Makụ 12

Ẹtu, e gude ndu nnwamụ, e butaru ye lẹ mgbabu vayịnu nmaa

(Mát. 21:33-46; Luk. 20:9-19)

1Jisọsu gude ẹtu zhilahaa whẹ iwhe sụ whẹ: “Ọo nwoke lanụ bẹ kọru vayịnu l'eegudeje eme mmẹe. Ọ bya agbaa ya ụwho bya ebua ya iduma; ẹka l'aa-nọje adzọshi mmẹe l'akpụru vayịnu ono. Ọ bya atụa nwụlo ha l'eli l'ewhekerewhe, bụ ẹka l'eenyihuje eche mgbabu ono eche. Ọ bya e wota ẹka ono g'ọ ha ye l'ẹka ndu-n-nwamụ o butaru tẹ whẹ letajeru iye ya ẹnya. Ọ tụgbua jeshia ọha ọdo. 2Ọ bya erwua nteke l'eegbuje akpụru vayịnu, o zhi onye ozhi t'o jekfu ndu-n-nwamụ ono tẹ whẹ wẹe ya oke akpụru vayịnu ono nkiya. 3Whẹ gude nwozhi ono chia ya iwhe, gbabẹ iya ẹka ọto nwufu iya, ọ lashia. 4Nwoke ono byakwa bya ezhi onye ozhi ọdo, whẹ gude onye onona tsujashia ya ishi, meru iwhe iwhere nụ iya. 5O zhikwawho onye ọdo. Whẹ gude onye onona gbua ya egbu. O nokwawho gẹ whẹ meru igweligwe ndu ọdo, o zhigeeru; ndu bẹ whẹ chiru iwhe, ndu bẹ whẹ gburu egbu. 6A nọnyaa ọ bụwaru-a onye lanụ whuduru, onye ono bụkwanuru nwa iya, o yeru obu. O zhi nwa iya ono t'o je, asụjenu lẹ ya marụ-a l'onye ọwa, kabẹ bụru nwa iya-a bẹ whẹ l'a-kabẹe yeru ẹso. 7Ndu n-nwamụ ono, l'eche mgbabu ono whụle iya whọ, whẹ zụa mgbede sụ: ‘Ẹhee! Ọo onye ọwaa l'e-bekochaa nweru alị-a mẹe nna iya nwụhu. Unu bya t'anyi gbua ya nggẹ alị ono abụru nke anyi.’ 8Whẹ gude iya, megbua ya, pata iya tụa l'azụ mgbabu ono.”

9O noo ya, Jisọsu jị whẹ: “?Ọo gụnu bẹ onye nwe mgbabu ono l'e-me ndu ono? Ọo-bya egbushia ndu ono l'eche mgbabu ono, wota mgbabu vayịnu ono ye l'ẹka ndu n-nwamụ ọdo. 10Unu tẹke agụbudua iwhe e deru l'ẹkwo Okfu Chileke sụ:

“ ‘Ọo ẹwhuru ono gẹdegede, ndu l'atụ ụlo jịkaru, l'ọo ọ-ga-lẹ-mkpa,

bẹ bekochaaru bya abụru ẹwhuru, gude ụlo.

11O noo bụru iwhe Onye-Nwe-Ọha meru,

Ọ dụ anyi biribiri l'ẹnya.’ ”

12Ndu ishi lẹ ndu l'agbajẹ ẹja nụ Chileke ono mẹe ndu o-zhi-iwu mẹe ndu bụ ọgurenya ndu Ju marụ l'ọo whẹ bẹ Jisọsu nmaturu etu ono, whẹ melahaa tẹ whẹ gude iya. Ọle whẹ tsụhuru mkpụkpu egvu. Whẹ haa ya gbakashịhu.

Okfu akịriko

(Mát. 22:15-22; Luk. 20:20-26)

13Tọ dụ iya bụ l'a bya aharu ndu Fárisii zhi mẹe ndu nke Hẹ́rodu tẹ whẹ je egeta iya l'olu-okfu. 14Ndu ono e zhiru byakfuta iya bya asụ iya: “Onye-ukfu-l'ọha, anyi marụ l'ị bụ onye ire-lanụ, tẹmenu tọ dụ iwhe l'ịitsu egvu. Tọ dụkwawho onye l'iikfu ele ẹnya l'iwhu. Iigudeje ire-lanụ ezhi ụzo Chileke. ?Tọ bụdunu omebyi iwu Chileke mẹ anyi -tụjee akịriko nụ Siza, bụ ishi ọ-chị-ọha Romu? ?Anyi l'a-nọje atụ iya, tọo t'anyi ba atụjeshi?”

15Jisọsu marụ l'ọo l'eli ọnu bẹ whẹ l'ekfu iya, ọ sụ whẹ: “?Ọo gụnu meru unu bya mu adata? Unu wotaadaru mu nụ shịru olu tẹ mu leedaa ẹnya.”

