Jọn 17

Jisọs îriaak uriaak inyi lek kan̄

1Mgbọ Jisọs otumube ikọ cha isan̄a, ibebene chieen̄ ikpọ inyọn̄, mè iriaak uriaak ibe:

“Nte n̄a, mgbọ ya îkem. Nyi emi, Gwun̄ kwun̄, umin, inyi emi, Gwun̄ kwun̄, ǹnyi owu umin si. 2Mije, owu onyi emi unye me lek otutuuk ebilene, inyi ǹkennyi otutuuk ebi geelek owu onyibe emi ugwem ikakaan̄ge itata. 3Mgbọ yi, otutuuk oniin̄ òkukup isasa ikaan̄ ugwem ikakaan̄ge itata ìre irọriọọn̄ owu ogwu ọmọ gaalek orebe Awaji me atikọ, mè irọriọọn̄ si emi Jisọs Karais ogwu owu oriabe inu me linyọn̄. 4Nrọ otutuuk ikwaan̄ onyibe emi iso, mè isa me ikeya inyi owu umin me linyọn̄. 5Eya orọ, mgbọ yi, Ute, nyi emi irek umin me agba lek kwun̄, inyi m̀kpọk ǹkaan̄ umin ya, eyi nkaan̄be melek kwun̄ sabum enirom linyọn̄.

Jisọs îriaak uriaak me ibot ebi udun̄ kan̄

6“Nra irọ inyi ebi owu ogobobe isibi me linyọn̄ isa inyi emi eriọọn̄ ogwu owu orebe. Me okpatu, îre owu okaan̄ ema, mè inisa ema ikana itap emi me ubọk. Ema mîsiki ibot inyi ikọ kwun̄. 7Mgbọ yi, ema mîriọọn̄ ibe ke otutuuk inu owu okanabe itap emi me ubọk ìnan̄a me ubọk kwun̄. 8Mije, nlook ema etip owu olookbe emi, ema ebọbọkọ itap. Ema mîriọọn̄ ibe, me atikọ, ke emi ǹnan̄a me lek kwun̄ inu, mè ichieek si ibe ke îre owu oria emi inu me linyọn̄. 9Eya orọ, ǹkiriaak uriaak me ibot ebi n̄a ebi owu okanabe itap emi me ubọk, mije, îre owu okaan̄ ema. Ǹkariaak uriaak me ibot ebi linyọn̄. 10Otutuuk inu geelek nkaan̄be ìre echi kwun̄. Otutuuk inu geelek owu okaan̄be ìre echi n̄a si. Umin n̄a mè uja n̄a îsibi utoon̄ sa me lek kiban̄.

11“Emi m̀kpayaka ikup me linyọn̄ ifiin̄ igak ikeya, mânika igọọk owu. Ire, ebi owu onyibe emi chi mêkup me linyọn̄. Eya orọ, Ute Mbuban, bem ema me unye eyi erieen̄ kwun̄, òrere erieen̄ eyi owu onyibe emi, inyi ema ere ge, kubọk emi melek kwun̄ erebe ge. 12Mgbọ nkupbe melek kiban̄, nsa unye eyi erieen̄ ya owu onyibe emi ibem ema, mè isun̄ ema me utelelek. Eya orọ, kpunu ene geege ònanan̄a me lek kiban̄ ichep, îtata ogwu edọmọbe isan̄a ibe ke ìbochechep, kubọk egebe me emen Ikpa Mbuban.#17:12 Itọn̄ 41:9

13“Mgbọ keyi, emi mânika igọọk owu. Ire, ǹkitumu ikọ chi mgbọ keyi nkupbe me linyọn̄, inyi ebi n̄a chi ekaan̄ unwọọn̄ n̄a òjot òjot me emen kiban̄. 14Nnyi ema ikọ kwun̄. Eya orọ, ebi linyọn̄ mîcha ema, mije, ema kpere ebi linyọn̄, kubọk emi si nkarege ogwu linyọn̄.

15“Ǹkabeek ibe owu òkpulu ema òsan̄a me linyọn̄. Ire, ǹkibeek ibe owu òchit ema, inyi ogwu ijo ikachak ema ubọk me lek. 16Ike nkarege ogwu linyọn̄, ema si kpere ebi linyọn̄. 17Eya orọ, sa atikọ kwun̄ sun̄ ema esese nyi lek kwun̄, mije, ikọ kwun̄ ìre atikọ. 18Ike owu oriabe emi inu me linyọn̄, ikeya si ke emi nria ema itap me linyọn̄. 19Mije kiban̄, emi nsun̄ lek n̄a esese, inyi ema esun̄ si lek kiban̄ esese enyi owu me atikọ.

Jisọs îriaak uriaak me ibot ebi ìchechieek me lek kan̄

20“Ire, ǹkariaak uriaak mije ebi udun̄ n̄a chi gaalek. Ǹkiriaak si mije otutuuk ebi mêchieekbe me lek n̄a inan̄a me lek ata etip eyi ebi udun̄ n̄a chi mêlookbe. 21Nte n̄a, ǹkibeek ibe owu òrọ inyi otutuuk ebi ìchechieek me lek n̄a me linyọn̄ ere ge, kubọk owu okupbe me emen n̄a, emi si nkukup me emen kwun̄. Rọ si inyi ema ekup me emen kiji, inyi ebi linyọn̄ esa me ikeya echieek ibe ke îre owu oria emi inu me linyọn̄.

22“Umin ya eyi owu onyibe emi, nsa inyi ema si, inyi ema ere ge, kubọk owu melek n̄a erebe ge. 23Ike owu okupbe me emen n̄a, emi si mâkup me emen kiban̄. Rọ inyi ema otutuuk ekana ere ge kpọi, inyi ebi linyọn̄ eriọọn̄ ibe ke owu oria emi inu; ke owu omun̄ ema me chieen̄, kubọk owu omun̄be emi me chieen̄.

24“Ute, ǹkiweek ibe otutuuk ebi owu onyibe emi egọọk emi ekup me ere mbakup, mè ekemun̄ umin n̄a eyi owu onyibe emi, mije owu omun̄be emi me chieen̄ sabum enirom linyọn̄.

25“Ute ogwu ata irọrọ, ubọk geelek ebi linyọn̄ ekariọọn̄ge owu, emi nriọọn̄ owu. Ebi linyọn̄ mîriọọn̄ si ibe ke îre owu oria emi inu me linyọn̄. 26Nra irọ inyi ebi linyọn̄ eriọọn̄ ogwu owu orebe, mâkirọ si ikeya ifo isi, inyi imumechieen̄ owu okaan̄be me lek n̄a ikup me emen kiban̄, inyi emi ǹsa me ikeya ǹkup si me emen kiban̄.”

Currently Selected:

Jọn 17: Obolo

Highlight

Copy