San Mateo 14

Juan on tlakuatekijketl okimiktijkej

(Mr. 6.14-29; Lc. 9.7-9)

1Ipan on tonaltin, Herodes, on gobernador ne Galilea, okak on uejueyi milagros yejuan kichiuaya Jesús. 2Niman yejua okinmijlij itekitkauan yejuan kipaleuiyayaj:

—On yejua Juan yejuan tlakuatekijketl. Yejua yonoyolitij* niman yonoketsteu intsajlan on mikatsitsimej. Yejua ika yejua ueli kichiua on milagros.

3Herodes ijkon okijtoj, pampa yejua otlanauatijka ma kajsikan Juan, niman ma kisalokan ikan teposcadenas niman ma kitsakuakan pampa kinekiya kipaktis Herodías isiuau. In Herodías isiuau katka Felipe on ikniu Herodes. 4Juan kijliaya Herodes:

—Itlanauatil Dios xmitskauilia tikpiyas isiuau mokniu ken mosiuau.

5Herodes kinekiya kimiktis Juan, pero kinmakajsiya on tlakamej, pampa nochimej kineltokayaj ika Juan sen tiotlajtojketl. 6Pero ijkuak okichijkej iluitl ipan iluiu Herodes, imixpan on itenotskauan onijtotij ichpoch Herodías. Niman Herodes sanoyej* okuelitak ken onijtotij on ichpochtli. 7Yejua ika okiprometerouilij niman onokalaktij ikan itlajtol para kimakas san tlinon yejua kitlajtlanis. 8Kemaj yejua ikan itlanauatil inanaj okijlij Herodes:

—Nikan ipan sen plato xnechmaka itsontekon Juan on tlakuatekijketl.

9Ijkuakon, on rey Herodes onajman, pero pampa yonokalaktijka ikan itlajtol inmixpan on itenotskauan yejuan iuan tlakuayaj, on rey otlanauatij para ma kimakakan. 10Okintitlan on isoldados ma kikechtsontekitij Juan ne kampa tsakutikaj. 11Kemaj okuajkikej itsontekon ipan sen plato, niman okimakakej on ichpochtli. Kemaj yejua okiktik niman okimaktilij inanaj.

12Kemaj oualajkej on yejuan inomachtijkauan* Juan, niman okitkikej on itlalnakayo niman okauatoj ipan tlalkontli. Kemaj oyajkej okimachistitoj Jesús on tlinon onochiu.

Jesús okitlakualtij makuijli mil tlakamej

(Mr. 6.30-44; Lc. 9.10-17; Jn. 6.1-14)

13Ijkuak Jesús ijkon okimat, onejkuanij ompa niman oyaj iselti ipan barco kampaka xakaj nemi. Pero ijkuak on tlakamej okimatkej ika Jesús ye yau, yejuamej okiskej ipan on kalpanmej, niman onejnentiajkej okuitlapanuijkej. 14Ijkuak Jesús okis ipan on barco, okitak ika miyek tlakatl ompa kichixtikatka. Yejua okimiknelij* niman okimpajtij on kokoxkej yejuan kinuikayaj.

15Ijkuak ye tiotlak katka, on inomachtijkauan* Jesús oualajkej itech, niman okijlijkej:

—Aman ye tiotlak, niman nikan xakaj chanti. Xkintitlani on tlakamej para ma uiyan ipan on kalpantsitsimej niman ma kouakan tlen kikuaskej.

16Jesús okinmijlij:

—Ka, xkipiyaj tline* yaskej. Yej nemejuamej xkinmakakan tlinon kikuaskej.

17Yejuamej okijlijkej:

—Pero san tikpiyaj makuijli pan niman ome michin.

18Jesús okinmijlij:

—Xnechajkuilikan nikan.

