Makụ 2

Jisọsu l'eme onye iwhe lọnwuru ibẹhu lanụ t'o mehu

(Mát. 9:1-8; Luk. 5:17-26)

1Tọ dụ iya bụ, a nọlewho nwidzudzu ono, Jisọsu lwawhu azụ lẹ Kapániyọmu. Ọ ngakọta ẹka lile l'ọ nọwaa l'uwhu. 2Igweligwe madzụ zarụ wụkfuta iya bya adọru l'ẹka ono nke ọwhu l'ọoto dụhee ẹka a whụru ụzo ilile, mbụ m'ọo l'ọnu-ụlo ono. Jisọsu kfulahaaru whẹ okfu Chileke. 3O nweru unwoke ọbu, iwhe lọnwuru ibẹhu lanụ, ụmadzu ẹno pa patarụ iya. 4A hanụka l'igweligwe kụru l'ụlo ono nke bụ lẹ whẹ ta adụdu ike kpata mkpa pakfu iya Jisọsu. Ọo ya bụ, whẹ kwe nyihu eli ụlo ono, je alafua ya ụzo lẹ nhamụnha mkpula ibẹka iya ọwhu Jisọsu nọ. Whẹ lafulewho ụzo ono, whẹ pata iwhe-azẹe nwoke ono, iwhe lọnwuru ibẹhu lanụ zẹe, pyoo ya l'ụzo ono, pazeta iya l'ime ụlo ono. 5Jisọsu whụlewho lẹ gẹ ndu ono gude kwetabe lẹ ya l'a-dụ ike mee tẹ nwoke ono jee ije, ọ sụ nwoke ono ibẹhu lanụ nwụhuru anwụhu ono; “Nwa mu, a gụwaru ghu nvụ l'iwhe-dụ-ẹji i metagbaberu g'ọ ha.” 6Tọ dụ iya bụ lẹ ndu o-zhi-iwu, harụ nọdu l'ẹka ono harụ aarị l'ime obu whẹ sụ:

7“?Ọo gụnu bẹ nwoke-e l'ekfu ẹgube-ẹ? Ọ kwa ekfubyishi bẹ l'ookfubyishi Chileke. ?Ndẹe onye ọdo l'a-dụ ike gụaru madzụ nvụ l'iwhe-dụ-ẹji onye ọbu metagbaberu l'abụa Chileke kpụ.” 8Jisọsu vuru ụzo marụ iwhe whẹ l'arị l'obu whẹ, ọ sụ whẹ: “?Ọo gụnu meru iwhe unu l'arị ẹgube ọriri ono l'obu unu? 9?Ndẹe ọwhu ka ntse okfuru nwoke-e, iwhe lọnwuru ibẹhu lanụ? Ọo t'a sụ iya: ‘A gụwaru ghu nvụ l'iwhe bụ-zhia iwhe-dụ-ẹji i metagbaberu,’ tọo t'a sụ iya: ‘Gbalihu pata iwhe-azẹe ghu jelahaa ije?’ 10Ọo l'ọo nggẹ unu makwanụru l'e zhiru Abụbu-Ndiwhe t'ọ gụjeeru madzụ nvụ iwhe-dụ-ẹji onye ọbu metagbaberu lẹ mgboko-o.” Ọ sụ nwoke ono iwhe lọnwuru ibẹhu lanụ: 11“Ọo ghu bẹ mu l'ekfuru t'ị pata iwhe-azẹe ghu lashia ibe ghu.” 12Nwoke ono zhilihu pata iwhe-azẹe ya, whẹ tụko gẹ whẹ ha ele gẹ l'ọotugburu, ọ kpụbe whẹ ọnu okfu, whẹ jalahaa Chileke ajaja sụ: “Ha! Anyi tẹke awhụbukwaa ẹgube iya ọwa lẹ mgboko.”

Jisọsu l'eku Lívayi

(Mát. 9:9-13; Luk. 5:27-32)

13Jisọsu dawhu azụ l'agụga eze-ẹnyimu ono ọdo. Igweligwe madzụ wụkfuta iya, o zhilahaa whẹ iwhe. 14O jenyazhiawho l'echi-ụzo, ọ whụa Lívayi, bụ nwa Álufiyọsu g'ọ sụgaberu onwiya l'ụlo okpoga akịriko. Jisọsu sụ iya: “Lívayi, tsoru mu.” Lívayi gbashilekwawho tsoru iya. 15Ọo ya bụ, Jisọsu whẹ je erilahaa nri l'ibe Lívayi. Igweligwe ndu akịriko ọdo mewaro ndu ọdo mmaanụ l'aamakwarụwho ejo ẹka, tụkokwawho nọdu l'ẹka ono, whẹ lẹ Jisọsu mẹe ndu l'etso ụzo iya tụko eri nri ono nkele ẹgube ndu ono ha l'igwe awụ etso iya. 16Ndu o-zhi-iwu l'ime ndu Fárisii whụlewho lẹ Jisọsu bẹ yẹle ndu ono, l'aamarụ ejo ẹka mẹe ndu akịriko tụkoru eriko nri, whẹ sụ ndu l'etso ụzo iya: “?Ọo gụnu meru o je anọdu yẹle ndu akịriko mẹe ndu ọdo l'aamakwarụwho ejo ẹka tụko eriko nri?” 17Jisọsu nụle iya who, ọ sụ whẹ: “Ndu ẹhu dụ mma ta akpajẹkwa ishi onye l'eme ọgvu, ọ kwa ndu ẹhu l'eme bẹ l'akpajẹ iya. Mu Jisọsu ta abyakwa oku ndu dụ chịriri, ọ kwa ndu l'eme iwhe-dụ-ẹji bẹ mu byarụ ekuku.”

