Génesis 11

Naa nchia anto nui ixin rugijixin na̱ ngajni

1Ko are mee nguixin nunthe banichja na̱ nakua ngiigua, 2ko are bachrjexin na̱ nunthe jii nu thi chrinxin nchaꞌon, bithja na̱ naa chjaaga ngain nunthe Sinar ko nthiꞌa tabinthe na̱. 3Ko ndache choo na̱: «Nthuchjian ná xro nche ko nthuchján ná xro.» Ko bundeꞌe na̱ xro nunthechján ko ibundeꞌa na̱ xro, ko bundeꞌe na̱ chingo saruthe ixin binchetsexinxin na̱ xro nunthechján. 4Kuthejan ndachro na̱: «Nthuchjian ná naa rajna, ko naa nchia anto nui siji ngajni. Ko jaꞌin ruchunxinxin ná na̱ ko jañaa ruchjekaꞌa ná nguixin ngataꞌa nunthe.»

5Ko Ndo Dio xinkajin Ndo ixin tsjeꞌe Ndo rajna ko nchia anto nui tenchechjian na̱. 6Ko ndachro Ndo: «Chujni teꞌi xrajeꞌo xraxaon na̱ ko xrajeꞌo nichja na̱. Mexinxin kuexiꞌin na̱ xra jiꞌi, ko jai ixruꞌin kensen rukayakuen na̱ ixin thi texraxaon na̱ sincheꞌe na̱. 7Mexinxin ruxinkajin ná ko nthutjajin ná na̱ kunixin tsjé ngiigua ixin jañaa itsinxinꞌa choo na̱.»

8Jañaa Ndo Dio kunchjekee na̱ nguixin ngataꞌa nunthe, ko ibinchechjianꞌa na̱ rajna. 9Mexinxin rajna mee biꞌin Babel ixin nthiꞌa Nchaa ná binchetjajin na̱ kunixin tsjé ngiigua, ko jañaa chjekee na̱ nguixin ngataꞌa nunthe.

Ni bachrjeninxin Sem

(1 Cr. 1:24-27)

10Nthiꞌi jitaxin ni bachrjeninxin Sem. Ko ubatho yoo nano are juii chrin suji binchetjaan chujni, Sem bechunda naa renkia nano are guan xeꞌen, xan Arfaxad. 11Sem xra bechon naꞌo renkia nano, kai bechunda icha xeꞌen xan xii ko xan nchrii.

12Arfaxad bechunda kan ko thenaꞌo nano are guan xeꞌen, xan Sala. 13Kuthimejan are guan Sala, Arfaxad xra bechon noo renkia ko nii nano, kai bechunda icha xeꞌen xan xii ko xan nchrii.

14Ko are Sala bechunda kan ko the nano, guan xeꞌen biꞌin Heber. 15Kuthimejan are guan Heber, Sala xra bechon noo renkia ko nii nano, kai bechunda icha xeꞌen xan xii ko xan nchrii.

16Ko are Heber bechunda kan thenoo nano, guan xeꞌen biꞌin Peleg. 17Kuthimejan are guan Peleg, Heber xra bechon noo renkia ko kan ko the nano, kai bechunda icha xeꞌen xan xii ko xan nchrii.

18Ko are Peleg bechunda kan ko the nano, guan xeꞌen biꞌin Reu. 19Kuthimejan are guan Reu, Peleg xra bechon yoo renkia ko na̱a̱ nano, kai bechunda icha xeꞌen xan xii ko xan nchrii.

20Ko are Reu bechunda kan ko theyoo nano, guan xeꞌen biꞌin Serug. 21Kuthimejan are guan Serug, Reu xra bechon yoo renkia ko yaato nano, kai bechunda icha xeꞌen xan xii ko xan nchrii.

22Ko are Serug bechunda kan ko the nano, guan xeꞌen biꞌin Nacor. 23Kuthimejan are guan Nacor, Serug xra bechon yoo renkia nano, kai bechunda icha xeꞌen xan xii ko xan nchrii.

24Ko are Nacor bechunda kan ko na̱a̱ nano, guan xeꞌen biꞌin Taré. 25Kuthimejan are guan Taré, Nacor xra bechon naa renkia ko thena̱a̱ nano, kai bechunda icha xeꞌen xan xii ko xan nchrii.

26Ko are Taré bechunda nii kan ko the nano, bechunda xeꞌen biꞌin Abram, xan Nacor ko xan biꞌin Harán.

Ni bachrjeninxin Taré

27Nthiꞌi jitaxin ni bachrjeninxin Taré: Taré kjui ndudee Abram, Nacor ko Harán. Ko Harán kjui ndudee Lot. 28Ko Harán beꞌen ngain nuntheꞌe chujni caldeo, thi nunthe guanxin, ko are jeꞌe beꞌen, ndudee xra bechon ndo.

29Ko Abram ko Nacor binthekaꞌo nchrii; chriꞌi Abram biꞌin Sarai, ko chriꞌi Nacor biꞌin nchra Milca. Ko Milca ko Isca kjui nchrichjeꞌe Harán. 30Ko Sarai chroꞌa banchekunkjiꞌi chjan.

31Ko Taré sabikao Abram, Sarai, ko xanthii, xan diꞌin Lot, thi kjui xeꞌen Harán ko binthegachrjexin na̱ rajna Ur ngain nuntheꞌe chujni caldeo ko sarrukji na̱ ngain nunthe Canaán. Aro jeꞌo biji na̱ nunthe Harán ko nthiꞌa tabinthe na̱. 32Ko ngain nunthe Harán benxin Taré are bechunda yoo renkia ko naꞌo nano.

Currently Selected:

Génesis 11: plsNT

Highlight

Copy