Génesis 46

Jacob, kai biꞌin Israel, jeꞌe ko chujnii biji na̱ Egipto

1Israel, ndudee José, bachrjexin Canaán kunixin kain chujnii ko kain thi chunda. Ko are biji Beerseba, binchendusen kuxiigo ixin binchesayexin Ndo Diue Isaac, thi kjui ndudee. 2Thi̱e mee Ndo Dio bayee Israel ngathe kuthachrin ko ndachro:

—Jacob, Jacob.

Ko jeꞌe batheꞌe:

—Nthiꞌi riꞌi.

3Kuthimejan Ndo Dio ndachro:

—Jaꞌan Dio na, Diue ndudaa. Xraonꞌa ixin tsji Egipto ixin nthiꞌa sinthatsjé chujni sachrjeninxin jaꞌa ko sinthakjan na̱ naa rajna anto jié. 4Jaꞌan tsji ngajin ngain nunthe Egipto, ko jaꞌan sinthakjan chujni sachrjeninxin jaꞌa ngain nunthe Canaán. Jaꞌa senxin ngain nunthe Egipto ko José seꞌe ngajin ko tsejee makon.

5Ko Jacob sakjuixin Beerseba, ko xeꞌen binchekani xan ngain ntha thingajin kunxin, kai chriꞌi xan ko kai xan nchinchinchjeꞌen xan, ngain ntha thingajin kunxin ruaꞌan faraón ixin rukjixin na̱ Egipto. 6Ko Jacob ko kain chujnii sakjui na̱ Egipto ko sabikao na̱ kuxintheꞌe na̱, kulekue na̱ ko kain thi bechunda na̱ nthiꞌa Canaán. 7Ko kain xeꞌen ko kain xanthii sakjui xan ngain jeꞌe.

8Jaꞌin biꞌin xeꞌen Israel, xan sabikao Egipto:

Rubén, xan saꞌo, xan binchekunkjiꞌi Lea. 9Kain xeꞌen Rubén kjui: Xan Hanoc, Falú, Hezrón ko Carmi.

10Ko kain xeꞌen Simeón kjui: Xan Jemuel, Jamín, Ohad, Jaquín, Zohar, ko Saúl thi kjui xeꞌen nchri cananea.

11Ko kain xeꞌen Leví kjui: Xan Gersón, Coat ko Merari.

12Ko kain xeꞌen Judá kjui: Xan Er, Onán, Sela, Fares ko Zara; (aro xan Er ko xan Onán ndabinthegeꞌen xan nthiꞌa Canaán). Ko xeꞌen Fares kjui Hezrón ko Hamul. 13Ko kain xeꞌen Isacar kjui: Xan Tola, Fúa, Job ko Simrón. 14Ko xeꞌen Zabulón kjui: Xan Sered, Elón ko Jahleel.

15Kain chjan teꞌi bechunda Lea ngain Jacob are binthe na̱ Padan-aram, ko kai xan Dina. Ko kan ko thenii chujni bachrjeninxin Jacob ko Lea, xan xii ko xan nchrii. 16Ko xeꞌen Gad kjui: Xan Zifión, Hagui, Ezbón, Suni, Eri, Arodi ko Areli. 17Ko xeꞌen Aser kjui: Xan Imna, Isúa, Isúi, Bería, ko Sera nchri choo xan. Ko xeꞌen Bería kjui; xan Heber ko Malquiel. 18Kain chjan teꞌi bachrjeninxin Jacob ko Zilpa, nchri ncheꞌe xra bajon Labán ngain Lea. Ko kain chujni bachrjeninxin ni teꞌi kjui theinkjaon chujni.

19Ko xeꞌen Raquel, thi kjui chriꞌi Jacob, kjui: Xan José ko Benjamín. 20Ko guan yoo xeꞌen José ngain nunthe Egipto, xan Manasés ko xan Efraín xan binchekunkjiꞌi Asenat, ko ndudee Asenat kjui Potifera xi danee rajna On. 21Ko xeꞌen Benjamín kjui xan Bela, Bequer, Asbel, Gera, Naamán, Ehi, Ros, Mupim, Hupim ko Ard. 22Ko xan teꞌi xan bachrjeninxin Raquel ko Jacob, thi thenoo chujni bachrjeninxin na̱.

23Ko xeꞌen Dan kjui: xan Husim. 24Ko xeꞌen Neftalí kjui: Xan Jahzeel, Guni, Jezer ko Silem. 25Ko xan teꞌi bachrjeninxin Bilha ko Jacob, ko Bilha kjui nchri ncheꞌe xra bajon Labán ngain Raquel, ko yaato chujni bachrjeninxin ni teꞌi.

26Ko kain chujni teꞌi bijikao Jacob ngain nunthe Egipto, thi chujni bachrjeninxin jeꞌe ko bikinꞌa nchri deindeꞌe, ko binthekji nii kan ko inkjaon chujni. 27Ko kai bikin Jacob ko José ko kayui xeꞌen José, xan bintheguanxin Egipto, ko kain chujnii Jacob bintheji Egipto, kjui nii kan ko the na̱.

28Ko are uchiaon rugiji na̱, Jacob binchetaon nthiꞌá Judá ixin rugetan José ko ruganchiangiꞌi kexeꞌe nthiꞌá thji Gosén. Ko are biji na̱, 29José kuetuꞌan ruxrangiꞌi na̱ kunxin ngain ntha thingajin ba ixin bichuꞌen ndudee ngatja nthiꞌá. Ko are José bikon ndudee, kuinga bikjua ndo, ko see tsjanga ngataꞌa nthachaan ndudee. 30Ko Israel ndachro ngain José:

—Jaꞌan ubikon ko nuna ixin richon, ¡ko jai unchao ndaseꞌen na!

31Kuthimejan José ndache xan choo ko kain ni nchianduꞌe ndudee:

—Tsji sitsjaa faraón ixin sinthanua, ko rundathjan ixin xan chian ko kain ni nchianduꞌa ndudana binthe nunthe Canaán juii na̱ ixin bigithuꞌe na̱ ngajin na. 32Ko rundathjan ixin thi thingaria ra kuxiigo yaa xraa ra, mexinxin bikoo ra kuleko, kuxinthaa ko kain thi techunda ra. 33Ko are sayaꞌa ra faraón ko sanchiangiꞌa ra keꞌe xra ncheꞌe ra, 34jaꞌa ra ndache ra ixin juxon kuleko nchiangi ra xraa ni xranchrjeꞌan ra. Ko jañaa nchao sithuꞌa ra ngain nunthe Gosén ixin ni egipcio nchexruxinꞌa na̱ ni thingaria kuleko.

Currently Selected:

Génesis 46: plsNT

Highlight

Copy