San Marcos 8

Jesús kitamaka este cuatro mil tokni̱wa̱n

1Íkua̱ꞌ poxsan monejnechko̱lo̱ꞌ, iwá̱n akipiayaj te̱ kikuaj. Iwá̱n Jesús kino̱tzaꞌ idisci̱polojmej, kijtoj:

2—Cho̱ka noa̱lmaj iga ini̱mej gente, iga kipiaya e̱yi días iga nigaj onokej nowa̱n, iwá̱n ayá̱ꞌ kipiáj te̱ kikuaj. 3Siga niktijti̱tanij ichajcha̱n, ijkó̱n maya̱ntia̱skej, wel tapoliwij ipan ojti iga sekin wa̱lkej wejka.

4Idisci̱polojmej kijtojkej:

—¿Kén mamotamaka ini̱mej gente nigaj ka̱n ayagaj cha̱ntitoꞌ?

5Jesús tatajtan:

—¿Ké̱skitaj pa̱n ankipiáj?

Yejame̱n kijtojkej:

—Sié̱tejsan.

6Iwá̱n Jesús kijlij la gente iga mamotajta̱li̱ka̱n ta̱lpan, iwá̱n Jesús kikuiꞌ inó̱n siete pa̱n iga kimáꞌ gracias Dios. Iwá̱n kita̱tajkoloj iwá̱n kimajmáꞌ idisci̱polojmej iga yejamej makimajmakaka̱n la gente. 7Kipiayaj no̱ alí̱n michtzitzi̱n, iwá̱n Jesús kimáꞌ gracias Dios iwá̱n no̱ tatekimáꞌ iga makimajmakaka̱n la gente. 8Nochi takuajkej este ijixwikej. Disci̱polojmej kite̱mijkej siete chikiwiꞌ iga takualta̱tájkol yej ayoꞌ kikuajkej. 9Iga nóchiya takuajkej ken cuatro mil. Iwá̱n Jesús kijlij la gente iga mayá̱ka̱nya. 10Iwá̱n Jesús tejkájkeja ipan á̱ka̱l iwá̱n idisci̱polojmej iga yajkij seꞌ a̱ltepe̱ꞌ yej kijliáj Dalmanuta.

Fariseojmej kitajtaniliáj Jesús iga makichi̱wa yej ayi̱ꞌpa mo‑ita

11Fariseojmej wa̱lkej ka̱n onoꞌ Jesús iwá̱n pe̱ꞌ kikuejkuesino̱tzkej, kitajtanili̱toj iga makine̱xtili̱ka̱n tejté̱ yej ayi̱ꞌpa mo‑ita yej Dio̱ssan wel kichi̱wa. 12Jesús achi má̱j mijneltij, iwá̱n kijtoj:

—¿Te iga ini̱mej gente kinekij makitaka̱n yej ayi̱ꞌpa mo‑ita?, nimitzijliáj iga ayá̱ꞌ kitaskej.

13La gente ka̱wikej; Jesús iwá̱n idisci̱polojmej yajkij tejkawitoj ipan á̱ka̱l iga yajkij a̱sentápal.

Amo mamitzkajkaya̱waka̱n fariseojmej

14Kua̱ꞌ yajkij ayá̱ꞌ kiwi̱gayaj te̱ kikua̱skej iga ke̱lkajkej, petz sé̱tzi̱nsan pa̱n kiwi̱gayaj ipan á̱ka̱l. 15Jesús kijlij idisci̱polojmej:

—Taꞌ xikakika̱n; amo xikchi̱waka̱n ken kitekichi̱waj fariseojmej iwá̱n yej kitokaj Herodes, iga yejamej né̱sikiꞌ ye̱ꞌnemij, sie̱mpa ayá̱ꞌ.

16Iwá̱n disci̱polojmej mojlia̱yaj:

—Anka ijkó̱n te‑ijliá iga atikuajligakej pa̱n.

17Jesús kimatiꞌ te̱ mojlijtoyaj iwá̱n kijtoj:

—¿Te iga nemi anmo‑ijliáj iga ayá̱ꞌ ankipiáj pa̱n? ¿Ke̱ ayá̱ꞌ ankimatij iga nej, iga se̱ pa̱n wel nikchí̱ komati? ¿Ix poxsan anyo̱ltakuaktikej? 18¿Ankipiáj amoyi̱x iwá̱n ayá̱ꞌ antacháj? ¿Annakasyojkej iwá̱n ayá̱ꞌ antakakij? ¿Ayoꞌ ankejla̱mikij? 19Kua̱ꞌ nik‑reparti̱roj cinco pa̱n entre cinco mil tokni̱wa̱n, ¿ké̱ꞌ chikiwiꞌ te̱miꞌ yej ta̱tájkol yej ká̱wigoꞌ?

Iwá̱n yejame̱n kijtojkej:

—¡Doce!

20Jesús sej kijtoj:

—Kua̱ꞌ iga siete pa̱n nikmajmakakej cuatro mil tajta̱gaꞌ, ¿ké̱ski chikiwiꞌ ankinejnechkojkej iga inó̱n yej ayá̱ꞌ kikuajkej?

Iwá̱n yejame̱n kijtojkej:

—¡Siete!

