Ikwaan̄ 13

Awaji îgobo Banabas mè Sọọlu iria isibi

1Me mgbọ ya, ntitiin̄ Awaji òkup me Antiọk îkaan̄ owuwa ebi nriran mè ebi ijejeen̄ me emen. Erieen̄ kiban̄ ìre Banabas mè Simiọn ogwu ekigwen Nigeri, mè Lusiọs ogwu Sairini mè Manayen, (Ogwu ekpukpobe ọmọ mè Erọdu ogwu ibot mkpulu me ere ge), mè Sọọlu. 2Usen ge mgbọ ema ekitọbọ ebum inyi Okaan̄-ene me ijin-otu mè uriaak, Ekwukwu Mbuban otutumu inyi ema ibe, “Ìsan̄a Banabas mè Sọọlu ìsun̄ esese ìnyi emi, inyi enerọ ikwaan̄ ngwenbe ema ibe enerọ!” 3Eya orọ, mgbọ ema eriaakbe uriaak, mè ijin otu isan̄a, ema etotoon̄ ubọk me ibot ebirieen̄ iba cha, mè iriaak uriaak inyi ema, mè iria ema isibi.

Banabas mè Sọọlu mîsi achọ Saipọrọs

4Ebirieen̄ iba chi, Banabas mè Sọọlu, ebi Ekwukwu Mbuban oriabe isibi, enenije isi ire ama Selusia òkup me otu mun̄, mè inin̄ uji inan̄a me ere ya isi ire achọ Saipọrọs. 5Mgbọ ema erebe ama ekigwen Salamis me achọ ya, ema ebebene ikitumu ikọ Awaji me otutuuk uwu ntitiin̄ ebi Ju òkup me ama ya. Ema mîsa Jọn Mak igbaalek ije, inyi ikitap ubọk inyi ema me lek ikwaan̄.

6Ema mîjijen̄e ikana otutuuk inyọn̄ achọ ya, mè inire ama ge ekigwen Pafọs. Me ama ya, ema enenichichini ogwu enerieen̄ ge ogwu Ju, ogwu nriran ataak, òkisa yọk ofia iroon̄ nriroon̄. Erieen̄ kan̄ ìre Baa-Jisọs. 7Ogwu nriran ataak yi ìre unene kè Segiọs Pọlọs, ogwu ebi ibot mkpulu ebi Rom etobe ibe ikikpulu ebi ìluk me inyọn̄ achọ ya. Segiọs Pọlọs yi îkaan̄ ifuk-ibot enenen. Ineniria ikwaan̄ igwen Banabas mè Sọọlu ibe enu enetumu ikọ Awaji enyi ọmọ igban̄. 8Ire, mgbọ ema erebe uwu ogwu ibot mkpulu ya, Baa-Jisọs ya, ogwu ekigwen si Elimas (eyi òsisibi “ogwu ofia” me usem ebi Giris), onenitap ufialek ikwek Banabas mè Sọọlu, mè iweek irọrọ inyi ogwu ibot mkpulu ya ikabọkọ ichechieek eyi Banabas mè Sọọlu ekijeen̄ ìtap. 9Ire, Ekwukwu Mbuban oninin̄ ijot emen kè Sọọlu ogwu ekigwen si Pọọlu. Ibebene chieen̄ igwuun̄ Elimas me lek, mè itumu inyi ọmọ ibe, 10“Owu gwun̄ yọk keyi! Owu ìre ogwu ochicha inyi inu geelek òrere ata inu. Ataak geelek mè ijo ofiaan̄ geelek ìjojot owu emen. Ìre ìkakem si mgbọ owu obotele iwuwuwọlọ atikọ eyi Okaan̄-ene? 11Mgbọ keyi, unaan̄-ejit Okaan̄-ene îkeme owu. Owu mônin̄ ǹnàan̄. Bene me mgbọ keyi, owu òkpoyaka imọọn̄ utoon̄ egwe sọnja mgbọ.”

