Makụ 4

Ẹtu e gude onye l'atụ iwhe akụ anma

(Mát. 13:1-9; Luk. 8:4-8)

1O be nteke ọdo, ọ byakwa awata whẹ ozhi iwhe l'agụga eze-ẹnyimu ono. Igweligwe madzụ dọ-whe iya mgburumgburu, nke ọwhu ọ bahụru l'ime ụgbo, l'ese l'eli ẹnyimu ono je anọdu anọdu l'eze-ẹnyimu ono. Igweligwe ndu ono dọru l'eli-mgboko l'agụga eze-ẹnyimu ono swiru iya. 2O gude ẹtu dụ l'iche l'iche zhilahaa whẹ iwhe ha l'igweligwe sụ. 3“Unu ngabẹ nchị! Ọo nwoke lanụ bẹ jeru ọtu iwhe akụ. 4Nwoke ono l'atụ iwhe akụ ono, ọ harụ daa l'agụga echi-ụzo. Ụnwenu bya atụtua ya lwee. 5Ndu harụ nashịhu daa l'alị ẹjagiri ẹka anụ-alị l'ẹte adụa shii; e jia ekfu, o fushiwanu ome l'anụ-alị ono, igbi l'ẹte akwataa dụ. 6Anwụ chidelewho, ụnwu-iwhe ono, fushiwarunu ono nwụlwashihu, nkele whẹ ta agbabẹdu ọgbaragbu l'ime alị. 7O nweru ọwhu darụ l'ẹka ẹwu ogvu dụ l'ime alị. Yẹle ẹwu ogvu ono fushia, ẹwu ogvu ono vushia bya akpagbushia mebyi iwhe ono, whẹ ta amịtahe mebyi. 8Ndu harụ daa l'ẹka alị dụ ree. Ọ nọdu l'ẹka ono fushia vua, bya amịshia mebyi. Ndu mịtaru ụkporo l'iri, ndu mịta ụkporo ugbo ẹto, ndu mịta ụkporo ugbo ise.” 9Ọ sụ whẹ: “Onye ụzo-nchị dụ t'ọ nụa ya.”

Iwhe meru iwhe Jisọsu l'egudeje ẹtu ezhi iwhe

(Mát. 13:10-17; Luk. 8:9-10)

10Ọ nọdulewho nwẹkiya ndu nọ nteke ọ nmarụ ẹtu ono mẹe ụmadzu iri l'ẹbo whọ bya ajị iya iwhe ẹtu ono bụ. 11Ọ sụ whẹ: “Ọo unubẹdua bẹ Chileke meru t'unu marụ iwhe ono e shi domigee edomi l'okfu abụbu ono, Chileke bụ eze, ọle ndu ọdo bẹ l'a-nmakọtaru iwhe lile ono l'ẹtu. 12Nke ọwhu,

“ ‘whẹ l'e-leje ẹnya nta lee imo,

ọle ọ tọ dụdu iwhe whẹ l'a-whụ.

Whẹ angajẹe nchị nta ngaa imo,

ọle ọ tọ dụdu iwhe l'edo whẹ ẹnya.

Nggẹ l'ọ tọ dụ nno mẹ whẹ adawhu azụ lwakfuta

Chileke m'ọ gụaru whẹ nvụ.’ ”

Jisọsu l'akọ iwhe ẹtu ono bụ

(Mát. 13:18-23; Luk. 8:11-15)

13Ọ bya ajị whẹ: “?Ẹtu-a te edodu unu ẹnya? ?Ndẹe gẹ unu l'e-me majẹru ẹtu lile mu l'anmajẹ? 14Onye ono l'atụ iwhe akụ ono l'atụ okfu Chileke. 15Ndu ọwhu nọ l'agụga echi-ụzo ẹka l'agha okfu Chileke bụ ndu nụ-geeru iya nụ, e jia ekfu Sétanu shi rwua bya anafụ whẹ okfu ono a kụru l'ime obu whẹ. 16Ndu ọwhuna bẹ dụkwawho g'ọo mebyi iwhe a tụru l'ẹka ẹjagiri dụ. Whẹ nụ-geeru okfu ono, whẹ gude ẹhu-ụtso natakebe iya ree. 17Ọle ọ tọ gbabẹdu ọgbaragbu l'ime onwowhe. Nteke whẹ kpọleru-a nwụkfu, iwhe-ọtsulanu -byakfutale whẹ whọ, ọdua ya abụru nteke ndu ọdo l'akpa whẹ ẹhu nkele whẹ kwetaru okfu ono; mu abụru iya bụ iwhe l'a-kpata whẹ adashịa buhaa okfu ono. 18Ndu ọwhu bẹ dụ g'ọo iwhe akụ ono ọwhu darụ l'ẹka ogvu dụ l'ime alị. Whẹbedua bụ ndu nụru okfu Chileke, 19ọle whẹ l'arịnuka ọriri ẹhu whẹ. Oyenuka ẹnya l'ẹku mẹwaro iwhe ọdo, l'agụkaa whẹ enwenwe batanụ, bya akpalahaa okfu ono ẹhu. T'ọ mịhe amị. 20Ọle ndu ọwhu bụ mebyi darụ l'alị-ọsu: o noo ndu ọwhu l'anụ-gejee ya, whẹ ewota iya ye l'obu whẹ, o noo ndu ọwhu l'eyeje mebyi. Ọwhu l'amịta ụkporo l'iri, ndu amịta ụkporo ẹto, ndu ọwhu amịta ụkporo ise.”

