Jọnu 15

Jisọsu bụ ọkpobe oshi vayịnu

1Jisọsu kfulashia sụ whẹ: “Ọo mụbe Jisọsu bụ ọkpobe oshi vayịnu. Nna mu bụ onye l'eleta mgbabu vayịnu ono ẹnya. 2Iwhe bụ ẹkali, dụ mụbe Jisọsu l'ẹhu ndu ọwhu l'ẹte amịje mebyi bẹ l'ọokwafuje. Ẹkali ndu ọwhu l'amịje mebyi bẹ l'ọonoje akọcha akọcha nke ọwhu l'ọo-dụ ree kabaa ọomi mebyi. 3Okfu ono, mu kfuru yeru unu ntaa mewaru unu, unu dụkota ree. 4Unu nọdu mu l'ime; tẹ mbẹdua nọdu unu l'ime. Ọo gẹ ẹkali oshi l'afụa mịa mebyi nke ẹka iya, m'ọ -bụa l'ọ kakfụru l'oshi vayịnu, bụkwawho g'unu l'afụa yee mebyi m'ọ -bụ-zhidua lẹ mu l'unu tụgbaru bụru nnanụ.

5“Ọo mbẹdua bụ oshi vayịnu, unubẹdua bụru ẹkali iya. Onye ọwhu nọdu mu l'ime, mbẹdua nọdu l'ime onye ọbu bẹ onye ọwhu ọbu l'amị mebyi mịshia ya ike, o noo nkele ọ tọ dụdu iwhe unu l'a-dụ ike eme ilile mẹ mu l'unu atụgbaa bụru nnanụ. 6Iwhe bụ onye mu l'iya l'ẹte atụgbaa bụru nnanụ bẹ l'ee-tuwhakwa etuwha g'ọo ẹkali oshi a kọchafuru akọchafu, ya akpọo nkụ. Ẹgube ẹkali oshi dụ nno bẹ l'aa-chịta ye l'ọku, ọku ekepyashia. 7Ọ -bụru lẹ mu l'unu tụgbaru bụru nnanụ, okfu mu buru unu eburu l'ẹhu, ọ tọ dụdu iwhe bụ iwhe dụ unu ree, unu sụru t'e meeru unu l'eete emeru unu. 8O noo ụzo, l'ee-shi goshi ọdu-biribiri nke Nna mu, mbụ t'unu mịa mebyi mịshia ya ike, gude nno goshi l'unu bụ ndu l'etso ụzo mu. 9Ọo gẹ Nna mu yeru mu obu bụ gẹ mu yeru unu. Unu nọpyabelekwawho l'ime n-yemobu ono, mu yeru unu. 10Ọ -bụru l'unu l'emee iwhe lile, mu sụru t'unu mee bẹ unu l'a-nọpyabekwaa lẹ n-yemobu nkemu, mbụnu-a gẹ mbẹdua mekotaru iwhe Nna mu sụru tẹ mu mee, mu nọpyabe lẹ oye obu nke Nna mu ono.

11“Sụa, iwhe lile-e bẹ mu l'ekfukotaru unu nke ọwhu ẹhu-ụtso nkemu l'a-bụ nkunu mẹe t'ẹhu tsọo unu ụtso tsọfu iya unu l'ishi. 12Ọ waa bụ iwhe mu tụru unu iwu iya: Unu ye ibe unu obu lẹge mu yeru unu obu. 13O to nwedu n-yemobu ọdo, madzụ l'eye ibe iya, ka ọwa, mbụ lẹ madzụ kwoberu iswi ọnya iya whẹ swefu ẹnya lẹ ndzụ iya kweta lẹ ya l'a-nwụhu. 14Unu bụkota ọnya mu mẹ unu l'e-mewaa iwhe mu sụru t'unu mee. 15Mu te ekubahekwaa unu nwozhi ọdo, o noo nkele nwozhi ta amajẹdu iwhe Onye-nwe-iya-nụ l'eme. Iwhe mu l'e-ku unu bụ ọnya mu whẹ nkele iwhe mu nụru l'ọnu Nna mu bẹ mu mekotawaru unu marụ. 16Ọ tọ bụkwa unubẹdua họtaru mu, ọ kwa mbẹdua gbechia họta unu dobe iche nke ọwhu unu l'a-dụ g'ọo oshi-ọmi mịa mebyi ono, l'a-nọdugbuwaruro. Ọ kwanụ iya bụ nke ọwhu bụ iwhe unu shi mu l'ẹka sụ tẹ Nna nụ unu; ya anụ iya unu. 17Iwhe bụ iwu, mu l'a-tụru unu bụ t'unu ye ibe unu obu.