21Jesús kijtoj:

—¿Amejwa̱n aya ankentende̱rowaj?

Jesús kitachaltiá se̱ pacha de Betsaida

22Má̱j má̱j asikej ipan se̱ a̱ltepe̱ꞌ yej ito̱ka̱ꞌ Betsaida; iwá̱n Jesús kiwajliguilijkej se̱ pacha, kitekiꞌtajtanilijkej iga makichijchimi. 23Iwá̱n Jesús kima̱wila̱n in pacha iga kiki̱xtij ipan a̱ltepe̱ꞌ; iwá̱n kita̱lilij ichíjchal ipan iyi̱x, iwá̱n kita̱lilij ima̱mej, iwá̱n kitajtan siga tejte̱ya kita. 24Yej pacha katka, kijtoj:

—Kena nitachá, nikita tajta̱gaꞌ ken tikita kuawimej, eꞌ nikita iga nejnemij.

25Iwá̱n Jesús sej kita̱lilij ima̱mej ipan iyi̱x, iwá̱n ta̱gaꞌ tachi̱xtiki̱saꞌ, iwá̱n achitiáꞌ. Welja ye̱ꞌtachaꞌ este wejka. 26Iwá̱n Jesús kití̱tanya icha̱n, kijlij:

—Amo xaj tajkoa̱ltepe̱ꞌ, amo xikijto iga nimitztachaltij.

Pedro kinojma‑ijtowa iga Jesús sí yéjya Cristo

27Jesús iwá̱n idisci̱polojmej yajkij ipan íta̱l a̱ltepe̱ꞌ yej ito̱ka̱ꞌ Cesarea Filipo, ipan ojti, Jesús kitajtan idisci̱polojmej:

—In sekin, ¿té̱ kijtowaj de nej?

28Yejame̱n kijtojkej:

—Sekin kijtowaj iga tej tiJuan yej tabautiza̱rowa̱ya. Sekin kijtowaj iga tej Elías, iwá̱n sekin kijtowaj iga tej agaj profeta.

29Jesús kijtoj:

—In amejwa̱n, ¿té̱ ankijtowaj de nej?

Pedro kijtoj:

—Tej tiCri̱stoj.

30Eꞌ Jesús kitekimáꞌ iga amo makijli̱ka̱n ni agaj iga yéj in Cristo.

Jesús kipowa kén iga mikis

31Iwá̱n Jesús pe̱ꞌ kijlij idisci̱polojmej iga poxsan yawij kikno̱chi̱watij, kijtoj:

—Nej yej iPiltzi̱n Ta̱gaꞌ, yawij ne‑ikno̱chi̱watij poxsan iwá̱n yawij ne‑ijiyatij we̱wetkej yej manda̱rowaj iwá̱n ije̱fejmej sacerdo̱tejmej iwá̱n yej tamachtiáj ipan iley Moisés. Yawij ne̱mikti̱tij iwá̱n ipan e̱yi día nia ni‑ojpa‑isati sej.

32Ijkó̱n iga kinojma‑ijlijkej. Iwá̱n Pedro kiwi̱gaꞌ Jesús ka̱n iyokamej, pe̱ꞌ kajájwaꞌpa iga kijlij iga amo makijto ijkó̱n.

33Eꞌ Jesús mokuepaꞌ iga kitachi̱lij idisci̱polojmej, iwá̱n kajajwaꞌ Pedro, kijlij:

—¡Tzitzimiꞌ, xicholo note̱noj! Iga tej ayá̱ꞌ tikejla̱miki ken Dios kejla̱miki, sino que tikejla̱miki ken tajta̱gaꞌ.

34Iwá̱n Jesús kino̱tzaꞌ idisci̱polojmej iwá̱n la gente, kijtoj:

—Siga agaj kineki mane̱toka, ayꞌya makichi̱wa yej yéj kineki, iwá̱n manejnemi ipan noojwi, malej iga makikno̱chi̱waka̱n poxsan este makimikti̱ka̱n. 35Iga yej ayá̱ꞌ mote̱makas iga makimikti̱ka̱n, yawi mikiti; eꞌ nochi yej makimikti̱ka̱n iga nej ne̱toka iwá̱n iga kipowa ye̱ꞌnoti̱ciaj, inó̱n sí moma̱nawi̱j. 36¿Té̱ mota̱nili̱j ta̱gaꞌ siga makipiá nochi yej onoꞌ ipan iní̱n ta̱jli, iwá̱n makipolo iya̱lmaj? 37¿Ke̱ꞌ wel kixta̱was iga makikowa iya̱lmaj? 38Siga ipan iní̱n ta̱jli ka̱n mopoxchi̱wa yej aye̱kti agaj mapi̱na̱wa iga notájto̱l iwá̱n iga ne‑i̱xmati, nej no̱ yej iPiltzi̱n Ta̱gaꞌ, nia nikijto̱ti iga ayéj nodiscí̱poloj. Inó̱n nikijto̱j kua̱ꞌ niwi̱ꞌ sej ipan ita̱wi̱lyo noTaj Dios, kua̱ꞌ niwi̱ꞌ iwá̱n iya̱ngelejmej.

Currently Selected:

San Marcos 8: nhxTNT

Highlight

Copy