San Lucas 11

Jesús okintitij on inomachtijkauan* kenijki kichiuaskej oración

(Mt. 6.9-15; 7.7-11)

1Se tonajli Jesús kichijtikatka oración. Niman ijkuak otlan, semej inomachtijkauan* okijlij:

—NoTEKO, xtechmachti kenijki tikchiuaskej oración ijkon ken Juan okinmachtij inomachtijkauan*.

2Jesús okinmijlij:

—Ijkuak nenkichiuaskej oración ijkin xkijtokan:

ToTajtsin, akin tinemi iluikak,

ma mitsyekteneua nochi tlakatl.

Xuajla niman xtlamandaroki ipan in tlaltikpaktli ijkon ken titlamandaroua ne iluikak.

3Xtechmaka tlen tikuaskej aman niman mojmostla.

4Niman xtechtlapojpoluili totlajtlakoluan ijkon ken tejuamej

tikintlapojpoluiyaj yejuan itlaj xkuajli techchiuiliaj.

Niman xtechpaleui para maka titlajtlakoskej,

yej xtechejkuanili nochi tlen xkuajli.

5No ijki Jesús okinmijlij:

—Ma tikontlalikan ika semej nemejuamej kipiya sen itetlajsojkaikniu* niman kanaj tlajkoiuan yau ichan on itetlajsojkaikniu niman kijlia: “Notlajsojkaikniu, xnechtlanejti yeyi pan, 6pampa sen notlajsojkaikniu uejka oualeu san kemach oyejkok nochan, niman xnikpiya tlinon nikualtis.” 7Niman ma tikontlalikan ika on okse kuajnankilis nepa ikalijtik, niman kijlis: “Maka xnechpajsolo. Nejua kuajli yonitlatsaku, niman nejua iuan nokoneuan yotitotenkej para tikochiskej. Xniuelis ninokuiteuas para nimitsonmakas.” 8Nemechijlia ika maski xnokuiteuaskia para konmakas, pero san pampa itetlajsojkaikniu kitlajtlanilia, yejua nokuiteuaskia niman komakaskia nochi tlen kitlajtlanilia. 9Yejua ika nemechijlia: Xtlajtlanilikan Dios on tlen mechpoloua, niman yejua mechmakas. Xtejtemokan on tlen mechpoloua, niman nenkinextiskej. Xtetepinikan on tsakuijlotl, niman Dios mechtlatlapouilis. 10Ijkon xchiuakan, pampa yejuan kitlajtlani, kiselia, niman yejuan kitejtemoua, kinextia, niman yejuan kitetepinia on tsakuijlotl, kitlatlapouiliaj.

11’¿Tlen nemotsajlan yakaj tajtli nemi yejuan noyolchikauas para kimakas ikoneu sen tetl ijkuak kitlajtlanilis sen tlaxkajli? ¿Noso kimakas sen kouatl ijkuak kitlajtlanilis sen michin? 12¿Noso kimakas sen kolotl ijkuak kitlajtlanilis sen totoltetl? 13Aman tej, tla nemejuamej yejuan xnenkuajkualtin tlakamej nenkimatij ken nenkinmakaskej nemokoneuan on tlajtlamach* tlen kuajli, sanoyej* pantlannestikaj ika nemoTajtsin iluikak chanej* kiminmakas Espíritu Santo on yejuan kitlajtlaniliskej.

On fariseos* okitlajtolketsteuilikej Jesús

(Mt. 12.22-30; Mr. 3.20-27)

14Jesús okixtijlij sen tlakatl on xkuajli espíritu yejuan okinontilijka, niman ijkuak on xkuajli espíritu okis, on nontsin otlajtoj. Niman on tlakamej sanoyej okixpakaitakej on tlen onochiu. 15Pero sekimej okijtojkej:

—In tlakatl kintekixtilia on xkuajkualtin espíritus ika ipoder Beelzebú yejuan intlayekankau on xkuajkualtin espíritus.

