Nau Ntơm 14
14
Ăbram tâm lơh dơi đah ma kađăch êng êng
1Nôk nây geh du huê kađăch kuŏng rnha Kêđôlômơr jêng kađăch ta bri Êlam, păng tâm rnglăp đah pe nuyh kađăch, kađăch ta bri Sinơr rnha Ămraphel, kađăch ta bri Êlêasar rnha Aryŭk, ndrel ma kađăch ta bri Kôyim rnha Thiđal. 2Lĕ puăn nuyh kađăch i nây leo băl hăn tâm lơh đah prăm nuyh kađăch, kađăch ta ƀon Sôđŭm rnha Ƀêra, kađăch ta ƀon Kômôra rnha Ƀirsa, kađăch ta ƀon Atma rnha Sinap, kađăch ta ƀon Sêpoyim rnha Sêmêpơr, ndrel ma kađăch ta ƀon Ƀêla i bu kuăl đŏng ƀon Sôar. 3Lĕ rngôch prăm nuyh kađăch i nây, rgum tahen khân păng nơm hăn tâm rnglăp ndrel ta rđŭng yôk Siđim dadê, ntŭk dak văch dak văr boh aƀaơ ri. 4Lĕ geh 12 năm jêh, lĕ prăm nuyh kađăch i nây gŭ ta nâm kađăch kuŏng Kêđôlômơr, tât năm 13 khân păng leo băl bah iăt nau đah kađăch i nây. 5Yơn ma tât năm 14 kađăch Kêđôlômơr, ndrel ma lĕ kađăch i gŭ ndrel păng, leo băl hăn tâm lơh đah mpôl kađăch i bah iăt nau păng. Dôl hăn rŏ trong nây, khân păng tâm lơh đah phung Rêphem ta ƀon Asthôrôt-Karnem, phung Sôsim ta ƀon Hăm, phung Êmim ta ntŭk bri lŏng Khĭriathem 6ndrel ma phung Hôri rŏ yôk Sêir, n'ho ma tât ta ƀon Elƀaran dăch ma bri rdah ri. 7Jêh dơi khân păng tâm lơh đah phung i nây, khân păng plơ̆ sât bơh nây tât ta ƀon Ên-Misphat, i bu kuăl ƀon Kađeh đŏng, khân păng tâm lơh đah phung Amalêk ta bri nây, ndrel ma đah phung Amôri gŭ ta bri Hasasôn-Tamar nây dơi khân păng đŏng.
8Phung kađăch prăm nuyh i bah iăt nau kađăch kuŏng Kêđôlômơr nơh, jêng kađăch ƀon Sôđŭm, kađăch ƀon Kômôra, kađăch ƀon Atma, kađăch ƀon Sêpoyim, ndrel ma kađăch ƀon Ƀêla, khân păng leo băl tâm lơh ta rđŭng yôk Siđim. Ƀon Ƀêla i nây bu kuăl ƀon Sôar đŏng. 9Ta rđŭng yôk Siđim nây, khân păng tâm lơh đah kađăch Kêđôlômơr jêng kađăch bri Êlam, kađăch Thiđal jêng kađăch bri Kôyim, kađăch Ămraphel jêng kađăch bri Sinơr, ndrel ma kađăch Aryŭk jêng kađăch bri Êlêasar, ndri geh puăn kađăch tâm lơh đah prăm kađăch. 10Ta rđŭng yôk Siđim nây geh ntu dak pring krăk ŏk ngăn. Dơi kađăch Kêđôlômơr, jêh ri kađăch ƀon Sôđŭm, ndrel ma kađăch ƀon Kômôra nchuăt chah chrai tŭp ta ntu pring ri khât lĕ phiao ndrel tahen khân păng nơm, jêh ri kađăch i hôm pe nuyh ri nchuăt jât yôk ri. 11Kađăch i dơi lơh bu nây, khân păng sŏ lĕ drăp ndơ ta ƀon Sôđŭm, ndrel ma ta ƀon Kômôra ri, nđâp ma ndơ sông sa đŏng, jêh ri du sât bơh ntŭk nây. 12Lŭt i mon Ăbram gŭ ta ƀon Sôđŭm ri, bu nhŭp rdu păng đŏng, ndrel ma lĕ drăp ndơ păng.
