San Lucas 10

Jesús ruaꞌan nii kan ko the chujni kuinchieꞌe

1Kuthimejan Jesús kuinchieꞌe nii kan ko the chujni, ko jeꞌe ruaꞌan yoo ko yoo na̱ ngain kain rajna thi jeꞌe rukji. 2Ko ndachro ngain na̱:

—Ndua thi rundathjo ra, anto tsjé xree Ndo Dio jii, aro ni ncheꞌe xra tsjéꞌa na̱. Mexinxin nchetseꞌen ra ñao Xi najni ruruaꞌan xa icha ni ncheꞌe xra ixin sincheꞌe xree xa. 3Thji ra jai jaꞌa ra ko xraxaon ra ixin jaꞌan ruaꞌan ra inchin kuleko ngayee kundanixra. 4Thjioꞌa ra thi tamanxin ni, thi dingachjian tumi ko kathe. Ko tadinthengathjenꞌa ra ngatja nthiꞌá ixin sajon ra juajna ngain chujni. 5Ko are saso ra ngain kexeꞌo nchia, saꞌo dajon ra juajna ko ndachro ra: “Chrjuin tsunuꞌe ngain ansean ra xro te ra ngain nchia jiꞌi.” 6Ko ja̱ ngain nchia mee jii chujni jian, chujni mee tekininxin na̱ sayée na̱ thi chrjuin jaꞌa ra sajon ra ngain na̱, aro ja̱ naꞌi thi chrjuin mee sarukjan ngajin ra. 7Ko ngain nchia mee dithuꞌa ra ko nthi̱ꞌa̱ jinthe ra ko diꞌi ra thi ruchjaa ra na̱. Ixin thi ncheꞌe xra jikininxin ruxengeꞌe ꞌna. Ko dithuaꞌa ra ngain jejee nchia. 8Are saso ra ngain naa rajna thi jaan sayáꞌa ra na̱, jinthe ra thi ruchjaa ra na̱, 9ko nchexrueꞌen ra chujni niꞌi te nthi̱ꞌa̱, ko ndache ra na̱: “Thi thetuꞌan Ndo Dio ujuii ngajin ra.” 10Aro ja̱ saso ra ngain naa rajna thi ruchroꞌa chujni sayáꞌa ra na̱, jaꞌa ra dachrje ra ngaa nthiꞌá ko ndachro ra: 11“Kain ncheꞌe rajnaa ra tse kathena ná, tsuntsjenga ná ixin yaa ruchro ixin jaꞌa ra bithikaonꞌa ra juajna bikiaꞌan ra. Aro xraxaon ra ixin thi thetuꞌan Ndo Dio uchiaon juii ngajin ra.” 12Jaꞌan ndua rindathjo ra ixin are Ndo Dio sincheꞌe jie̱ ngain kain chujni, icha sujiꞌa jie̱ suꞌen rajna Sodoma ke thi rajna juinaoꞌa bayée thi juajna kjuiꞌo ra.

Rajna bithikaonꞌa

(Mt. 11:20-24)

13’¡Anto tangi tsuꞌan ra jaꞌa ra chujni rajna Corazín! ¡Ko anto tangi tsuꞌan jaꞌa ra chujni rajna Betsaida! Ja̱ kain thi bikon ra binthaꞌa ngajin ra, runthaꞌa ngayee chujni rajna Tiro ko Sidón, nduaxin chujni mee usee rukinthuꞌe na̱ thi jianꞌa ncheꞌe na̱. Ko runthengaa na̱ luntho thie ko rukjataꞌa na̱ ntheeso giꞌi ngataꞌa jaa na̱ ko jañaa rukjaguxin na̱ ixin ukuinthuꞌe na̱ thi jianꞌa bancheꞌe na̱. 14Mexinxin are Ndo Dio sincheꞌe jie̱ ngain kain chujni, icha sujiꞌa jie̱ sueꞌen rajna Tiro ko Sidón ke jaꞌa ra. 15Ko jaꞌa ra rajna Capernaum, ¿Axraxaon ra jaꞌa ra tsji ra ngajni? Naꞌi, jeꞌa jamee ixin jaꞌa ra tsji ra ngain xruꞌi dangaꞌa.

