San Lucas 9

Jesús okintitlan on majtlaktli uan ome apóstoles* para temachtiskej niman tepajtiskej

(Mt. 10.5-15; Mr. 6.7-13)

1Jesús okinsentlalij on majtlaktli uan ome apóstoles* niman okinmakak poder niman tlanauatijli para kintekixtiliskej nochi on xkuajkualtin espíritus niman para tepajtiskej. 2Kemaj okintitlan ma kiteijlitij on temachtijli ika Dios kineki tlamandaros inka yejuamej on yejuan kineltokaj, niman para kimpajtiskej on kokoxkej. 3Niman okinmijlij:

—Maka itlaj xkiktikan para ipan ojtli, nion topijli, nion bolsa, nion tlakuajli, nion tomin. Niman san se nemotlaken yejuan nekitlalijtiaskej. 4San katlejua kajli kampa nemajsiskej ompa xmokauakan hasta kaman nenmejkuaniskej ipan on kalpan. 5Niman kampa xmechseliskej, xkisakan ipan on kalpan niman xtsejtselokan nemokxi de on tlalteutli, para ma kimatikan ika yejuamej kualaniaj Dios.

6Yejuamej tej, oyajkej ipan nochi on kalpantsitsimej, niman temachtiayaj on kuajli tlajtojli yejuan kiteijlia ken Dios temakixtia niman nochiuiyan kimpajtijtiayaj on kokoxkej.

Herodes xkimatiya tlinon kinemilis itechkopa Jesús

(Mt. 14.1-12; Mr. 6.14-29)

7On gobernador Herodes okak tlen Jesús kichiuaya, niman xkimatiya tlinon kinemilis, pampa sekimej kijtouayaj ika Juan yoyoliu* niman yonokuiteu ipan itlalkon, 8niman oksekimej kijtouayaj ika on tiotlajtojketl Elías yejua yononextij. Niman oksekimej kijtouayaj ika semej on ye uejkaui tiotlajtojkej yoyoliu* niman yonokuiteu ipan itlalkon. 9Pero Herodes okijtoj:

—Sano nejua onitlanauatij para ma kikechtsontekikan Juan. ¿Manin tej, akinon on tlakatl yejuan nikaki kiteneuaj kichiua miyek tlajtlamach*?

Niman Herodes kichiuaya kanika para kitas Jesús.

Jesús okintlakualtij makuijli mil tlakamej

(Mt. 14.13-21; Mr. 6.30-44; Jn. 6.1-14)

10Ijkuak on apóstoles* onokuepkej, okitlajtlajtouilijkej Jesús nochi tlinon okichijkej. Kemaj okinuikak niman oyajkej ipan on xalpatlajkan nisiu on kalpan, itoka Betsaida. 11Pero ijkuak on tlakamej okimatkej, oyajkej iuan. Niman Jesús okinselij niman okinnojnots ika on ken Dios tlamandaroua, niman Jesús no okimpajtij on kokoxkej.

12Ijkuak ye tiotlaktitiaya, on majtlaktli uan ome nomachtijkej* okijlijkej:

—Xkintijtitlani on tlakamej para ma kitejtemotij kanon kochiskej niman tlen kikuaskej ipan on kalpantsitsimej niman ontlajtlaluis kampaka chajchantiua, pampa nikan kampa tinemij xitlaj* onkaj.

13Pero Jesús okinmijlij:

—Nemejuamej xkinmakakan tlen kikuaskej.

Niman yejuamej okijtojkej:

—Xtikpiyaj más tlakuajli yej san in makuijli pan niman in ome michimej. ¿Tikneki ma tikouatij tlakuajli para nochimej in tlakamej?

14On tlakamej kanaj makuijli mil katkaj. Pero Jesús okinmijlij on inomachtijkauan*:

—Xkinnauatikan ma noseuikan ojonkuaj de 50 ne ipan on sakayo.

15Yejuamej ijki okichijkej niman nochimej onotlajtlalijkej. 16Kemaj ijkuak Jesús okontilan on makuijli pan niman on ome michimej, oajkotlachix iluikak niman okimakak tlaxtlauijli Dios para on tlakuajli. Niman kemaj ijkuak yokitlatlapan on pan, okinmakak on inomachtijkauan* para ma kinxexelouilikan on tlakamej. 17Yejuamej otlakuajkej niman nochimej oixuikej. Niman kemaj ika on tlatlajkotsitsin yejuan onokau, okitemiltijkej majtlaktli uan ome chikiutin.

Pedro okijtoj ika Jesús yejua Cristo

(Mt. 16.13-19; Mr. 8.27-29)

18Se tonajli ijkuak Jesús iselti kichijtikatka oración, niman on inomachtijkauan* ompa iuan nemiyaj, okintlajtoltij:

—On tlakamej, ¿ken kijtouaj akin nejua?

19Yejuamej okijlijkej:

—Sekimej kijtouaj ika tejua tiJuan on tlakuatekijketl, oksekimej kjtouaj ika tejua tiElías, niman no sekimej kijtouaj ika tise on ye uejkaui tiotlajtojkej yejuan yoyoliu* niman yonokuiteu ipan itlalkon.