Oryọku be l'eedobeje l'eli ẹka iwhoro iya l'a-ngashị

(Luk. 8:16-18)

21Jisọsu sụ whẹ: “?Ọ dụ onye l'anwụjeru ọku ye l'oryọku wota ite kpupyabe iya, ọdua onye ọbu enwua ya lẹ mkpula ugbooshi? ?Tọ dụ l'eli ẹka l'aatukobeje oryọku bẹ l'ọo-tukobe iya? 22O noo l'ọ tọ dụdu iwhe e domiru edomi l'ẹte abụa nggẹ e wofuta iya tụa jalaa b'e domituru iya, tẹmenu iwhe lile, l'eeme l'edomi bẹ bụkwawho nggẹ e wofuta iya iwhoro. 23Onye ụzo-nchị dụ t'ọ nụa ya.” 24Ọ sụ whẹ: “Unu kwabẹkwaru iwhe unu l'anụ lẹ nchị ẹnya. Ọo iwhe unu gude tụru iwhe nụ ibe unu bụ iwhe Chileke l'e-gudekwawho tụru nụ unubẹdua, ọo-gbẹenu nụ unubẹdua ọwhu ka shii. 25L'onye nweru nụ bẹ Chileke l'eyekwajeru l'ọwhu o nwe nggẹ ọ kabaa enwenwe. Ọle onye l'ete enwee nụ, bẹ nwanwa iya ọwhu o nwe enwenwe owhu bẹ l'ee-gbẹenu natafụa ya.”

Ẹtu mebyi iwhe l'efu efu

26Ọ sụkwa whẹ whọ: “Ẹka Chileke bụ eze dụ g'ọo nwoke gharụ mebyi iwhe l'alị. 27Chi jihu gụbe nwoke ekuru mgbẹnya, chi sahụ, ya etehu, mebyi iwhe ono fushia vushia, ya ama g'o meru me. 28Alị l'onwiya l'efuje iwhe. Iwhe ono l'evuje ụzo fushia, tẹmenu ya abya emee nzịrizaa, tẹmenu ya abya nteke ono bya awhọo ishi yee mebyi. 29Nteke mebyi iya ono kalẹruwho aka, nwoke ono, nwe iya nụ e gude mma bya egbuta iya nkele nteke l'eemetaje iwhe e meberu l'alị rwuwaru.”

Ẹtu e gude akpụru mọsutadu anma

(Mát. 13:31-32,34; Luk. 13:18-19)

30O kfugee nno, ọ sụkwa whẹ whọ: “?Ọo gụnu bẹ anyi l'a-sụ l'ẹka Chileke bụ eze dụ g'ọo ya? Mbụ ?ọo ẹgube ẹtu gụnu bẹ anyi l'e-gude kọo akọ g'ọ dụ? 31Ọ dụ g'ọo akpụru iwhe-akụ ono bụ mọsutadu, bụ iya kakọta vịtiviti l'akpụru oshi, l'aakụje akụ l'alị lẹ mgboko. 32Ọobuje nteke a kụru iya l'alị ya abya evuta, kakọta iwhe bụ iwhe l'aakụje akụ l'eli. Ya abya emeshia ẹkali nke ọwhu ụnwu-ẹnu l'ewhe l'eli l'abyajẹnu bya akpalahaa ẹkfunu whẹ l'ime iya.” 33Jisọsu gude ẹgube igweligwe ẹtu du-gee g'ọo ono zhibaa whẹ okfu Chileke gẹ whẹ l'a-dụ ike t'o dotabe whẹ ẹnya. 34O to nwezhidua okfu, o kfuru whẹ l'abụkotaa l'ẹtu l'ẹtu b'o gude kfuru whẹ iya. Ọle nteke yẹle ndu l'etso ụzo iya nọdulewho nwẹka whẹ, ya atụko iwhe lile kọkotaru whẹ nke ọwhu l'o-do whẹ ẹnya.

Jisọsu l'eme tẹ whẹrewhere nọdu doo

(Mak. 8:23-27; Luk. 8:22-25)

35L'urwẹnyashi mbọku ono, ọ sụ ndu l'etso ụzo iya: “Unu t'anyi dafụ azụ mini azụ iya ọwhu.” 36Whẹ ghaa igbudu ndu ono l'ẹka ono, bahụ l'ụgbo ọwhu Jisọsu nọduhawaa whẹ l'iya lịru tụgbua. Ụgbo ndu ọdo l'eetsokwa whẹ whọ. 37Whẹ kpọnyaa l'ụgbo, oke whẹrewhere wata ewhewhe, oke akpara-mini ono l'atụtajeru mini ye l'ụgbo ono. Mini jide ụgbo ono eji. 38Jisọsu zẹero l'ụzo azụ, woru ishi tukobe l'eli iwhe l'aatukobeje ishi eku mgbẹnya; whẹ tee ya sụ iya: “O-zhi-iwhe ?tị kpadụ anyi ishi? Ụgbo l'abyakwa anyi ekpukpu.” 39O tehu baarụ oke whẹrewhere ono mba, sụ eze-ẹnyimu ono t'o deru gẹe, t'ọ be emehekwa ụkporo ọdo. Oke whẹrewhere ono whebua, mgboko ono dahụ rịgbidingu. 40Ọ sụ whẹ: “?Ọo gụnu meru unu l'atsụ egvu? ?Unu te ekwetadu ilile lẹ Chileke l'a-dzọ unu?” 41Ẹhu nmakọta whẹ kpakpakpa, whẹ kfulahaaru ibe whẹ sụ: “?Ọo ẹgube madzụ gụnu bẹ nwoke-e bụ? ?Onye ọwhu oke whẹrewhere mẹe eze-ẹnyimu l'anụkaaru okfu?”

Currently Selected:

Makụ 4: Ezaa

Highlight

Copy