Jọnu 3

Nikodímọsu l'ejekfu Jisọsu

1O nweru nwoke lanụ ọbu, ẹwha iya bụ Nikodímọsu. Nikodímọsu bẹ tso l'ọgbo ndu Fárisii. Ọ bụkwaruwho onye ishi ndu Ju. 2Ọ bya ebe l'ẹnyashi ujiku lanụ, nwoke ono tụgbua byakfuta Jisọsu bya asụ iya: “O-zhi-iwhe, anyi makwarụa l'i bụ onye l'ezhije mmamagụ, tẹmenu ọ bụru Chileke yeru ghu t'ị bya. Ọ tọ dụdu onye fụru ome eze iwhe lile-e l'iimegbabe l'abụa lẹ Chileke kfụru onye ọbu l'azụ.”

3Jisọsu sụ iya: “Iwhe meru eme bụ ọwa, ọ -bụru l'a ta anwụdu madzụ ọdo bẹ onye ọbu l'a-byakwaa l'e-tso l'onye Chileke bụ eze lẹ ndzụ iya.” 4Nikodímọsu sụ iya: “?Ndẹe gẹ l'ee-shi nwụa madzụ ọdo nteke ọ kahụwaru akahụ? ?L'ọo-bahụ-whu azụ l'ẹwho ne iya, je anọdu t'a nwụa ya nke ugbo labọ?” 5Jisọsu sụ iya: “Iwhe mu l'eme t'o doo ghu ẹnya bụ: ọ -bụru l'eete egudedu mini yẹle Ume-Dụ-Nsọ nwụa madzụ ọdo bẹ onye ono l'a-byakwaa l'a-bụ onye Chileke bụ eze lẹ ndzụ iya. 6Onye madzụ nwụru mẹe iwhe shi l'ẹka madzụ bụkota nke madzụ. Onye Ume-Dụ-Nsọ nwụru mẹe iwhe shi l'ẹka Ume-Dụ-Nsọ, tụkota bụru nke Ume-Dụ-Nsọ. 7T'ọ bọ dụkwa ghu biribiri lẹ mu sụru l'aanwụ-whuje unu azụ ọdo. 8Whẹrewhere l'anọje ewhe ala ẹka dụ iya mma, gụ anụlewho ụkporo iya, ọle ị tị makwanụ ẹka o shi, tị ma ẹka l'oowhe ala, o nokwawho g'ọ dụ iwhe bụ onye Ume-Dụ-Nsọ nwụru ndono.”

9Nikodímọsu sụ iya: “?Ndẹ-zhia g'ẹgube iwhe ono l'e-me nwụa?”

10Jisọsu sụ iya: “?Ị bụ onye l'ezhi iwhe lẹ Ízurẹlu, iwhe dụ nno te edo ghu ẹnya. 11Iwhe mu l'akarụ ghu bụ, l'ọo iwhe anyi marụ bẹ anyi l'ekfuje, ọ bụru iwhe anyi whụru l'ẹnya bẹ anyi l'atụje ọnu iya, ọle unu te ekwetadu lẹ nke anyi bụ iya. 12Mbụ sụ, ọ -bụru lẹ mu kfuru unu iwhe nke mgboko-o, unu te ekweta iya, ?ndẹkwanu g'unu l'e-shi kweta mẹ mu kfuderu unu g'iwhe nke imigwe dụ. 13Ọ tọ dụdu onye bahụjeru l'imigwe t'a gụfulewho onye ono, shi l'imigwe bya, bụ iya bụ mbẹdua, bụ Abụbu-Ndiwhe. 14Ọ kwa gẹ Mósisu gudeje mkpụru wolia agwọ ono, e gude ope mee l'echi-ẹgu, bụ g'e wolifutaje Abụbu-Ndiwhe, 15nke ọwhu bụkwanu onye woru onwiya ye iya l'ẹka, onye ono enweru ndzụ tututu-mịmimi.

16“Lẹ Chileke bẹ yenukaru ndiwhe obu, yetabe whẹ iya nke ọwhu ọ nụru Nwa lanụ, o nwe kpụ nke ọwhu bụkwanu onye wowaru onwiya ye Nwa iya ono l'ẹka t'onye ọbu ba ala l'iyi. O chia ndzụ tututu-mịmimi bẹ onye ono l'e-nwe. 17Iwhe Chileke kwoberu zhi Nwa iya t'ọ bya lẹ mgboko-o ta abụkwa t'ọ bya ekpelahaa ndiwhe ikpe. Iwhe ọ byaturu kwa t'e shi l'ẹka iya dzọo ndiwhe. 18Onye nọ iya l'ẹka bẹ l'ẹte anmakwa ikpe, obekwanu l'onye l'ete ekwee woru onwiya ye iya l'ẹka b'e gbee nmahawarọ ikpe, o noo nkele onye ono te ekwetadu nke Nwa Chileke ono, bụ Nwa lanụ. 19Gẹ Chileke l'e-gude bua ikpe ono bụ: L'iwhoro ono byarụ lẹ mgboko-o, ndiwhe gbee haa iwhoro ono hatachia ẹkpuroochi, nke l'ọo l'iwhe whẹ l'eme bụkota ejo iwhe. 20Iwhe meru nụ bụkwaru l'onye l'eme ejo iwhe l'akpọje iwhoro ashị, onye ono te eshitajedu ụzo ẹka iwhoro dụ: a nọnyadawho ejo iwhe ọbu, l'oomegbabe gbafụta iwhe. 21Ọle onye l'eme ire-lanụ l'afụtaje bya anọdu l'ẹka iwhoro dụ, nke ọwhu l'aa-whụ-dzuru iya marụ l'iwhe l'oome bẹ ẹka Chileke dụkwawho.”

