kjónté chojni jínahñara la nohara tsochje̱héra xja̱anra nkehe jína, a̱ndá ti Itꞌéni itjen nkaya nka̱jní la nkexrín chrókjuajonhña chꞌan ti Ncha̱kuén chꞌan ti chrókjuanchiara.

Jesús chónta kjuachaxíen Jínahña, ichro sin

(Mt. 12:22-30; Mr. 3:19-27)

14Ndá chꞌin Jesús kuakitsje ijnko ncha̱kuén jínahña tsíkjinchenosín ijnko chojni. Ndá ti ó tsíkꞌaxrje ti ncha̱kuén jínahña la ti nkexro xitjahya nixja la jína nixja. Ndá kaín chojni chrákon sin kixin xi̱kaha tsíkjichꞌe chꞌin Jesús. 15#Mt. 9:34; 10:25.*Ndá nkojín ti sin kꞌuejó ntiha ndáchro:

―Ti nkexro a la takitsje ncha̱kuén jínahña kixin chónta kjuachaxin kuènté Beelzebú, ti nkexro tꞌe̱tue̱hen kaín ti jínahña ―ichro sin.

16 # Mt. 12:38; 16:1; Mr. 8:11. *A̱ndá iso sin tjinkaon sin chrókjua̱cha̱xi̱n sin chꞌin Jesús la kjuanchehe sin ijnko kjuaxroan kuènté nkaya nka̱jní. 17Kjánchó chꞌin Jesús ó nohe nkehe tjenka̱yáxin sin la ndáchro:

―Ti nkojín gobierno nkokónhña tjenka̱yáxin ndá tsjajo̱nko kícho la tsꞌitjáña ti kjuachaxin tsꞌe̱to̱anxín sin, la kja̱xin ti sin tjejó nkoko̱a nchia ti nkokónhña tsjenka̱yáxin sin, la kja̱xin séhya tsꞌejó sin nkoko̱a. 18A̱ndá ti Jínahña ti chrókjuajo̱nko kícho, ¿la nkexrín chróchónta kjuachaxin na̱xa̱ chrókꞌue̱to̱an kixin chrókꞌuaxrje ti ncha̱kuén jínahña? Ndá jahara ndáchrora kixin janhan takítsjexián ncha̱kuén jínahña kjuachaxíen Beelzebú. 19A̱ndá ti xi̱kaha la, ¿nkexro chjéhe kjuachaxin ti sin chréhe̱ ti jahara kixin tjacha sin takitsje sin ncha̱kuén jínahña? Jehe sin tja̱ko̱xi̱n sin kixin nduáhya tjénka̱yáxinra. 20A̱ndá ti kjuachaxíen Díos takítsjexián ti ncha̱kuén jínahña la tíha chrókónoaxinra kixin ti kjuachaxíen Díos mé ó ikui ti tjejora.

21’Ti ijnko chojni imá tse̱he̱ yámá chika tꞌayakohen ndo̱e, la ti nkehe chónta la tsꞌitjáñahña. 22A̱ndá ti itsi ijnko nkexro a̱ntsí tse̱he̱ ke ti nkexro a, la tsjajo̱nko ti ìnché ti nchia, ndá ti tsjacha la tsakítsjehe kaín ti chika yámá chꞌan la ko tsákja kaín ti nkehe siín ntiha. 23#Mr. 9:40.*Ti nkexro titekakonhña ti janhan mé nínkakona sin. A̱ndá ti nkexro tjinki̱tsahya ti janhan mé tꞌinkákonhe̱n ti ixra̱ itꞌa̱ ―ichro chꞌin Jesús.

Ti ncha̱kuén jínahña ikjan

(Mt. 12:43-45)

24Ndáchro chꞌin Jesús:

―A̱ndá ijnko ncha̱kuén jínahña tsíkꞌaxrjexín ijnko chojni la ixri ti nonte xámá xritjeyá nketí tso̱kꞌèxín. Ndá ti ó kꞌuitjahya nketí tso̱kꞌèxín la tjenka̱yáxin: “Tsokjan ndo̱na#11:24 ndo̱na mi casa kꞌuaxrjéxi̱a̱n.” 25Ndá ti ó ikjan la tꞌikon éxi ijnko nchia náxrjón tsjehe, tsíkótjóá. 26Ndá sákjuikakjín í yato ncha̱kuén jínahña a̱ntsí jínahña. Ndá kaín kꞌuíxehen a̱sén ti chojni a la a̱ntsí náxrjónhña kóhen ti nkexro a ke ti senó ―ichro chꞌin Jesús.

