Rod maq liq 16

Haq pehnd che tawd sanr fea vid che

1Ker cher med#16:1 Ker cher med Ker cher med awr lehr Kawd ren thuq med muhd ni tuhz phawd awr cawg che yaog. Khreq yad awg mor awg khuhn ga vid sehr ma te che a nig ved a nax ma Pher ber haq ngag nig hehd haq sir vid ax che yaog. 2Khreq yad teq pa te kenr che heh, Jawd mawd Yer suq ve mehz khuhd haq ngawx lehq yawd haq haq yur-oq. Yawd a thoq ted ceng lor che liz ma koz, yawd haq ga vid-oq. Awg lawn ghod ver, yawd awr lehr chaw laex ghad haq ga vid vehr lehq ngag haq liz ga lar vehr che yaog.

3Ngag geh teq geha Yer suq Khreq ve kanx ga te che awg chawd Pid kid laq he lehq Ar kud laq#16:3 Pid kid laq he lehq Ar kud laq Pawd loq ve awg chawd phehq che yaog. Cy 18:2-3 haq ngawx. haq ngag duhd nuhd chehd che yaog lehd koz vid-oq. 4Ix mag awr lehr, ngag a saq gha pong tug ngag awg pun khanr suh che chaw phehq che yaog. Ngag lehax ix mag ved awg bon haq chid muh che ma hez, Yud daq chaw ma hez che Khreq yad awg mor awg gha lia liz, ix mag ved awg bon haq chid muh chehd che yaog. 5Ix mag ved yehg awg khuhn phawng daq chehd che Khreq yad awg mor haq liz ngag duhd nuhd chehd che yaog lehd koz vid-oq. Ar siq muhd mig awg khuhn Khreq yad awg kawd maq te ghad phehq che ngag haq che Ed pehr nehz haq liz ngag duhd nuhd chehd che yaog lehz koz vid-oq. 6Nig hehd awg pun kanx hax ceh nux te che Mar riq#16:6 Mar riq Liq phu khuhn Mar riq 6 ghad cawg che yaog. A sug te ghad haq koz che lehq nar kha nehax maq sir. haq liz ngag duhd nuhd chehd che yaog lehd koz vid-oq. 7Ngag geh thawnr khuhn chehd jaw che awg chawd, ngag ved Yud daq chaw ceng Ar dawd niq he lehq Yud niq haq liz, ngag duhd nuhd chehd che yaog lehd koz vid-oq. Ix mag awr lehr, cuh yad teq pa awg khuhn awg meh buhg che chaw phehq che yaog. Ngag Khreq yad mad phehaq ser huh liz ix mag Khreq yad phehq vehr che yaog.

8Jawd mawd Yer suq awg khuhn ngag haq che Ar par liq haq liz ngag duhd nuhd chehd che yaog lehd koz vid-oq. 9Ngag geh teq geha Khreq ve kanx te che Ud rar baq he lehq ngag haq che Sar tar khuz haq liz ngag duhd nuhd chehd che yaog lehd koz vid-oq. 10Kha nehax lawnd ngawx peg che Khreq yad Ar per ler haq liz, Ar rir tawr buq ve yehg yad ka yad teq pa haq liz ngag duhd nuhd chehd che yaog lehd koz vid-oq. 11Ngag ved Yud daq chaw ceng phehq che Her ror diq or he lehq Jawd mawd Yer suq awg khuhn chehd che Nar kir suq ve yehg yad ka yad teq pa haq liz ngag duhd nuhd chehd che yaog lehd koz vid-oq.

12Jawd mawd Yer suq awg pun kanx te chehd che Tar rud phehr naq he lehq Tar rud phawd saq haq lehd ma koz, Jawd mawd Yer suq ve kanx haq hax ceh nux te chehd che ngag haq che Per rar siq haq lehd ma koz, ngag duhd nuhd chehd che yaog lehd koz vid-oq. 13Jawd mawd Yer suq awg khuhn lez yug lar che Rud phuq he lehq ngar ye kheh taw sawnr lar che, yawd ved awr ye ix mag haq ngag duhd nuhd chehd che yaog lehd koz vid-oq. 14Ar sor kar, Phar ler gor, Her rar mer, Par rawd baq, Her rar maq he lehq i hehd geh chehd che a vix a nax teq pa haq ngag duhd nuhd chehd che yaog lehd koz vid-oq. 15Phi lawd luq, Yud liq, Ner ruq he lehq Ner ruq yawd ved awg nax ma, Awd lor par he lehq i hehd geh chehd che Khreq yad awg gha lia haq ngag duhd nuhd chehd che yaog lehd koz vid-oq.