13Geh du huê bunuyh klaih, hăn nchuăt mbơh ma Ăbram i phung Hêbrơ, nôk păng hôm gŭ ta ntŭk tơm jri Mămrê. Mămrê jêng bu klô phung Amôri, jêng oh nô ma Ehkŭl, ndrel ma Anơr đŏng. Ehkŭl, ndrel ma Anơr nây lĕ tâm rnglăp ma Ăbram. 14Tât Ăbram tăng lah mon păng lĕ bu nhŭp rdu, păng leo băl 318 nuyh, jêng bunuyh i blao tâm lơh i deh ta jay păng nơm, khân păng tâng phung rlăng tât ta ƀon Đăn. 15Ăbram tâm pă mpôl ta phung păng nơm nây, jêh ri lơh phung kađăch i nây ta nôk măng, n'ho ma tâng lơh tât ta ƀon Hôpa mpeh bơh lơ ƀon Đamas ri. 16Khân păng sŏ sât dadê lĕ drăp ndơ, sŏ i mon Lŭt păng ri, ndrel ma drăp ndơ păng đŏng, sŏ phung bu ur, ndrel ma lĕ rngôch bunuyh êng êng i bu nhŭp đŏng.
Ăbram ndrel ma kađăch Mĭlkisađek
17Jêh Ăbram sât dơi tâm lơh đah kađăch Kêđôlômơr, ndrel ma kađăch aƀă êng i gŭ tâm rnglăp ndrel kađăch nây, kađăch ƀon Sôđŭm hăn chuă păng ta rđŭng yôk Savê, i bu kuăl đŏng «Rđŭng yôk kađăch». 18Jêh ri kađăch ƀon Salêm rnha Mĭlkisađek ndjôt nŭmpăng, ndrel ma ndrănh play yŭng yar ƀon ma ăn Ăbram, kađăch nây jêng bunuyh jan brah ma Kôranh Brah i dŭt prêh.#NMƠ 110:4; Hêb 5:6, 10; 7:1-10 19Păng lah nau geh jêng ăn ma Ăbram:
“Dăn Kôranh Brah i dŭt prêh ta kalơ, nơm tơm njêng trôk, ndrel ma neh ntu, ăn nau geh jêng ma may.
20Rnê ma Kôranh Brah i dŭt prêh ta kalơ, brah i ăn may dơi đah phung rlăng may”.
Jêh ri Ăbram ăn ma kađăch i nây du kô̆ tâm jât, lĕ drăp ndơ i păng sŏ lơh bu ri nơh.#28:22; KLê 27:30-33
21Jêh ri kađăch ƀon Sôđŭm lah ma Ăbram: “May mplơ̆ ƀon lan gâp nơm ma gâp găp hơyh, drăp ndơ i nây may sŏ dôh”. 22Yơn ma Ăbram lah ma kađăch ƀon Sôđŭm nây: “Gâp ton ta bơh năp Brah Yêhôva i Kôranh Brah dŭt prêh, nơm tơm njêng trôk, ndrel ma neh ntu 23gâp mâu ôh sŏ drăp ndơ may du mlŏm, bol lah du mlŏm rse brai, mâu lah du mlŏm rse ntô jot kŏ gâp mâu sŏ đŏng, lơi ăn may lah: «Gâp ya sơm n'hơm ndrŏng ăn Ăbram». 24Gâp mâu ôh sŏ ndơ, gâp dăn may ăn ndơ sông sa i phung hăn tâm lơh ndrel gâp jêng phung i gŭ ta jay gâp nơm lĕ jêh sa nơh găp hơyh. Yơn ma Anơr, Ehkŭl, ndrel ma Mămrê, khân păng jêng bunuyh tâm rnglăp ndrel gâp, ăn khân păng nây sŏ êng drăp ndơ ma khân păng nơm”.
Currently Selected:
Nau Ntơm 14: cmoL
Highlight
Share
Copy
Want to have your highlights saved across all your devices? Sign up or sign in
© (Active) Wycliffe Bible Translators, Inc. All rights reserved.
