SAN LUCAS 4

An xapay makxkay'un lhila'ts'intanuy an Jesús

(Mt. 4:1-11; Mr. 1:12-13)

1An Jesús sawalhcha ixla'tanu'ojota an ixTakuwin Dios akxni tasp'itcho'ochalh an ayxkan tan junkan Jordán. Chi an ixTakuwin Dios lhi'alhcha lakak'iwin. 2T'up'uxam wilhchani ancha ixt'awnachalh. Ancha an xapay makxkay'un ixlila'ts'intanuycha an Jesús. Jantu k'is tu'u ix'uy an Jesús an t'up'uxam wilhchan, ixli'astan chawanalhcha. 3Pus an xapay makxkay'un juniy:

―Li isTs'alhk'at'i Dios, k'aja'un ani chiwx li katatapalalh pan.

4An Jesús alhtaylh juniy:

―Ts'o'kanta tan najun: “Jantu wa pancha katiputsukulh an lapanak, [wachu kaputsukuya chux an ixchiwinti Dios].”

5Wa chuncha an xapay makxkay'un a'tam lhi'ampalh lakatam laka ay a'stitawk'a an Jesús, chi lakmasuni'olhcha an laj'ay lhich'alhkat alin lakamunulhpa chi an ixk'usinti. 6Juniy:

―Akxta'ni'oyancha chux ani lhich'alhkat chi an ixk'usinti, mu kit'ini kima'axta'nikanta, kit'in layi akma'axta'niya yu ikma'axta'niputun. 7Li ak'int'ats'o'ott'aniya'a mi'anucha kajun'oya chux.

8An Jesús alhtaylh juniy:

―[¡K'ap'inchicha Satanás,] mu ts'o'muk'akanta an la ixchiwinti Dios tan najun: “Wa yucha an miJamach'alhkat Diosi k'at'ats'o'ott'aniya'a chi wa yucha k'ak'iklak'a'iya'a.”

9Walh lhi'ampalh la'acha'an Jerusalén, muk'achalhcha la ix'ukxni an tajtan, chi juniy:

―Li isTs'alhk'at'i Dios, k'awarj p'it'i an talaktsin. 10Mu ts'o'muk'akanta an la ixchiwinti Dios:

An Dios kajamakminiyani ix'angelhnin para li katalhistakni,

11katama'ch'apayani para li jant'u k'a'ayst'uk'uk'a laka chiwx.

12An Jesús alhtaylh juniy:

―Ts'o'muk'akanta tan najun: “Jant'u wa k'at'ilhila'ts'int'anut'i an miJamach'alhkat Dios.”

13Pus an xapay makxkay'un akxni la'ts'ilhi li tucha lay ali lhila'ts'intanuy, makawlhcha, sta apu'a'tamka'.

An Jesús a'taynilhcha lhichiwiniy an ixchiwinti Dios

(Mt. 4:12-17; Mr. 1:14-15)

14Ancho'olhcha xalakaat'un Galilea an Jesús, sawalhcha ixla'tanuni an ixTakuwin Dios, chi sawalhcha ixtamispayi ta ixlijalhi'ay an tan ixt'ajun. 15Ixjamasuniycha an laka lakcha'a tan ixtala'ta'ayxt'o'a an judiojnin, chi oxicha ixtalhipast'ak'a ixchuxk'an.

An Jesús alh la'acha'an Nazaret

(Mt. 13:53-58; Mr. 6:1-6)

16Alhcha la'acha'an Nazaret, tan ta'ayachalh, chi akxni sábado tanuchalhcha an laka cha'a an tan ixtata'ayxt'o'a an judiojnin, mu chunchacha ixlismanita, chi sa'cha ixyalh tsukulhcha punajuni an ixchiwinti Dios. 17Chi taxta'nilhcha an ixlibro Isaías, an yu ma'anchacha ixlichiwiniy ixchiwinti Dios, pus pux'otlhicha, walh ancha la'cha'alh tan najunta:

18An ixTakuwin Dios la ki'ukxni t'ajun,

mu yucha kilakpach'apalh la ixmaka para li

ajkalhixa'alalh an laj'oxi chiwinti an jakilhpatinin.

[Chi kimakminta para li ajkak'uch'ulh an yu wa

tala'ta'oxila'alhiy la ixjalhunutk'an.]

Chi para li p'asi aknawlh li an yu talaklhchawnan

kajamakawkalh,

chi katajalakawanalhi an yu jantu tajalakawanan.

Chi para li kajamakawkalhi an yu sawalhcha

jamama'alh'ajnikan.

19Chi para li aklhichiwinilhi yu chaway ani

oxi panch'e'ex yu ixnawin an Dios.

20Pasmilhcho'olhcha an libro an Jesús, xta'nicho'olhcha an yu ixja'a'tayjunun lapanak, chi tawilhcha. An yu ancha ixtat'aw'ojoy wa sa'cha ixtala'ts'ini an Jesús. 21Yucha tsukulhcha jajuniy:

―Chaway walhcha la mi'ukxlakapuk'an tacha an ts'o'kanta.

22Ixchuxk'an oxicha ixtalhichiwiniy an Jesús, chi sawalhcha ixtalhi'a'niya tacha an laj'oxi chiwinti ixchiwiniy, ixtalajuniy:

―¿Ani chu jantu yu an ists'alh José?

23Yucha jajuniy:

―Ijk'atsaycha li akilajunaw ani chiwinti: “Jak'uch'unu', k'ak'uch'uk'a mi'akstu! Wach'u k'a'ilht'u ani la mint'un yu t'ach'a lak'ilht'uchi la'acha'an Capernaúm.”