16Jesús xra ndachro ngain chujni kuinchieꞌe:

—Thi chujni tsiꞌin thi rundachro ra, kai tsinna na̱ jaꞌan. Ko thi sithikaonꞌa ra jaꞌa ra, chujni mee kai jaꞌan sithikaonꞌa na. Ko thi chujni sithikaonꞌa na̱, kai dithikaonꞌa na̱ ngain thi ruaꞌan na.

Kjan thi nii kan ko the chujni

17Are kjan thi nii kan ko the chujni, anto chee na̱ ko ndachro na̱:

—Kain espíritu jianꞌa bithikaon ko bincheꞌe thi ndachrjan ná are nichja ná kunixin juachaxian suixin.

18Ko Jesús ndachro ngain na̱:

—Jaan, jaꞌan bikon kexreen betsingaxin nchiijin ngajni inchin naa xruꞌi are tungiixin. 19Jaꞌan chjaꞌa ra juachaxin tsingachje ra kunchee ko kunthanchia ko tsixiꞌan ra ngain thi jianꞌa, ko xruꞌin tsuꞌan ra. 20Jaꞌa ra tunuaꞌa ra chrjuin ixin espíritu jianꞌa dithikaon ra, icha jian chaꞌa ra ixin ngajni ubinthetaxin ra.

Ndudaꞌa ko Xeꞌen ndo

(Mt. 11:25-27; 13:16-17)

21Are mee, Jesús anto chee ko jikaon kunixin Espíritu Santo ko ndachro:

—Suixin Ndudana ko jaꞌan nthasayaꞌa, ixin Suixin thetuꞌan nunthe ko ngajni, ko jiꞌi kuemeꞌe kain ni anto nuꞌe ko ni anto thinxin ko kjuaguꞌe ni kjan xraa naa xan nchinchjan. Jaan, ixin jañaa binao Suixin.

22’Ndudana chjana kain thi jii. Ko xruꞌin chujni nuꞌe kensen na jaꞌan, jeꞌo Ndudana chunxin na jian, ko xruꞌin kensen chunxin jeꞌe ndo, jeꞌo jaꞌan thi chunxin ndo ko thi ni jaꞌan rinaꞌo sinthagatsuan ndo.

23Kuthimejan Jesús tsjeꞌe ngain chujni bakao ko ndachro ngain na̱:

—Anto chrjuin ixin thi chujni tedikon thi jaꞌa ra tedikon ra jai, 24ixin jaꞌan ndathjo ra ixin tsjé ni bagayee juajnee Ndo Dio ko ni baketuꞌan binao na̱ rugikon na̱ thi jaꞌa ra tedikon ra, aro bikonꞌa na̱ ko rukiꞌin na̱ thi jaꞌa ra tethiꞌin ra jai, aro kuinꞌa na̱.

Naa thi samaritano anto jian

25Kuthimejan naa xi tjaago ley kjui xa bitsjeꞌe xa Jesús ko bikjexin ixin runchenichja Jesús naa thi jianꞌa ko ndachro xa:

—Suixin ke tjaago, ¿keꞌe sinthaꞌa ixin sayaa thi sarichunxin kainxin nchaꞌon?

26Jesús ndachro ngain xa:

—¿Keꞌe jitaxin ley bayée Moisés? ¿Keꞌe thinxin?

27Ko xi tjaago ley ndachro:

—Ngain ley mee jindachro: “Thjueꞌe Ndo Dio kunixin ansean, kunixin kain thi tsanga tunuꞌa, kunixin nguii juaxraxauan, ko thjueꞌe icha chujni inchin thjueꞌe nthauꞌa.”