20Kemaj yejua okintlajtoltij:

—Niman nemejuamej, ¿ken nenkijtouaj akin nejua?

Niman Pedro okijlij:

—Tejua tiCristo yejuan Dios okuatitlan.

Jesús okinmachistij inomachtijkauan* ika yejua kimiktiskej

(Mt. 16.20-28; Mr. 8.30—9.1)

21Pero yejua sanoyej* kuajli okinnauatij para maka yakaj kijliskej. 22Niman okinmijlij:

—Nejua yejuan oninochiu Tlakatl ika onkaj nikijyouis miyek tlajtlamach*. On ueuetkej tlayekankej niman intlayekankauan on tiopixkej niman on temachtijkej ikan itlanauatil Dios xnechseliskej. Nechmiktiskej, pero ipan yeyi tonajli niyoliuis* niman ninokuiteuas ipan notlalkon.

23Niman nochimej okinmijlij:

—Tla yakaj kineki nouan yas, ma kelkaua nochi on tlen más kintlasojtla, ma nemi listo para tlajyouis mojmostla noso mikis nopampa, niman kemaj ma uajla nouan. 24Yejua in nemechijlia pampa yejuan kinekis kimakixtis inemilis ipan in tlaltikpaktli, kipolos ialma, pero yejuan san nopampa kipolos inemilis ipan in tlaltikpaktli, yejua kiselis nemilistli para ialma. 25¿Tlinon ika kipaleuis sen tlakatl tla kinoyaxkatis* nochi tlen onkaj ipan in tlaltikpaktli niman sano yejua popoliuis noso noxoxotonis? 26Tla yakaj tej, noka pinaua niman ika pinaua on tlen niktemachtia, nejua yejuan oninochiu Tlakatl no ika nipinauas ijkuak niuajlas ikan noueyilis, ikan iueyilis noTajtsin niman inueyilis on yejyektitokej ángeles. 27Ika tlen melauak nemechijlia ika sekimej yejuan aman nikan nemij kitaskej Dios tlamandaros ijkuak xe mikij.

Jesús onixpatlak

(Mt. 17.1-8; Mr. 9.2-8)

28Kanaj ipan chikueyi tonajli más sakin* ika ijkon okijtojka, Jesús okinuikak Pedro, Santiago niman Juan niman otlejkok ipan sen tepetl para okichiuato oración. 29Niman chika Jesús kichijtikatka oración, onixpatlak niman on itlaken sanoyej oistayak niman opetlan. 30Kemaj ouajnonextijkej omemej tlakamej iuan tlajtlajtouayaj, niman on tlakamej katkaj Moisés niman Elías. 31Yejuamej uatlachixtikatkaj ijtik on ueyilistli sanoyej petlani niman tlajtlajtouayaj ken Jesús mikis ne Jerusalén. 32Maski Pedro niman icompañeros sanoyej kochisnekiyaj, onotlachaltijkej, niman okitakej on iueyilis Jesús niman on omemej tlakamej yejuan ompa iuan nemiyaj. 33Ijkuak on tlakamej ye kitlalkauijtiayaj Jesús, Pedro okijlij:

—Temachtijketl, ¡sanoyej kuajli ika nikan tinemij! Ma tikchijchiuakan yeyi kalmatsitsintin: se para tejua, okse para Moisés niman okse para Elías.

Pero Pedro xkimatiya tlinon kijtouaya. 34Niman chika Pedro ijkon tlajtouaya, ouajlaj sen moxtli yejuan okintlapachoj niman ijkuak okitakej ika yomoxkalakkej, onomojtijkej. 35Kemaj ne ipan moxtli okakistik sen tlajtojli yejuan okijtoj:

—In yejua notlajsojkaKoneu. Yejua xtenkakikan.

36Ijkuak yotlan kakisti on tlajtojli, okitakej ika Jesús sa iselti nemiya. Yejuamej xok onauatkej niman xakaj itlaj okijlijkej ipan on tonaltin on tlen okitakej.

Jesús okipajtij sen telpochtli yejuan kipiyaya sen xkuajli espíritu

(Mt. 17.14-21; Mr. 9.14-29)

37Uajmostla, otemokej ne ipan on tepetl, niman miyek tlakatl okinamikito Jesús. 38Kemaj sen tlakatl yejuan nemiya ne intsajlan on tlakamej okijlij ikan chikauak tlajtojli:

—Temachtijketl, nimitsiknotlajtlanilia xkita nosentekoneu, 39pampa kajsi sen xkuajli espíritu yejuan kichiualtia san tsajtsiteua niman kemaj sanoyej kitsejtseloua hasta kamaposonalkisa. Sanoyej kitlajyouiltia niman xkineki kitlalkauis. 40Yonikinmiknotlajtlanilij monomachtijkauan para ma kixtilikan on xkuajli espíritu, pero xouelkej.

41Jesús okijtoj:

—¡Ay tlakamej yejuan xtlaneltoka niman xmelajki tlanemiliaj! ¿Hasta kamanon nemouan ninemis niman nemechxikos? Nikan xkuajuika mokoneu.

