Nau Ntơm 26

Nau Kôranh Brah ton ma Isăk

1Nôk nây geh nau ji sŏt ji ngot kuŏng ta bri nây du tơ̆ jât, tâm ban ma lĕ geh ta rnôk Abrahăm nơh đŏng. Ndri Isăk hăn ta ƀon Kêrar, gay ma dăn gŭ ndrel kađăch Abimalĭch, jêng kađăch phung Phalihtin. 2Jêh ri Brah Yêhôva tâm mpơl ma Isăk, lah ma păng: “May lơi ôh du ta bri Êsip, ăn may gŭ ta ntŭk bri Gâp mbơh ma may hŏ.#12:7; 28:13 3Ăn may gŭ ta bri i mâu ôh di bri may nơm dja hŏ, Gâp mra gŭ ndrel ma may, Gâp mra ăn geh jêng ma may, Gâp mra ăn dâng lĕ bri dja ma may n'ho ma tât kon tât sau may, Gâp mra jan ngăn kơt nau Gâp lĕ ton ma Abrahăm bơ̆ may nơh.#NNt 22:16-18 4Gâp mra ăn kon sau may bâk rơ̆ ŏk tâm ban ma mănh kalơ trôk, Gâp mra ăn dâng lĕ bri dak dja ma kon sau may, jêh ri dâng lĕ bunuyh lam neh ntu dja bu mra sŏ dơn geh jêng yor ma tă bơh kon sau may dadê.#26:24; 24:60; 12:2; 28:14; 22:18 5Gâp mra jan dâng lĕ ndơ i nây, yorlah Abrahăm iăt nau Gâp nơh, păng jan tâng nau Gâp đă Gâp lah, ndrel ma jan tâng nau vay Gâp”.#Yak 2:21

Isăk, ndrel ma kađăch Abimalĭch

6Jêh ri Isăk gŭ ta ƀon Kêrar nây. 7Lah bunuyh ta ƀon nây ôp păng ma nau ur păng nây: “Bu moh bu ur dja?” Păng mbơh ma bu lah: “Oh gâp”. Păng mâu ôh bănh mbơh ma bu lah ur păng, yorlah păng gĭt lah: “Gâp klach bu klô ta ƀon dja nkhât gâp, gay ma sŏ ur gâp, yorlah ur gâp uănh ueh reh ngăn”.#12:10-20; 20:1-18 8Tât păng gŭ ta ƀon nây lĕ jŏ ngăn, geh du nar kađăch Abimalĭch jêng kađăch phung Phalihtin, păng uănh bơh mpông bloh ri, say Isăk ndrel ma Rêbêka i ur ri tâm ut tâm lôr. 9Jêh ri kađăch Abimalĭch đă bu kuăl Isăk, lah păng: “Păng ur may ngăn, mơm dâng may lah «Păng oh gâp»?” Isăk ơh: “Dâng gâp lah kơt nây, yorlah gâp klach bu nkhât yor ma ur gâp nây”. 10Kađăch Abimalĭch lah ma păng: “Moh dâng may jan ma hên kơt nây? Lah geh du huê ta phung ƀon lan gâp bêch ndrel ma ur may, lah ndri may nsŭk phung hên jêng tih”. 11Jêh ri kađăch Abimalĭch mbơh dâng lĕ phung ƀon lan, păng lah kơt nđa: “Bu moh jan djơh bu klô dja, mâu lah i ur păng, nkhât lơi bunuyh nây”.

Isăk tâm rnglăp ndrel kađăch Abimalĭch

12Isăk gŭ tuch tăm ta bri nây, tât păng kăch păng rek păng geh rhiăng, yorlah Brah Yêhôva ăn geh jêng ma păng. 13Jêh ri tât păng ndrŏng, tât păng geh drăp ndơ lơ ma ŏk n'ho ma jêng bunuyh dŭt ndrŏng ngăn. 14Păng geh be biăp, geh ndrôk ŏk ngăn, ndrel ma geh bunuyh sơm kơl jan kar ŏk đŏng, kơt ndri phung Phalihtin mâu nach ma ôbăl. 15Dâng lĕ ntu dak mpôl sơm kơl jan kar bơ̆ păng Abrahăm kuyh rnôk Abrahăm hôm rêh nơh, phung Phalihtin brôi lĕ phiao. 16Jêh ri kađăch Abimalĭch lah Isăk: “May du bơh ntŭk dja hŏm, yorlah may geh bunuyh geh drăp ndơ dŭt ŏk rlao hên”.

