Ibeb 12

Awaji îgwen Eberam

1Okumugwem onenitumu inyi Eberam ibe, “Nan̄a sibi tele ido iman kwun̄, mè ama iman kwun̄ mè uwu nte kwun̄, mè je nan̄a si ofifi ido eyi mâjeen̄be owu.

2“Mârọ inyi owu òmumana òkana ikpele ido.

Mâgbana owu,

mè irọ mè erieen̄ kwun̄ itaan̄ etip;

mâsa me lek kwun̄ igbana owuwa ene.

3Mâgbana ebi geelek ìgbagbana owu,

mè ifieek otu inyi ebi geelek ìfefieek otu inyi owu.

Mâgbana si otutuuk ebi linyọn̄ inan̄a me lek kwun̄.”

4Eberam onanan̄a me Aran, ike Okumugwem otemebe ọmọ, mè isa Lọt igbaalek ije. Eberam ìre akọp acha jaaba mè go mgbọ îtelebe Aran. 5Isasa Serayi ogwu nwa, mè Lọt gwun̄ ogwu ngwan̄ igbaalek, mè ikpulu otutuuk inu geelek ema ekaan̄be, mè ebi usun̄ geelek ema ekaan̄be me Aran, igbaalek inan̄a ije isi ire ido Kenan.

6Eberam onenije iraka inin̄ ido Kenan, mè inigwuun̄ uwu ọfọ kan̄ me agba lek uti ilip mbuban ge òkup me ama More, me agba lek ama Sekem. Me ike mgbọ ya, ebi Kenan òwa me inyọn̄ ijọn̄ ya ekiluk. 7Okumugwem onenisibi ichichini Eberam me ere ya, mè itumu inyi ibe, “Kpọ, îre bọn owot iman kwun̄ ke mbasa ijọn̄ yi inyi.” Mije keya, Eberam onanama ntook me ere ya inyi Okumugwem ogwu òsisibi ichichini ọmọ.

8Sọnja mgbọ iraraka, Eberam onenitele ere ya, mè ije isi ijọn̄ ogoon̄ ogoon̄ ere ama Beten mè ama Ai okupbe, mè inigwuun̄ uwu ọfọ kan̄ me etete ama iba cha. Beten okup me agan̄ ichep-ura, sà Ai okup me agan̄ mbum-ura. Ineninama ntook me ere ya, mè itọbọ ebum inyi Okumugwem. 9Eberam oneninan̄a me ere ya, mè ije ifo èwê agan̄ osiki.

Eberam îsi Ijipiti

10Me ike mgbọ ya, akan̄ òwa me otutuuk inyọn̄ ijọn̄ ya. Eya orọ, Eberam onanan̄a ije ifo Ijipiti ibosi igọọk iluk sọnja mgbọ mije akan̄ ya onyebe enenen me inyọn̄ ijọn̄ ya. 11Mgbọ ema ekije igbet Ijipiti, Eberam onenitumu inyi Serayi ogwu nwa ibe, “Nriọọn̄ ibe ke owu ìre enenwaan̄ òjajaan̄ uja. 12Mgbọ ebi Ijipiti isimun̄ owu, mêtumu ibe ke owu ìre nwa n̄a, mè itet emi ikpan̄, mè ijuuk owu itele. 13Eya orọ, ire ife chi inu, tumu ibe ke owu ìre ngwan̄ n̄a, inyi inu ije ijaan̄ emi me lek nan̄a me lek kwun̄, mè ǹsa mije kwun̄ ǹgat ugwem.”

14Mgbọ Eberam mè ebi kan̄ erebe Ijipiti, ebi Ijipiti emumun̄ si ibe ke ogwu enenwaan̄ ya îjaan̄ uja enenen. 15Mgbọ ebi ibot ikwaan̄ ogwu Fero emun̄be ogwu enenwaan̄ ya, ema esasa ukpatu uja kan̄ isi ikpa inyi ogwu Fero. Ogwu Fero oraria ebi ikwaan̄ kan̄, enunu inisa ogwu enenwaan̄ ya ifo uwu ogwu Fero. 16Ogwu Fero okpọkpọ Eberam ijaan̄ mije kè Serayi. Eberam okukup me ere ya, mè ikaan̄ ogbogbo arọọn̄, mè eriembuuk, mè ogbogbo inyinya akpan echi uman mè echi orie, mè ikaan̄ si owuwa ebi usun̄ ebirieen̄ mè ebibaan̄.

17Ire, Okumugwem oraria ikpele orukan̄ igwook me lek ogwu Fero mè otutuuk ebi uwu kan̄ mije kè Serayi nwa kè Eberam, ogwu îmọnọbe. 18Ogwu Fero oraria ikwaan̄ igwen Eberam, mè ido ọmọ ibe, “Ìre keke ke owu orọ emi ikeyi? Ìre keke orọ owu òkatumu ìnyi emi ibe ke ogwu enenwaan̄ ya ìre nwa kwun̄? 19Sà ìre keke orọ mè owu òfiaan̄ emi ibe ke Serayi ìre ngwan̄ kwun̄, mè otele mè m̀mọnọ ǹsa ǹrọ nwa n̄a? Mgbọ yi, kpọ nwa kwun̄ ire eyi, bọkọ, mè je fo!” 20Ogwu Fero onyinyi ebi kan̄ ida ibe esa Eberam mè ogwu nwa mè otutuuk inu îkaan̄be eban, mè efon.

Currently Selected:

Ibeb 12: Obolo

Highlight

Copy