Mgbọ yaage, oduku ekirika mè udun okakana ichit ọmọ ke bùk. Ibebene ikinyinya ikana ikiweek ogwu òbotet ọmọ me ubọk isa ikijeen̄ oniin̄. 12Mgbọ ogwu ibot mkpulu ya omun̄be inu ya òrọrọ, ichechieek me lek kè Karais, mije, ijejeen̄ înọbe ofolek Okaan̄-ene îke ọmọ chieen̄ enenen.

Banabas mè Sọọlu mîsi Antiọk òkup me Pisidia

13Pọọlu mè ebi melek kan̄ eneninan̄a me Pafọs ikọp isi Pega eyi òkup me agan̄ Pamfilia. Me ama keyi ke Jọn otele ema, mè igwu ikom ifo Jeruselem. 14Pọọlu mè Banabas enanan̄a me Pega ije isi ama Antiọk òkup me agan̄ Pisidia. Me Usen Mbuban, ema eninin̄ uwu ntitiin̄ ebi Ju òkup me ama ya, mè isiki ikweek. 15Mgbọ efukbe inu inan̄a me emen Ikpa Ikan kè Mosis, mè ifuk si inan̄a me emen ikpa ebi nriran isan̄a, ubọk ekirọ, ebi ibot uwu ntitiin̄ ya eraria etip ijet Pọọlu mè Banabas ibe, “Bọn Nte, ire ikaan̄ ikọ enyi ebetumu isasa itap eji efuuk me emen, ìnitumu, ke irek îsibi inyi enyi.”

16Mgbọ ya, Pọọlu onanan̄a ikeke, mè iwuwum ubọk inyi ema ibe egban̄ utọn̄, mè inibene ikitumu inyi ema ibe, “Enyi ebi Ijeren, mè otutuuk kinyi ebi ofifi ido ebi ìkaan̄ ukpook Awaji me emen, soso ìgban̄ utọn̄ me lek inu mbatumu! 17Awaji ogwu ebi Ijeren ekitọbọ ebum inyi ogobo ebi nte nte kiji, mè irọ inyi ema emumana ekana ikpele ido me mgbọ ema egọọkbe iluk me ido Ijipiti, mè isa me ikpele unye isan̄a ema isibi me ido ya. 18Akọp acha ini ke Awaji ome irọrọ kiban̄ me emen èwê. 19Ido jaaba ke Awaji otim akọn̄ ikpan̄ me inyọn̄ ijọn̄ Kenan, mè iyaka ijọn̄ ife cha inyi ebi kan̄ ibe ebọkọ esak me ìrot. 20Otutuuk inu chi òrọrọ ìben efit acha ini mè akọp go.

“Mgbọ eya orakabe, inenikinyi ema ebi ibot oyerebet ibe ekekpulu ema. Òta ogwu ibot oyerebet òkpukpulu ema ìre Samien ogwu nriran. 21Ebi Ijeren enenido Awaji ibe inyi ema ogwu ubọọn̄, inyi ikikpulu ema. Awaji onyinyi ema Sọọlu gwun̄ kè Kis ogwu ònan̄a me egep kè Benjamin. Sọọlu okpukpulu ebi Ijeren akọp acha ini. 22Ire, Awaji osasan̄a Sọọlu isan̄a, mè isa Debit gwun̄ kè Jesi irọ ubọọn̄ inyi ema. Mije ata irọrọ kè Debit ke Awaji me lek kan̄ otumu ata ikọ ofolek kan̄ ibe, ‘Emi nra imun̄ ibe ke Debit gwun̄ kè Jesi ìre ogwu òkirọ inu òkineme emi me ejit. Debit môrọ otutuuk inu geelek mweekbe ibe irọ.’ 23Inan̄a me owot iman kè Debit ke Awaji osan̄a Jisọs, ogwu unyan̄a ya îchieekbe use, isibi inyi ebi Ijeren. 24Sabum Jisọs oninu, Jọn ògwook mun̄ îdasi inu inilook otutuuk ebi Ijeren ibe egwu ekom me emen ijo kiban̄, mè enu enegwook mun̄. 25Mgbọ Jọn osibe ikwaan̄ kan̄ igbet itata, inenido ebi ene usen ge ibe, ‘Ìre enyi ekikeek ibe ke emi ìre ekene? Emi ǹkare ene ya ogwu enyi ekikpọ chieen̄ me inunu kan̄. Ìkpọ, ene ya òkinu me udun̄ n̄a, emi ǹkagbe ogwu òbotọn̄ọ olik ikpukot ene ya.’

