San Marcos 15

Jesús okuikakej ixpan Pilato

(Mt. 27.1-2,11-14; Lc. 23.1-5; Jn. 18.28-38)

1Ijkuak otlanes, intlayekankauan on tiopixkej, on ueuetkej tlayekankej, on temachtijkej ikan itlanauatil Dios niman nochimej on más uejueyi tekiuajkej ipan on sanedrín*, okinemilijkej tlinon kichiuiliskej Jesús. Kemaj ijkuak yokisalojkej, okuikakej niman okitemaktilitoj itech on gobernador itoka Pilato. 2Niman Pilato okitlajtoltij:

—¿Tejua tiinrey on hebreos*?

Jesús okinankilij:

—Kemaj, ijki ken tejua tikijtoua.

3Niman on tlayekankej tiopixkej kiteixpanuiyayaj ikan miyek tlajtlamach*. 4Kemaj Pilato oksejpa okitlajtoltij:

—¿Xitlaj ika titlanankilis? Xkita kech ika tlajtlamach* ika mitsteixpanuijtokej.

5Pero Jesús xitlaj* ika okinankilij. Yejua ika Pilato okitlatlachaltij, niman xkimatiya tlinon kinemilis.

Pilato okitemakak Jesús para ma kajkopilokan ipan kojnepanojli

(Mt. 27.15-26; Lc. 23.13-25; Jn. 18.38—19.15)

6Cada xipan ipan on iluitl itoka Pascua*, Pilato kinmakauiliani on tlakamej sen tlakatl yejuan tsakutika yejuan yejuamej kitlajtlaniyaj. 7Niman nemiya sen tlakatl itoka Barrabás, tsakutikatka iuan oksekimej yejuan otemiktijkaj ijkuak onajkomankaj. 8Kemaj on tojlamej oualajkej, niman okitlajtlanilijkej Pilato para ma kixti sen yejuan tsakutikaj ken kichiuani nochipa ipan on iluitl. 9Niman Pilato okinnankilij:

—¿Nenkinekij para ma nikmakaua inRey on hebreos*?

10Pilato ijkin okijtoj pampa yejua kimatstikatka ika san ikan innexikol on tlayekankej tiopixkej okitemaktilijkej Jesús. 11Pero on tlayekankej tiopixkej okinchiualtijkej on tlakamej para ma tlajtlanikan Barrabás, niman maka ma kitlajtlanikan Jesús. 12Kemaj Pilato okintlajtoltij:

—¿Tlinon nikchiuas iuan on yejuan nemejuamej nenkitokayotiaj inRey on hebreos*?

13Kemaj yejuamej okinankilijkej chikauak:

—¡Xkajkopilo ipan kojnepanojli* para ma miki!

14Pilato okinmijlij:

—¿Tlinon tej, xkuajli okichiu?

Pero yejuamej oksejpa más chikauak otsajtsikej:

—¡Xkajkopilo para ma miki!

15Pampa Pilato kinekiya kuajli nokauas inuan on tlakamej, okinmakauilij Barrabás. Kemaj okinnauatij isoldados para ma kuijuitekikan Jesús. Niman kemaj okitemaktilij para ma kajkopilokan ipan kojnepanojli.

On soldados tlamach ika okitlajyouiltijkej Jesús

(Mt. 27.27-31; Jn. 19.16)

16Kemaj, on soldados okuikakej Jesús ne ikiauak on palacio itoka pretorio, niman okinnotskej nochimej on oksekimej soldados. 17Okitlaliltijkej sen tlakentli* morado, okichijchijkej sen uitscorona, niman okimaniltijkej ipan itsontekon. 18Kemaj opeu kitsajtsiliaj:

—¡Kuajli xnemi tejua iminRey on hebreos*!

19Kemaj okuauijuitekej ikan akatl, okichijchakej, niman onotlakuantelketskej ixpan sano ijki ken kimauistiliaskiaj. 20Kemaj ijkuak ika yonauiltijkej, okixtilijkej on tlakentli* morado, niman okitlaliltijkej itlaken. Niman okuikakej para okajkopilotoj ipan kojnepanojli*.

Jesús okajkopilojkej ipan kojnepanojli

(Mt. 27.32-44; Lc. 23.26-43; Jn. 19.17-27)

21Ijkuakon, ompaka panotiaya sen tlakatl itoka Simón yejuan chanej* on kalpan Cirene. Yejua itataj katka Alejandro niman Rufo, niman oualeu neka ipan campo. Yejua okinauatijkej para ma kikti on kojnepanojli* de Jesús.

22Okuikakej Jesús ne kampa itoka Gólgota, yejuan no kijtosneki Mikatsontekomatlan. 23Niman okitekiuiltijkej vino tlanelojli iuan mirra. Pero Jesús xokiselij. 24Kemaj okajkopilojkej, niman yejuamej onotlatlankej para kitaskej cada se tlinon kiktis de itlaken Jesús.

