MARIKO 5

Kisoobi chiito ne ki tinyei oik

(Mat 8:28-34; Luk 8:26-39)

1Ki it icheek pitet age ne po araraita, agoi emetap Gerasenik. 2Ak kingo kagolong' eng' moingetap peek, kotuiyo ak chiito ne ki menyei ole ki mi kereeriisyek, ak kotinyei tamirmiryet ne murwoon. 3Ki menyei ye mi kereeriisyek; ak ki ma komi chii ne kita komuuchi korat ineendet agot eng' nyororoit; 4amu kiga kerate ineendet mugurek ak nyororosyek konyil che chaang', ak king'etyei nyororosyek ak kotonaton mugurek; ak ki ma komi chii ne ki imuuchi koboi ineendet. 5Ki waagaati peetuusyek tugul, kemoi ak peet, eng' kereeriisyek ak tuloonook, ak kotilegei koik.

6Kingo keer `ineendet Jeso eng' ye loo, kolabat ole mi ak kogutung'ji; 7ak kowaach eng' tuugeet ne oo kole, “Iting'eno nee inyee Jeso, Weeriitap Kamuktaindet Ne Toroor Miising'? Asoomin eng' Kamuktaindet ale amenyaliila.” 8Amu kigaleenji ineendet, “Mong'u eng' chiichi, inyee tamirmiryet ne murwoon!”

9Ak ki teebe ineendet koleenji, “Ng'oo kaineng'ung'?” Koleenji ineendet, “Kainennyu ko Chaang'indo, amu ki chaang'.” 10Ki soom ineendet miising' kole, amaon komanda eng' emonooto.

11Ak ki mi tegeiyatap tulweet akweet ne oo ne po toorook che ki agetoos. 12Ak ki soom koleenji, “Iyanwech kechut toorook.” 13Ki iyanji icheek, ak ki manda tamirmirik che murwonen koba kochut toorook. Ki rwai akweetap toorook, che neegit eliphuusyek aeng' kochoortaegei chemng'eisut koba kochoorchigei ak kobekyi araraita.

14Ki mweiso anyun che ki iyagi toorook ak komwaitaat eng' nganaseet ak eng' emet. Ak ki pwa anyun piik kogeer kiit ne kagoyaak. 15Ki pwa ole ki mi Jeso ak kogeer ineendet ne kiga konam oik, kotebyei ko kagolaach ngoroik, ak ko kagong'omit ineendet ne ki tinyei chaang'indap oik; ak ki aragenso pichooto. 16Ki mwaita paorinik komwachi piik kiit ne kiyaak eng' ineendet ne ki tinyei oik, ak kiit ne kiityi toorook ak icheek. 17Ki toi piik komwachi ineendet kole kwo eng' kiwotosyekwak.

18Ye ki laanyei moingetap peek, kogaigai ineendet ne kiga konam oik kole kotebi tuwai. 19Ki ma chamji Jeso, ago ki leenji, “Ui kaa ole mi choronoguk, ak iboorchi tuguuk che eecheen che kagoyaun Kiptaiyat, ak ko uu ye kagobooruun rireenet.” 20Ki nam pandanyi ak kotoi komwaita eng' Decapolis tuguuk che eecheen che kayachi `Jeso ineendet; ak ki kwong'yo piik tugul.

Cheptap Jairo ak kobogoryot ne kimyani

(Mat 9:18-26; Luk 8:40-56)

21Ye kingo kagolanda Jeso kogeny eng' moinget kwo pitoniin, koyumjigei tuiyet ne oo komi ineendet ye neegitee araraita. 22Ki nyo agenge eng' pounigap sinagogit ne kiguure Jairo, ak kingo keer ineendet, kobutyi keelyekyik, 23ak kosoom miising' koleenji, “Neegit kome cheptonyu ne ming'in. Nyoo igonoor ineendet euneguk, si kosap.” 24Ki pa anyun kobooto ineendet.

Ki isup ineendet tuiyet ne oo ak ki igiich ineendet.

25Ki mi kobogoryo ne kiga komandae korotiik eng' kenyiisyek taman ak aeng'. 26Kiga konyalil ineendet miising' agobo chepkerichinik che chaang', ak kiga kogoito tuguukyik tugul che ki tinyei ama toret kiy, ago kitesak myando koyait. 27Kingo kas agobo Jeso, konyo kosubu ineendet ak tuiyet ne ki mi let ak kotiiny ngoryennyi. 28Ki leenjigei, “Ngatiiny agot ngoroikyik, kisoobo.”

29Ye kingo tiiny, kogisiis mandaetap korotiik ak kogas eng' poortanyi kole kagisoop eng' kaimutyennyi. 30Kingo nai Jeso kole, kagoistoegei kimnateet, koweleljigei tuiyet ak kole, “Ng'oo ne katiiny ngoroikyuk?” 31Ak ki leenji `kasubikyik ineendet, “Igeere ole tee tuiyet ak ileen, ‘Ng'oo ne katwaa?’ ” 32Kiguskong' kotabendo komoche konai kole ng'oo ne katiiny. 33Ago ki nyo kobogoryondonooto ko kagonai kiit ne kageyachi, ak kobutyi tainnyi koarageni ak kobotani, ak komwachi `ineendet imanit tugul. 34Ki leenji ineendet, “Chebi, kagosaabin kayaneng'ung'; ui eng' kaalyeet, ak isap eng' myandang'ung'.”

35Kingo ta kong'alaali ineendet, kobwa piik che punu kootap pounindet ne po sinagogit ak kole, “Kagome cheptong'ung'. Kata iimji nee kaneetindet?” 36Ago ma mage kiy Jeso ng'olyoot ne kagimwa, koleenji pounindetap sinagogit, “Meiywei, iyan kityo.” 37Ki ma chamji chii koosup ineendet kobatee Petero, Jakobo ak Johana ng'eetap kametap Jakobo.

38Ki it `icheek kootap pounindetap sinagogit, ak ki keer piik che sololendos, kobooto che riirtos ak koteeitos miising'. 39Ye kingo kakwo ko, koleenji pichooto, “Kalya si owasegei ak orirtosi? Tom kome lakweet ago inuuchi.” 40Ak kirorechi ineendet kochot.

Ye kingo kagoon ineendet pichooto tugul koba saang', komut kwandap lakweet ak kamet kobooto che ki mi ak ineendet ak kwo ko ole mi lakweet. 41Kingo kagonam eutap lakweet koleenji, “Talitha koum,” ye kiweech ko, “Chebi, amwaun ale, ng'eet!” 42Ki ng'eet chebooto ak kowendot; (ki po kenyiisyek taman ak aeng'). Eng' yooto ko ki nam icheek kwong'eet ne oo. 43Ki ng'at `ineendet icheek miising' kole amat konai chii ng'olyoondoniito, ak ki mwaita kigoochi tuguuk che amei.

Currently Selected:

MARIKO 5: KALDC

Highlight

Copy