16Niman oksekimej, san para kitlatlataskej, kitlajtlaniliayaj ma kichiua sen tlamauisojli yejuan ualeua ne iluikak. 17Pero Jesús kimatstikatka tlinon kinemilijtikatkaj, niman okinmijlij:

—San katlejua país yejuan notlajkoxeloua, xoxotoni. Niman tla ipan sen chanyotl* on chanejkej noxelouaj ikan tlauejli, no ijki xoxotoni. 18No ijki tej, tla on Satanás noxelos inuan on xkuajkualtin espíritus, ¿kenijki uelis onyas nochipa ipoder? Ijkin nikijtoua pampa nemejuamej nenkijtouaj ika niktekixtilia on xkuajkualtin espíritus ikan ipoder Beelzebú. 19Pero tla ijki yeskia ken nenkinemiliaj, ¿akinon kiminmaka on poder on tlakamej yejuan mechkuitlapanuiyaj para no kintekixtiliaj on xkuajkualtin espíritus? Tla ijkon sano yejuamej mechixkomaka ika xkuajli nentlanemiliaj. 20Pero tla Dios nechmaka poder para niktekixtilia on xkuajkualtin espíritus, in kijtosneki ika Dios youajlaj para mechmandaros.

21’Ijkuak sen tlakatl kojtitikaj kuajli nemi armado niman kitlajpiya ichan, on tlen ompa kipiya xakaj ueli kikuilia. 22Pero tla uajlau okse tlakatl yejuan más kojtik xken yejua niman kitlani, tla ijkon, kuilia nochi iarmas yejuan ika noyolchikauaya iteko on kajli, niman on tlakatl yejuan mas kojtik kixexeloua para oksekimej.

23’On yejuan xitlaj* ika nechixnamiki nouan nopoua, niman on yejuan xnouan tlasentlalia texexeloua.

On xkuajli espíritu oksejpa nochantia ipan iyojlo sen tlakatl

(Mt. 12.43-45)

24’Ijkuak sen xkuajli espíritu kisa ipan sen tlakatl, pajpanotinemi nochiuiyan kampaka xalpatlajkan. Kitejtemojtinemi kampa noseuis, niman ijkuak xkinextia, kinemilia: “Oksejpa nias ijtik on tlakatl kampa onikis.” 25Ijkuak oksejpa nokuepa, konextia on tlakatl ken itlaj kajli yejuan ijtik kualtsin tlachpankan niman kuajli tlaojonkaj. 26Kemaj yejua yau niman konana okse chikome yejuan más xkuajkualtin espíritus xken yejua, niman nochimej nochantiaj ijtik on tlakatl. Yejua ika, on tlakatl más xkuajli nemi xken achtopa nemiya.

Jesús okijtoj on tlen más kuajli para sen tlakatl kichiuas

27Ijkuak Jesús otlan kijtoua in tlajtlamach*, sen siuatl yejuan nemiya intsajlan on tojlamej, ikan chikauak tlajtojli okijlij:

—Sanoyej tlatiochijtli on siuatl yejuan omitstlakatilij niman omitschichitij.

28Pero yejua okijtoj:

—¡Dios más kintiochiua on yejuan kakij itlajtoltsin niman kitlakamatij!

On xkuajkualtin tlakamej okitlajtlanilijkej Jesús ma kichiua sen tlamauisojli yejuan kisa iluikak

(Mt. 12.38-40; Mr. 8.12)

29On tlakamej más nosentlalijtikatkaj iyeualkan Jesús, niman yejua opeu ijkin kinmijlia:

—On tlakamej yejuan nemij ipan in tonaltin, sanoyej xkuajkualtin. Nechtlajtlaniliaj ma nikchiua sen tlamajuisojli, pero xitlaj nikchiuas yej san on tlamauisol yejuan ipan onochiu on tiotlajtojketl Jonás. 30Ijkon ken Jonás onochiu tlamauisojli para on tlakamej yejuan chantiyaj Nínive, no ijki nejua yejuan oninochiu Tlakatl ninochiuas tlamauisojli para in tlakamej yejuan nemij ipan in tonaltin. 31Ipan on tonajli ijkuak Dios teyolkuitis niman tetlajtlakolmakas, on reina yejuan ualeua neka Sur, nokuiteuas niman kintlajtlakolmakas in tlakamej yejuan aman nemij. Ijkon uelis kichiuas pampa yejua oualeu uejka de ipaís para okakiko itlamatkilis* Salomón, niman nejua nikan ninemi yejuan más niueyixtikaj xken Salomón niman on yejuan aman nemij xnechchiuiliaj cuenta. 32Ipan on tonajli ijkuak Dios teyolkuitis niman tetlajtlakolmakas, on yejuan chantiyaj ipan on ueyikalpan itoka Nínive nokuiteuaskej niman kintlajtlakolmakaskej in tlakamej yejuan aman nemij. Ijkon kichiuaskej pampa on yejuan ochantijkej Nínive onoyolpatlakej ijkuak Jonás okintlajtlajtouilij itemachtil Dios. Niman nejua nikan ninemi yejuan más niueyixtikaj xken Jonás, niman on yejuan aman nemij xonoyolpatlakej ijkuak onikintlajtlajtouilij itemachtil Dios.

Jesús otemachtij de sen tlauijli

(Mt. 5.15; 6.22-23)

33’Xakaj kitlikuiltia itlauil niman kitlalia kampa iyantias, nion itsintlan itlaj chikiutli. Yej kitlalia kampa tlakpak para kintlauiluiya on yejuan kalakij ijtik on kajli. 34Ipan motlalnakayo tikpiya mixtololojuan para titlacha. Tla mixtololojuan kuajli tlachaj, ueli tikita on tlen tikchiua. Pero tla xtitlacha, xueli tikita on tlen tikchiua. No ijki tla motlamachilis kuajli, ueli ika tikajsikamati on tlen Dios kineki para tikchiuas. Pero tla motlamachilis xkuajli, tla ijkon, xtikajsikamatis on tlen Dios kineki para tikchiuas. 35Yejua ika noneki para tikejeuas motlamachilis para tikajsikamatis on tlen Dios kineki para tikchiuas, niman para maka tikpolos itlaj mokajsikamatilis. 36Ijkon tej, tla motlamachilis kajsikamati nochi tlen Dios kineki para tikchiuas, tla ijkon, xmitspolos nion achijtsin kajsikamatilistli, yej motlamachilis yes ken sen lámpara yejuan mitstlauiluis.

Jesús okinmixkomakak on fariseos* niman on temachtijkej ikan itlanauatil Dios

(Mt. 23.1-36; Mr. 12.38-40; Lc. 20.45-47)

37Ijkuak Jesús otlan tlajtlajtoua, sen fariseo* okinots para iuan ontlakuas ichan. Yejua ika Jesús okalak ichan on fariseo* niman onotlalij itech mesa. 38On fariseo* hasta omojkatlachix ijkuak okitak ika Jesús xonomajtekij para tlakuas. 39Pero toTEKO okijlij:

—Nemejuamej fariseos* san tlapani nemochipauaj ken yakaj kichipaua san ikuitlapan on taza noso ikuitlapan on plato, pero ipan nemoyojlo nententokej ikan tlachtekilistli niman ika on tlen xkuajli nenkichiuaj. 40¡Ah tsontekonchikajkej*! ¿Tlen xnenkimatij ika on yejuan omechchijchiu pani ipan nemotlalnakayo no omechchijchiu tlaijtik ipan nemoyojlo? 41Pero xkinmakakan tetlayokolijli* on mayankej niman nemokauaskej nochi chipauak hasta nemoyojlo.

