Luka 24

Sene Yɛsu yi e reku

(Mat 28:1-10; Mar 16:1-8; Yoh 20:1-10)

1Tûk mɛsɛng e ji sati mo, bop-bop nagasi, beha mo ba jut behal nesang nerat vemo de yɛn a ga kana yong, ko ba kyè mɛ̀ vɔk e sak o. 2Yɛn a wul, ko ba sɛ̀ ba ga kana biring gwofwa mo yi e nû sak o. 3Ko jeng de yɛn a yel e ji mo, yɛn a sɛ̀ revîn Darwey Yɛsu wɛt. 4A rɔngɔl a yɛn zii na pyɛ yane, ko gobok, bemat behak beba de ba tɛ̀ berugu de bà nɛp sizɔng ba tumal bagat na yɛn. 5Beha mo ba wok bengyip, yɛn a ye cěndet a bato mɛn vɔk e vwel, ko bemat o ba yang ɛn, “Yaga sɛ́ de yin a sé jāma womo de a vɔk neken e kwɔn de be lɛsɛ ɛ̀ bavin arɛt? 6A sé e ngamo wɛt! Ba ga sene hɛ yi e reku! Bàre hin na pyɛ de á ha a yin jeng de á sè tanga yin e sevwêl Galili wɔgɔ: 7‘A sé gbing-gbing na be ba nára Me de ma tɛ́ me mwat e vɔ bemât banɛn; yɛn a rɔda ba kak me e ra cɔ́gɔt, ko e tuk hê tat, ba rɔda ba sene me yi e reku.’ ”

8A remo kwong, beha mo ba bare na há mɛ mo. 9Yɛn a to ɛn yi e sak o, ko yɛn a ha a bemât masâ fwom mɛ kuru na wɛ gwining tanga bwang bemat mɛ mwa pyɛ́ yemo mwa. 10Beha de ba ha a bemât masâ fwôm Yɛsu há hane mo ba sé Marya wo Magdala, na Yowana, na Marya nêng Yakɔp, tanga bwang beha de ba sé na yɛn. 11Ko bemât masâ fwom mɛ mo ba sey tsak o na há mɛn o wɛt, yaga yɛn a bare, há de beha mo ba ha a yɛn ha sé hâ neshɔngɔlɔng zɔng. 12Ko Bitrus a sogo, a kaba setele vɔk e sak o, a pom, a ye kwot, ko a di gworugu gwolwis de bá hanas hɛ mɛ̀ e hagat hining. E bama mo, a to ɛ vɔk e lɔ, a langat hɛ na pyɛ de ya ga té.

Kwɛngɛl vɔk e Ɛmawus

(Mar 16:12-13)

13Tuk hane mo, beba e ji bemât raà Yɛsu bá sè kyè vɔk e kerepomo kehak de be tâng kɛ, à Ɛmawus; ka sé sede lyōsho kuru na yɛ jining (11) yi e Yɛrusalɛm. 14Yɛn a sé ra berem na bemɛn e ra pyɛ̂ mwa de ya ga kana té. 15Jeng de ba sé kyě ha, be ra berem e ra pyɛ́ mo, ko Yɛsu pyɛ mɛ a vɛ̌ yi, a dop na yɛn. 16Ko mwa ano de yɛn a di ɛ, pyɛ cak ya dul ɛn nà tɔk ɛ. 17Ko Yɛsu a hwo yang ɛn, “Yin e ra berem e ra sɛ́ e gwong arɛt?”

Yɛn a tumal, ko ba bɛrɛng na lashê yey. 18Gwining e ji mɛn de ba tang ɛ, à Keleyopas a rangal hɛ, a yang ɛ, “E hwo nju mo de hwà sé kwɛnɛt e Yɛrusalɛm de hwà dun pyɛ́ de ya té e hwomo e ji nepɔlɔ nane arɛt?”

19Yɛsu a to rangal hɛ, a ye, “E yɛ̌ pyɛ́ arɛt?”

Ko yɛn a yang ɛ, “Pyɛ́ de ya té na Yɛsu wo Nazarɛt. Yɛ a womo de á sè zarap Dagwi, de há mɛ na fwom mɛ bá vɔk reto e nuyêl Dagwi tanga bemât mwa. 20Ko begbɔng bepiris tanga bemât nuyel mot ba nára hɛ, na be gang ɛ na shɔt reku. E bama mo, ba kak ɛ e ra cɔ́gɔt. 21Ko wot, wot á kana sɛt yey, e yɛ wɛ de e ba viri BeIsrayɛl! Ko tik hane kwong, tuk hê tat a hemo de pyɛ́ yemo ya té. 22Ko beha behak e ji mot ba ga nɔng ot pyɛ langat. Yɛn a wɔ́ e sak o bop nagasi, 23ko yɛn a sɛ̀ revin mɛ wɛt. Yɛn a to ɛn, ko ba ha a wot, yɛn a di pyɛ cak sede e ji negwi-ywey, yɛn a di betom-lagwi de ba ha a yɛn, Yɛsu a sé na neken. 24Ko behak e ji mot ba wɔ́ e sak o arɔng, yɛn a sɛ̀ tyɛng pyɛ de beha mo ba ha. Ko yɛ pyɛ mɛ, yɛn a di ɛ wɛt.”

25Ko Yɛsu a yang ɛn, “À betɔn behak! Bato min ba sé dirik, ko yi ano, yin a sey tsak o na kayɛ pyɛ de bezarap Dagwi bà kana ha wɛt. 26Yin a tɔk, a sé gbing-gbing na Mwat de Dagwi a kasa na a sey bemat a sɔ reyɔm rane, yaga na a tɔk wok netâ gbɔng nerey mɛ wɛt a?” 27Ko Yɛsu a misang a yɛn neha de bà kana ha e ra yɛ e ji mwa Bwok-basa Dagwi, a hwo mɛ̀ yi e bebok-basa Mose vɔk e bebok-basa mwa bezarap Dagwi.

