MARIKO 8

Kobaei `Jeso piik eliphuusyek ang'wan

(Mat 15:32-39)

1Eng' peetuusyechooto ko ki piit kogeny tuiyet ne oo ak ki ma kotinyei kiy ne amei, koguur anyun Jeso kasubikyik ak koleenji, 2“Ariiree tuiyet, amu kagotebi kobooto nguno peetuusyek somok ak ma tinyei kiy ne amei. 3Ngot aunde koba oldanywa koma am kiy, kotanuitos eng' ooreet, amu kagobun alak eng' icheek ole loo.”

4Ki wolji kasubikyik kole, “Imuuchi konyoorunee ano chii magatiinik eng' emoni surkwen kobae pichu kot kobiyong'so?” 5ki teebee icheek koleenji, “Otinye magatiinik ata?” Ak kole, “Tisap.”

6Ki ng'at anyun tuiyet kotep ng'wony. Ki nam magatinichooto tisap ak kingo kagomwa kongoi, kobuutul ak kogoochi kasubikyik si konde tainnywa, ak kogoochinot tuiyet. 7Ki tinyei njireenik che mengeechen che ng'ering'; ak kingo kagoberuur, kong'at konde chooto ak icheek tainnywa. 8Ki amis ak kobiyong'so. Ak ki iyum katuganik, ak kiyam mesendoik tisap. 9Ak icheeget ko ki olo po eliphuusyek ang'wan. Ak kiunda icheek koba. 10Ak yeityo anyun kolaany moingetap peek kobooto kasubikyik ak koba komoswegap Dalmanuta.

Tebuutyetap Pharisaik

(Mat 16:1-4)

11 # Mat 12.38; Luk 11.16 Ki pwa Pharisaik ak kotoi koteepse ineendet. Kotyemei ineendet, ko kiteebe `icheek ineendet kigoochi kaboorunet ne punu kipsengwet. 12#Mat 12.39; Luk 11.29 Ki ibuus ne nyigiis eng' muguleldannyi ak kole, “Amu nee si kocheeng'ei ibini kaboorunet? Amwaiwok iman ale, ma mi kaboorunet ne kigoochi ibini.” 13Ak ki pagaakta icheek, ak kolaany moingetap peek kogeny, kolanda kwo pitet age.

Mermeregap Pharisaik ak che po Herod

(Mat 16:5-12)

14Ak kiutye icheek koip magatiinik; ki ma kotinyei kiy eng' moinget kobatee magatyat agenge kityo. 15#Luk 12.1 Ki itigon icheek koleenji, “Oriipkei, ak oriibegei mermeregap Pharisaik ak mermereek che po Herod.” 16Ki ng'alaaljingei icheegei koleen, “Abeere amu ma ki tinyei magatiinik.” 17Ak kingo nai Jeso, koleenji, “Kalya si oteebegei ole motinye magatiinik? Tom onai anan oguiye? Ta ko uueen mugulelwekwok? 18#Jer 5.21; Ezk 12.2; Mar 4.12 Otinye koonyek, amogeere kiy? Ak otinye iitiik, amogastoi? Amobwaati? 19Yu kinga puutulji magatiinik muut piik eliphuusyek muut, ko ki tinyei kereboonik ata katuganik che ki koyum?” Koleenji ineendet, “Taman ak aeng'.” 20“Ak tisap eng' piik eliphuusyek ang'wan, koginyi mesendoik ata katuganik che ki koyum?” Ak koleenji, “Tisap.” 21Koleenji icheek, “Tom oguiye?”

Kisoobi kipkoraatyat eng' Bethsaida

22Ki it anyun Bethsaida. Ak kimutyi `icheek ineendet chii ne koraat ak kosoom kotwa ineendet. 23Ki nam eutap kipkoratyandanooto ak komut komandae nganaseet; ak ye kingo kagong'utyi konyekyik ak kogonoor eunekyik ineendet, koteebe kole, “Igeere kiy?” 24Ki inyal parak ak kole, “Ageere piik; amu ageere icheek ko uu keetiik, kobendi.” 25Yeityo kotwa eunekyik kogeny konyekyik; ak ki ichiil koonyek ak kisop, ak kogeer tuguuk tugul komyee. 26Ki unda kwo kaa, koleenjin, “Amewe nganaseet agot kitigin.”

Mwaetap Petero agobo Jeso

(Mat 16:13-20; Luk 9:18-21)

27Ki pa Jeso ak kasubikyik agoi nganasook che po Caesarea Philippi. Eng' ooreet koteebe `ineendet kasubikyik koleenji, “Mwaei piik kole aa ng'oo?” 28#Mar 6.14-15; Luk 9.7-8 Komwachi koleenji, “Leen, ii Johana Kabatisanindet; koleen alak, ii Elijah; ak leen alak, ii agenge eng' maotik.” 29#Jhn 6.68-69 ki teebee icheeget kole, “Ago oleen okweek aa ng'oo?” Kowolji Petero koleenji, “Ii Kristo.” 30Ak ki ng'at icheek kole amat komwachi chii agobo ineendet.

Komwaei Jeso agobo meennyi ak ng'eetyeennyi

(Mat 16:21-28; Luk 9:22-27)

31Ki toi koneet icheek kole, kanyool konyalil Weeriitap chii eng' tuguuk che chaang', ak koeesyo poisyek, tisiik che eecheen ak siriik ak kebar, ak ye igeskei peetuusyek somogu kong'eet kogeny. 32Ki mwa ng'olyoondonooto kotook. Ak ki nam `Petero ineendet ak kotoi koger kong'. 33Ago kiwelelgei ak kogeer kasubikyik, ak koger kong' Petero ak koleenji, “Ui let eng' anee, Setani! Amu mebwaati tuguugap Kamuktaindet, ago tuguugap piik.”

34 # Mat 10.38; Luk 14.27 Ki kuur anyun tuiyet kobooto kasubikyik ak koleenji icheek, “Ngo machei chii age tugul kosubwo, koeesyogei ak kosut kimurtoiyondennyi ak kosubwo. 35#Mat 10.39; Luk 17.33; Jhn 12.25 Amu age tugul ne machei kosar saboondanyi kobeeti; ak age tugul ne ibeeti saboondanyi agobo anee ak logoiywek che myach kosaru. 36Amu nyooru porot nee chii, ngo nyoor ng'wony komugul, ak kobeet saboondanyi? 37Amu igoitoi nee chii kowale saboondanyi? 38Amu age tugul ne ililani agobo anee kobooto ng'aleekyuk eng' ibinita po sokseet ak tengek, ko tuun ililanjin agine Weeriitap chii ineendet, ye tuun nyoonei eng' liilindap Kwandanyi kobooto malaikaisyek che tiliileen.”

Currently Selected:

MARIKO 8: KALDC

Highlight

Copy