19Kemaj otlanauatij para on tlakamej ma notlajtlalikan ipan on sakayoj. Kemaj, ijkuak okontilan on makuijli pan niman on ome michin, oajkotlachix iluikak niman okimakak tlaxtlauijli Dios niman ijkon okitiochiu on tlakuajli. Niman kemaj okitlatlapan on pan niman okinmakak on inomachtijkauan* para ma kinxexelouilikan on tlakamej. 20Nochimej otlakuajkej niman kuajli oixuikej. Kemaj on nomachtijkej* ika on tlatlajkotsitsin tlen onokau okitemiltijkej majtlaktli uan ome chikiutin. 21On yejuan otlakuajkej kanaj makuijli mil tlakamej katkaj, pero xtejuamej okimpokej on siuamej nion on kokonej yejuan no otlakuajkej.

Jesús onejnen ipan atl

(Mr. 6.45-52; Jn. 6.16-21)

22Kemaj Jesús okinnauatij on inomachtijkauan* para ma kalakikan ipan on barco, niman ma yakatstiakan ipan okse ilado on mar chika yejua kinnauatiaya ma uiyan on tlakamej. 23Más sakin*, ijkuak yokintitlan on tlakamej, Jesús otlejkok ipan on tepetl para iselti okichiuato oración. Ijkuak otlayouak, Jesús iselti ompa nemiya. 24Ipan on mismo tiempo, on barco ye yaya atlajkotian, niman on akoxonajli ontlauitekiya itech on barco, pampa on ajakatl sanoyej chikauak tlauitekiya intech yejuamej. 25Ijkuak uejkakualkan kanaj ipan yeyi hora, Jesús nejnentiaya ixko on mar, niman okinnisiuij inomachtijkauan*. 26Niman ijkuak on inomachtijkauan* okitakej nejnentiu ixko on mar, sanoyej onomojtijkej. Yejuamej okijtojkej:

—¡Ay! ¡Ne uajlau sen tlamojtiloni!

Niman omojkatsajtsikej.

27Pero Jesús nimantsin okinnots, niman okinmijlij:

—Xmoyolchikauakan. Nejua niJesús. Maka xmomojtikan.

28Kemaj, Pedro okonankilij, niman okijlij:

—NoTEKO, tla tejua, xchiua ma niuiya ixko on atl hasta kampa tinemi.

29Jesús okijlij:

—Xuajla.

Ijkuakon, Pedro okis ipan on barco, niman opeu nejnemi ipan on mar para oyaj kampa nemi Jesús. 30Pero ijkuak okitak on temojtij ajakatl, onomojtij niman opeu apolaki. Kemaj ijkin otsajtsik:

—¡Xnechmakixti, noTEKO!

31Nimantsin Jesús okiktsij ipan ima, niman okijlij:

—¡Semi achijtsin tikpiya motlaneltok! ¿Tline* otiometlamat?

32Niman ijkuak yejuamej otlejkokej ipan on barco, onoteltij ika chikauak ajakaya. 33Kemaj on yejuan nemiyaj ipan barco onotlakuantelketskej ixpan Jesús, niman okimauistilijkej. Okijlijkej:

—Tlakaj melauak tejua tiiKoneu Dios.

Jesús okimpajtij on kokoxkej ne ipan on tlajli itoka Genesaret

(Mr. 6.53-56)

34Niman ijkuak okipanauijkej on mar, oajsikej ipan on tlajli itoka Genesaret. 35Ijkuak on tlakamej yejuan ompa chanejkej okonixmatkej, okitemachistitoj nochiuiyan ipan on regiones ika Jesús ye ompa nemi. Yejua ika, okinuajuikakej on kokoxkej ne kampa Jesús nemiya. 36Niman on tlakamej sanoyej okitlajtlanilijkej para on kokoxkej ma kinkauili ma kajsikan, maski san itenkotsin itlaken. Niman nochimej yejuan okajsikej itlaken, opajtikej.

Currently Selected:

San Mateo 14: nguNT

Highlight

Copy