Rod maq liq 11

Cawg chehd ser che Id sar rer laq chaw teq pa awg lawn

1Kheh te lehq ngag na ngawx che, Ghig sa yawd ved chaw ceng haq chid bag lar haz vehor la. Ma chid bag lar haz hawg. Ngag liz Id sar rer laq chaw te lehq, Ar brar hanr ve awg yad awg dug awg khuhn Ber yar minr ve awg ceng awg khad te ghad phehq che yaog. 2Awg kawd maq thad liz Ghig sa sir lar che,#11:2 Ghig sa sir lar che Ghig sa lez yug lar che lehd koz gad che yaog. 8:29, Bon 4:20 yawd ved chaw teq pa haq yawd chid bag lar haz che ma hez. Ed lid yaq awr lehr Ghig sa mehz khuhd suhr huh Id sar rer laq chaw teq pa haq vend bax tar lehq koz che, 3#1Jm 19:10, 19:14“Jawd mawd-og, nawg ved cuh kar var teq pa haq i hehd dawz vehr che yaog. Nawg ved tox tand kig teq pa haq liz i hehd dud kha vehor. Ngag te ghad lehax cawg lar haz lehq, ngag haq liz dawz vehr tug i hehd ca chehd che yaog,” lehz Liq phu khuhn buhq lar che haq nig hehd maq sir la. 4Kheh ma khuhd, Ghig sa yawd haq khawd-ehg kheh kawq koz vid cheawg le. #1Jm 19:18Bar laq sax ho mehz khuhd suhr huh khi cuhx maq teh che chaw suhr hinx ghad ngag awg pun ngag teh lar ser che yaog lehz kawq koz vid che yaog. 5Che ve haq kha sur suar, a meha awg yand awg khuhn liz, awg bon haq te lehq lez yug lar che chaw a cehax cawg lar ser che yaog. 6Awg bon#11:6 Awg bon 4:4 haq ngawx. haq te lehq lez yug che ver, kanx te che haq te lehq yawd i hehd haq lez yug lar che ma hez. Kanx te che haq caz daq che ver, awg bon u ve awr lehr, awg bon mad kawq phehq che yaog.

7Kheh te lehq, khawd-ehg kheh le. Id sar rer laq chaw teq pa awr lehr, i hehd ca che haq maq gha.#11:7 ca che haq maq gha Kanx te che haq lehax cud lehq, yonr che haq ma cud cheaq te lehq yaog. 10:3 Lez yug lar che chaw teq pa lehax gha lehq, ma lez yug lar che chaw teq pa awr lehr, Ghig sa i hehd ve ni ma haq heh vid vehr che yaog. 8Liq phu khuhn koz che heh,

# Bon 19:4, Isy 29:10 “Yaq ni kha gag yuhq mir ka chehd che ni ma lehd ma koz,

mad mawg vix che mehz sir lehd ma koz, ma kad vix che nar puh lehd ma koz,

Ghig sa i hehd haq pid che yaog,”

lehd koz lar che yaog. 9Dar viq liz koz che,

# Chid 69:22-23 “I hehd ve thi cad thi dawg che#11:9 I hehd ve thi cad thi dawg che Dar viq yawd ved cand par teq pa awg lawn koz chehd che yaog. Chid 69:22 awr lehr,

i hehd awg pun pehnr thuh lar che he lehq

va thuh lar che,

i hehd khi thid pong tug he lehq i hehd haq cir yanr tug kawq phehq vehr vid-oq.

10I hehd mehz mad mawg tug,

i hehd ve mehz sir awg naz tud phehq vehr vid-oq.

I hehd ve cuhq liz, khar thad liz kuhq ghad phehq vehr vid-oq,”

lehd koz che yaog.

Bid saz a naz chaw teq pa thaer khuhq che haq gha che

11Kheh te lehq ngag na ngawx che, Id sar rer laq chaw teq pa awr lehr, par kuhd vehr che thad kha gag khi thid pog cheawg la. Ma hez hawg. Kheh ma khuhd, Id sar rer laq chaw teq pa yaq che jiz che haq te lehq bid saz a naz chaw teq pa awr lehr, thaer khuhq che haq gha che yaog. Che awr lehr, Id sar rer laq chaw teq pa khawehx che ni ma cawag tug awg pun te che yaog. 12I hehd yaq che jiz che ted ceng awr lehr, mig gig yad#11:12 mig gig yad Bid saz a naz chaw haq koz che yaog. Cy 13:46-48, 18:16 teq pa haq Ghig sa ve awg bon awg khuhn paw sa vid gha lehq, i hehd sond che ted ceng awr lehr, bid saz a naz chaw teq pa haq Ghig sa ve awg bon awg khuhn paw sa vehr vid gha ver, awg mor awg khuhn i hehd kha peh vad-ag gehag thad huh, che haq keh lex lehq khawd-ehg taw maq awg bon awg khuhn kawq paw sa vehr vid gha tuawg le.