16Whẹ wotaru iye ya. Ọ sụ whẹ: “?Ọo ishi onye b'e seru iya ẹgube-ẹ, deru ẹwha iya swibe iya?”

Whẹ sụ iya l'ọo nke Siza.

17Jisọsu sụ whẹ: “Ọo ya bụ t'unu woru iwhe ọwhu bụ iwhe Siza nụ Siza, unu eworu iwhe ọwhu bụ nke Chileke nụ Chileke.”

Ọnu, Jisọsu yeru whẹ tụfu whẹ ẹhu.

Nke ooshi l'ọnwu teta

(Mát. 22:23-33; Luk. 20:27-40)

18Ndu Sádusii byakfuta Jisọsu. Ọo whẹ bụ ndu sụru l'e te eshidu l'ọnwu eteta anọdu ndzụ. Whẹ byakfuta iya bya ajị iya sụ: 19“Onye-ukfu-l'ọha, Mósisu bẹ deru iya anyi l'ẹkwo iwu sụ: ‘Nteke ọbu lẹ madzụ bẹ nwune iya nwoke nwụhuru t'ọ nwụta nwa, ọwhube nyee ya nọdukwadua, tẹ nwune iya ono lụpyabe nwanyị ono t'ọ nwụtaru onye ọwhu nwụhuru anwụhu whọ nwa.’ 20O nweru ndu dụ ẹsaa lẹ nwune. Onye nke ọgurenya bẹ lụru nwanyị, lụa ya nwụhu to dobe akọ. 21Onye nke ẹbo je alụpyabe nwanyị ono, ọ nwụhukwawho to dobe akọ. Onye nke ẹto b'ọ nwụkwaruwho g'o nwụru ndu ọwhu, 22jeye unwune ẹsaa ono lụgba-gezhia nwanyị ono l'ẹhu l'ẹhu nwụshihukota whẹ te edobe akọ. E megee l'ikpazụ, nwanyị l'onwiya nwụhufua. 23O -rwua nteke l'ee-shi l'ọnwu teta gbalihu ?ọo onye ole bẹ nwanyị ono l'a-bụ nyee ya? Gẹ whẹ ẹsaa ono lụkotaru iya l'ẹhu l'ẹhu-a.”

24Jisọsu sụ whẹ: “?Tọ dụ iya bụ iwhe ọbu meru g'o gude unu shiswee ụzo ọbu ndono nkele iwhe e deru l'ẹkwo Okfu Chileke te edodu unu ẹnya, to dokwawho unu ẹnya gẹ ike Chileke beru. 25Lẹ nteke ndu nwụhuru anwụhu l'e-shi l'ọnwu teta nọdu ndzụ bẹ nwoke l'a-byahẹkwaa l'alụ nwanyị, nwanyị ta abyahẹ l'a-lụ ji. Whẹ l'a-dụ-gee g'ọo ndu ojozhi-imigwe. 26A bya lẹ nke oshi l'ọnwu teta nọdu ndzụ: ?unu tẹke agụbudua akọ ono, e deru l'ẹkwo Mósisu, mbụ l'ẹka ono, o kfuru nke nwa oshi, l'enwu ọku. Ẹka ono bẹ Chileke l'ekfuru Mósisu l'ọo yẹbe Chileke bẹ bụ Chileke nke Ébirihamu, bụru Chileke nke Áyiziku, bụru Chileke nke Jékọpu. 27Ọo ya bụ lẹ Chileke ta abụdu Chileke ndu nwụhuru anwụhu, ọo Chileke ndu nọ ndzụ.” Ọ sụ whẹ: “Unu awhụwaa l'unu kwatarụ shiswee ụzo.”

Iwu ọwhu kakọta mkpa

(Mát. 22:34-40; Luk. 10:25-28)

28Nwoke lanụ l'ime ndu o-zhi-iwu, nọ l'ẹka ono anụ iwhe whẹ l'atụ, whụa lẹ Jisọsu yeru ọnu l'ajị ono ree. Ọ jị iya sụ: “?Ọo iwu ole bụ iwu ọwhu kagee mkpa?”

29Jisọsu sụ iya: “Iwu ọwhu bụ iya kagee mkpa bụ: ‘T'unubẹ ndu Ízurẹlu nụa ya, lẹ Onye-Nwe-Ọha, bu Chileke anyi bẹ bụ iya bụ Onye-Nwe-Ọha lanụ, dụ nụ kpụ. 30Tẹ g'i ye Onye-Nwe-Ọha, bụ Chileke ghu obu ghu g'ọ ha. Gude ndzụ ghu g'ọ ha mẹe uche ghu g'ọ ha mẹe ike ghu g'ọ ha ye Chileke obu.’ 31Iwu ọdo, l'etso iya bụru: ‘T'i ye madzụ ibe ghu obu lẹge i yeru iya onwoghu.’ Ọ tọ dụhedu iwu ọdo ka iwu labọ ono shii.”