26“Bọn Nte n̄a, enyi bọn owot iman kè Ebereyam, mè enyi ebi ofifi ido ìkakaan̄ ukpook Awaji me emen, îre eji ke Awaji oria ata etip eyi unyan̄a keyi ijet. 27Ebi Jeruselem mè ebi ibot kiban̄ kperiọọn̄ ogwu Jisọs orebe. Ire, itip-oyerebet eyi ema etipbe ọmọ îrọ inyi inu ebi nriran egebe ibak ọmọ, eyi ekifuk me uwu ntitiin̄ me Usen Mbuban geelek, irọ iso. 28Ubọk geelek kpunube ijo inu geege îrọbe eyi ebesa itip ọmọ oyerebet mkpa, ema egegen ibak itumu inyi Pailet ibe inyi ida ibe ekpan̄ ọmọ. 29Mgbọ ema erọbe otutuuk inu egebe me Ikpa Mbuban ibak ọmọ iso, ebi udun̄ kan̄ enenijene nkwukwu kan̄ me inyọn̄ uti nkwurieen̄ isa isi ifuun̄ me udọn̄-ufuun̄. 30Ire, Awaji ojojomo ọmọ me mkpa. 31Ebi udun̄ kan̄ ebi ìgọgọọk ọmọ ijijen̄e ikana inan̄a me agan̄ Galili inire Jeruselem esasa chieen̄ imun̄ ọmọ owuwa mgbọ me owuwa usen. Me mgbọ keyi, ebi ife chi enire ebi ata-ikọ inyi ọmọ me isi ebi ene.

32“Ata etip yi ke eji esa inu inilook enyi mgbọ keyi: 33Use ya eyi Awaji ochieekbe ebi nte nte kiji ke Awaji onirọ iso me ukot kiji ebi ìrere bọn bọn, sa me lek îjomobe Jisọs me mkpa. Ikeya ke ege si me ikpa Okwa, òso ibot iba, ibe,

“ ‘Owu ìre Gwun̄ n̄a,

chereyi ke Emi nkana ire Nte kwun̄.’#13:33 Itọn̄ 2:7

34Ijojomo me mkpa eyi Awaji ojomobe ọmọ inyi nkwukwu kan̄ ikajọ ke ege inu ofolek me Ikpa Mbuban ibe,

“ ‘Emi mânyi enyi ugbana òkup mbuban, eyi kpolọbe,

eyi nchieekbe use inyinyi Debit.’#13:34 Asaya 55:3

35Ikeya ke ege si ikọ ya me ofifi ere me Ikpa Mbuban ibe,

“ ‘Owu Awaji òkpotele ibe

ogwu kwun̄ Ogwu Òkup Mbuban

ikup me emen udọn̄-ufuun̄ ijọ.’#13:35 Itọn̄ 16:10

36“Mgbọ Debit ogwu òtutumu ikọ ya osibe ikwaan̄ inyi Awaji isan̄a me ukot eyi kan̄, îkwu igọọk ebi nte nte kan̄, ebeben ifuun̄, nkwukwu kan̄ ojọjọ. 37Ire, Jisọs ogwu Awaji ojomobe me mkpa ìkajọ kubọk ge. 38Eya orọ, bọn Nte n̄a ebirieen̄, ǹkiweek ibe enyi eriọọn̄ me atikọ ibe ke etip itetele ijo inyi ene ìje me ubọk kè Jisọs inire enyi lek. 39Ǹkiweek si ibe enyi eriọọn̄ ibe ke ogwu geelek òchechieek me lek kè Jisọs môsa me lek kè Jisọs ilibi inwọnọ otutuuk ijo inu cha echi Ikan kè Mosis ikakọtge ìrọ inyi enyi elibi enwọnọ.

