San Juan 10

Ka̱n mi̱xkui̱tilo pan borre̱gojmej

1Jesús sej kijlij fariseojmej:

—Nimitznojma‑ijliáj iga yej ayá̱ꞌ kalaki ipan ipue̱rtajyo kóla̱l ka̱n onokej borre̱gojmej, ma̱jwaꞌ kalaki seꞌ lado, ino̱nwaꞌ yej tachteki, iwá̱n tamaga iga kikui yej ayéj itatki. 2Eꞌ yej kalaki ipan puerta, ino̱nwaꞌ in pastor yej kicuida̱rowa borre̱gojmej. 3Yej tacuida̱rowa pan puerta, kitapowiliá puerta iga makalaki pastor, iwá̱n borre̱gojmej kitajto̱lkakij. Pastor kino̱tza ipan ito̱ka̱mej, iwá̱n kikiki̱xtiá kóla̱lko. 4Iwá̱n kua̱ꞌ kikijkí̱xtija inochi borre̱gojmej, in pastor tapanowa, iwá̱n borre̱gojmej kitokaj iga kitajto̱lkakij. 5Eꞌ ayá̱ꞌ kitokaj seꞌ yej aki̱xmatij, ma̱jwaꞌ sencholowaj, iga ayá̱ꞌ kitajto̱lkakij yej ná̱mo̱l.

6Jesús kine̱xtilij ka̱n mami̱xkui̱ti̱ka̱n, eꞌ yejemej akimatikej te̱ kijto̱jneki.

Jesús yej kiye̱ꞌcuida̱rowa borre̱gojmej

7Inó̱n iga Jesús sej kijlij fariseojmej:

—Nimitznojma‑ijliáj iga nej ken nipue̱rtaj ka̱n kalaki borre̱gojmej. 8Inochi yej wa̱lkej achto que nej, inó̱mejwaꞌ yej tachtekij iwá̱n tamagaj iga kikuij yej ayéj itatkimej; eꞌ borre̱gojmej ayá̱ꞌ kitajto̱lkakikej. 9Nej nipue̱rtaj, yej ipan nej kalaki, moma̱nawiá, ken tikita inó̱n borrego yej ki̱sa iwá̱n kalaki iwá̱n kasi sakaꞌ.

10’Yej tachteki wi̱ꞌ iga san tachtekiki, tamiktiá iwá̱n tapolowa, eꞌ nej niwa̱laj iga xiye̱ꞌonoka̱n nochipa, wa̱n amo mamitzpolo̱ka̱n nité̱. 11Nej yej nikye̱ꞌcuida̱rowa borre̱gojmej. Pastor yej kiye̱ꞌcuida̱rowa borre̱gojmej este mote̱maka iga mamiki. 12Eꞌ yej tekipanowa iga san tata̱niá, kua̱ꞌ kita wi̱ꞌ se̱ weyi koyo̱ꞌ,#10:12 Español: lobo. Lobo ken weyi koyo̱ꞌ. ompa kikajte̱wa borre̱gojmej, iwá̱n cholowa, iga ayéj pastor iwá̱n iga ayéj itatki borre̱gojmej. Iwá̱n weyi koyo̱ꞌ kita̱talochtiá borre̱gojmej, iwá̱n sempa̱payi̱nij. 13Inó̱n ta̱gaꞌ cholowa iga yéj kinékisan tomi̱n, ayéj borre̱gojmej.

14’Nej yej nikye̱ꞌcuida̱rowa borre̱gojmej, inó̱n iga niki̱xmati noborre̱gojmej iwá̱n noborre̱gojmej no̱ ne‑i̱xmatij. 15Ijkó̱n ken noTaj ne‑i̱xmati nej no̱ niki̱xmati noTaj; iwá̱n nej nimote̱maka iga manimiki iga noborre̱gojmej. 16Nikpiá no̱ seꞌ noborre̱gojmej, yej ayá̱ꞌ onoꞌ ipan iní̱n kóla̱l, iwá̱n nia no̱ nikuajligati ipan iní̱n kóla̱l. Ijkó̱n yejemej no̱ ne̱tajto̱lkakiskej, iwá̱n onos se̱san kóla̱l iga borre̱gojmej iwá̱n se̱san pastor.

17’Inó̱n iga noTaj ne̱cho̱kiliá, iga nimote̱maka iga nimiki iga noborre̱gojmej iwá̱n sej ni‑ojpa‑isas. 18Ayagaj wel ne̱miktiá, sino que nej nimoyokate̱maka iga nimiki. Nej wel nimote̱maka iga mane̱mikti̱ka̱n iwá̱n wel sej ni‑ojpa‑isa. Ijkó̱n ne̱tekimáꞌ noTaj.

