Makụ 10
10
Jisọsu l'ekfu nke ebukahu nwoke yẹle nyee ya
(Mát. 19:1-12; Luk. 16:18)
1Jisọsu fụta l'ẹka ono tụgburu jeshia alị Judíya mẹe mkpụkpu ndu azụ ẹnyimu Jọ́danu. A ha l'igweligwe wukfuta iya ọdo. O zhilaha whẹ iwhe gẹ l'oozhijehawa whẹ iya.
2Ndu Fárisii bya iya adata bya ajịlahaa ya sụ: “?Ọo dụ ree tẹ nwoke chịfuje nyee ya?”
3Ọ sụ whẹ: “?Ọo gụnu bẹ Mósisu tụru l'iwu t'e mejee?”
4Whẹ sụ iya: “Mósisu sụru t'onye byajẹkwa l'achịfu nyee ya, vujeekwaru ụzo deru ẹkwo nụ iya lẹ ya ta alụhedu iya, tẹmenu ya achịfuwa iya rọo.”
5Jisọsu sụ whẹ: “Ọo l'unu bụ ndu ejo obu meru Mósisu tụaru unu ẹgube iwu ono. 6Ọle eshi mbụlembu nteke Chileke meru mgboko b'o melekwaruwho nwoke, mee nwanyị. 7O noo iwhe meru nwoke je l'a-ha nna iya, haa ne iya je yẹle nyee ya atụgba. 8Whẹ ẹbo abya abụru onye lanụ. Ọo ya bụ lẹ whẹ ta abụhedu ụmadzu labọ. Whẹ bụwaa onye lanụ. 9Ọo ya bụ, iwhe Chileke tụgbaberu nnanụ, t'ọ bọ dụkwa onye l'e-je iya okekahu ẹbo ọdo.”
10Whẹ bahụlewho l'ụlo, ndu l'etso ụzo iya jị iya iwhe okfu ono bụ. 11Ọ sụ whẹ: “Onye chịfuru nyee ya je alụa nwanyị ọdo bẹ bụkwa ogori bẹ l'ori. 12Nteke bụ l'ọo yẹbedua bụ nwanyị nọnyaaru gbafụ l'ibe ji iya je alụta ji ọdo, nwanyị ono l'eriakwaa ogori.”
Jisọsu l'agọru ụnwegirima ọnu-ọma
(Mát. 19:13-15; Luk. 18:15-17)
13Whẹ l'eekutakaaru iya ụnwegirima t'o byigee whẹ ẹka, ndu l'etso ụzo iya balahaaru ndu ono l'ekutaru iya ụnwegirima ono mba. 14Jisọsu whụa ya, ẹhu ghulahaa ya eghu. Ọ sụ whẹ: “Unu hakwaa ụnwegirima tẹ whẹ byakfuta mu. Unu ba akpọshishi whẹ abyabya, l'ọo ndu dụ nno bẹ Chileke bụ eze whẹ. 15Tẹ mu kfule iya who t'o doo unu ẹnya, onye l'ete egudee obu ụnwegirima kweta l'ọo Chileke bụ eze lẹ ndzụ iya ta abyakwa l'a-ha Chileke t'ọ bụru eze lẹ ndzụ iya.” 16Ọ bya ehetagee ụnwegirima ono byidzukotaru whẹ ẹka, gọru ọnu-ọma nụ whẹ.
Nwoke nweru ẹku
(Mát. 19:16-30; Luk. 18:18-30)
17Jisọsu tụgbuleruwho, nwoke lanụ gude ọso gbakfu iya je ebyishi ikpere l'alị l'iwhu iya sụ iya: “O-zhi-iwhe, bụ onye ọma. ?Ọo gụnu bẹ mu l'e-me nke ọwhu mu l'e-nwe ndzụ tututu-mịmimi?”
18Jisọsu sụ iya: “?Ọo gụnu meru l'iiku mu onye ọma; ọ tọ dụdu onye ọdo, bụ onye ọma gbahalẹwho Chileke nwẹkiya. 19Ị mawarụ-a iwhe lile Chileke sụru t'e mejee: ‘Be egbukwa ọchi, ti ri ogori, ti zhi oshi, ba adzụkwa ejire tukobe madzụ ibe ghu, be emegbutakwa madzụ ibe ghu, gụ akwabẹje ne lẹ nna, nwụru ghu nụ ugvu.’ ”
20Nwoke ono sụ iya: “Onye-ukfu-l'ọha, eshi nkeshi mu bụ nwata ta adụkwa iwhe ono ọwhu mu doswejeru.”