24Chi jajumpalay:

―Ani sawalhi an yu klajunaw, jantu xamati la'a'ikan yu lhichiwiniy ixchiwinti Dios tan la ixla'acha'an. 25Chi ixluwk'an t'akunini ixtat'ajun an xalakaat'un Israel yu ixtalaknitacha ixt'apapak'an akxni ixt'ajun an Elías, akxni la'at'utu k'ata apaytat jantu ixmin xkan, ay lhichawani ix'alin ani lakaat'un. 26Walh an Elías jantu mala'achakalhi para li ka'alh jala'ts'ini an t'akunin yu jamacha'an Israel, apalij la'acha'an Sareptaja mala'achakalh waniy la'acha'an Sidón, para li ka'alh la'ts'ini pumatam t'aku yu ixnitacha ixt'apapa'. 27Chi ixluwk'an yu ixtalaklakap'uch'i'ojotacha ixtat'ajun an xalakaat'un Israel akxni ixt'ajun an Eliseo, yu ixlichiwiniy ixchiwinti Dios. Walh jantu xamati k'uch'ukalh, apalij yucha an Naamán jamacha'a Siriaja k'uch'ukalh.

28Akxni chunchacha ta'alha'asmatlhi, ixchuxk'an an yu ixtatanumanalh an tan ixta'ayxt'o'nun sawalhcha tala'talh'amalh. 29Pus tatamakxtulhcha an Jesús an la'acha'an, talhi'alhcha tanchun la ix'ukxni a'stitawk'a tan ixla'acha'ank'an ixjuntachalh yu'uncha, sta anchacha ixtama'aj'ajuputun. 30Pero yucha japujataxtulh, alhcha.

Pumatam lapanak yu ixlakpach'apata makxkay'un

(Mr. 1:21-28)

31An Jesús alh Capernaúm xalakaat'un Galilea, chi akxni jantu ixtapatsakan wilhchan, ixjamasuniycha. 32Ixtalhi'a'niycha tacha an ixmasuy mu ixchiwiniy tacha yu lhit'ajun lhich'alhkat.

33An tan ixta'ayxto'nun ixtanun pumatam lapanak yu wa ixlakpach'apata makxkay'un, pus p'ascha pukilht'asay 34najun:

―¡Jijwa! Jesús de Nazaret, ¿t'isunch'a la't'ant'a? ¿Wa kilamintawcha lalakt'ilhi'ulanin? Kit'in ikmispayan, uxint'i Stalan'a ixlapanak Dios.

35Pus an Jesús la'a'aymalh juniy:

―¡Wasa'cha k'ak'ilhu, chi k'amak'awcha ani lapanak!

Wa chuncha an makxkay'un, ma'talhi an lapanak tan an ixtayanalh ali'in, pero jantu tani ilhtulh. 36Pus ixchuxk'an an yu tala'ts'ilh ixtalaktalhanancha, chi ixtalajumpaxay:

―¿Tisu wa tichiwinticha ani li layi ilhtuy li kata'osli an lakmakxkay'un chi ta'osa?

37Ta ixlijalhi'ay an tan ixt'ajun an Jesús sawalhcha ixmispakan.

An Jesús k'uch'ulh an ixput'icha'o'olh Simón

(Mt. 8:14-15; Mr. 1:29-31)

38Akxni taxtulhcha an Jesús an tan ixta'ayxto'nun an lapanakni, la ixcha'acha an Simoni tanuchalh, walh an ixput'icha'o'olh an Simón sawalhcha ixch'apata alhp'as iskakat, pus tatapayniniycha an Jesús li kak'uch'ulh. 39Yucha tantawilhi an tan ixmalh, la'a'aymalhi an alhp'as jaskakana', pus makawlhcha an alhp'as iskakat, chi wa akxni tayalhcha an ixput'icha'o'olh an Simón tsukulhcha jamaway.

Ixluwk'an ta'an'anini jak'uch'ulh an Jesús

(Mt. 8:16-17; Mr. 1:32-34)

40Akxni ta'aknuchalhcha an wilhchan, wa tuchicha ta'an'at ixtapakxanta yu ixtalaklhit'ajun ixta'an'ank'an, talhicha'anilhcha an Jesús, pus yucha ixjalaklakpach'apaycha pumatamjtamin chi ixjak'uch'uycha. 41Wachu tamakawlhi tanlhun lakmakxkay'un ixluwk'an an ta'an'anin, akxni ixtat'asay an lakmakxkay'un ixtanajun:

―Uxint'i an isTs'alh Dios.

Pero an Jesús jantu ixjamakawniya katachiwinilh. Ixjalaj'aymay, mu yu'uncha ixtak'atsayi li yucha an Cristo.

Ta ixlijalhi'ay Galilea ta'a'cho'olhi an Jesús

(Mr. 1:35-39)

42Akxni tunkulhcha an Jesús taxtulh, alhcha tan jantu la'acha'an. Pero an lapanakni ixtapuxkajuy pus tala'cha'alhi tan ixt'awnachalh, jantu ixtamakawniya li ka'alh, ixtach'apa'ulaputun, 43pero an Jesús jajuniy:

―Wachu lhitask'iniya li ak'alh nawna an ali la'acha'anaxni an laj'oxi chiwinti yu alin la ixlich'alhkat Dios, mu yucha kilhimakminkanta.

44Pus an laka lakcha'a an yu ixpulakta'ayxt'okan an Galilea, an Jesús ixlichiwiniycha an ixchiwinti Dios.

Currently Selected:

SAN LUCAS 4: tpp

Highlight

Copy