San Juan 20

Xechon Jesús

(Mt. 28:1-10; Mr. 16:1-8; Lc. 24:1-12)

1Ngain nchaꞌon domingo, are nduuyo ko xra naxion xeꞌe, María Magdalena kjui ngain chinthi thi xrabaa Jesús, ko bikon ixin ikoꞌa xro bejee chinthi mee. 2Kuthimejan kuinga kjui thi beꞌe Simón Pedro ko ngain inaa ni bakao Jesús, thi anto bathjueꞌe, ko ndachro ngain na̱:

—Sadikao na̱ Jesús ko ikoꞌa ngain chinthi, ko nuaꞌa ná thinoo bakeꞌe na̱.

3Ko Simón Pedro ko thi anto bathjueꞌe Jesús, binthegachrje na̱ ko kjui na̱ ngain chinthi. 4Ko kayui na̱ tethinga na̱, aro jeꞌe icha kuinga ke Pedro, ko mee thi icha saꞌo biji ngain chinthi. 5Ko are bisee ixin chunxiꞌin, bikon jeꞌo manta tate nthi̱ꞌa̱, aro bixinꞌa. 6Ko tuenxion biji Simón Pedro, ko bixiꞌin ngain chinthi ko bikon jeꞌo manta tate nthi̱ꞌa̱. 7Ko manta besia jaa Jesús, ibeꞌa manta ngain manta icha ixin jixea manta ko ujee tajii manta. 8Kuthimejan bixiꞌin thi anto bathjueꞌe Jesús, thi biji icha saꞌo ngain chinthi, ko are bikon, jeꞌe bithikaon. 9Ko jeꞌe na̱ xra kuinxinꞌa na̱ thi jitaxin ngain Xruen Ndo Dio, ixin Jesús rugunda ruxechon ngayee ni ndadigeꞌen. 10Kuthimejan kayui ni teꞌi sakjui na̱ nchianduꞌa na̱.

Jesús xraago ngain María Magdalena

(Mr. 16:9-11)

11Aro María ndabithuꞌe nduja ngaka chinthi ko jitsjanga. Ko are bisee ixin chunxiꞌin thi jii chinthi, 12bikon yoo ángel tengaa luntho rua ko tate ngataꞌa thi bakeꞌe na̱ Jesús, naa tajii thi beꞌe jaa Jesús ko inaa thi beꞌe ruthee. 13Ko kayui ángel teꞌi banchiangiꞌi María ko ndachro:

—Jaꞌa, ¿unda ritsjanga?

Ko María ndachro ngain ángel:

—Ixin sabikao na̱ Nchana ko nunaꞌa thinoo bakeꞌe na̱.

14Are juexin ndachro jiꞌi, bathunua ko bikon Jesús ixin nthi̱ꞌa̱ tajii, aro benueꞌa ixin a jaan Jesús. 15Kuthimejan Jesús banchiangiꞌi:

—¿Unda ritsjanga? ¿Kensen rithjee?

Ko María xraxaon ixin xii jiꞌi xi jinda ntha thuchjuin ko ndachro ngain:

—Ja̱ suixin sakjuiꞌo Jesús thi beꞌe nthiꞌi, ndachjejin na thinoo kuinthuꞌe ixin jaꞌan siruaa ko satsjiꞌan.

16Kuthimejan ndachro Jesús:

—¡María!

Ko María kjan ko ndachro kunixin ngigua hebreo:

—¡Raboni!

Ko raboni ruchro, Xi tjaago.

17Jesús ndachro:

—Katheꞌa na ixin xra tajinꞌa thi jii Ndudana, aro thji thi te xan chian ko chjeꞌe xan juajnana ixin jaꞌan tsajiin thi thjen Ndudana ko Ndudaa ra kai, thi Ndo Diona ko Ndo Dioa ra kai.

18Kuthimejan María Magdalena kjui bindachro thi jian juajna ngain chujni bakao Jesús ixin María bikon Jesús. Ko Jesús kuetuꞌen María ixin rundachro jiꞌi ngain na̱.