Ti kjuachéhe̱ chaxín

27Ndá chꞌin Jesús tjenixja chꞌan chronka chꞌan kaín tíha ndá ijnko chojnichjin tjenkákjan ti jehe sin la itsen nixja tjan, ndáchro tjan:

―Chéhe̱ ti nkexro kjuínchekokjíha la ko kjuíntakꞌánkía.

28Ndá chꞌin Jesús kjuáte̱he, ndáchro:

―A̱ntsí chéhe̱ ti nkexro tihin ti itén Díos la ko titekaon sin.

Tjanchia sin ijnko kjuaxroan

(Mt. 12:38-42; Mr. 8:12)

29 # Mt. 16:4; Mr. 8:12. *Ndá nchónhña chojni sítónkotsé ti itjen chꞌin Jesús ndá jehe chꞌan kjuankíxin nixja chꞌan, ndáchro chꞌan:

―Ti chojni siín ijie la jínahña sin; tjanchia sin kixin chrókjuásian ijnko kjuaxroan náxrjón, kjánchó tsjáko̱xi̱nhña nijnko kjuaxroan; jehó ti nkehe tsíkóhen Jonás, ti nkexro kꞌuéchronka itén Díos ósé. 30#Jon. 3:4.*Ndá éxi kóhen Jonás la kónoexín ti sin chjasin Nínive mé xi̱kaha tso̱hen ti Xje̱en Díos kꞌóna Chojni kixin tsꞌikon ti chojni siín ijie. 31#1Rs. 10:1-10; 2Cr. 9:1-12.*A̱ndá ti ña̱o tsito̱exín iji̱é chojni ti tjejó ijie, la ti tjan reina tsíkji̱xi̱n nó Sur mé tsꞌinkatjen tjan la tsjanchia tjan ijie̱ kixin tsjasóte sin. Kixin jehe tjan la ikjín kjui̱xi̱n tjan kuíhin tjan ti kjuaxrexinkaon jína nixja Salomón. A̱ndá ijie itjén janhan la a̱ntsí chonta kjuachaxin ke Salomón. 32#Jon. 3:5.*La ko ti sin chjasin Nínive kja̱xin tsꞌinkatjen sin ti ña̱o tsito̱exín iji̱é chojni, la tsjanchia sin ijie̱ tsondáchro sin kixin tsjasóte ti chojni tjejó ijie kixin ti sin chjasin Nínive la kuíto̱he sin ti iji̱é sin ti ó kuíhin sin ti itén Díos chrónka Jonás. A̱ndá ijie itjén janhan la a̱ntsí chonta kjuachaxin ke Jonás.

Ti xrohi tꞌinkaséñaxín cuerpoé chojni

(Mt. 5:15; 6:22-23)

33 # Mt. 5:15; Mr. 4:21; Lc. 8:16. *’Nijnko chojni chrókjuinchekꞌákjen ijnko xrohi ndá chrókjuaki̱ma la ko chrókjua̱kꞌe̱hya chrínkí ijnko ntacajón. Náhí. Noi chrókjuákꞌe ti xrohi kixin tsꞌikonxín chojni. 34Ti ikonra mé yóhe̱ éxi ijnko xrohi tꞌinkaséñaxín ti cuerpo kuèntára. A̱ndá ti jína ti ikonra la kuenté cuerpo kuèntára tsochónta xrohi. A̱ndá ti jínahña ti ikonra la kuenté cuerpo kuèntára la sítie tsjakꞌe. 35Chrokóxakohanra kixin jína chrókꞌuayakohénra ti xrohi chontara kixin chrókꞌuankahya la chrókꞌuixitiéhya ti tjejora. 36A̱ndá ti kuenté ti cuerpo kuèntára chróchónta xrohi la ko nítꞌo̱ chrókꞌuixitiéhya ndá chrókꞌuíkonra jína éxi chróchontara ijnko lámpara jína chꞌe ixra̱.

Chꞌin Jesús chrónka kixin nduáhya tjako ti sin fariseo la ko ti sin tjako ley

(Mt. 23:1-36; Mr. 12:38-40; Lc. 20:45-47)

37A̱ndá ti ó kjuixin nixja chꞌin Jesús, ndá ijnko fariseo chrónoéhe̱ chꞌin Jesús kixin sátsjiko chꞌan ndo̱e chꞌan sinie sin. A̱ndá ti ó kjuíji sin ntiha la kꞌuíxehen sin nchia, ndá kjuákꞌetja̱xi̱n chꞌin Jesús chjino ti itjen mesa. 38Ndá ti fariseo la chrákon kixin kꞌuíkon chꞌan kixin chꞌin Jesús kꞌóntihya itja ti ó sinie éxi kuehen sin ichꞌe sin, 39kjánchó Ìnchéni ndáchro:

―Jahara chojni fariseo tjo̱ni̱mára ndója ti vaso la ko ti plato. A̱ndá ti nkaxehen a̱sánra la síkaón kjuache̱e la ko kjuachji̱no̱xíhin. 40Jahara lo̱nti̱ra. ¿A noahñara kixin ti nkexro kjuíchꞌéna ti ndója la koí nkaxehen kjuíchꞌéna ní? 41Ti kaín a̱sánra chrókjui̱ncheki̱to̱nhénra ti chojni nóa ti nkehe chontara la kuentéra chrókótjóára.

