Ikwaan̄ 11

Pita îkpa ukpatu ije kan̄ inyi ebi ntitiin̄ Awaji me Jeruselem

1Ebi otuchieen̄ mè bọn Nte ìkup me otutuuk ido Judia eneninọ ibe ke ebi ekarege ebi Ju mîbọkọ ikọ Awaji itap. 2Eya orọ, mgbọ Pita onube inire Jeruselem, bọn Nte ebi Ju, ebi ìkirọ inye ibe ebi ekarege ebi Ju geelek ìchechieek me lek kè Jisọs efieek afi, ebebene ikitumu ijo otu ikọ inyi ọmọ, ibe, 3“Ìre ìkare owu keyi oje isi inin̄ uwu ebi ekafieekge afi, mè igọọk isiki ikweek irie inorie?”

4Pita obebene ikpa otutuuk inu cha òrọrọ, mè ubọk îrọbe inyi ema. 5Ìtumu inyi ema ibe, “Emi ǹkup me Jọpa ikiriaak uriaak, mè imun̄ ilaak ọkpọchieen̄. Me emen ilaak ya, mmun̄ inu òkup kubọk odidọ akpọk isi ile etobobe olik me utọn̄ ini, onan̄abe me isinyọn̄ ikigele isiki inu, mè iniyik me isi n̄a. 6Mkpọkpọ, mè imun̄ owuwa anam ukot ini, mè owuwa anam oron, mè imun̄ si anam echi òkinyinyọnọ me ijọn̄, mè ebi kè unọn inyọn̄, me inyọn̄ odidọ ya. 7Mgbọ nkikpọ anam cha, ida ge onenitumu inyi emi ibe, ‘Pita, nan̄a keke! Kpan̄, mè taka!’

8“Mfọfọọk ibe, ‘Okaan̄-ene, emi m̀kpakọt itaka anam cha kubọk ge, mije, ǹkararak ìkirie inu geege òrere mbuban inu, mè ìyaka ire inu ikatanage me isi Awaji.’

9“Ida ya okpọkpọk inan̄a me inyọn̄ òso mgbọ iba itumu ibe, ‘Inu geelek Awaji orombe, mè itumu ibe ke îtana, owu katumu ibe ke ìkatana.’ 10Inu ya îrọ mgbọ ita sabum enitaba inu akpọk isi ile ya òbet lek odidọ ibene isan̄a ifo isinyọn̄.

11“Mgbọ yaage, ebirieen̄ ita eriabe inan̄a me Sisaria inu Jọpa ibe enegwen emi enenire uwu ya ere nlukbe. 12Ekwukwu Mbuban otutumu inyi emi ibe mè emi nkakiket ukot, mè ǹgọọk ife cha ǹje mgbọ yaage. Ebirieen̄ gweregwen chi, bọn Nte ebi enyi emun̄be me ere yi, mîgọọk emi ije inan̄a me Jọpa isi ire uwu kè Kọniliọs ya me Sisaria. Eji otutuuk ene mîsaba inin̄ uwu kè Kọniliọs ya. 13Mgbọ eji enin̄be emen uwu ya, Kọniliọs onenikpa inyi eji ibe ke ọmọ îmun̄ ogwu osat Awaji ge me uwu kan̄ mgbọ ọmọ okiriaak uriaak. Ogwu osat Awaji ya otutumu inyi ọmọ ibe mè ọmọ iria etip isi lek enerieen̄ ge ekigwen Saimọn ogwu ekigwen si Pita òkup me Jọpa; 14ke Pita ya mônitumu ikọ Awaji inyi ọmọ, inyi Awaji isa me ikeya inyan̄a ọmọ mè otutuuk ebi ototun̄ ukan̄ kan̄.

15“Emi ibebene ikitumu ikọ Awaji inyi ema me uwu ya, Ekwukwu Mbuban oninin̄ emen ife cha, kubọk înin̄be eji ebi Ju emen me adasi mgbọ. 16Me ike mgbọ ya, nsisi ikeek ikọ Okaan̄-ene otumube ibe, ‘Jọn ìsa mun̄ ikike igwook ebi ene mun̄. Ire, mêsa Ekwukwu Mbuban igwook enyi mun̄.’ 17Eya orọ, ire Awaji inyi ebi ife cha Ekwukwu Mbuban yaage ubọk înyibe eji ebi Ju mgbọ eji echieekbe me lek Okaan̄-ene Jisọs Karais, ìre emi ìre ekene, eyi emi mbanikikput Awaji?”