13Kheh te lehq, nig hehd bid saz a naz chaw teq pa haq ngag che kheh koz ax che yaog. Ngag bid saz a naz chaw teq pa awg pun cuh yad te lehq, kanx che ve haq ngag tar ir tar muh che yaog. 14Ngag kanx che ve#11:14 kanx che ve Ha lehg che bon khuhd mar che kanx haq koz che yaog. haq tar ir tar muh che awr lehr, ted ceng cenr haq te lehq ngag ved chaw ceng khawehx che ni ma cawg vid lehq, i hehd ted pehg pehar thaer khuhq che haq gha tug ngag te che yaog. 15Awg lawn ghod ver, Id sar rer laq chaw teq pa haq chid bag lar che haq te lehq, mig gig yad Ghig sa haq kawq cawd daq hawr daq vehr ver, Id sar rer laq chaw teq pa haq kawq haq yug che ted ceng awr lehr, suh kig lo kawq teq tuag che heh phehq che ma hez hawg la.

16Awg kawd tand vid che khaor mod#11:16 Awg kawd tand vid che khaor mod Ar brar hanr haq koz gad che yaog. awg cehd ted dig nehax daq kehg ver, khaor mod te dig nux awg gha lia liz#11:16 awg gha lia liz Id sar rer laq chaw haq koz gad che yaog. daq kehg che yaog. Awg chi#11:16 Awg chi Ar brar hanr haq koz che yaog. daq kehg ver, awg kax teq pa#11:16 awg kax teq pa Id sar rer laq chaw haq koz che yaog. Heh 15:18-21, Yrm 11:16, Nhm 10:37, Ysk 44:30 liz daq kehg che yaog. 17Awg kax teq pa haq tawz chid bag lehq, nig hehd sar lonr awg thenr#11:17 sar lonr awg thenr Bid saz a naz chaw haq koz che yaog. ve awg kax phehq che liz, yawd nig hehd haq yug lehq awg kax u ve teq pa cawg jaw kig huh sar lonr med cehg haq caz daq vid lehq, awg kag awr ve awg kax teq pa geh awg cuhd haq gha cad ver, 18tawz kha lar che awg kax teq pa awg khod-aq ni ma taq ir. Nig hehd ni ma ir ver, che haq duhd ngawx ser. Nawg awg chi haq car vid chehd che ma hez, awg chi nawg haq car vid chehd che#11:18 awg chi nawg haq car vid chehd che Bid saz a naz chaw teq pa thaer khuhq gha che awr lehr Yud daq chaw teq pa haq te lehq yaog, lehd koz gad che yaog. Yh 4:22 yaog.

19Ngag awg cehg haq gha cax daq tug, awg kax teq pa haq tawz kha vehor lehz, nawg koz tug yaog. 20Cawd che yaog. I hehd maq yonr cheaq te lehq tawz kha che haq gha khanr che yaog. Nawg awr lehr yonr che haq te lehq yeg chehd che yaog. Kheh te lehq, ni ma taq ir. Kuhz che ni ma cawg vid-oq. 21Awg lawn ghod ver, Ghig sa awr lehr sar lonr med awg kax#11:21 sar lonr med awg kax Yud daq chaw haq koz che yaog. haq maq teh lar vid ver, nawg haq liz teh tar ax tug ma hez. 22Kheh te lehq, Ghig sa har kax che ted ceng he lehq yawd hehnd chawa te che ted ceng haq duhd ngawx ser. Par kuhd chehd che chaw teq pa haq yawd hehnd chawa te che yaog. Kheh liz, yawd ved har kax che ted ceng awg khuhn nawg chehd chehd che ver, nawg haq yawd har kax che ted ceng cawg chehd che yaog. Yawd ved har kax che ted ceng awg khuhn nawg ma chehd ver, nawg haq liz#11:22 nawg haq liz Bid saz a naz chaw haq koz che yaog. tawz kha vehr tug yaog. 23Kheh te lehq, Yud daq chaw teq pa liz, maq yonr che awg khuhn mad kawq chehd don chehd che ver, awg cehg haq te pawz kawq cax daq vid tug yaog. Awg lawn ghod ver, i hehd haq te pawz kawq caz daq vid tug Ghig sa te gha che yaog. 24Awg lawn ghod ver, sar lonr cehg awg thenr awg ceng khuhn nawg haq tawz yug lehq, a sug yawd ved awg ceng ma hez che sar lonr med cehg haq cax daq vid ver, sar lonr med awg kax teq pa awr lehr, a sug yawd ved sar lonr med cehg haq lex lehq khawd-ehg taw maq sa che awg khuhn kawq caz daq vid gha tuawg le.

