Matiu Utu iviva
Utu iviva
Matiu iye Jisas gharaghambu regha, na idae regha Livai. Matiu va ghakaiwo i mbana takis weŋgi gharɨgharɨ, na va e ghakaiwoko ghayamoyamo ŋgoreiye. Matiu va i roriya bukuke iyake thiye Jiu gharɨgharɨniye kaiwanji.
Matiu le bukuke e tɨne i woraŋgiya weinda Jisas iye Ravavaghare, iye valɨkaiwae i vavaghareŋgiya gharɨgharɨ Loi le ghamba mbaro kaiwae. Le vavaghare vavana ra thuweŋgi Vaŋgothiye 5 gheghad 7, Vaŋgothiye 10, Vaŋgothiye 13, Vaŋgothiye 18 na Vaŋgothiye 24 gheghad 25.
Tembe ŋgoreiyeva Matiu i vaghareinda Jisas iye Mesaiya iyava e Dagerawe Teuye tɨne ghalɨŋae gharautu va thɨŋa ne i mena. I woraŋgiya ghalɨŋae gharautu lenji utuutu kaero iye “Mesaiya” iye vaŋa Hibru idaniye, ghathombe e vaŋa Grik iye “Krais.” “Mesaiya” gharumwaru ŋgoreiye “iye thɨ ruvuya bunama e umbaliye.” The lolo thoŋgo thɨ ruvuya bunama e umbaliye iye tututhi loloniye. Iya kaiwae Matiu i woraŋgiya weinda Jisas iye Mesaiya. Ko iyemaeŋge Jiu thɨ renuwaŋa thɨ munjeva Mesaiya ne i mena na i vamidiya le ghamba mbaro e yambaneke na i varinjoŋgiya Jiu ghanjithɨghɨyaŋgi. Jisas ghe mbaŋa e tɨne Rom gharɨgharɨniye thɨ mbaroŋa Jiu ghambanji.
Jiu mava thɨ loŋweghathɨgha Jisas, va thɨ botewoyathu na thɨ rokros. Matiu Vaŋgothiye 21 gheghad 27 i woraŋgiya budakai va i yomara e wikɨko iyako tɨne ko amba thɨ rokros. Vaŋgothiye 28 i utuŋa Jisas le thuweiru utuniye.
Matiu le bukuke i govunɨwe Jisas i variyeŋgiyaŋgiya gharaghambu na vethɨ utuŋa utuniye weŋgiya gharɨgharɨke wolaghɨye e valɨvaŋgake wolaghɨye.
Currently Selected:
Matiu Utu iviva: tgo
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. All rights reserved.