Nke ọswi ẹgu

(Mát. 9:14-17; Luk. 5:33-39)

18Nteke ono bẹ ndu l'etso ụzo Jọnu baputizimu mẹe ndu l'etso ndu nke Fárisii tụkoru aswị ẹgu ekfu anụ Chileke. Tọ dụ iya bụ l'o nweru ndu wukfutaru Jisọsu bya ajị iya: “?Ndẹe g'e meru ndu l'etso ụzo Jọnu mẹe ndu l'etso ụzo ndu Fárisii l'aswị ẹgu ekfu anụ Chileke, ndu ọwhu l'etso ghu nụ ta aswị?” 19Jisọsu sụ whẹ: “?Ọ dụ ree tẹ ndu e kuru tẹ whẹ bya ọswa ẹswa-nwanyị swịje ẹgu l'ẹka onye ọbu kuru whẹ l'ẹswa nwanyị ono kabẹkwadua nọdu swiru whẹ? Whẹ ta akabẹdu aswị ẹgu mẹ ọ nọkwadua l'ẹka ono. 20Ọle mbọku nọkwaa abya nteke l'aa-nafụ whẹ onye ono, l'alụ nwanyị nke ọwhuu, bụ iya kuru whẹ l'ẹswa-nwanyị ono. O noo nteke whẹ l'aswịlahaa ẹgu ndono.

21“Ọ tọ dụdu onye l'ewotaje ẹkwa ọwhuu gude gbachia ẹka akahụ uwe, lakahụru alakahụ. Onye meru iya nno, nke ọwhuu ọbu e gude jee t'a gbachia ya alakahụlee, lakata akahụ uwe ono, njọ ẹgbeenu ka njọ l'ẹgube ụzo, l'a-dụ iya nụ nteke ono. 22O nokwawho gẹ l'ọoto dụa onye l'awụjeru akụru mmẹe ọwhuu ye lẹ akahụ ẹda mmẹe l'akaa aka. Onye wụru iya ye iya, mmẹe ono agbafua ẹda mmẹe ono. Mẹe ono yẹle ẹda mmẹe ono atụko bụru iwhe iyi yitaru. Akụru mmẹe ọwhuu bẹ l'aawụjeru ye lẹ ẹda mmẹe ọwhuu, karụ aka.”

Mbọku ọtuta-ume ndu Ju

(Mát. 12:1-8; Luk. 6:1-5)

23Ọ bya ebe ujiku lanụ, mbọku ono bụ mbọku ọtuta-ume ndu Ju, Jisọsu l'aaghata l'ẹgu ẹka ọbu a kọru witi. Ndu l'etso ụzo iya gbukolahaa ishi witi ono gẹ whẹ l'aghata l'ẹka ono. 24Ndu Fárisii sụ iya: “Leedanu ?ọo gụnu meru ndu l'etso ụzo ghu l'eme iwhe dụru anyi lẹ nsọ ememe mbọku ọtuta-ume?”

25Jisọsu sụ whẹ: “?Unu tẹke agụdua ẹkwo-okfu Chileke gụ-vu iwhe Dévidi meru nteke mkpa byarụ iya, ẹgu l'agụ iya agụ ndu yẹle iya lị? 26L'ọ bahụru l'ụlo Chileke nteke ọbu Abáyata bụ onye ishi ndu l'agbajẹ ẹja nụ Chileke je ewota buredi, dụ nsọ l'iwhu Chileke. Buredi ono t'e rwubedu Dévidi l'atata, t'o rwube ndu yẹle iya lị. Ọlewho ndu l'agbajẹ ẹja nụ Chileke b'o rwuberu kpụ. Dévidi je ataa ya, nụkwawho ndu yẹle iya lị, whẹ takwaawhọ.”

27Jisọsu sụ whẹ: “Chileke doberu mbọku ọtuta-ume t'ọ kwọjee madzụ, o to kedu madzụ tẹ madzụ kwọjee mbọku ọtuta-ume. 28Ọo ya bụ l'ọo Abụbu-Ndiwhe bẹ bụ Onye nwegee nweru mbọku ọtuta-ume.”

Currently Selected:

Makụ 2: Ezaa

Highlight

Copy