18Mgbọ bọn Nte cha ìkup me Jeruselem enọbe otutuuk ubọk inu cha osabe irọ, ema kpeyaka isisaak Pita. Kpan̄asi ikeya, ema ebebene ikitọn̄ Awaji, mè ikitumu ibe, “Ire ikeya, Awaji înyi si ebi ekarege ebi Ju irek ibe egwu ekom, mè ekaan̄ ugwem ikakaan̄ge itata.”

Ntitiin̄ Awaji eyi òkup me Antiọk

19Saasaak ya eyi òbene me mgbọ ekpan̄be Sitibin îrọ mè bọn Nte eyiyala esi egwook me ere òkup kubọk Fonisia, mè Saipọrọs, mè Antiọk. Ere geelek ema erebe, ema ekitumu ikọ Awaji inyi ebi Ju gaalek. 20Ire, usini ebirieen̄ me lek bọn Nte cha, ebi ìnan̄a me Saipọrọs mè Sairini inu Antiọk ebebene ikilook ebi ìkitumu usem Giris ata etip eyi Okaan̄-ene Jisọs. 21Okaan̄-ene otatap ubọk inyi bọn Nte chi, ogbogbo ene echechieek, mè igwu ikom igọọk Okaan̄-ene.

22Etip inu ya òrọrọ otataan̄ isi ire utọn̄ ebi ntitiin̄ Awaji òkup me Jeruselem, ema eraria Banabas ibe isi Antiọk isi ikpọ. 23Mgbọ Banabas orebe Antiọk, mè imun̄ ibe ke Awaji îsa me atata nnwọn kan̄ igbana ebi ama ya, ibebele ejit, mè itap ema efuuk me emen, ibe mè ema esa otutuuk ejit kiban̄ ekeke enye me lek Okaan̄-ene me atikọ. 24Banabas ìre ata ene òkakaan̄ ichechieek, ogwu Ekwukwu Mbuban ojotbe me emen. Me ere ya, owuwa ebi ene egwugwu ikom igọọk Okaan̄-ene.

25Banabas oneninan̄a me Antiọk isi Tasọs isi iweek Sọọlu. 26Mgbọ îweekbe Sọọlu imun̄, isasa ọmọ ika inu Antiọk. Ema ene iba egọgọọk ebi ntitiin̄ Awaji òkup me Antiọk ikup iso acha ge, mè ikijeen̄ ogbogbo ene inu. Îre me Antiọk ke edasi ikigwen ebi udun̄ kè Jisọs ebi “Kirisiten.”#11:26 Kirisiten me usem Giris ìsibi “ogwu òkigọọk Karais.”

27Me ike mgbọ ya si, usini ebi nriran enanan̄a me Jeruselem inu me Antiọk. 28Ene ge me lek kiban̄, ogwu ekigwen Agabọs, onanan̄a ikeke, mè iben nriran me unye Ekwukwu Mbuban ibe ke uga akan̄ môkup me otutuuk ido echi ebi Rom ekikpulu. (Inu ya îrọ si iso me mgbọ ogwu Sisa ekigwen Kọlọdiọs okikpulu ido ebi Rom.) 29Mije keya, ebi udun̄ kè Jisọs chi enenitumu ifieek me lek kiban̄ ibe ke ema mêria inu geelek ema ekọtbe ikaan̄, me ene me ene, ijet bọn Nte ìkup me Judia isasa itap ubọk inyi ema. 30Ikeya ke otutuuk kiban̄ erọ si, mè ikisa inu cha inyi Banabas mè Sọọlu. Ebiba mîra ikiria inu cha ijet ebi ugane ntitiin̄ me Jeruselem.

Currently Selected:

Ikwaan̄ 11: Obolo

Highlight

Copy