Id sar rer laq chaw teq pa haq kawq haq yug tug awg lawn

25A vix a nax teq paog, nig hehd a sug yawd ved cud yiq haq cud lehq ni ma maq gha ir tug, khuhd ceh lar che awg lawn#11:25 khuhd ceh lar che awg lawn Yud daq chaw he lehq bid saz a naz chaw teq geha Ghig sa ve awg sinx gha cad tug haq koz gad che yaog. Kaw 1:26-27 che ve nig hehd haq sir vid lar gad che yaog. Bid saz a naz chaw teq pa gehag maq peh ser che kheh ceh, Id sar rer laq chaw ted pehg pehar ni ma heh chehd che yaog. 26Kheh te lehq, Id sar rer laq chaw awg gha lia thaer khuhq che haq gha tug yaog. Liq phu khuhn buhq lar che heh,

# Isy 59:20-21 Pong vid sehr phad awr lehr, Yid onr awg khuhn lo tuhaz lehq,

Yar koq awg ceng awg khad teq pa awg khuhn lo haeg che ted ceng haq yawd yug chid bag tug yaog.

27 # Isy 27:9 Ngag i hehd ve vend bax haq yug kha che te yand,

che ve awr lehr i hehd geh ngag te tug kar tiq sax caz phehq che yaog,

lehd koz buhq lar che yaog. 28Ha lehg che bon khuhd haq koz ver, nig hehd awg bon gha tug i hehd Ghig sa ve cand par#11:28 Ghig sa ve cand par Maq yonr che Yud daq chaw teq pa haq koz che yaog. phehq che yaog. Kheh ma khuhd, Ghig sa lez yug che haq koz ver, a pux nux teq pa haq te lehq i hehd awr lehr Ghig sa haq che chaw phehq che yaog. 29Awg lawn ghod ver, Ghig sa kheha pehar che awg bon he lehq yawd kug yug lar che ted ceng haq yawd ved ni ma mad kawq pa. 30Nig hehd Bid saz a naz chaw awg kawd thad Ghig sa haq maq na yug liz, Id sar rer laq chaw teq pa maq na yug cheaq te lehq a meha nig hehd har kax che ted ceng haq gha vehr che heh, 31nig hehd yawd geh gha vehr che har kax che u ve haq te lehq i hehd liz har kax che haq gha tug, a meha i hehd maq na yug che yaog. 32Awg lawn ghod ver, chaw awg gha lia haq har kax vid tug, Ghig sa awr lehr chaw awg gha lia haq maq na yug che ted ceng awg khuhn ke huh lar che yaog.

33Ghig sa ve ir jad mad jad che cud yiq ma yiq he lehq sir vix che ni ma awr lehr, khawd-ehg taw maq nax jad cheawg le. Ghig sa suhx jehg suhx taz che teq pa awr lehr, a sug liz ca duhd mad gag. Yawd ved yaq kaw teq pa haq a sug liz ca mad mawg.#11:33 a sug liz ca mad mawg Isy 55:8 haq ngawx. 34#Isy 40:13Jawd mawd Ghig sa ve ni ma haq a sug sir cheawg le. Yawd haq a sug mar vid jehg vid jaw cheawg le. 35#Yb 41:11Ghig sa awg bon gha kawq te khuhq ax tug, a sug yawd haq awg kawd awg bon te vid jaw cheawg le. 36Awg lawn ghod ver, kha cawg chehd che awg ceng gha lia awr lehr, yawd geh lag che, yawd haq te lehq cawag lehq yawd awg pun te che yaog. Co co taer taer yawd haq chid ir chid muh vid-oq. A meng.

Currently Selected:

Rod maq liq 11: lhiNT

Highlight

Copy