42 # Lv. 27:30. *’Nóara jahara fariseo. Jahara chje̱héra Díos ijnko ite parte kaín ti kaxro̱a̱n tjiko nkehe inieni. Ndá tahyara kuentá ti nkehe jína chrókjui̱chꞌera la ko nkexrín chrótjue̱héra Díos. Jína chróchje̱héra Díos ti nkehe la ko chrókꞌuitjáñahñara chrókjuínki̱tsara kichuara.

43’Nóara jahara fariseo. Tjinkáonra tsꞌejotja̱xinra ti silla tjetoan nkaxehen ni̱nko la ko tjinkáonra kixin jína tsonixje̱he̱ chojni ti jahara ti ó tsoxétara sin nti̱a.

44’Nóara jahara maestro tjáko ti ley la ko jahara fariseo. Chꞌiyehé a̱sánra kixin tinkachónkira Díos. Kjánchó jahara la éxi ti tóye̱ tsíxravá chojni tsíkꞌen, tꞌikonhña chojni la tꞌatsínka sin nátaón la noehña sin kixin tsíxravá chojni ntiha.

45Ndá ijnko ti maestro tjako ley kjuáte̱he, ndáchro:

―Maestro, ti xi̱kaha ndáchrua la, ¿á kja̱xinhña jeheni tꞌándaxínhíni ní?

46Ndá ndáchro chꞌin Jesús:

―Kja̱xin nóara jahara tjákora ley. Tétue̱hénra chojni sichꞌe sin ijnko nkehe imá ixra̱ chrókjuachahya chojni chrókjuíchꞌe. A̱ndá jahara la nijnko ndedo nchekꞌinkihyara kixin chrókjuínki̱tsara sin.

47’Nóara jahara, chꞌénara tja̱tꞌo̱ chritaón ti tsíxravá ti sin kꞌuéchronka itén Díos ósé tsíkꞌóñá ti sin kꞌuaxrjeníxinra. 48Ndá xi̱kaha tjáko̱xinra kixin ncho̱xon ti nkehe tsíkjichꞌe ti sin kꞌuaxrjeníxinra kixin jehe sin kꞌóñá sin ti nkexro kꞌuéchronka itén Díos, a̱ndá jahara chꞌénara tja̱tꞌo̱ ti tsíxravá sin.

49’Mé xi̱kaha ti kjuaxrexinkaon jína chrónkaxín Díos: “Janhan tsochrꞌán chojni tsochronka ti itan kuénta̱na la ko tsochrꞌán chojni tsjikjako taná. A̱ndá ti chojni la tsꞌóñá nkojín ti nkexro a la ko tsochónkíhi sin ti íso sin, ichro Díos.” 50A̱ndá Díos mé tsjanchia ijie̱ ti chojni siín ijie kixin kꞌuitjí ijni̱é kaín ti sin kꞌuéchronka itén chꞌan ndesi ti xrankíxin kꞌóna chjasintajni, 51#Gn. 4:8; 2Cr. 24:20, 21.*ndesi ti kꞌuitjí ijni̱é Abel hasta ti kꞌóñá sin Zacarías, kꞌóñáxin sin chꞌan nko̱siñe ti itjen altar la ko ti ni̱nko. A̱ndá Díos mé sinchekjasóte chꞌan ti sin tjejó ijie kixin xi̱kaha kjuíchꞌe sin.

52’Nóara jahara maestro tjáko ti ley kixin tjinkákonhñara kixin íso chojni tso̱nohe sin ti nkehe chaxín la ni jahara tjinkákonhñara si̱nchexiteyára tíha la ko kja̱xin ti̱toéhyara kixin íso chojni chrókuitekaon sin ―ichro chꞌin Jesús.

53Ndá ti ó kjuixin nixja chꞌin Jesús kaín tíha, la ti sin tjako ley la ko ti sin fariseo mé imá kónínkaon sin ndá kjuankíxin kjuanchankíhi sin chꞌan nchónhña nkehe 54kixin chrókjua̱cha̱xi̱n sin chꞌan kixin áchꞌe nduáhya chrókjuate̱he chꞌan ndá chrókjuanchia sin ijie̱.

Currently Selected:

Lucas 11: poeNTplus

Highlight

Copy