Tomong Betom Yɛsu 3

Ba tɛ̀ mwat nà bol tyang

1Tuhak, Bitrus na Yohana bá sè kyè vɔk e Gbɔng Duk Re Fongol e jeng won. Jeng o yá sè dyām tyat nahywegelek. 2Jeng de yɛn a wul hwomo, yɛn a kwey e ruhup de ba tâng gwɛ, à Ruhup Rwat. E hwomo, yɛn a di mwat hwak de a sé nà bol yimo tɔ́ mɛ. Kahɛ tuk bemat ba jurus hɛ, ba wɔ̀ tikis hɛ e ruhup gwane mo, na a bin ra won na bemat de ba sé kyè wɔ̀ yel e nelalâ Gbɔng Duk o. 3Jeng de a di Bitrus na Yohana, yɛn a sé kyè wɔ̀ yel e ji mo, a rangal hɛn dyām. 4Yɛn a bɛrɛng hɛ gbir, ko Bitrus a yang ɛ, “Bɛrɛng hot!” 5A bɛrɛng hɛn, a bare, a rɔda sɛ̀ pyɛ cak yi na yɛn. 6Ko Bitrus a yang ɛ, “Ma vɔk dyām ko tyɔng wɛt. Ko pyɛ de ma vɔk, e yɛ de mê nɔng o: E ji rezâ Yɛsu Kristi wo Nazarɛt, ma yang o, sogo, na hwo kyè!” 7A kaba hɛ e vwɔ yege, ko a sɛlɛ hɛ na a sogo. E ji jeng, bol mwat o mwa na bayîs vɛ ba pere tɛ̀ gap. 8A gyili e tumal, ko a hwo kyě kyè. Ano, a raa Bitrus na Yohana wɔ̀ yel e nelalâ Gbɔng Duk o, a sé kyè, a sé gyilsit, ko a to sé somo Dagwi. 9Mwa bemat e hwomo ba di ɛ a sé kyè na bol mɛ, ko a sé somo Dagwi. 10Jeng de ba tɔk, a sé e mwat de á kana sangsal e Ruhup Rwat na a ra won, yɛn a langat hɛn tyɔng wɛt, ko a sé a yɛn kpɔrɔk na pyɛ de ya ga té na yɛ.

Rehâ Bitrus e Gbɔng Duk Re Fongol

11Jeng de mwat de a tɛ̀ tyang o a sé rɔɔ kaba Bitrus na Yohana, a sé a mwa bemat pyɛ langat sedesi. Ba tele wɔ e hwomo, ko yɛn a vey sɛ̀ ɛn e dem de ba tâng hɛ, à Fwàm Sɔlɔmɔn. 12Sede Bitrus a di ɛn, a yang ɛn, “À yin BeIsrayɛl, yaga sɛ́ de pyɛ yemo ya tɛ̀, yin a langat hin arɛt? Yaga sɛ́ de yin e shusha bayis e ra wot ano arɛt? A sé a yin, a sé yi na reto mot kɛ nerat mot e bayîs Dagwi de wot a tɛ̀ mwat womo a kyè arɛt? 13Dagwi, yɛ de a sé Dagwi wo Abraham, na wo Yishak, na wo Yakɔp, yɛ wɛ de a sé Dagwî bedabeda mot arɔng, yɛ mo a nɔ̂ng mwât fwom mɛ Yɛsu gbɔng nerey. Yin á vo Yɛsu mo, yin á nára hɛ na be mɔrɔ hɛ. E jeng de Pilatus á ye, ê hàla hɛ na a kyè, ko yin á kyɛ́ in. 14Yin á kyɛ́ in Yɛsu de a sé jɛrɛ, de a to sé mwat rwat, ko yin á rangâl Pilatus a hàla a yin Barabas de a sé mwât mɔbɔs bemat. 15Mwa neken na yi na Yɛsu, ko yin á mɔrɔ hɛ. Ko Dagwi á sene hɛ yi e reku. Wot e tɔk nɔng nuha e ra pyɛ yemo. 16Yi na tɛ̂ gap mɛ e ra Yɛsu, mwat de yin a sé bɛrɛng hɛ mo, ko yin a tɔk ɛ arɔng, a sey gap na a kyè. A sé yi na rezâ Yɛsu, ko yaga a tɛ̀ gap mɛ e ra yɛ, de mwat o a tɛ̀ tyang gyat ano, sede remo de yin mwa yin a sé bɛrɛng.

17“Ko di, à begwa, ma tɔk, yin tanga bemât nuyel min yin á mɔrɔ Yɛsu sana tɔk cap-hâ pyɛ de yin a ra. 18Yimo raane, Dagwi à kana ha yi e nenu mwa bezarap mɛ wɔgɔ, Mwat mɛ de a kasa na a sey bemat ê sɔ reyɔm. Ko a sé e gwong a gwomo de Dagwi a sila há mɛ mo. 19Yaga ano, ma sé ha a yin, doyo hin yi e banɛn min na yin a raa Dagwi, yaga na a bin fugut a yin banɛn min. 20Ka sede yin a ra ano, ko Darwey ê vey a yin na jeng de yin a rɔda to turu hin; ê tomo na Yɛsu arɔng, yɛ mwat de à kana kasa, yaga na a sɛlɛ hin, na a sey bemat. 21A sé gbing-gbing na Yɛsu a nàra e lagwi sɛ̌ jeng de Dagwi a rɔda ba tɛ̀ pyɛ̂ mwa ye tɛ́ ɛ pyas. A sé ano de Dagwi à ha yimo raane yi e nenu bezarap mɛ vê jɛrɛ. 22Yaga Mose à kana ha wɔgɔ, ‘Dagwi de a sé Darwey min ê tomo na zarap mɛ sede me. Mwat o ê sè yi e ji bemat min. A sé gbing-gbing na yin a wet betong, na yin a gyeng mwa pyɛ́ de ê ha a yin. 23Kawɛ mwat de ê wet betong na a gyeng neha mɛ wɛt, ba rɔda gas ɛ mwa burang yi e ji bemât Dagwi.’ 24Mwin, mwa bezarap Dagwi yi e Samwɛl vɔk e nuyel yɛn à ha a bemat pyɛ́ de ya rɔda ba té. Ko e nepɔlɔ nemo, pyɛ́ yane ya ga té. 25Dagwi à kana sira e ra pyɛ́ cak, yaga na yin a sɛ̀ nerât yɛ̄, ko à ra ano yi e nenu bezarap mɛ. À wuna hɛ na sira tanga bedabeda min arɔng, ko à to sé, yaga na yin a sɛ̀ nerât wuna-na-sira mo de à ra ano. Pyɛ́ mo ya sé tyɛng na há de à ha a Abraham wɔgɔ, ‘Yi na yére mō, ma rɔda tɛ̀ nerat e ra bemât jêy mwa.’ 26Ano kwong, Dagwi à kasa Yɛsu, mwât fwom mɛ, ko à tānga tomo hɛ vey na yin, na a tɛ̀ nerat e ra yin. Yɛsu mo á ra ano yi na tɛ̂ kawɛ mwat e ji min a doyo yi e begwong beves mɛ.”

Currently Selected:

Tomong Betom Yɛsu 3: bomBI

Highlight

Copy