Luk 13

Ire ene ìkagwu ìkom me emen ijo kan̄, môkwu

1Me ike mgbọ ya, usini ebi ìkup me ere ya, enenikpa inyi Jisọs ibe ke Pailet îkpan̄ ebi Ju ìnan̄a me Galili mgbọ ife cha ekigwa ngwugwa me ubọk me emen Uwu Mbuban. 2Jisọs ododo ebi ìtutumu ikọ ya ibe, “Ìre enyi ekikeek ibe ke ebi Galili ebi ekpan̄be cha erọrọ ijo inu igak otutuuk ebi Galili, ke Awaji obak me lek isulu ema osusut ikeya? 3Ire ikeya ke enyi ekikeek, îlọ. Mije, ìrere enyi me lek kinyi, ire enyi kpegwu ikom inan̄a me emen ijo kinyi, otutuuk kinyi mêkwaan̄ si ike ife cha ekwaan̄be. 4Ìrere akọp mè ene jeeta cha ebi ìkwakwaan̄ mgbọ uwu-oket ogbugbọbe ikeme ema me Silowam, ìre enyi ekikeek ibe ke ife chi mîrọ ijo inu igak otutuuk ebi ìluk me Jeruselem? 5In̄-in̄, ìkare ikeya. Ìrere enyi me lek kinyi, îtata enyi egwugwu ikom inan̄a me emen ijo kinyi, enyi otutuuk ene mêkwaan̄ si isan̄a ike ife cha ekwaan̄be.”

6Jisọs onenito urọk ge inyi ema ibe, “Îkaan̄ enerieen̄ ge òkakaan̄ uti figi me emen uko gerep kan̄, mè ikijijen̄e ikisi ikpọ mè ìre ọmọ mômun̄ mfut me inyọn̄ uti ya. Ire, ìkamun̄ mfut geege me inyọn̄. 7Inenitumu inyi ogwu òkisi ikwaan̄ me uko ya ibe, ‘Acha ita ire eya nkijijen̄e ebon uti figi yi inikiweek mfut me inyọn̄. Ire, ǹkamumun̄ kubọk mfut geege. Ìre uti yi ìbokpọkpọ ikeke ikeyi ikike ichit ijọn̄ ni? Fieek fiin̄!’ 8Ire, ogwu òkisi ikwaan̄ me uko ya ofọfọọk ọmọ ibe, ‘Ogwu nte, tele mè ikup-nu acha ge yi isọkọ me lek, mè ǹchiin̄ ijọn̄ ǹkana, mè ǹgwook inorie uti me ebon, mè eyaka ekpọ-nu. 9Ire ito mfut acha òbonu, mônwọn. Ire ìkato mfut mgbọ ya, efieek efiin̄.’ ”

Jisọs îgwa ogwu akọọk me Usen Mbuban

10Îkaan̄ Usen Mbuban ge, Jisọs okijeen̄ inu me uwu ntitiin̄ ge. 11Enenwaan̄ ge ijo erumun̄ onwunbe ikana ekpuk otutuuk akọp mè acha jeeta òwa si me uwu ntitiin̄ ya okupbe. Ijo erumun̄ ya ìtetet ogwu enenwaan̄ ya inwun igọbọ. Ogwu enenwaan̄ ya ìkakikọt ìbene lek ìkeke ìtat. 12Mgbọ Jisọs omun̄be ogwu enenwaan̄ ya, igwegwen ọmọ ibe, “Ogwu enenwaan̄, mîrọ inyi owu ònwọnọ me ubọk orukan̄ òkisisaak owu!” 13Itotoon̄ ubọk me lek ogwu enenwaan̄ ya. Mgbọ yaage, ogwu enenwaan̄ ya obebene lek ikeke itat, mè ikitọn̄ Awaji.

14Ogwu ibot uwu ntitiin̄ ya onanaan̄ ejit mije Jisọs ogwabe ene me Usen Mbuban, mè igana inyi ebi ìkup me uwu ya ibe, “Usen gweregwen okup isasa isi ikwaan̄. Ogwu iweek ibe egwa ọmọ, inu me emen usen gweregwen cha, ikanu me Usen Mbuban.”

15Jisọs ofọfọọk ọmọ ibe, “Enyi ebi isi iba kechi! Ìre enyi kpekitọn̄ọ eriembuuk kinyi, mè ìre inyinya akpan kinyi me uwu anam isa ije isibi isi inyi mudim me Usen Mbuban? 16Ire enyi ikirọ ikeya me lek anam ikike, sà ogwu enenwaan̄ yi, gwun̄ kè Ebereyam, ogwu Yọk otapbe mkpọn ototuuk akọp mè acha jeeta ye? Ìre ìkagbe ibe etọn̄ọ ogwu enenwaan̄ yi esibi me emen mkpọn me Usen Mbuban ni?”

17Ikọ ya Jisọs odobe ema okpọkpọ itet otutuuk ebi ochicha kan̄ cha esip. Ire, otutuuk ene ekekibele ejit me lek otutuuk inu ukechieen̄ Jisọs okirọ me etete kiban̄.

Urọk ukwuuk uti mọsitadi

(Mat 13:31-32; Mak 4:30-32)

18Jisọs onenikitumu ibe, “Ìre mkpulu eyi Awaji ìbet lek keke mọnọ? Sà ìre keke ke mbasa itọ me lek? 19Mkpulu eyi Awaji ìkup kubọk ukwuuk uti Mọsitadi eyi gwun̄ enerieen̄ ge omọnọbe isi iwop me uko kan̄. Ukwuuk uti ya otitibi, mè ikana ikpele uti. Unọn òwulu me inyọn̄ okekinu inisọọk me inyọn̄ otu agọọk uti ya.”

