Jek 14
14
Okumugwem môkpulu linyọn̄
1Ìkpọ, usen oyerebet Okumugwem òkinu, mgbọ mêfumbe inu kinyi mè ikup me isi kinyi ikiche inu cha.
2Mâtitiin̄ otutuuk ido geelek, inyi ejibi akọn̄ enu me Jeruselem. Ema mêbọkọ ama ya, mè iwọlọ uwu ifum inu, mè itet ebibaan̄ igọọk ilaak me unye. Mêkpulu ìkike iba ama ya me akọn̄ isa ifon. Ire, ebi ene ebi mêsikbe, kpebekpulu isibi me ama ya.
3Mgbọ ya, Okumugwem môjibi akọn̄ isibi isi itim me lek ebi ido cha, mè itim akọn̄ kubọk îkitim me usen akọn̄. 4Me usen ya, ọmọ môgwuun̄ ukot me inyọn̄ ogoon̄ Olifu, eyi òkup me agan̄ mbum-ura inyi Jeruselem. Ogoon̄ Olifu ya môtọtọbọ ibum ìkike iba ibene me agan̄ mbum-ura isi ire agan̄ ichep-ura, agan̄ ge môjujuk ifo agan̄ inyọn̄, agan̄ ge keyilọ môjujujuk ifo agan̄ osiki, ikpele iteke mônenisibi ikeke me etete. 5Enyi mêliliin̄ itibi emen iteke n̄a ya òkup me etete ogoon̄, mije, iteke ya môjọn̄ọ ire Asen. Enyi mêliin̄ kubọk enyi eliliin̄be me ukot kè Ujaya ogwu ubọọn̄ Juda me mgbọ sikisik-ijọn̄ ya. Okumugwem Awaji n̄a môneninu, otutuuk ebi mbuban mêgọọk ọmọ inu.
6Me usen ya, utoon̄ ìkpokup, utọọk mè senesene mun̄ ewuuk ìkpokup si. 7Usen ya ìbore usen òsibi esese, egwe ìkpokup, eririeen̄ ìkpokup. Okumugwem oriọọn̄ usen ya. Isire ikakwun̄, utoon̄ ìbokukup.
8Me usen ya, mun̄ òkinyi ene ugwem môkigbuk isibi me Jeruselem, mgbọ ura mè mgbọ ibot, mè itọbọ ibum iba. Ugwaka ge obolibi ifo okwaan̄ Uchi me agan̄ mbum-ura, sà ugwaka ge keyilọ obolibi ifo okwaan̄ Mediterenia me agan̄ ichep-ura.
9Okumugwem mônenire ubọọn̄ me otutuuk linyọn̄. Me usen ya, Okumugwem ge kpọi obokup, erieen̄ kan̄ si obore erieen̄ ge gaalek òkukup.
10Otutuuk lek ijọn̄ yi, bene me Geba me agan̄ inyọn̄ me lek Jeruselem si re Rimọn me agan̄ osiki kan̄, mônwene ikana òla ijọn̄. Ire, Jeruselem môbene ifo inyọn̄, mè ikeke me irek ere îkupbe, ibene me otunchit Benjamin isi ire lek Adasi Otunchit, mè isi ire otunchit Mfufọ, mè ibene me Uwu-oket Ananeli isi ire ere ekichimi miin̄ ogwu ubọọn̄. 11Ebi ene mêluk me Jeruselem me utelelek, jakajaka ìkpoyaka ikup.
12Ijo orukan̄ Okumugwem obosa isulu otutuuk ebi ido cha ìtitim akọn̄ me lek Jeruselem osusut ìre ikeyi: Ufuk kiban̄ môjọ ita ema me ìkeke, chieen̄ kiban̄ môjọ ita me emen udọn̄ chieen̄ kiban̄, alọm kiban̄ môjọ isan̄a me otu kiban̄. 13Me usen ya, Okumugwem môtap ikpele wọlọwọlọ me etete kiban̄. Ene ge môtet ogwu melek kan̄ ubọk, mè ibene ubọk isulu ogwu melek kan̄. 14Ebi Juda si mêtim akọn̄ me Jeruselem. Mêkwọọk inu ubọọn̄ ebi ido ìkana ema okokop ititiin̄, alata araran̄ mè alata okuket mè ekwut mè ofọnti òwawa enenen. 15Ubọk yaage si, ijo orukan̄ anam môtet inyinya melek inyinya mgbidim ukot, mè aligọ melek inyinya akpan, mè otutuuk anam òkup me m̀gba-ǹgwele ukan̄ kiban̄.
16Mgbọ ya, ebi ìsisik me lek otutuuk ido cha ìtitim akọn̄ me Jeruselem, mêkinene isi Jeruselem me acha me acha isi ikitọbọ ebum inyi Ogwu Ubọọn̄, òrere Okumugwem Ogwukaan̄ Inyọn̄ mè Ijọn̄, mè ikisi irie ijọk Uwu Nlak. 17Ire ikaan̄ otoko ge me otutuuk linyọn̄ eyi ìkanene ìsi Jeruselem ìsi ìtọbọ ebum ìnyi Ogwu Ubọọn̄, òrere Okumugwem Ogwukaan̄ Inyọn̄ mè Ijọn̄, ibot ìkporep igwook me inyọn̄ ijọn̄ kiban̄. 18Ire ebi Ijipiti ijit isisi ijọk me Jeruselem, ibot ìkporep igwook me inyọn̄ ijọn̄ kiban̄. Okumugwem môria ijo orukan̄ eyi îkinyi ido ebi kpegọọk isi irie ijọk Uwu Nlak ya igwook ema me lek. 19Eyi mônenire osusut ebi Ijipiti, mè ire si osusut ebi ido geelek ebi kpesi orirọ ijọk Uwu Nlak ya.
20Me usen ya, mêge me lek egiriga ekitobo me lek inyinya ibe: “ÌKUP MBUBAN INYI OKUMUGWEM.” Ikeya si, otin̄ geelek me Uwu Mbuban Okumugwem môkup me mbuban kubọk okwa mbuban cha òkikup me isi ntook. 21Otutuuk otin̄ geelek me Jeruselem mè Juda môkup me mbuban inyi Okumugwem Ogwukaan̄ Inyọn̄ mè Ijọn̄. Ebi geelek ìnu ngwugwa mêbeen̄ usini me lek otin̄ cha isa item inu. Me usen ya, kpunu ogwu mbit geege òbokup me Uwu Mbuban Okumugwem Ogwukaan̄ Inyọn̄ mè Ijọn̄.
Currently Selected:
Jek 14: ANNa
Highlight
Share
Copy
Want to have your highlights saved across all your devices? Sign up or sign in
© The Nigeria Bible Translation Trust, 2013
