Luka 21

Nɔrɔ de kuma a tɛ̀

(Mar 12:41-44)

1Yɛsu a hwo bɛrɛng, ko a di bedaberey de ba tɛ̀sɛ nɔrɔ mɛn e ji kwɔ̂n tɛ́sɛ dyām e Gbɔng Duk Re Fongol. 2A to di kuma hwak de a sé pɛ́ng-pɛng, a tɛ̀ nedyam zwey neba. 3Ko Yɛsu a ye, “Tsak o mwin me ha a yin: Kuma womo de a sé pɛ́ng-pɛng a tɛ̀ pyɛ de ya dal ye bwang bemât mwa. 4Yaga mwa hɛn ba vɛ́sɛ yi e ji pyɛ̂ nedanerey mɛn, ba tɛ̀sɛ. Ko yɛ, mwa ano de a sé pɛ́ng-pɛng, a tɛ̀ mwa pyɛ de ê re mɛ̀ pyɛ́.”

Rehâ wey na Gbɔng Duk Re Fongol

(Mat 24:1-2; Mar 13:1-2)

5Bemat behak bá sè ha e ra Gbɔng Duk Re Fongol, bá sè tɛ̀sɛ kâ nerât wɛ de ba lɔk na beta berat tanga nenɔrɔ de bemat bá kana nɔngɔ̂s Dagwi. Ko Yɛsu a yang ɛn, 6“Jeng ya sé kyè vey de ba rɔda gangas mwa pyɛ́ yemo de yin a sé bɛrɛng. Vit a gwofwa gwohwak e ngamo de ba rɔda ba tik gwɛ e ra tɛ̂t mumwɛ.”

Reyɔm na rezot

(Mat 24:3-14; Mar 13:3-13)

7Ko yɛn a hwo rangâl Yɛsu, yɛn a ye, “À Da, pyɛ́ yemo ye ba té nayu ɛ? Ko e sɛ́ de ye ba dura a wot, pyɛ́ yemo ya sé kyè wɔ̀ té arɛt?”

8Yɛsu a yang ɛn, “Tē in naka, mwat hwak a kwɛlɛng hin wɛt. Yaga bemat pyak ba rɔda ba vey e ji reza hom, ko kawɛ e ji mɛn ê ba ye, yɛ a sé me; ê ba to ye, ‘Jeng hom ya ga vey bagat.’ Yin kwon raa hɛn wɛt! 9Yin wok bengyip wɛt e jeng de yin e ba wok rehâ tô como na rehâ sogô nehywɛ. Gbing-gbing na pyɛ́ yane ye ba té, ko jeng ye yɛnɛ mo ya ga vey bagat e ngyen wɛt.”

10Yɛsu a to gwɛ̌ yang ɛn, “Yére bemat jey ya rɔda ba tó como na bemɛn, ko yere arɔng ya rɔda ba tó como na yere cak. 11Vwel ha rɔda ba digis sizɔng, ko vyong na nerɔ neves na rɔda ba sè e nekwɔn detidetu. Ba rɔda ba di pyɛ́ de ya sé yê bengyip ding-ding na gbɔng pyɛ̂ dura de ye yi e lagwi. 12Ko gyam na pyɛ́ yemo mwa ye ba té kwong, ba rɔda ba vos in, ko bê ba tak a yin reyɔm. Ba rɔda ba wɔ́ na yin e beduk re fongol, na be ba ra a yin shɔt, na be ba tɛ̀ in e ngyang. Ba rɔda to ba wɔ́ na yin e nuyêl begbɔng begwɔ̀m na begwɔmna, yaga yin e raa me. 13Jeng a yane kwong de yin a rɔda ba nɔng nuha e ra Yɛgɛt Yat. 14Ko yóng in neyey min, yin kwon sap gyam e ra pyɛ de yin ê ba wɔ̀ ha, na yin a ba dul mɛ̀ bato min. 15Yaga me ma rɔda ba nɔng in neha tanga netsitsɛng yerê nemo de vit a mwât repugu min hwak de a rɔda ba tɔk ha há duk o, kɛ a kyɛ́ ɛ pyɛ́ de yin a rɔda ba ha. 16Beda tanga beneng min, na begwa min, na cáng min, tanga besa min ba rɔda ba nára hin e vɔ bemat o, ko yɛn a rɔda ba tɛ̀ be mɔbɔs behak e ji min. 17Kawɛ mwat a rɔda ba bɛɛ hin ves, yaga yin e raa me. 18Ko vit a setôt rato min sining de sa rɔda ba gaba! 19Niri hin, ko ano yin a rɔda ba sey bato min.”

