Susumo 33

Yakɔp a man na Esau

1Yakɔp a ye ganga, ko a di Esau tanga bemat mɛ naga benaas (400). Ko a gas a beha mɛ Leya, na Rahɛl, na jɛn-beha mɛ beba nèy o mwa. 2A tɛ̀ jɛn-beha mo na nèy mɛn e yel, ko a raa mɛ na Leya na nèy mɛ, tanga Rahɛl na hwey mɛ Yɔsɛf e tala mo. 3Ko yɛ pyɛ mɛ a kwey e yel mɛn, a raa na té guduruk e vwel zang taama jeng de a vey bagat wɔ man na gwa mɛ mo. 4Ko Esau a tele, na a wɔ̀ tang ɛ show, a kula hɛ e gey, a man rwanang na yɛ, ko mwa hɛn ba hwo tosho yaga yey pyɛng. 5Jeng de Esau a ye ganga, a di beha na nèy, ko a ye, “E beva a vemo de ba sé tanga hwo arɛt?”

Yakɔp a toyo a yɛ, a ye, “À darwey hom, a sé e nèy hom a nemo de Dagwi, yi na nerat mɛ, a ga nɔng me.” 6Ano kwong, jɛn-beha na nèy mɛn ba gwɛ̌ sek bagat, ba ye guduruk. 7Leya, na nèy mɛ, ba sek bagat, ba ye guduruk arɔng, ko e yɛnɛ mo, Yɔsɛf na Rahɛl ba sek bagat, ba ye guduruk.

8Ko Esau a ye, “Bagyɛng vemo de ma tanga manas na vɛ, ba sé vê sɛ́ arɛt?”

Yakɔp a ye, “A sé yaga na me bin sɛ̀ mɛ nerat yi na hwo, à darwey hom.”

9Ko Esau a yang ɛ, “Ma vɔk pyɛ de ya vey a me, à gwa hom. Vɔk pyɛ́ de ya sé myo.”

10Yakɔp a ye, “Wey, me ra won na hwo: ka sede ma ga sɛ̀ nerat na hwo, ko tik na hwo sey nɔrɔ hom! Mwin, dî bayis mō zɔng a sé sede dî bayîs Dagwi, a remo de hwà ga sey me na yey pyɛng. 11Gabɔk wɛt, sey nɔrɔ de ma vey a hwo mɛ! Dagwi a ga dura a me nerat mɛ vit à yere mo. Ma vɔk pyɛ de ya vey a me.” Yakɔp a shonong mɛ Esau e ngyen, na a de sey nɔrɔ mo.

12Esau a yang ɛ, “Tik na wot vo gwong. Mê dop na hwo.”

13Ko Yakɔp a ye, “À darwey, hwà tɔk nèy nà rɔngɔl nebot o. Ko mê tē naka na vyēl tanga yas de ye ngas nèy. Ka sede ba ro ɛn na yol tuk hining zɔng, ko mwa kara mo bê wey. 14Ka sede hwà simo, à darwey, hwo sey yel. Me, mê de raa hywɛ e bama, tyɛng na kwɛngɛl yas na nèy, vɔk e jeng de mê ba wul kwɔn mō e Seyir.”

15Ko Esau a ye, “Tik na me nɔng o behak e ji bemat de ba sé tanga me.”

Ko Yakɔp a yang ɛ, “Yaga sɛ́ de hwô ka to ra ano ɛ? Tik na me sɛ̀ nerat na hwo zɔng.” 16E tuk hane mo, Esau a hwo vo gwông to ɛ vɔk e Seyir. 17Ko Yakɔp a kyè vɔk e Sukɔt. A lɔk a tó mɛ lɔ e hwomo, a tɛ̀ buk yaga yas mɛ arɔng. Yaga ano de ba yila zâ kwɔn o, à Sukɔt.#33:17 Sukɔt: Cap reza mo ya sé Buk.

18Ano de Yakɔp a toyo yi e Mɛsɔpɔtamya-Bato, a wɔ̀ wul tyang e repomô Shɛkɛm de ra sé e ji sevwêl Kanaan. A yong kwɔ̂n ye ngyɔk wɔ̂ sɛ̀ repomo mo. 19A sey bak hey o yi e vwɔ̂ nèy Hamor, dâ Shɛkɛm, e nû dyām pyɛng naga (100). 20E kwɔn hane mo a lɔk ɛ gàgbang rangâs yas vɔk na Dagwi, ko a vo a hɛ rezâ Ɛl, yɛ a Dagwi Israyɛl.

Currently Selected:

Susumo 33: bomBI

Highlight

Copy