28Jeng de yɛn a vey bagat na kerepomo de yɛn a kyè vɔk ɛ̀ mo, Yɛsu a ra sede é kyè wɔ̀ kwey. 29Ko yɛn a shonong e ra yɛ, ba yang ɛ, “Sàngal e ngamo tanga wot, yaga gwi gwa ga kyè, ko nawiri na sé tɛ̀.” Ko Yɛsu a yel, na a bin sangal na yɛn. 30Jeng de a sé re pyɛ́ tanga yɛn, a jut kpam-tuk, a feng a Dagwi, a kwɔrɔs wɛ, ko a gas a yɛn. 31E jeng o, bayis mɛn ba hwo wunta hɛn, yɛn a tɔk ɛ, ko a vɛ̌ ye bit e bayis mɛn. 32Yɛn a tâng bemɛn, “Yɛ́t de neyey mot ná gà lolo na yey pyɛng jeng de á gà kyě há a wot e gwong, ko á ga misang a wot Bwok-basa Dagwi.”

33Remo-remo, yɛn a sogo, ko ba to ɛn vɔk e Yɛrusalɛm. Ba pom, ba sɛ̀ bemât masâ fwom Yɛsu kuru na wɛ gwining de ba ga tula hɛn e dem hining tanga bemat de ba sé tanga yɛn, 34ko yɛn a sé tē, “Mwin, Darwey a ga sene yi e reku! A ga dura a Simɔn tó mɛ!”

35Ano kwong, bemat beba mo ba hwo ha a yɛn pyɛ́ de ya ga té e gwong, mwa na gwong de yɛn á tɔk Darwey jeng de á kwɔrɔs kpam-tuk.

Yɛsu a dura a bemât mɛ tó mɛ

(Mat 28:16-20; Mar 16:14-18; Yoh 20:19-23; T.B.Yɛsu 1:6-8)

36Jeng de bá sè rɔ̌ ha a yɛn pyɛ́ yane, Yɛsu pyɛ mɛ a vɛ̌ tumal e ji mɛn, a yang ɛn, “Tik na neyey min ne dyɛng!”

37Yɛn a ye lot, bengyip ba vo ɛn, ko a sé a yɛn sede yɛn a sé di wovuvwel. 38Ko Yɛsu a yang ɛn, “Yaga sɛ́ de yin a ye bège arɛt? Yaga sɛ́ de yin e dasap e neyey min arɛt? 39Di in vɔ hom tanga bol hom. A sé e me pyɛ hom! Rá in me, na yin a di: Wovuvwel a vɔk banama tanga bekup wɛt, sede remo de yin a di ma vɔk.”

40Bama de a ha ano, a dura a yɛn vɔ mɛ tanga bol mɛ. 41Yɛn a rɔngɔl gbak sana sey tsak o, yaga yɛn a sila na yey pyɛng, ko ba sé langat hɛn pyɛ yemo. Yaga ano, a rangal hɛn, a ye, “Yin a vɔk pyɛ̂ re cak e ngamo a?” 42Yɛn a nɔng ɛ cɛ̌k namâ tɔk de ba ga rangas, 43a sey, ko a hwo re mo e nuyel mɛn.

44Ko a to yang ɛn, “Pyɛ ma yemo de ma kyě ha a yin jeng de má rɔngɔl tanga yin wɔgɔ: A sé gbing-gbing na mwa pyɛ́ de bà kana jɛk e ra me e ji Badu Mose na e bebok-basa bezarap Dagwi, tanga yēmo de bà jɛk e Bwok-basa Lɛlɛ yē sila.”

45Ano, a tɛ̀ neyey mɛn ne tɔk pyɛ́ de bà jɛk e Bwok-basa Dagwi. 46A yang ɛn, “Bà jɛk ngan: Mwat de Dagwi a kasa na a sey bemat a rɔda di reyɔm, ko a rɔda to sene yi e reku e tuk hê tat. 47Ba rɔda shara a mwa yére bemat jey e ji reza mɛ, ye doyo yi e banɛ̂n yɛ̄, yaga na Dagwi a hàla a yɛ̄ vɛ, ko ba rɔda susu shara mo e Yɛrusalɛm. 48Yin vɛ yin a sé bemât nuha e ra pyɛ́ yemo. 49Ko me ma rɔda wɔ̀ tomo a yin na pyɛ de Da hom a ye, ê nɔng in. Ko kā gyeng in e ji repomo mo e ngyen sɛ̌ jeng de ba nɔng in reto yi e lagwi.”

Ba jut Yɛsu vɔk e lagwi

(Mar 16:19-20; T.B.Yɛsu 1:9-11)

50E bama mo, Yɛsu a kyè na yɛn wɔ bagat na Bet-Anya. A jut vɔ mɛ e rak o, ko a tɛ̀ nerat e ra yɛn. 51Sede a sé tɛ̀ a yɛn nerat ano, a gas ɛ na yɛn, ko ba jut ɛ vɔk e lagwi. 52Yɛn kwong, yɛn a re a yɛ fongol, ko yɛn a to ɛn vɔk e Yɛrusalɛm na yey pyɛng sizɔng. 53E hwomo, yɛn a wusal e Gbɔng Duk Re Fongol e de somô Dagwi.

Currently Selected:

Luka 24: bomBI

Highlight

Copy