Zɛkarya 6
6
Pyɛ ye rwit: Bekyɛkyɛ̂ bedwa benaas
1Ma to di pyɛ mo cak. E remo, ma di bekyɛkyɛ̂ bedwa benaas be nunus yi e tê beraku beba de ba yong na dyam pama. 2A sé e bedwa bezà besinang de ba hwɔlɔ kyɛkyɛ wo mɛsɛng o, berigi de ba hwɔlɔ wo neba, 3berɔgɔ de ba hwɔlɔ wo netat, ko berúrùm de ba hwɔlɔ wo nenaas. Mwa vɛ ba vɔk gap hyiw. 4Ma hwo rangâl tom-lagwi de a dopse misang a me pyɛ́ mo, ma yang ɛ, “À da, be dura sɛ́ arɛt?”
5A toyo a me, a ye, “Yɛn a sé e tô gùl naas ve lagwi. Yɛn a sé mɛsɛng nusu yi e nuyêl Dagwi Darwêy Da Jey Mwa. 6Kyɛkyɛ de berigî bedwa be hwɔlɔ wɛ wa sé kyè vɔk e bak rwa bato, womo de berɔgɔ be hwɔlɔ wɛ wo kyè vɔk e bak rwa ta, ko wo berúrùm bedwa wo kyè vɔk e vwêl bak rwa batin.”
7Sede bedwâ gap o ba nusu e jey, ba hwo longsot, na be nɔ̂ng vɛ nu, be kyè, ko tom o a yang ɛn, “Kyè in wɔ̀ gwɔsɔ jey!” Ko yɛn a kyè. 8E bama mo, a yang me na gbɔng fwɔ, “Bedwa de ba kyè vɔk e rwa bato bê ra pyɛ de Gabik Dagwi Darwey hê simo, na be ra e hwomo.”
Ba nɔng nu, be tɛ̀ a Yɔshuwa kpîn negwɔm
9Dagwi Darwey a ha na me a ye, 10“Hɛldai, na Tobiya na Yɛdaya ba ga toyo yi e de sesam e sevwêl Babilɔn. Jut nɔrɔ de yɛn a vey mɛ, na hwo kyè mɛ vɔk e lɔ Yɔsiya hwêy Tsefanya. 11Yong kpîn negwɔm na dyam pyɛng tanga dyam shinang yê nɔrɔ mo, na hwo tɛ̀ wɛ e ra tô Yɔshuwa hwêy Yɛhɔzadak, darwêy bepiris. 12-13Ha a yɛ wɔgɔ, me, Dagwi Darwey, Dâ Jey Mwa, ma ye ngan, ‘Mwat hwak ê nára hɛ yi e ngamo sede lang ha nǎ hɛ, ko a rɔda to wɔ lɔk a me Gbɔng Duk Re Fongol. Ma rɔda yila hɛ à Lang, ko ba rɔda nɔng ɛ nerey ne gbɔng gwɔ̀m. A rɔda re negwɔm e ra bemat mɛ. Piris hom hwak a rɔda tumal e hagât gwofwa negwɔm mɛ, ko yɛn a rɔda ra fwom tanga yɛ e ji nesa.’ 14Ba rɔda tik kpîn negwɔm o e ji Gbɔng Duk Re Fongol, na be bare mɛ na Hɛldai, na Tobiya, na Yɛdaya tanga Yɔsiya.”
15Bemat de ba sé sangal yikyik ba rɔda vey sɛlɛ, na be to lɔk Gbɔng Duk Re Fongol wo Dagwi Darwey. Ano, yin a rɔda de tɔk, e Dagwi Darwey, Dâ Jey Mwa, de a tomo me na yin. Pyɛ́ yemo mwa ya rɔda té, ka sede yin ê gyeng hâ Dagwi Darwey, Dagwi min na yey min mwa.
Currently Selected:
Zɛkarya 6: bomBI
Highlight
Share
Copy
Want to have your highlights saved across all your devices? Sign up or sign in
© 2009 Nigeria Bible Translation Trust and Wycliffe Bible Translators, Inc. in cooperation with Berom Language and Translation Board
New Testament originally published by © 1984 International Bible Society and Nigeria Bible Translation Trust