Jisọsu yẹle Jọnu onye l'emeje baputizimu

22E megelewho, Jisọsu yẹle ndu l'etso ụzo iya tụgbua jeshia alị Judíya. Whẹ kpọo nwụkfu l'ẹka ono, l'oomeshi ndu madzụ baputizimu. 23Jọnu l'emekwawho baputizimu nkiya lẹ Ínọnu. Ínọnu bẹ dụkube Sélimu ntse. Ọ nọdu l'ẹka ono eme baputizimu nkele mini ha shii l'ẹka ono. Ndiwhe l'awụ awụ-kfuta iya l'ẹka ono, l'oomekaa whẹ baputizimu. 24Nteke ono bụkwanuru nteke l'ẹteke atụa Jọnu mkpọro. 25A nọnyaa, ndu l'etso ụzo Jọnu, whẹ l'onye Ju lanụ ọbu tụkfuta ẹgo gẹ l'eemeje nke nsọ ọsafu onwonye mmerwu. 26O noo ya, whẹ tụru iya byakfuta Jọnu bya asụ iya: “O-zhi-iwhe, ?ị whụnuawho l'onye ọbu gụ l'iya shi nọdu l'azụ Jọ́danu azụ iya ọwhu, mbụ onye ono, i shi atụ ọnu iya, ọ kwa iya nọ l'ẹka-a ntaa eme baputizimu, ndu madzụ l'awụ gidigidi ejekfu iya?”

27Jọnu sụ whẹ: “Ọ tọ dụkwa onye dụ iwhe ọ bya l'a-nata m'ọ -bụa iwhe Chileke nụru iya. 28Unubẹdua l'onwunu kabẹkwaa bụru ndu ẹto, nụru nteke mu kfuru sụ l'ọ tọ kwa mụbe Jọnu bụ Kuráyisutu ọbu, Chileke kweru ụkwa iya, l'ọ kwa ezhizhi b'e zhiru mbẹdua tẹ mu vuru iya ụzo bya. 29Sụa, ọ kwa nwata nwokoro, l'eje ọlu nwanyị bẹ nwanyị ọbu, a bya l'ekee ya nọdu-turu. Ọnya nwata-okoro l'abụjekwa ọ -kfụru l'ẹka ọnya iya ono nọ, anụ iwhe l'ookfu, ẹhu atsọ iya ụtso. Ọo mụbe Jọnu bụ ọnya Jisọsu. Ọ bụru iwhe ono meru ẹhu kwata atsọshi mu ụtso ike ntaa atsọfu mu iya l'ishi. 30Ẹwha Jisọsu kafụtaje ode ude eje eje, nke mụbe Jọnu aka ọlwali eje eje.

Onye shi l'igwe bya

31“Ọo onye ono, shi l'igwe bya ono bẹ bụ iya bụ onye kakọta shii lẹ g'a ha. Onye shi lẹ mgboko bụlewho nke mgboko-o, tẹmenu l'ọonojelewho ekfu g'ọo ndu mgboko-o, onye ono, shi l'imigwe bya bẹ bụ iya kakọta shii lẹ g'a ha. 32Ọo iwhe ọ nụru lẹ nchị iya, whụa ya l'ẹnya bẹ l'ookfuje. Ọle ọ tọ dụdu onye l'ekweje nata ozhi iya. 33Onye ono, natarụ ozhi, l'oozhi bẹ gudewa ono kweta lẹ Chileke bụ ọkpobe iya. 34O noo nke l'onye ono, Chileke yeru ono l'ekfu okfu, Chileke kfuru. Iwhe meru iya bụru lẹ Chileke ta ahatadu Ume-Dụ-Nsọ ahata nụ iya. 35Chileke, bụ Nna yeru Nwa iya obu, o wokotaakwaru iwhe lile-e ye iya l'ẹka. 36Onye wowaru onwiya ye l'ẹka Nwa Chileke ono bẹ nwewaru ndzụ tututu-mịmimi, ọle onye l'ẹte anụaru Nwa Chileke okfu bẹ ndzụ ono l'abyakwaa l'erwube ẹka. Onye ono bẹ oke-ẹhu-eghughu Chileke l'adụakwaro swiru jeyewaro lẹ tututu-mịmimi.”

Currently Selected:

Jọnu 3: Ezaa

Highlight

Copy