19Kua̱ꞌ judiyojmej kikakikej inó̱n tajto̱lmej, sej moyojyokatijkej. 20Miaꞌ kijtowa̱yaj:

—¿Te iga ankichi̱wiliáj caso, yejwaꞌ kipiá ma̱lespí̱ritoj iwá̱n lo̱kojtitoꞌ?

21Eꞌ sekin kijtowa̱yaj:

—Ayagaj yej kipiá ma̱lespí̱ritoj wel ijkó̱n tajtowa. ¿Ix wel se̱ ma̱lespí̱ritoj ki̱xtapowa pachamej?

Judiyojmej ta‑ijiyaj

22Inó̱n ve̱j sektaj, iwá̱n Jerusalén nemi kilwichi̱wilia̱yaj weyitio̱pan. 23Jesús onoya weyitio̱pan, ila̱doj kalte̱n yej ito̱ka̱ꞌ Salomón, 24iwá̱n judiyojmej kiyawalojkej Jesús, iwá̱n tatajtankej:

—¿Este ke̱man nikmelaꞌmatiskej a̱ꞌyéj in tej? Siga tej tiCri̱stoj xine̱nojma‑ijli̱ka̱n nokta.

25Jesús kijtoj:

—Nimitzijlíjkeja iwá̱n ayá̱ꞌ anne̱cre̱dojkej. Yej ankitaj nikchi̱wa iga ijkó̱n nokta ne̱tekimaka noTaj, inó̱n kimelaꞌne̱xtiá a̱ꞌyéj in nej. 26Eꞌ amejemej ayá̱ꞌ ankicre̱dowaj iga ayéj anoborre̱gojmej, ijkó̱n ken nimitzijlíjkeja. 27Noborre̱gojmej ne̱tajto̱lkakij, iwá̱n nej no̱ niki̱xmatij iwá̱n ne̱tokaj. 28Nej nikchi̱wa iga nochipa maonoka̱n iwá̱n noTaj, iwá̱n ayagaj ne̱kui̱li̱j. 29Nochi noborre̱gojmej ne̱máꞌ noTaj, yéj má̱j kipiá poder que nochi, iwá̱n ayagaj wel kikui̱liá yej kipiá ipan ima̱ꞌ. 30Nej iwá̱n noTaj se̱san.

31Iwá̱n judiyojmej sej kikuikej teꞌti iga kipata̱naltiliáj Jesús. 32Iwá̱n Jesús kijtoj:

—Níkchija miaꞌ yej ye̱kti amo‑i̱xtaj iga ipode̱r noTaj; ¿iga katiapa de inó̱n yej nikchij annetemiti̱jnekij?

33Judiyojmej kijtojkej:

—Ayá̱ꞌ niawij nimitztewi̱tij iga tikchij yej ye̱kti, sino que iga tima̱ltajtoj iga Dios; tej tita̱gaꞌ iwá̱n tikijtowa iga tiDio̱s.

34Jesús kijlij judiyojmej:

—Ipan amoley ijkuilijtoꞌ yej Dios kijtoj: “Amejeme̱n andio̱smej.” #10:34 Sal 82:6 35Tikmatij iga yej kijtowa itájto̱l Dios ijko̱nya nokta, iwá̱n Dios kito̱ka̱wij dio̱smej ino̱mej yej kikakikej itájto̱l. 36Siga Dios ne̱tapejpen iwá̱n ne̱ti̱tan ipan iní̱n ta̱jli, ¿kén ankijto̱skej iga nima̱ltajtoj iga nikijtoj iga nej iPiltzi̱n Dios? 37Siga ayá̱ꞌ nikchi̱wa yej kichi̱wa noTaj, amo xine̱cre̱do̱ka̱n. 38Eꞌ siga nikchi̱wa yej kichi̱wa noTaj, malej ayá̱ꞌ anne̱cre̱dowaj nej, eꞌ xicre̱do̱ka̱n yej nikchi̱wa, iga xikmelaꞌmatika̱n nokta iga noTaj onoꞌ nowa̱n iwá̱n nej nonoꞌ iwá̱n noTaj.

39Sej kiwi̱gasnekiáj preso, eꞌ Jesús choloj.

40Iwá̱n Jesús yajki ipan we̱ya̱ꞌ Jordán iki̱sáya̱mpa to̱nati̱ꞌ, iwá̱n ompa ka̱wiꞌ, ka̱n Juan tekitabautiza̱rowa̱ya. 41Miaꞌ gente yajkij kitatoj, iwá̱n kijtowa̱yaj:

—Melá̱ꞌ iga Juan ayá̱ꞌ kichij nisé̱ milagro, eꞌ nochi ken kijtoj Jesús, ómpaya nokta.

42Miaꞌ kicre̱doj Jesús ompa ka̱n onoyaj.

Currently Selected:

San Juan 10: nhxMNT

Highlight

Copy