MARIKO 6

Keesyoi Jeso eng' Nazareth

(Mat 13:53-58; Luk 4:16-30)

1Ki mong' ineendet eng' olooto ak konyo agoi nganaseetap emennyi, kobendoti ak kasubikyik. 2Kingo it sabato kotoi koneetis eng' sinagogit, ak ki kwong'yo che chaang' che ki kas ineendet ak koleen, “Nyoorunee ano chiichi tuguuchu? Nee utaatyoni ki kigoochi chiichi? Nee poisyonichu kiimeen yaaksei eng' eunekyik? 3Tos ma musogindet niito, weeriitap Maria, ne tupcho ak Jakobo, Joses, Judah, ak Simion? Tos ma mi kobootech eng' olinyo chepkametisyekyik?” Ak kinyoor kanagutyet eng' ineendet.

4 # Jhn 4.44 Ak ki leenji `Jeso icheek, “Nyooru maotyo teegisto, kobatee eng' emennyi, ak eng' che po ooreennyi ak eng' koonnyi.”

5Ki mata komuuch koyai kwang'utyo age tugul eng' olooto, kobatee piik che ng'ering' che ki myandos che kigonoor eunekyik ak kosaap icheek. 6Ak ki kwong' ineendet amu pistoennywa.

Koyooktoi kasubikyik chooto taman ak aeng'

(Mat 10:5-15; Luk 9:1-6)

Ak kiwendote nganasook koneetisyoti. 7Ki kuurchigei anyun taman ak aeng', ak kotoi koyookto kobee aeng' aeng', ak ki igoochi icheek kimnateet koterteer tamirmirik che murwonen. 8#Luk 10.4-11 Ki ng'at icheek koleenji, “Mat oip kiy ne po panda kobatee kirokto kityo; agot magatyat, anan suberet, anan sendeisyek eng' lolet; 9oba olaachi kweonik ago mat olaach sumotik aeng'. 10Ye kobe ko age tugul, otebi yooto agoi obe eng' olooto. 11#Poi 13.51 Ak oldo age tugul ne mataachak, ama cham kogasak, ye omande eng' olooto, olelekte temburyek che mi keelyekwok si kobiit koek paornateet eng' icheek.” 12Ki manda ak koamdaat kole kanyool kosik piik. 13#Jak 5.14 Ki oon oik che chaang', ak koilee `mwaita che chaang' che ki myandos ak kosaap icheek.

Meetap Johana kabatisanindet

(Mat 14:1-12; Luk 9:7-9)

14 # Mat 16.14; Mar 8.28; Luk 9.19 Ki kas laitoryat Herod agobo nooto; amu kiga konaak kainenetap Jeso ak ki le alak, “Kagong'eet Johana kabatisanindet eng' che ki pek, nooto anyun poisyei kimnatosyechu eng' oriitinnyi.” 15Ago ki mwa alak kole, “Elijah ineendet.” Ak ki le alak, “Maotyo ineendet, anan uu age eng' maotigap keny.”

16Ago ye kingo kas Herod kole, “Johana niito, ne ki atile metit, kagong'eet.”

17 # Luk 3.19-20 Amu kiga koyookto `Herod ineendet piik, koba konam Johana, ak korat eng' korgoreet, amu Herodias osotyotap Philipu ng'eetap kamet, amu kiga kobaigei ineendet ak kwonyooto. 18Amu ki mwachi `Johana Herod koleenji, “Etei ng'atuutik otebi ak osotyotap ng'eetap kamenng'ung'.”

19Ak kiwech `Herodias ineendet, ak kimach kobar. Ago ma imuuch, 20amu ki iywei `Herod Johana ak ki riip, kongen kole ineendet ko chii ne po imanda ak ko tiliil. Ye kingo kas Herod ng'aleekyik, koiimgei miising'; nganda ki cham koboiboenjin kogas ineendet.

21Ki it anyun peetuut ne nyolu, ye ki yai Herod igoorto ne po peetuutap sigennyi, koyachi piikyik che eecheen, kiptainik, ak che taagunotiin che po Galilaya. 22Kingo nyo ko cheptap Herodias ak koureren, kobaibai Herod ak icheek che kitebyei eng' amisyet kobooto ineendet; ak ki leenji `laitoryat chebooto, “Sooma kiy age tugul ne imache si agoonin.” 23Ak ki iyasyechi kole, “Kiy age tugul ne isooma agoonin, agot kebebertap laitornatennyu.”

24Ki manda ak komwachi kamet kole, “Asoom nee?” Ak ki leenji, “Metitap Johana Kabatisanindet.” 25Ak yeityo konyo kochook agoi ole mi laitoryat ak kosoom kole, “Amache ale igoono nguno metitap Johana Kabatisanindet eng' tageito.”