Ha e ra rehâ wey na Yɛrusalɛm

(Mat 24:15-21; Mar 13:14-19)

20“Jeng de yin a rɔda ba di bagyɛng bemât como ba gwɔrɔ Yɛrusalɛm, ko yin a rɔda ba tɔk, ba vey bagât wey na repomo mo. 21E jeng o, tik na bemat de be ba sè e sevwêl Yudiya be tele vɔk e beraku. Vemo de be ba sè e ji repomo mo kwong, bē tik rɛ; ko vemo de be ba sè sangal e nebapomo kwong, yɛn a wɔ̀ yel e ji repomo mo wɛt. 22Yaga negasi nane na rɔda ba sè jeng de Dagwi a rɔda ba tabak bemat mɛ, na be sila pyɛ̂ mwa de bà kana jɛk e Bwok-basa Dagwi. 23Yaa kukuuk! Gawey e ra beha de bê ba vɔk jim, mwa na vemo de bê ba ngas nèy e jeng o! Gbɔng reyɔm ra rɔda ba hwo e ra sevwel semo, ko Dagwi a rɔda ba tɛ̀ shom na bemat o. 24Ba rɔda ba mɔbɔs behak na bewal, ko ba rɔda ba hashe behak e sesam vɔk e yére bemasî mwa, ko bemat beduk ba rɔda ba bɔrɔs Yɛrusalɛm sɛ̌ jeng mɛn ya sila.”

Toyô Yɛ̀ de a tɛ́ ɛ mwat

(Mat 24:29-31; Mar 13:24-27)

25“Ba rɔda ba bɛrɛng pyɛ̂ langat cak e gwi, na e pwɛl, na e netangacɛn. E ngamo e jey kwong, a rɔda ba sè a yére bemasi kpɔrɔk sizɔng, ko yɛn a rɔda ba wok bengyip gworep de gwo lulum tanga nshi de ne paa bagung. 26Jeng de bemat be ba sè gyeng pyɛ́ de ye kyè wɔ̀ té e ra jêy mwa, ba rɔda ba kushu sede bemât cushu yaga bengyip, yaga ba rɔda ba kàsa pyɛ́ de ya vɔk reto e gwi yi e begwông yɛ̄. 27E jeng yane kwong, bemat ba rɔda ba di Me de ma tɛ́ me mwat me kyè vey e ji rele na reto tanga nedyɛt nerat sizɔng. 28Jeng de pyɛ́ yemo ye ba hwo té, tumal hin na yin a yâng bato min garang, yaga ba ga vey bagât sey in.”

Pyɛ de be masa yi e retîn regwi

(Mat 24:32-35; Mar 13:28-31)

29E bama mo, Yɛsu a hwo ha a yɛn gwɔrɔ-há hemo, a ye, “Bɛrɛng hin retîn regwi na bwang cɔ́gɔt mwa. 30Jeng de yin a di berang mɛn ba ga hwo turuk, ko yin a tɔk, swigi gwa ga vey bagat. 31Tyɛng ano arɔng, jeng de yin a di pyɛ́ yemo ya ga hwo té, ko yin a tɔk, jeng ya ga vey bagat na Dagwi a hwo re negwɔm.

32“Tsak o mwin me ha a yin: Bemat de ba sé beken a remo, mwa vɛ ba rɔda kushu wɛt, sɛ̌ pyɛ́ yemo mwa ya té. 33Jey tanga lagwi ba rɔda ba tala hɛn, ko reha hom ra rɔda ba tala hɛ ko tyɔng wɛt.”

Bɛ́rɛng nekanang

34“Tē in naka! Yin kwon tɛ̀ bato min e ra nzem sɔ̂ pyɛ́ yemo de ye tɛ̀ yin a feng kɛ e ra báre pyɛ̂ jey yemo. Ka ano, ko tuk hane ha rɔda ba hwo e ra yin hák, sede pyɛ ya hwo e sòro. 35Yaga ha rɔda ba hwo e ra kawɛ mwat de a sé e kahɛ kwɔn e jey. 36Bɛrɛng hin nekanang kayɛ jeng, ko rá in won, yaga na yin a sɛ̀ gap, na yin a kyè tyang e ji pyɛ́ yemo de ya rɔda ba té, yaga na yin a bin ba tumal arɔng e nuyêl Me de ma tɛ́ me mwat.”

37Kahɛ tuk Yɛsu a basa a bemat e Gbɔng Duk Re Fongol, ko kahɛ hywelek a nunus, ko a wɔ̀ pɔl e raku hwak de be tâng wɛ, à Raku Pàt. 38Ko bop nagasi, bemât mwa ba kyese e Gbɔng Duk Re Fongol o na be wok ɛ.

Currently Selected:

Luka 21: bomBI

Highlight

Copy