17Jêh ri Isăk du bơh ntŭk nây hăn gŭ ta njŏng yôk Kêrar, tê̆ chun bok gŭ ta ntŭk nây. 18Isăk đă bu kuai tay dâng lĕ ntu dak Abrahăm i bơ̆ de kuyh ri nơh, yorlah lĕ phung Phalihtin de brôi lơi dadê jêh khât Abrahăm nây nơh, Isăk tê̆ tay rnha dâng lĕ ntu dak i nây tâng kơt rnha i bơ̆ păng lĕ tê̆ nơh đŏng. 19Mpôl sơm kơl jan kar Isăk kuyh du ntu dak ta njŏng yôk nây, geh dak lôh hoch nâng bơh ntu i nây. 20Yơn ma phung chiăp ta bri Kêrar nây tâm lŏk đah phung chiăp Isăk, phung nây lah: “Dja jêng ntu dak hên” jêh ri Isăk tê̆ rnha ntu nây «Êsêk», geh nau khlay lah «Nau tâm rlăch», yorlah phung nây lĕ tâm lŏk đah păng. 21Mpôl sơm kơl jan kar Isăk kuyh tay du mlŏm ntu dak jât, yơn ma phung chiăp tâm lŏk đah păng đŏng, ndri Isăk tê̆ rnha ntu dak nây «Sĭtna», geh nau khlay lah «Tâm rdâng». 22Jêh ri păng du ntŭk êng, păng kuyh tay du mlŏm ntu dak jât, ntu dak nây mâu hôm ôh say bu tâm pit, ndri dâng păng tê̆ rnha ntu dak nây «Rêhôƀôt», geh nau khlay lah «Huy», păng lah: “Aƀaơ dja Brah Yêhôva lĕ ăn ntŭk huy ma hên jêh, ăn hên geh drăp ndơ ndrŏng ta bri dja”. 23Jêh ri păng du bơh ntŭk nây hăn gŭ ta ƀon Ƀêrsêƀa. 24Ta măng nây Brah Yêhôva tâm mpơl ma păng, lah ma păng kơt nđa: “May lơi ôh klach, yorlah Gâp gŭ ndrel may, Gâp dja i brah Abrahăm bơ̆ may yơk mbah nơh, Gâp ăn geh jêng ma may, Gâp jan ăn may geh kon geh sau bâk rơ̆, yorlah Abrahăm nơh i bunuyh sơm kơl jan kar ma Gâp”.#12:2 25Jêh ri păng jan du ntŭk ma jan brah ta ntŭk nây, păng yơk mbah Brah Yêhôva ta ntŭk nây. Păng tê̆ chun bok păng nơm gŭ ta ntŭk nây, jêh ri mpôl sơm kơl jan kar păng kuyh ntu dak ta ntŭk nây đŏng.

26 # NNt 21:22 Geh du nar kađăch Abimalĭch hăn mâp Isăk, hăn ndrel păng geh Ahusat jêng bunuyh kơl păng, ndrel ma Phikŭl jêng kôranh tahen păng đŏng. 27Isăk lah ma kađăch nây: “Moh nau khân may hôm ŭch hăn mâp gâp, yorlah khân may lĕ biănh mprơh gâp”. 28Kađăch Abimalĭch lah ma Isăk: “Lĕ hên gĭt Brah Yêhôva gŭ ndrel may ngăn, kơt ndri hên mân, hên ŭch ăn bân tâm ton tâm rnglăp ndrel. 29Ăn may ton ma hên, may mâu lơh djơh ma hên, kơt hên mâu lơh djơh ma may, jan ndơ ueh dơm ma may, lĕ ăn may sât đăp mpăn nơh, aƀaơ dja may lĕ Brah Yêhôva de ăn geh jêng đŏng”. 30Isăk ndrăp nhêt sa kuŏng ăn ma kađăch, ndrel ma lĕ phung i hăn ndrel păng nây, jêh ri khân păng nhêt sông sa ndrel ta ri dadê. 31Tât ôi tay, khân păng dâk ơm ôi tâm ton băl, jêh ri Isăk njŭn kađăch Abimalĭch, ndrel ma phung i hăn ndrel păng nây sât, khân păng sât đăp mpăn. 32Ta nar nây đŏng, mpôl sơm kơl jan kar ma Isăk hăn mbơh ma păng ntu dak i khân păng mhe kuyh nây nơh, khân păng lah: “Ntu hên kuyh nơh lĕ geh dak”. 33Isăk tê̆ rnha ntu dak nây «Sipa», geh nau khlay lah «Nau ton», ndri dâng bu ntơ ƀon nây «Ƀêrsêƀa», geh nau khlay lah «Ntu dak ton#26:33: Ma nau khlay ma rnha ntu dak i nây dăn uănh ta, NNt 21:31.», n'ho ma tât aƀaơ dja.

34Tât Êsao lĕ geh 40 năm, păng sŏ ur bar bơh phung Hêt, du huê rnha Yuđit i kon Ƀêri, i du huê rnha Ƀahmat i kon Êlôn.#24:3-4 35Lĕ bu ur bar hê nây jan ăn Isăk, ndrel ma Rêbêka rngot ngăn.

Currently Selected:

Nau Ntơm 26: cmoL

Highlight

Copy