26Ki aragen anyun miising' laitoryat; ago amu kayosyautikyik, ak amu icheeget che kitebyei eng' amisyet, ko mata koete ineendet. 27Ara ki iyookto laitoryat asigarindet age eng' che kiriipsei kong'at kole keip metitap Johana. Ki wo anyun kotil metit eng' korgoreet, 28ak ki ip metoto eng' tageito, ak kogoochi chebooto; ak kogoochi chebooto kamet. 29Ye kingo kas kasubikyik agobo ng'olyoondonooto, kobwa ak kosut poortanyi, ak konde kererit.

Kebaei piik eliphuusyek muut

(Mat 14:13-21; Luk 9:10-17; Jhn 6:1-14)

30Ki iyumjigei Jeso che kiyooktoi ak komwachi ineendet tuguuk tugul che kiga koyai ak tugul che kiga koneet. 31Ki mwachi icheek koleenji, “Obwa okweegei taban ole surkwen, si omuuny kitigin.” Amu ki chaang' che kibwanei ak kobendi, ak ki ma kotinyei agot poroindo ne amisye. 32Ak ki pa icheegei eng' moingetap peek kolang'ji surkwen.

33Ak kigeeroti piik kobendi, ak ki nai che chaang', ak ki rwai koba olooto kibagenge kobunu nganasook tugul, ak kondoe icheeget. 34#Kai 27.17; 1Lai 22.17; 2A.Pet 18.16; Ezk 34.5; Mat 9.36 Ak kingo lang' Jeso kogeer tuiyet ne oo, ak koriiregei icheek, amu ki uu keechiirek che ma tinyei mestowo; ak ki toi koneet icheek tuguuk che chaang'. 35Ye kimachei koimen, kobwonji ineendet kasubikyik ak kole, “Surkwen oli, ak machei koimen nguno. 36Mete piik koba emet ak nganasook che mi komoswek ole neegit, si koaljigei tuguuk che amei.” 37Ago ki wolji koleenji, “Ogoochi okweek amitwogik.” Ki leenji, “Kibe keal magatiinik che po dinarisyek pogol aeng', si kigoochi koam?” 38Ki leenji icheek, “Otinye magatiinik ata? Oba ogeer.” Ak kingo kagonai, kole, “Muut, ak njireenik aeng'.”

39Ki ng'at kole kobuur piik eng' susweek che nyalileen, korurugotkei. 40Ara ki tep ng'wony kotetatkei, kobee pogol ak kobee konom. 41Ki nam magatinichooto muut ak njireenik aeng', ak konyal kipsengwet, koberuur, ak kotonaton magatiinik. Ki igoochi kasubikyik si konde tainnywa; ak kipchechi icheeget tugul injirenichooto aeng'. 42Ki amis tugul ak kibiyong'so. 43Ki iyum katuganik che ki nyi kereboonik taman ak aeng', che po magatiinik ak njireenik. 44Icheeget che ki am magatinichooto ko ki murenik eliphuusyek muut.

Kowendoti Jeso eng' peek parak

(Mat 14:22-33; Jhn 6:15-21)

45Ki ichiich `Jeso kasubikyik kolaany moinget si kondoe ineendet koba pitoniin agoi Bethsaida, ak ya tugul kotyaachi tuiyet koba. 46Ye kingo kagobagaakta icheek, kwo tulweet kosa. 47Kingo ek koskoleny, komi moinget kwenutap araraita, ak ki mi ineegei emet ne yaamaat. 48Kingo keer icheeget konyalildos eng' poisyetap mugangok che ki kwerye moinget, amu ki kirindoi usoonet icheeget, konyo ole mi icheeget eng' riipseet ne po ang'wan ne po kemoi, kowendote araraita parak. Ki machei kosiirtoe icheeget, 49ago kingo keer icheek ineendet kowendoti eng' araraita parak, koleen icheeget abeere tamirmiryet, ak ki waakyo; 50amu ki keer icheek tugul ineendet, ak ki aragenso. Ak kitwekyi icheek koleenji, “Onyiganitu! Aa ineendet. Amoaragen.” 51Ki laany ineendet moinget kwo ole mi icheek ak ki siis usoonet. Ki kwong'yo miising' pichooto, 52amu ki ma nai icheek agobo magatiinik, amu ki uueen mugulelwekwak.

Kisoobi che ki myandos eng' Gennesaret

(Mat 14:34-36)

53Ye kingo kagolanda, koit emetap Genesaret ak korat moinget eng' ngeguut. 54Ye kingo mong' eng' moinget, konai `piik ineendet eng' sainooto, 55ak korwaat eng' koronooto komugul, ak kotoi komut che myandos eng' itogusyekwak, koba ole kiga kasyi ineendet. 56Ak oldo tugul ole ki mong'ji nganasook che mengeechen, anan che eecheen, anan emet, ki inde che myandos ye mi sirosyek. Ki soom `icheek ineendet kole tamangap kocham kotwa agot tabandap ngoryennyi; ak tugul che kitiiny ineendet ko kisopcho.

Currently Selected:

MARIKO 6: KALDC

Highlight

Copy