42Pero ijkuak on telpochtli kinisiuiaya Jesús, on xkuajli espíritu okitlajkal ipan tlajli niman sanoyej okitsejtseloj. Pero Jesús nimantsin okajuak on xkuajli espíritu, okipajtij on telpochtli niman kemaj okimaktilij itataj. 43Niman nochimej okintlatlachaltij on iueyilis Dios.

Jesús oksejpa okinmijlij inomachtijkauan* ika kimiktiskej

(Mt. 17.22-23; Mr. 9.30-32)

Chika nochimej kimojkaitstikatkaj on tlen Jesús kichiuaya, yejua okinmijlij inomachtijkauan*:

44—Kuajli xkakikan in, niman maka xkelkauakan. Nejua yejuan oninochiu Tlakatl nechtemaktiliskej intech on tlakamej.

45Pero on nomachtijkej* xkajsikamatiyaj tlinon yejua kinmijliaya, pampa xe kinkauiliaya kimatiskej. Niman yejuamej nomojtiayaj kitlajtoltiskej Jesús ma kinmelajkaijli on tlen kimijlijtikatka.

Jesús okinmijlij inomachtijkauan* akinon más ueyixtikaj ne kampa tlamandaroua Dios

(Mt. 18.1-5; Mr. 9.33-37)

46Kemaj on nomachtijkej* opejkej notenkuikuij de on akinon más ueyixtias intsajlan. 47Jesús okimat on tlen yejuamej kinemilijtikatkaj. Yejua ika, okontilan sen konetl niman inakastlan okitlalij. 48Kemaj okinmijlij:

—San akinon yejuan nopampa kiselia yejua in konetl, nejua nechselia. Niman yejuan nejua nechselia, no kiselia on yejuan onechajtitlan. Ijkon tej, on yejuan más xueixtikaj nemotsajlan, on yejua más ueyixtias.

On yejuan xtechtlauelita touan nopoua

(Mr. 9.38-40)

49Kemaj Juan okijlij:

—Temachtijketl, otikitakej sen tlakatl yejuan ikan motokatsin kintekixtilia on xkuajkualtin espíritus, pero tejuamej otiknauatijkej maka sa ma kichiua, pampa xtouan kistinemi.

50Pero Jesús okijlij:

—Maka xtlakaualtikan, pampa on yejuan xitlaj* ika techixnamiki, touan nopoua.

Jesús okajuak Santiago niman Juan

51Ijkuak ye nisiu katka on tonajli ika Jesús tlejkos iluikak, okajsik iojui ikan yolchikaualistli para Jerusalén. 52Achtoj okintitlan sekimej temachistijkej ipan on kalpantsin yejuan onkaj ipan iueyitlalpan Samaria, para okitejtemotoj kanon noseuis Jesús. 53Pero on samaritanos chanejkej ipan on kalpantsin xokinekkej kiselijkej pampa okitakej ika yau Jerusalén. 54Ijkuak on nomachtijkej* Santiago niman Juan ijkon okitakej, okijlijkej Jesús:

—ToTEKO, ¿tikneki para ma titlanauatikan ma tlikiaui ijkon ken okichiu on tiotlajtojketl Elías para nochimej ma tlatlakan?

55Kemaj Jesús okimixtlaloj niman ijkin okimajuak:

—Nemejuamej xnenkimatij tlinon nemojtik yokalak. 56Nejua tej, yejuan oninochiu Tlakatl oniuajlaj xpara nikinxoxotonilis innemilis on tlakamej, yej para nikinmakixtilis.

Kemaj oyajkej ipan okse kalpan pitentsin.

On yejuan yas iuan Cristo ika onkaj tlajyouis

(Mt. 8.19-22)

57Chika yejuamej yayaj ipan on ojtli, sen tlakatl okijlij Jesús:

—NoTEKO, nikneki nias mouan san kanon tejua tias.

58Jesús okijlij:

—On ostotsitsimej kipiyaj intekaluan, niman on totomej kipiyaj intepajsol, pero nejua yejuan oninochiu Tlakatl xnikpiya nion kanon nikochis.

59Jesús okijlij okse tlakatl:

—Xuajla nouan.

Pero yejua okijlij:

—NoTEKO, xnechkauili achtopa ma niuiya para nikontôkas notataj niman kemaj mouan nias.

60Jesús okijlij:

—Xkinkaua on yejuan miktokej ixpan Dios ma kintokakan inmikatsitsiuan, pero tejua xuiya niman xtemachisti kenijki Dios tlamandaroua.

61Kemaj okse no ijki okijlij:

—NoTEKO, nikneki mouan nias, pero achtopa xnechkauili ma nikinnauatiti nofamilia.

62Pero Jesús okijlij:

—On yejuan peua yau nouan niman noteltia, nemi ken sen tlakatl yejuan peua tekiti ika on tepostlaxoponajli*, niman kemaj ikuitlapan on tlacha. On yejuan ijkon kichiua xitlaj* ika uelis tlapaleuis kampa Dios tlamandaroua.

Currently Selected:

San Lucas 9: nguNT

Highlight

Copy