42’Melauak nemejuamej fariseos* nenkimakaj Dios nemodiezmo* de on menta*, niman ruda* niman nochi tlajtlamach* kijli. Pero maski ijkon nenkichiuaj, ¡lástima para nemejuamej!, pampa xnemouikaj iuan oksekimej ikan yolchipaualistli ken noneki, nion xnenkitlajsojtlaj* Dios ken noneki. Ijkuak nenkimakaj Dios nemodiezmo*, no noneki nenkichiuaskiaj yejua in oksekij tlajtlamach*.

43’¡Lástima para nemejuamej fariseos*!, pampa ne ipan sinagogas* nenkinekij nemotlaliskej ipan sietas kampa notlaliaj on uejueyixtokej, niman nenkinekij para ipan on plazas ma mechtlajpalokan ikan miyek tetlakaitalistli.

44’¡Lástima para nemejuamej temachtijkej ikan itlanauatil Dios niman nemejuamej fariseos*! ¡Nemejuamej nenomexayakyejkej! Nemejuamej ken nentlalkontin yejuan xnestokej, niman on tlakamej impan panouaj. Ijkon tej, on tlakamej panouaj nemopan niman xkimatij ika nenkinkajkayauaj ikan nemotemachtil.

45Kemaj sen temachtijketl ikan itlanauatil Dios okinankilij niman okijlij:

—Temachtijketl, ika on tlen tikijtoua, tejuamej no teuan titechkakistilia.

46Pero Jesús okijtoj:

—¡Lástima no para nemejuamej temachtijkej ikan itlanauatil Dios!, pampa oksekimej nenkintlamamaltiaj ika on tlamamajli yejuan sanoyej yetik para kitkiskej. Pero nemejuamej nion siquiera ikan se nemomajpil xnenkinekij nenkonkiktsiskej.

47’¡Lástima para nemejuamej!, pampa nenkinchijchiuiliaj mikakaltin on tiotlajtojkej yejuan sano nemoachtojtajuan okinmiktijkej. 48Ika on nenkiteititiaj ika nenkitaj kuajli on tlen okichijkej nemoachtojtajuan. Yejuamej tej, okinmiktijkej on tiotlajtojkej, niman nemejuamej nenkinchijchiuiliaj on mikakaltin. 49Yejua ika tej, Dios ikan itlamatkilis* okijtoj: “Nikintitlanilis tiotlajtojkej niman apóstoles*, niman sekimej yejuamej kiminmiktiskej niman oksekimej kintlauelitaskej niman tlamach ika kintlajyouiltiskej.” 50Yejua ika on tlakamej yejuan aman nemij kinyolkuitiskej ipampa inmikilis nochimej on tiotlajtojkej desde ijkuak opeu in tlaltikpaktli. 51Uajpeua ika iyesyo Abel niman ontlami hasta ika iyesyo Zacarías, yejuan okimiktijkej itsajlan on ueyitiopan niman on tlaixpan*. Yejua ika oksejpa nemechijlia ika on tlakamej yejuan aman nemij kinyolkuitiskej ipampa inyesyo on tiotlajtojkej.

52’¡Lástima para nemejuamej temachtijkej ikan itlanauatil Dios!, pampa xnenkinkauiliaj on tlakamej ma kajsikamatikan on tlajtlamach* itechkopa Dios. Nemejuamej xnenkiseliaj on tlajtlamach* nion xnenkinkauiliaj oksekimej ma kiselikan yejuan kinekij.

53Ijkuak Jesús otlan kinmijlia in tlajtlamach*, on temachtijkej ikan itlanauatil Dios niman on fariseos* sanoyej okualankej niman opejkej kixnamikij niman sa tlajtlamach* kitlajtoltiayaj. 54Niman yejuamej kinekiliayaj ma kijto itlaj yejuan uelis ika kiteixpanuiskej.

Currently Selected:

San Lucas 11: nguNT

Highlight

Copy