Jesús xraago ngain chujni bakao

(Mt. 28:16-20; Mr. 16:14-18; Lc. 24:36-49)

19Ko xrajeꞌo nchaꞌon domingo, are uthie, chujni bakao Jesús tate na̱ ngain naa nchia ko jian dikejee na̱ nchia ixin baxraguen na̱ chujni judío. Ko nthi̱ꞌa̱ kununxin Jesús ngayee na̱, ko ndachro:

—Thi chrjuin tunuꞌe anseen ni seꞌe ngajin ra.

20Ko are jindachro jiꞌi, jeꞌe kjuague na̱ raa ko ntha nthakuin thi kuniꞌi. Ko jeꞌe na̱ chee na̱ ixin bikon na̱ Jesús inaa. 21Kuthimejan Jesús kjan ndachro ngain na̱:

—Thi chrjuin tunuꞌe ngain anseen ni seꞌe ngajin ra. Ko jañaa inchin ruaꞌan na Ndudana, ruruaꞌan ra kai.

22Kuthimejan Jesús banuthetaon na̱ ko ndachro ngain na̱:

—Dayeꞌe ra Espíritu Santo. 23Thi chujni jaꞌa ra sinchetjañeꞌe ra thi jianꞌa bincheꞌe na̱, jaan sitjañeꞌe na̱, ko thi chujni sinchetjañeꞌa ra, chujni mee sitjañeꞌa na̱ thi jianꞌa bincheꞌe na̱.

Jesús kununxin ngain Tomás

24Tomás naa thi theyoo chujni bakao Jesús, thi kai banchegiꞌin na̱ xan Kuata, ko jeꞌe beꞌa ngain na̱ are kununxin Jesús. 25Kuthejan ni binthe nthi̱ꞌa̱, ni bakao Jesús ndachro na̱ ngain Tomás:

—Jaꞌan ná bikon ná Jesús.

Aro Tomás ndachro ngain na̱:

—Ja̱ sikonꞌa ngaa raa thi xrandoꞌo na̱ chia ko ja̱ ruxranxinꞌa kon rana thi bidoꞌo chia ko ngain ntha nthakuin thi kuniꞌi, jaꞌan chroꞌa sithikaꞌon.

26Batho jni nchaꞌon kuthimejan kain chujni bakao Jesús kjan na̱ ngain nchia inaa, ko nthi̱ꞌa̱ beꞌe Tomás ngain na̱ kai. Ko maski kain thi bixinxin na̱ nchia jian tatejee, Jesús biji ko tabeꞌe ngayee na̱ ko bajon juajna ngain na̱ ko ndachro:

—Thi chrjuin tunuꞌe ngain anseen ni seꞌe ngajin ra.

27Kuthimejan Jesús ndachro ngain Tomás:

—Tsjeꞌe rana ko ntha nthakuin na, ko xranxiꞌin kon raa thi kuniꞌi, ko ixraxaonꞌa ixin nduaꞌa thi ridikon, icha jian dithikaon.

28Kuthimejan Tomás ndachro:

—¡Suixin thi Nchana ko Ndo Diona!

29Ko Jesús ndachro:

—Tomás, ¿audithikaon ixin ubikon na? Ndo Dio sinchenchaon chujni bikonꞌa na ko dithikaon na na̱.

Thi binao kjuaago Juan ngain xroon jiꞌi

30Jesús bincheꞌe anto tsjé thi naꞌa bagikunxin chujni, ngathexin kon ni bagakao, aro kainxinꞌa jitaxin ngain xroon jiꞌi. 31Aro kain jiꞌi betaxin ixin sithikaon ra ixin Jesús mee thi Cristo, thi Xeꞌen Ndo Dio, ko are sithikaon ra rukjan ra inaa chujni narua ko xruꞌin nchaꞌon tsjexin ixin juachaxiin jeꞌe.

Currently Selected:

San Juan 20: plsNT

Highlight

Copy