Matayus 16

Ba simo Yɛsu a dura pyɛ bes

(Mar 8:11-13; Luk 12:54-56)

1Behak e ji BeFarisi na BeSaduki ba vey na Yɛsu, yɛn a simo na be mara hɛ. Yaga ano, yɛn a yang ɛ, a dura a yɛn pyɛ bes cak de yê dura, reto mɛ ra yi na Dagwi. 2Ko Yɛsu a toyo a yɛn, a ye, “Sede gwi gwa sé kyè wɔ̀ gaba, ko lagwi wa sé swinang, ko yin e tē, ‘Ey yàa! Jey ye ba sè ryat nahwol.’ 3Ko nagasi, ka sede yin a di lagwi wa sé swinang, wa to vɔk bale, ko yin e tē, ‘Kée! Yunung, jey yê vɔk rwak.’ Yin e tɔk bɛrɛng lagwi, ko yin e misang cap pyɛ́ de ya sé e ji wɛ, ko yin e tɔk misang cap pyɛ̂ jeng yemo wɛt. 4Bemât jeng yemo ba sé beves, ko be kyɛ́ ɛn nà raa Dagwi! Yin e simo be dura a yin pyɛ bes cak a? Wey! Pyɛ bes de ba rɔda dura a yin, yɛ à yè Yona.”

Ko a hàla hɛn, a kyè.

Gêy-sing BeFarisi na wo BeSaduki

(Mar 8:14-21)

5Jeng de bemât masâ fwôm Yɛsu ba ye dɔ a gworep o, a yang ɛn bam nà jut kpam-tuk. 6Yɛsu a yang ɛn, “Tē in naka, na yin tē hywɛ na géy-sing BeFarisi na wo BeSaduki.”

7Yɛn a tɔrɔng há mo na bemɛn, ba ye, “A ha ano yaga wot a vɔk kpam-tuk wɛt.”

8Ko Yɛsu a tɔk pyɛ de yɛn a sé ha, ko a rangal hɛn, a ye, “Yaga sɛ́ de yin a sé tɔrɔng na bemin, ko yin e tɛ̀sɛ kaa vɔ̂k kpam-tuk wɛt arɛt? À yin de yin e tɛ̀ gap min mwa e ra me wɛt! 9Yin a rɔngɔl nà tɔk arɛt? Yin a bare na jeng de mà kwɔrɔs bāgat vane batungun, na me nɔ̂ng bemat gu batungun (5,000) wɛt arɛt? E sháp ala de yin a sila na cɛ́k o de ya pɔl arɛt? 10Kɛ e rà bagat kpam-tuk bataama de mà kwɔrɔs, na me nɔ̂ng bemat gu banaas (4,000) arɛt? E sháp ala de yin a sila na bwang cɛ́k o arɛt? 11Yi e rɛ̌ de yin a kyɛm yin a tɔk wɛt arɛt? A sé e ra kpam-tuk wɛt de ma sè ha a yin. Tē in naka na géy-sing BeFarisi na wo BeSaduki!”

12E bamâ há hane, yɛn a tɔk, a sé e ra géy-sing de be yong mɛ̀ kpam-tuk wɛt de Yɛsu a yang ɛn, be tē naka na wɛ, ko a sé e ra basâ BeFarisi na BeSaduki.

Bitrus a nɔng nuha e ra Yɛsu

(Mar 8:27-30; Luk 9:18-21)

13Jeng de Yɛsu a wul yɛnɛ̂ sevwel bagat na repomô Kaisariya Filipi, a rangâl bemât masâ fwom mɛ, a ye, “Bemat be tē, Me de ma tɛ́ me mwat ma sé wà arɛt?”

14Yɛn a yang ɛ, “Behak be tē, hwà sé Yohana wo batisma; behak, Eliya; ko behak kwong be tē, hwà sé Yirmiya kɛ hwak e ji bezarap Dagwi.”