Urọk olat

(Mat 13:33)

20Jisọs okpọkpọk ikitumu ibe, “Ìre keke ke mbasa mkpulu eyi Awaji itọ me lek mọnọ? 21Mkpulu eyi Awaji ìkup kubọk sọntiik olat eyi enenwaan̄ otọbe itap me lek owuwa akpa ekọkọk eyi ìbosa irọ fituru, mè ifuku ikana mege, olat ya okakana iso lek otutuuk akpa ekọkọk ya, mè irọ inyi akpa ya iwuku.”

Otunchit eyi mkpulu Awaji ìre otunchit ògbagba inwan

(Mat 7:13-14,21-23)

22Mgbọ Jisọs okije ibosi Jeruselem, ikpọkpọ ikije igwaka inin̄ owuwa ama ile mè asabọn ama òkup me oniin̄ ya, mè ikijeen̄ ebi ama cha inu. 23Ene ge ododo ọmọ ibe, “Okaan̄-ene, ìre ibot ene inen mè inen gaalek ke ebenyan̄a isibi ni?”

Jisọs otutumu inyi ema ibe, 24“Ìsa ubọk geelek enyi ekọtbe, mè ìraka ìnin̄ me otunchit eyi ògbagba inwan. Mije, ǹkitumu inyi enyi ibe ke ogbogbo ene mêsa lek igak, ire, kpebekọt iraka inin̄ otunchit ya. 25Ogwukaan̄ uwu isinan̄a ikeke, mè inichit isotu ya, enyi mêkeke me oyet, mè itọbọ ubọk me otu isotu, mè iriaak igak ibe, ‘Soso Ogwu nte, gwuku isotu nyi eji.’ Ire, ogwukaan̄ uwu ya môfọọk enyi ibe, ‘Ǹkariọọn̄ enyi isi. Ǹkarọriọọn̄ si ere enyi enan̄abe.’

26“Mgbọ ya, enyi mênibene ikitumu ibe, ‘Iyak, eji mîgọọk owu igbaan̄ ikweek irie mè inwọ, owu si ojejeen̄ eji inu me lek oniin̄ eji elukbe me ama kiji.’

27“Ire, ogwukaan̄ uwu ya môkpọk ifọọk enyi ibe, ‘Ǹkariọọn̄ enyi isi. Ǹkarọriọọn̄ si ere enyi enan̄abe. Ìje ìnan̄a emi me isi, enyi ebi ijo kechi!’

28“Mgbọ ya, enyi mêto ujat ito, mè itaka ejeek enenen. Mije, enyi mêbene chieen̄ imun̄ Ebereyam mè Ajiki mè Jekọp mè otutuuk ebi nriran ukot ikaan̄ ekupbe me isi Awaji, ire, elalap enyi isibi igwook me oyet. 29Ebi ene mênan̄a me ido geelek me linyọn̄, me agan̄ mbum-ura mè agan̄ ichep-ura, me agan̄ inyọn̄ mè agan̄ osiki inu inigọọk isiki ikweek irie ijọk me ama ubọọn̄ Awaji. 30Me atikọ, owuwa ebi ìrere ebi isi chereyi mêkana ebi òta me mgbọ ya. Owuwa ebi òta chereyi mêkana ebi isi me mgbọ ya.”

Jisọs îfieek ejit inyi Jeruselem

(Mat 23:37-39)

31Mgbọ Jisọs okitumu ikọ ya, usini ebi Farisi enunu initumu inyi ọmọ ibe, “Nan̄a me ere keyi fo ofifi ere si kup, ke Erọdu òkiweek ikpakpan̄ owu.”

32Jisọs ofọfọọk ema ibe, “Ìsi ìlook ekpuuruk ya ibe ke emi mâgwa ene, mè irieen̄ ijo erumun̄ isibi me emen ene cherekeyi mè iyakwut. Òso egwe ita, mârọ ikwaan̄ n̄a isan̄a. 33Ubọk geelek, emi mâje ije n̄a inyi isi chereyi mè iyakwut mè uban̄akwut, mije, ogwu nriran geege ìkpokwu me ofifi ere, ilọ me Jeruselem gaalek.”

34Jisọs onenitumu ibe, “Jei Jeruselem! Jeruselem! Owu ama òkikpan̄ ebi nriran, mè ikisa ewuuk itọbọ ebi ikwaan̄ geelek Awaji oriabe ijet owu. Owuwa mgbọ, emi me lek n̄a nkiweek ikpukpulu enyi ebi Jeruselem itap me lek n̄a kubọk uman unọn okikpulu ebi bọn ichit me irak uwop. Ire, enyi kpechieek. 35Ìkpọ, mîyaak Uwu Mbuban kinyi itele inyi enyi ikeya ukpọk ukpọk emen. Me atikọ, ǹkitumu inyi enyi ibe ke enyi kpebeyaka imun̄ emi igak ikeya mege ire mgbọ enyi mêkitumu ibe, ‘Ugbana ikup inyi ogwu ònunu me erieen̄ Okumugwem!’#13:35 Itọn̄ 118:26 ”

Currently Selected:

Luk 13: Obolo

Highlight

Copy