32Onye o-zhi-iwu ono sụ iya: “Onye-ukfu-l'ọha, i kfuru ọkpobe-okfu, ọkpobe-okfu, i kfuru bụ lẹ Chileke dụ nnanụ: l'ọ tọ dụhedu Chileke ọdo dụ nụ t'a gbahaa yẹbedua. 33Ọo ya bụ tẹ madzụ ye iya obu iya g'ọ ha, t'o gude uche iya g'ọ ha mẹe ike iya g'ọ ha yekwawho madzụ ibe iya obu g'o yeru onwiya. L'iwu labọ ono bẹ dangoru ẹja, a kpọkotaru ọku mẹe ẹja ọdo, a gbarụ nụ Chileke.”

34Jisọsu whụlewho l'o kfuru g'ọo onye nweru uche, ọ sụ iya: “O to tehedu ẹnya ntaa Chileke abụru eze lẹ ndzụ ghu.” O kfugelewho nno tọ dụhewaro onye jebaaru ọtu ama nke ọji iya ajị ọdo.

?Kuráyisutu bụ Nwa Dévidi tọo Nwa Chileke?

(Mát. 22:41-46; Luk. 20:41-44)

35Ọ bya ebe nteke Jisọsu l'ezhi iwhe l'eze-ụlo Chileke, ọ sụ: “?Ndẹe g'e meru ndu o-zhi-iwu gbee sụ lẹ Kuráyisutu bụ Nwa Dévidi gẹ 36Dévidi l'onwiya bẹ Ume-Dụ-Nsọ meru ọ sụ:

“ ‘Chileke sụru Onye-nwe-yẹbe Dévidi:

“Nọdu anọdu l'ẹka-ụtara mu jeye nteke mu l'a-chịta

ndu ọhogu ghu dobe ghu lẹ mkpula ọkpa.” ’

37Dévidi l'onwiya l'ekukwanu iya Onye-Nwe-Ọha ?ndẹhunu g'o gude ọ bya abụfukwaaruwho Nwa Dévidi.”

Ẹhu tsọo igweligwe ndu nụru iya nụ ụtso.

Ọnma ọkwa ndu o-zhi-iwu

(Mát. 23:1-36; Luk. 20:45-47)

38Nteke l'oozhi iwhe ono b'ọ sụru: “Unu kwabẹjekwaru onwunu ẹnya l'ẹka ndu o-zhi-iwu nọ, mbụ ndu l'ọonoje agụ ẹgu tẹ whẹ yee adawurukutu uwe aghawhe, mbụ ndu iwhe whẹ yeru obu bụ t'e keleje whẹ ekele ugvu ugvu l'ẹka, a dọru adọru, 39mẹe tẹ whẹ nọdu l'oshi-anọdu ọwhu kakọta ree l'ụlo-ndzuko ndu Ju mẹe tẹ whẹ nọdu lẹ nggada ọwhu, l'aaka whẹ ọkwabe ugvu m'e jee l'eriri. 40Ndu l'eripyabeje ụnwu-mbunu, whẹ egude ẹregede ekfulewho ogologo okfu anụ Chileke. Ọo whẹbedua bẹ l'aa-kagezhia ọnmashi ikpe ike.”

Iwhe nwa-mbunu gude obu iya anụ Chileke

(Luk. 21:1-4)

41Jisọsu bya eje anọdu anọdu l'agụga ẹka l'eyeje iwhe l'anụ Chileke l'eze-ụlo Chileke, lelahaa ndu l'eye okpoga l'igbe l'eyejeru Chileke iwhe ono, l'anụ iya. Ndu nweru iwhe l'eyekaa oke okpoga. 42Nwa-mbunu lanụ, l'akpaba mkpaba nri bya bya achịru afụ labọ ye. 43Jisọsu kua ndu l'etso ụzo iya tẹ whẹ bya. Ọ sụ whẹ: “Iwhe mu l'emelewho tẹ mu kfuru unu bụ l'ọ kwa nwa-mbunu-a l'akpaba mkpaba nri-a bẹ kakọta-gee oye okpoga l'iwhe bụ ndu lile ono, shi yeta okpoga l'ẹka-a. 44Ishi iya bụ l'iwhe ndu ọwhu l'eyekaa bụ okpoga tsuru etsu. Ọle nwa-mbunu-a bẹ l'akpaba mkpaba nri; ọ bya atụkolewho iwhe o nweru nụkota, mbụ je akpaa l'iwhe o doberu nke egude akpata nri.”

Currently Selected:

Makụ 12: Ezaa

Highlight

Copy