Ndụmashi nke ndu mgboko

18“Ndu mgboko -kpọo unu ashị, t'unu nyatakwa lẹ whẹ vuhaadaro ụzo kpọ mu ashị ono tẹhenu whẹ bya akpọde iya unubẹdua. 19Nggẹ l'ọo iwhe unu bụ ndu nke mgboko-o mẹe ndu mgboko-o eye unu obu l'unu bu nke whẹ. Ọle mu họfutawaru unu lẹ mgboko-o dobe iche, unu ta abụhe nke whẹ. O noo iwhe meru whẹ kpọ unu ashị. 20Unu nyatakwa iwhe ono, mu kfuru unu ono; mu sụru lẹ nwozhi ta akajẹkwa onye nwe iya nụ shii. Ọo gẹ whẹ mekparu mbẹdua ẹhu bụ gẹ whẹ l'e-mekpa iya unu. Ọ bụru gẹ whẹ l'ete emeje iwhe mu kfuru bụ gẹ whẹ l'ete emekwawho iwhe ọwhu unu kfuru. 21Iwhe whẹ l'e-kwobe mekota unu iwhe ono bụ nkele ọo l'unu bụ nkemu, o noo lẹ whẹ ta amadụ onye ono, bụ iya bẹ mu shi l'ẹka bya. 22Nggẹ l'ọo iwhe mu ta abya bya ekfuru yeru whẹ m'ọ tọ bụkwa whẹ ome iwhe-dụ-ẹji, ọle eshi mu byawaru bẹhunu l'ọ tọ dụhekwaa iwhe whẹ l'e-gude gọfu nke iwhe-dụ-ẹji, whẹ metaru. 23Iwhe bụ onye kpọru mu ashị bẹ kpọkwaruwho Nna mụbe Jisọsu ashị. 24Nggẹ l'ọo iwhe mu l'ete emeshia iwhe onye ọdo l'ẹte adụa ike mee l'echilabọ whẹ mẹe tọ bụkwa whẹ ome iwhe-dụ-ẹji. Ọle ntaa bẹ whẹ gude ẹnya whẹ whụkota iwhe mu meshiru; whẹ kpọle mu-a ashị; kpọkwa iya whọ Nna mu. 25E dekwaru l'ẹkwo iwu sụ: ‘Whẹ kpọru mu ashị l'ẹbe adụ iwhe mu meru whẹ. Iwhe ono bẹ vụkotaakwaru lẹge e deru iya.’

26“Sụa, mu l'e-shi l'ẹka Nna mu zhi Onye Ọgbata ono; ya alwakfuta unu. Onye Ọgbata ono, bụ Ume-Dụ-Nsọ, bụ iya bụ Ume ire-lanụ shi Nna mu l'ẹka. Ọ -byalẹwho, ya ekfua okfu ẹhu mụbe Jisọsu yeru unu. 27Unubẹdua l'onwunu bụfukwaawho ndu l'a-nọ ekfu iwhe ono, unu gude ẹnya unu whụa lẹ nke mụbe Jisọsu, o noo lẹ mu l'unu shizhiewho lẹ mbụlembu nọduta.

Currently Selected:

Jọnu 15: Ezaa

Highlight

Copy