25Okajkopilojkej Jesús ijkuak las nueve ika kualkan. 26Niman para nochimej ma kitakan tline* miki ne ipan on kojnepanojli, ijkin okijkuilojkej: “In yejua inRey on hebreos*.” 27Niman no okajkopilojkej iuan Jesús ipan kojnepanoltin omemej tlakamej tlachtekkej, se iyekmakopa niman okse ioopochmakopa. 28Onochiu ijkon ken tlajkuilolnestikaj ipan on Yektlajkuilojli yejuan kijtoua: “Okipojkej inuan on xkuajkualtin.”

29Niman yejuan ompa kipanauiyayaj, kuijuikaltiayaj, niman nokuauiuixouayaj pampa sa ika nauiltiayaj. Niman kijliayaj:

—¡Aj! Tejua yejuan tikxoxotonis iueyitiopan Dios niman ipan yeyi tonajli oksejpa tlamis tikchijchiuas, 30xmomakixti sano tejua, niman xuajtemo ipan on kojnepanojli.

31Sano ijki intlayekankauan on tiopixkej niman on temachtijkej ikan itlanauatil Dios sa ika nauiltiayaj Jesús. Yejuamej kinojliayaj:

—Oksekimej okinmakixtij, pero sano yejua xueli nomakixtia. 32Tla yejua Cristo yejuan inRey on hebreos*, ma uajtemo ne ipan on kojnepanojli* para tikitaskej niman tikneltokaskej ika melauak yejua inRey on hebreos*.

Niman on yejuan ompa ajkopilkayaj ipan on kojnepanoltin no kuijuikaltiayaj Jesús.

Jesús omik

(Mt. 27.45-56; Lc. 23.44-49; Jn. 19.28-30)

33Ijkuak oajsik tlakualispan, otlayouatiak nochiuiyan, niman tlayouatok katka hasta ijki oajsik ipan yeyi hora ika tiotlak. 34Niman ipan on hora, Jesús chikauak otsajtsik:

—Eloi, Eloi, ¿lama sabactani? —yejuan kijtosneki: NoDios, noDios, ¿tline tinechtlalkauiya?

35Sekimej, yejuan ompa nemiyaj, okakkej, niman okijtojkej:

—Xkakikan. Kinotstikaj on tiotlajtojketl Elías.

36Kemaj sen tlakatl onotlalojtikis yejuan okiktik sen tojtontli momoxtik, niman okipatsoj ikan xokok vino. Kemaj okontlalij ipan sen akatl ika okonitij Jesús. Kemaj okijtoj:

—Xkauakan, ma tikitakan tla uajlau Elías kuajtemoltis.

37Kemaj, Jesús chikauak otsajtsik, niman kemaj ouajnomikilij. 38Ijkuakon, on yekcortina yejuan pilkaya ne ijtik on ueyitiopan ouajtlajkotetsayan* tlakpak hasta tlatsintlan. 39Ijkuak on soldadojtlayekanki romano yejuan ijkaya ixpan Jesús okitak kenijki otsajtsik, niman kenijki omik, okijtoj:

—Yejua in tlakatl melauak iKonetsin katka Dios.

40No san uejkatsin sekimej siuamej konitstikatkaj Jesús. Ompa nemiya María yejuan ualeua Magdala, Salomé, niman María yejuan inanaj Santiago yejuan más konetl, niman José. 41In siuamej oyajkej iuan Jesús, niman okipaleuijkej ijkuak kistinemiya neka Galilea. No nemiyaj ompa oksekimej siuamej yejuan oualejkej Jerusalén iuan Jesús.

Jesús okitôkatoj ijtik sen ostotl

(Mt. 27.57-61; Lc. 23.50-56; Jn. 19.38-42)

42Ipan on tonajli viernes, on hebreos* kuektlaliayaj nochi tlajtlamach* para xtekitiyaj ipan on tonajli sábado. Ipan on tonajli viernes, ijkuak nisiu para kalakis tonaltsintli, 43ouajlaj sen tlakatl, itoka José, yejuan ualeua ipan on kalpan itoka Arimatea. Yejua teuan katka intech on más uejueyi tekiuajkej ipan on sanedrín*, niman nochimej kitlakaitayaj. Yejua no kichaya kamanon peuas tlamandaros Dios. Yejua onoyolchikau, niman oyaj itech Pilato para okitlajtlanilij imikatlalnakayo Jesús. 44Pilato okitlatlachaltij ika saniman omik Jesús. Yejua ika, okititlan sen tlakatl para ma kuajuika on soldadojtlayekanki. Ijkuak on soldadojtlayekanki ouajlaj, Pilato okitlajtoltij tla melauak yomik Jesús. 45Kemaj ijkuak on soldadojtlayekanki okimachistij ika melauak yomik, Pilato okauilij José para ma kitemolti on imikatlalnakayo Jesús. 46Kemaj José okou sen tela istak yejuan sanoyej* patioj. Niman ijkuak okitemoltij on imikatlalnakayo Jesús, okitejkuix ikan on tela istak. Kemaj okitôkato ijtik sen tlalkontli yejuan okichkuakej ipan teostotl. Niman ne itenko okimimilojtiajkej sen tetl sanoyej ueyi, niman ika okitentsakukej. 47María on yejuan ualeua Magdala, niman María yejuan inanaj José okitakej kanon okauatoj itlalnakayo Jesús.

Currently Selected:

San Marcos 15: nguNT

Highlight

Copy