21Jisọsu lee ya ẹnya, ye iya obu. Ọ sụ iya: “Ọo iwhe lanụ wuduru ghu l'ii-me: lashia je erekota iwhe lile, i nweru, chịta iwhe i retaru iya keshiaru ndu ụkpa. Ọo ya bụ gụ enweru ọkpobe iwhe l'imigwe. I -megee ya nno, gụ abya etsoru mu.” 22Ọ nụlewho iwhe ono Jisọsu kfuru, ẹhu rwụrwuhu iya, ọ dzụkfube iwhu tụgburu nkele yẹbe nwoke bẹ nwenukaru iwhe.
23Jisọsu bya elewhee ndu l'etso ụzo iya ẹnya mgburumgburu sụ whẹ: “G'o gudebukwanua atsụ-be l'anụ tẹ ndu nweru iwhe haa tẹ Chileke bụru eze whẹ.”
24Iwhe ono, o kfuru nno tụfu ndu l'etso ụzo iya ẹhu. Jisọsu kfuwhu iya azụ sụ whẹ: “Ụnwu mu, mu sụru: G'o gudebukwanua atsụ-be lanụ gẹ madzụ l'e-me haa tẹ Chileke bụru eze lẹ ndzụ iya. 25L'ọ kakwa ntse t'ịnya pyoghata l'ẹnya aga, amamẹ t'onye nweru iwhe haa tẹ Chileke bụru eze lẹ ndzụ iya.”
26Ọ kabagewa whẹ roo ọtufu ẹhu. Whẹ sụ iya: “?Ọ bụhunuru onye bẹ l'aa-dzọta?”
27Jisọsu bya elee whẹ ẹnya sụ whẹ: “L'ẹka madzụ nọ b'ọ bụkwa ama-gẹ-l'ee-me, ọle ọ tọ dụdu nno l'ẹka Chileke nọ, o noo lẹ Chileke ta adụdu iwhe kpọru iya ẹka ememe.”
28Pyita sụ iya: “Lewaro, anyịbedua hakọtaakwanuru iwhe lile anyi nwe bya etsoru ghu.”
29Jisọsu sụ iya: “Iwhe unu l'a-malẹwho bụ l'ọ tọ dụdu onye kwoberu iswi ẹhu mụbe Jisọsu, ọdua l'ọo iswi ozhi-ọma ono haa ụlo iya, ọdua l'ọo nwune iya nwoke, ọdua l'ọo nwune iya nke nwanyị, ọdua l'ọo nna iya, ọdua l'ọo ne iya, ọdua l'ọo ụnwu iya, ọdua l'ọo alị iya, 30l'aata akfụ ụgwo iwhe ha g'ọo iwhe ono, ọ harụ ugbo ụkporo ise lẹ ndzụ iya, mbụ ụlo mẹe unwune nwoke mẹe nke nwanyị mẹe ne mẹe nna mẹe ụnwu mẹe alị; e behuduru iwhe tsụa m'ọo onye ọbu l'ẹhu ọtsu agha. E -megekwanua o -rwua lẹ mgboko ọwhuu l'a-byanụ, Chileke anụ iya ndzụ tututu-mịmimi. 31Ọle igweligwe ndu bụ ivurụzo ntaa l'ee-megee bụru ndu ikpazụ, ndu ikpazụ emegekwanua bya abụru ndu ivurụzo.”
Jisọsu l'ekfu nke ugbo ẹto lẹ ya l'anwụhu; teta nọdu ndzụ
(Mát. 20:17-19; Luk. 18:31-34)
32Jisọsu yẹle ndu l'etso ụzo iya l'eje Jerúsalẹmu, Jisọsu kparụ whẹ ye l'azụ vutaru whẹ ụzo. Ndu l'etso ụzo iya tsụlahaa egvu shii nkele ọ dụ whẹ biribiri. Ndu ọwhu l'awụ etso iya l'atsụkwawho egvu. O kucha ụmadzu iri l'ẹbo ono iche wata whẹ ọkoru iwhe l'ee-megee nwụaru iya. 33Ọ sụ whẹ: “Unu lekwa lẹ ntaa bẹ anyi l'e-jekwa Jerúsalẹmu. L'ẹka ono bẹ l'aa-kpụru Abụbu-Ndiwhe nụ ndu ishi ndu l'agbajẹ ẹja nụ Chileke mẹe ndu ọzhi-iwu. Whẹ ekpee ya nkfugbu. Whẹ akpụru iya kpẹe ndu l'ẹte amaa Chileke. 34Ee-gude iya mee ya iwhe ọchi, vụa ya ọnu-mini, chia ya ẹchachi, whẹ egbua ya. Ya anọo abalị labọ, nke ẹto iya, ya eshi l'ọnwu teta nọdu ndzụ ọdo.”
Iwhe Jémusu yẹle Jọnu l'aryọ Jisọsu
(Mát. 20:20-28)
35Jémusu yẹle Jọnu ụnwu Zébedi jekfu Jisọsu je asụ iya; “O-zhi-iwhe, o nweru iwhe ọ dụkwanu anyi nke t'i meeru anyi.”