28Kuthimejan Jesús ndachro ngain xa:

—Atho nchao jii thi jaꞌa ndachro. Ja̱ sincheꞌe kain yaa, jaan sayéꞌe kain thi sarichunxin kainxin nchaꞌon.

29Aro xi tjaago ley binao xa rugithuꞌe xa jian ngathexin kon Jesús ixin thi ndachro xa, mexinxin kjan banchiangi xa ngain Jesús:

—Aro, ¿kensen mee, thi ruthjuaa inchin thjuaa nthauꞌna?

30Kuthimejan ndachro Jesús ngain xa:

—Naa xii juixin Jerusalén ko sajithji rajna Jericó, ko ngatja nthiꞌá kayakuen kanxion xi cheꞌe, ko kueꞌe xa kain thi jidikao ko bantsjeꞌe xa lunthue ko bintja xa ko nthi̱ꞌa̱ banka xa xraa thi undadigeꞌen ko sabinthekji xa. 31Ko xrajeꞌo nthiꞌá jithixin naa xi daana ko are bikon xa thi xii jitsinga nthi̱ꞌa̱, jeꞌe xa batho xa nao. 32Kai xrajeꞌo nthiꞌá jithixin naa chujnii Leví. Ko are jeꞌe bikon thi xii jitsinga nthi̱ꞌa̱, kai batho xa nao. 33Aro kai nthi̱ꞌa̱ batho naa xi samaritano, ko are bikon xa thi xii jitsinga nthi̱ꞌa̱, jeꞌe xa kuiakunueꞌe xa. 34Ko kunchieꞌen xa ngaka xii mee, ko binchexrueꞌen xa kain thi dikuniꞌi nthauꞌe xa kunixin vino ko aceite ko kuensia xa jian. Kuthimejan binchetaꞌa xa kuluchuꞌe xa ko sabikao xa ngain naa nchia dithuꞌe ni kjin, ko nthi̱ꞌa̱ jeꞌe xa bakuꞌen xa thi niꞌi. 35Ko nduexin are jeꞌe xii mee sakjui xa, bantsje xa yoo tumi anto renthe ko bajon xa tumi ngain thi nchianduꞌa, ko ndachro xa: “Dakuꞌen xii jiꞌi, ko ja̱ sinchexiꞌin icha tumi ixin jeꞌe xa, jaꞌan tsjengaꞌa ꞌna are rukjan na.” 36Mexinxin ndachjejin na jaꞌa, ko ndachro, ¿kexeꞌe thi xii kjuaago ixin thjueꞌe thi xii kueꞌe na̱ ko bikaon?

37Xi tjaago ley ndachro:

—Thi xii kuiakunueꞌe thi kueꞌe na̱ ko bincheniꞌi na̱.

Kuthimejan Jesús ndachro ngain xa:

—Jaꞌa kai thji ko ncheꞌe jamee.

Jesús bitsjeꞌe Marta ko María

38Jesús ruee nthiee ko biji ngain naa rajna nchiin, ko nthi̱ꞌa̱ beꞌe naa nchrii biꞌin Marta ko bajon nchra nchianduꞌa nchra thi bithuꞌe Jesús. 39Jeꞌe Marta bechunda naa xan choo biꞌin María, ko jeꞌe María tabeꞌe chrika ruthee Jesús ixin kuiꞌin thi jinichja Jesús. 40Aro Marta anto jita juachjaon ixin juinao xraa urukjekua xree, ko kunchieꞌen ngain Jesús ko ndachro:

—Nchana, ¿aditsjeꞌa ixin xan chian jitajandana xan rinthaꞌa kain? ¡Dindache xan tsjengijna na xan!

41Aro Jesús ndachro:

—Marta, Marta, jaꞌa anto ta juachjaon ixin kain yaa, 42aro nakua thi rugunda sincheꞌe ni, ko María ukuinchieꞌe thi icha jian, ko xruꞌin chujni santsjeꞌe thi ukuinchieꞌe.

Currently Selected:

San Lucas 10: plsNT

Highlight

Copy