15Ko a to rangal hɛn, a ye, “Ko sɛ̌ yin ɛ, yin e tē ma sé wà arɛt?”

16Simɔn Bitrus a toyo a yɛ, a yang ɛ, “Hwà sé Mwat de Dagwi a kasa na a sey bemat, hwà sé Hwey Dagwi de a vɔk neken.”

17Yɛsu a yang ɛ, “Hwà sé wo yey pyɛng, à Simɔn, hwêy Yona! A sé e mwasi de a dura a hwo pyɛ yemo wɛt, ko a sé e Da hom de a sé e ji lagwi. 18Yaga ano, ma sé ha a hwo, hwà sé Bitrus wɔgɔ, Gwofwa, ko a sé e ra retîs gwofwa mo de ma rɔda lɔk ɛ̀ ekilisiya hom. Vit a mwât repugu de ê kyɛm a re como e ra wɛ, mwa na reku arɔng. 19Ma rɔda nɔng o bemakwilî Segwɔm Lagwi. Pyɛ de hwô ye wey a yɛ e ngamo e jey, Dagwi ê ye wey a yɛ arɔng. Ko pyɛ de hwô ye ey a yɛ e ngamo e jey, Dagwi ê ye ey a yɛ arɔng.”

20Ano, Yɛsu a nɔ̂ng bemât masâ fwom mɛ nu na gap, a yang ɛn, “Yin kwon ha a mwat hwak wɛt wɔgɔ, ma sé Mwat de Dagwi a kasa na a sey bemat.”

Yɛsu a ha e ra reyɔm mɛ na reku mɛ

(Mar 8:31—9:1; Luk 9:22-27)

21Yi e jeng o, Yɛsu a hwo misang a bemât masâ fwom mɛ, a ye, “A sé gbing-gbing na me kyè vɔk e Yɛrusalɛm, na me di reyɔm pyak yi e vɔ bemakuk, na bepiris, tanga bemât basâ Badu. Yɛn ê mɔrɔ me, ko e tuk hê tat, ba rɔda sene me yi e reku.”

22Ko Bitrus a hwɔtɔ hɛ e vwara, a hwo gyong ɛ, a ye, “À Darwey, gwi gwo ro mɛ̀! Pyɛ́ yemo yê sang té na hwo wɛt!”

23Yɛsu a doyo, a yâng Bitrus, “Sek e ngamo, à Shetan! Hwà sé a me sede pyɛ tiri bwol, yaga báre mō ha sé yerê hê Dagwi wɛt, ko ha sé yerê hê mwasi.”

24Ko Yɛsu a yâng bemât masâ fwom mɛ, “Ka sede mwat hwak e simo na a raa me, gbing-gbing na yɛ a ye bam a tó mɛ, na a jut cɔ́gɔt-kak mɛ, na a raa me. 25Yaga mwa mwat de e simo na a sey neken mɛ a rɔda bidɛ nɛ; ko mwa mwat de a ye waa a neken mɛ, yaga e raa me, a rɔda sey nɛ. 26Fwom o gwɛ a sɛ́, ka sede mwat a bensa pyɛ̂ mwa e jey, ko e yɛnɛ mo a bidɛ neken mɛ arɛt? Vit a pyɛ cak de mwat ê tɔk nɔng na a viri mɛ̀ tó mɛ. 27Yaga Me de ma tɛ́ me mwat ma rɔda ba vey na gbɔng nerât Da hom tanga betom-lagwi mɛ, ko ma rɔda ba tala kawɛ mwat pyɔlɔ mɛ tyɛng na pyɛ de a ga ra. 28Mwin me ha a yin: Behak ba sé e tumal e ngamo de be ba ku wɛt, sɛ̌ yɛn a ba di Me de ma tɛ́ me mwat ma sé kyè vey na me hwo re negwɔm.”

Currently Selected:

Matayus 16: bomBI

Highlight

Copy