40“Eya orọ, ìgbala chieen̄, inyi inu ebi nriran etumube ikarọ ìso me lek kinyi. Ebi nriran etumu ibe,

41“ ‘Enyi ebi kpekisa Awaji igwen inu,

ìkana chieen̄ ìkpọ inu mbarọ,

mè ike enyi chieen̄, mè enyi ekwaan̄ esan̄a.

Mije, emi mârọ inu ge me ukot kinyi eyi môrebe,

ire ene itumu inyi enyi, enyi kpebechieek.’#13:41 Abak 1:5 ”

42Mgbọ Pọọlu mè Banabas ekinan̄a me uwu ntitiin̄ ya isibi, ebi ene ebebe ema eyaka enu enejeen̄ ema inu cha me ofifi Usen Mbuban. 43Mgbọ ebi ntitiin̄ ya eyatbe, owuwa ebi Ju mè owuwa ebi ofifi ido ebi ìchechieek inye me lek ubọk iriaak Awaji ebi Ju egọgọọk Pọọlu mè Banabas. Pọọlu mè Banabas etutumu ikọ melek kiban̄, mè irọ ema inye ibe ekeke enye efo isi me emen atata nnwọn eyi Awaji.

44Me Usen Mbuban ògọgọọk, ìsik sọnja more otutuuk ebi ama ya esibi inu inigban ikọ Okaan̄-ene. 45Ire, mgbọ ebi ibot ebi Ju emun̄be urum ebi ene ìnunu me ere ya, ema ekakaan̄ ejit mba me lek kè Pọọlu mè Banabas, mè ibene ikitiik ema, mè ikitumu ikọ ikeme inu ema ekijeen̄.

46Ire, me ekalibige ema chieen̄, Pọọlu mè Banabas etutumu inyi ema ibe, “Îkup me uyọt ibe eji edasi etumu ikọ Awaji enyi enyi. Ire, enyi mîjit ikọ ya, mè imọnọ ibe ke ugwem ikakaan̄ge itata ìkagbe enyi. Mgbọ keyi, eji mênisa ikọ ya ikana ijet ebi ekarege ebi Ju. 47Mije keyi ke Okaan̄-ene onyi eji ikan ibe,

“ ‘Nra irọ ibe owu òre utoon̄ ònyi ebi ekarege ebi Ju,

inyi owu òsa unyan̄a òsi òre lek

ebi geelek me otutuuk linyọn̄.’#13:47 Asaya 49:6 ”

48Mgbọ ebi ekarege ebi Ju enọbe ikọ ya, ema ebebele ejit enenen, mè imin ikọ Okaan̄-ene eyi Pọọlu mè Banabas ekitumu. Otutuuk ebi Awaji ogobobe isun̄ ibe ekaan̄ ugwem ikakaan̄ge itata echechieek me lek kè Jisọs.

49Sa me ikeya, ikọ Okaan̄-ene okakana iso ere geelek me agan̄ ya. 50Ire, ebi Ju etutumu ikọ ifiat ejit ebibaan̄ ebi ukpook Awaji okupbe me emen, ebi eriọọn̄be erieen̄ me ama ya, mè ebirieen̄ ebi ìrere ebi isi me ama ya. Sa me ikeya, ebi ama ya ebebene ufialek me lek kè Pọọlu mè Banabas, mè ilap ema isibi me inyọn̄ ijọn̄ kiban̄. 51Mgbọ Pọọlu mè Banabas ebenan̄a me ama ya isibi, ema egegen̄ achiaan̄ ukot kiban̄ igwook me ama ya kubọk inu ata-ikọ ikeme ebi ama ya, mè inan̄a ije isi ama ekigwen Aikoniọm. 52Ebi udun̄ kè Jisọs ìkup me Antiọk ejojot me unwọọn̄, mè ijot si me Ekwukwu Mbuban.

Currently Selected:

Ikwaan̄ 13: Obolo

Highlight

Copy