36Ọ sụ whẹ: “?Ọo gụnu b'ọ dụ unu tẹ mu meeru unu?”
37Whẹ sụ iya: “Menua whẹ t'anyi nọkube ghu, onye lanụ l'ẹka-ụtara, onye ọwhu l'ẹka-ịcha nteke ono l'ịi-bụ eze egoshi ọdu-biribiri ghu.”
38Jisọsu sụ whẹ: “Unu ta amadụroo iwhe unu l'aryọ ?unu l'a-dụ ike ngụa l'omogo mu l'a-ngụ? tẹ ?unu l'a-dụ ike t'e mee unu ẹgube baputizimu l'ee-me mu?”#10:38 Bụ iya bụ unu l'a-dụdu nụ ike jee iwhe ọtsulanu, mu l'e-je, dụkwawho ike nwụhu gẹ mu l'a-nwụhu.
39Whẹ sụ iya: “Ee! Anyi l'a-dụa ike.”
Jisọsu sụ whẹ: “Unu l'a-dụkwaa ike ngụa l'omogo, mu l'a-ngụ, e mee unu ẹgube baputizimu ọwhu l'ee-me mu. 40Obenu nke tẹ madzụ nọdu l'ẹka-ụtara mu, ọdua l'ọo l'ẹka-ịcha, o noo ta abụdu mu b'o dụ l'ẹka. O noo bẹ dụru ndu Chileke doberu iya ngabẹru.” 41Ụmadzu iri ọwhuna nụlewho l'o noo gẹ whẹ jeru iya, whẹ wederu Jémusu yẹle Jọnu iwe. 42Jisọsu bya ekukobe whẹ l'ẹka lanụ sụ whẹ: “Unu marụ-a lẹ ndu a sụru l'ọo whẹ bụ ishi l'anọje akpapyashị ndu whẹ l'achị ishi, ndu ọwhu l'ekfu iwhe lanụ l'anọje eme tẹ ndu ọdo marụ l'ọo whẹ ka shii. 43Ọle nke unu ta adụkwa nno. Nke unu bụ, onye l'ọogu t'e mee ya onye ha shii l'ime unu, t'onye ọbu bụru onye l'a-nọ ejeru ndu ọwhu ozhi. 44Onye l'ọogu tẹ ya bụru onye ishi l'ime unu, t'onye ọbu wozeta onwiya alị, dobe onwiya g'ọo ohu l'ẹka ndu ọwhuna nọ. 45O noo lẹ Abụbu-Ndiwhe ta abyakwa t'e jejeru iya ozhi, iwhe o gbechia bya kwa tẹ ya jejeru ndu ọdo ozhi, mẹe tẹ ya gude ndzụ iya gbaarụ Chileke ẹja, t'ọ bụru iwhe ya l'e-gude gbata ndzụ igwe-ọha.”
Jisọsu l'eme t'onye l'atsọ ìshì, ẹwha iya bụ Batimíyọsu whụje ụzo
(Mát. 20:29-34; Luk. 18:35-43)
46Jisọsu whẹ byarwu-a Jériko. Tọ dụ iya bụ lẹ whẹ afụtadelewho l'ẹka ono yẹle ndu l'etso ụzo iya mẹe igweligwe ndu l'awụ etso iya, nwoke l'aza Batimíyọsu, l'atsọ ishi nọduwaa l'agụga echi-ụzo aryọ aryọ. Batimíyọsu ono bụ nwa Timíyọsu. 47Ọ nụlewho l'ọo Jisọsu onye Názaretu l'aghata, o chishia sụ: “Jisọsu Nwa Dévidi, meeru mu obu-imiko!”
48Whẹ l'agbochi iya nchị asụje iya t'o dobe ọnu ndoo. Ọ gbẹenu kabaa ya ọryashi ike: “Jisọsu Nwa Dévidi, meeru mu obu-imiko!”
49Jisọsu kfụshita, sụ t'e kua ya. Whẹ bya ekua ya sụ iya: “Nweru obu, gbalihu; ookukwa ghu oku.”
50Ọ chịru ukpo iya ghaa l'alị zhilihu jekfushia Jisọsu. 51Jisọsu sụ iya: “?Ọo gụnu b'ọ dụ ghu tẹ mu meeru ghu?”
Nwoke ono, l'atsọ ìshì sụ iya: “Onye-Nwe-Ọha, menua tẹ mu whụje ụzo.”
52Jisọsu sụ iya: “Lashia l'ekweta, ị kwetaru mewaru i mehu.”
Nteke onowho nwoke watalẹkwawho ọwhu ụzo. O tsoru Jisọsu tụgbua.
Currently Selected:
Makụ 10: Ezaa
Highlight
Share
Copy
Want to have your highlights saved across all your devices? Sign up or sign in
© 2014, Wycliffe Bible Translators, Inc. in cooperation with Abakaliki Literacy and Translation Trust