16Nig hehd te ghad he lehq te ghad daq che kehg che awg khuhn bux daq lehq laq kuhr cax daoq. Khreq yad awg mor awg gha lia nig hehd haq duhd nuhd chehd che yaog lehd koz, tawd sanr fea lar che yaog.

17A vix a nax teq paog, nig hehd gha hend peg che mar lar che tawd khuhd teq pa haq maq hawr che, phaz daq tug te che he lehq su yaq daq vid tug te che chaw teq pa haq kha nehax ngawx lehq jaw kae-o lehz, ngag nig hehd haq lawg khawx che yaog. 18Awg lawn ghod ver, kheh te che chaw teq pa awr lehr, a nig ved Jawd mawd Khreq awg pun kanx te che ma hez. A sug yawd ved ux peg awg pun lehax kanx te che#16:18 ux peg awg pun lehax kanx te che Phu gha cad tug awg pun lehax te che haq koz che yaog. yaog. I hehd awr lehr, na sa che tawd he lehq chid muh che tawd khuhd haq yehd lehq, cud yiq mad cawg che chaw teq pa ve ni ma haq her ka yug che yaog. 19Nig hehd na yug vix che awg lawn awr lehr, chaw awg gha lia gha kad cheaq te lehq, ngag ha lehg chehd che yaog. Kheh ma khuhd, nig hehd awr lehr daq che awg ceng haq sir vix lehq, haeg che awg ceng ve awg lawn haq a cehax liz maq sir vix tug haq ngag he gad ser che yaog. 20Maq muh tand ver, duhd sa vid sehr phad Ghig sa awr lehr, nig hehd ve khi ho awg huhx lo Sar tanr haq naz nehz vehr tug yaog.

A nig ved Jawd mawd Yer suq Khreq ve awg bon awg sinx nig hehd geh cawg vid-oq.

21Ngag geh teq geha kanx te sehr phad Tiq mod ser he lehq ngag ved Yud daq chaw ceng Lud kiq, Yar sonr#16:21 Yar sonr Cy 17:59 he lehq Sawd sid par taq#16:21 Sawd sid par taq Cy 20:4 teq pa awr lehr, nig hehd haq duhd nuhd chehd che yaog lehd koz tawd sanr fea lar che yaog.

22Ngag awr lehr, liq che haq buhq sehr phad Ter rar tiq yaog. Ngag liz Jawd mawd Yer suq Khreq awg khuhn nig hehd haq duhd nuhd chehd che yaog lehd koz tawd sanr fea lar che yaog.

23Ngag haq lehd ma koz, Khreq yad teq mor awg gha lia haq lehd ma koz, haq yug lehq canr tawa sehr phad Gar yuq#16:23 Gar yuq Yawd ved yehg awg khuhn Pawd loq hax jaw che yaog. Cy 18:17 awr lehr, nig hehd haq duhd nuhd chehd che yaog lehd koz tawd sanr fea lar che yaog. Med che awg khuhn#16:23 Med che awg khuhn Kawd ren thuq med haq koz che yaog. phu haq sax sehr phad Ed rar tuz#16:23 Ed rar tuz Cy 19:22, 2Ti 4:20 he lehq a vix a nax Kawr tuq liz, nig hehd haq duhd nuhd chehd che yaog lehd koz tawd sanr fea lar che yaog.

Awg leh med bon lawg che khuhd

25Ghig sa haq awg mig awg phond co co taer taer cawg vid-oq. Yawd awr lehr, ngag mar vid che ha lehg che bon khuhd he lehq Yer suq Khreq awg lawn ngag bon mar che heh, nig hehd haq yeg lag vid vix che yaog. Ngag mar vid che bon khuhd che ve awr lehr, cuhx kig nax jad che tawd khuhd phehq che yaog. Tawd khuhd che ve awr lehr, a mig thad lo haq tanr lehq khuhd ceh lar che#16:25 khuhd ceh lar che 11:25 haq ngawx. liz, a meha kha sehax tuhaz vid vehr che yaog. 26Chaw ceng awg gha lia yonr lehq na yug tug, co co taer taer Ghig sa tawd pid lar che heh, cuh kar var teq pa ve liq haq te lehq khuhd ceh lar che tawd khuhd u ve haq a meha chaw ceng awg gha lia gha sir vehr che yaog. 27Yawd te ghad lehax cud yiq kha peh vad-ag cawg che Ghig sa phehq che yaog. Yer suq Khreq haq te lehq co co taer taer yawd haq chid ir chid muh vid-oq. A meng.

Currently Selected:

Rod maq liq 16: lhiNT

Highlight

Copy