Ibeb 16

Ega mè Isimen ogwu gwun̄

1Serayi nwa kè Eberam ìkaman gwun̄ ìnyi Eberam. Ire, Serayi îkaan̄ ogwu usun̄ enenwaan̄ ge ònan̄a mè Ijipiti, ogwu ekigwen Ega. 2Usen ge, Serayi onenitọt inyi Eberam ibe, “Okumugwem ìkanyi emi gwun̄ geege. Eya orọ, na si gọọk ogwu usun̄ n̄a enenwaan̄ laak. Usini mgbọ, mâkaan̄ gwun̄ inan̄a me owot kan̄, ogwu mâsabe me lek kan̄ ikaan̄ uwu.”

Eberam obọbọkọ inu ya Serayi ogwu nwa otumube itap. 3Serayi nwa kè Eberam onenisa Ega ogwu usun̄ kan̄ enenwaan̄ ònan̄a me Ijipiti, inyi ogwu olom Eberam me lek nwa. Inu yi ìrọ mgbọ Eberam olukbe me Kenan akọp acha. 4Eberam ogọgọọk Ega ilaak. Ega oninin̄ owot.

Mgbọ Ega omun̄be ibe ke owot me lek kan̄, ibebene ikikpọ Serayi nga uwu kan̄ chieen̄ isiki. 5Serayi otutumu inyi Eberam ogwu olom ibe, “Îre owu orọ inyi ǹkembọkọ unyechieen̄ kechi. Emi me lek n̄a nsa ogwu usun̄ n̄a itap owu me ubọk. Mgbọ îmun̄be ibe ọmọ înin̄ owot, ibebene ikikpọ emi chieen̄ isiki. Kè Okumugwem ifieek oyerebet inyi owu melek n̄a.”

6Eberam ofọfọọk Serayi ibe, “Kpọ ogwu usun̄ kwun̄ ore ogwa, owu ore ogwa. Inu geelek òneneme owu oborọ ogwu usun̄ kwun̄, rọ.” Serayi obebene ikitutuku Ega. Ega onanan̄a me uwu ilibi ichep.

7Ogwu osat Okumugwem ge onenichichini Ega me agba lek ogbuuruk ge me emen èwê. Ogbuuruk ya ìkup me agba lek oniin̄ ekije isi Suru. 8Ogwu osat ya onenido ọmọ ibe, “Ega, ogwu usun̄ kè Serayi, ìre ònan̄a me ere owa mgbọ keyi? Sà ìre ere owa ke obosi?”

Ega ofọfọọk ibe ke ọmọ ìkilibi inan̄a me lek kè Serayi nga uwu kan̄.

9Ogwu osat Okumugwem onenitumu inyi Ega ibe, “Gwu kom fo gọọk nga uwu kwun̄, mè siki ibot nyi. 10M̀kpalọlọ irọrọ inyi bọn owot iman kwun̄ emumana ewa enenen. Kpebekọt ifuk otu ifuk kiban̄.”

11Ogwu osat ya îtumu si inyi Ega ibe,

“Mgbọ yi, owot me lek kwun̄;

owu môman gwun̄ enerieen̄.

Owu môgwen gwun̄ ya Isimen,#16:11 Isimen ìsibi ‘Awaji înọ.’

mije, Awaji înọ ida ito kwun̄

me emen tukutuku owu okupbe.

12Ire, gwun̄ ya ìbokup kubọk inyinya oron,

eyi ukpook geege ìkakitet,

ene geege ìkakitọ ikọ ìnyi.

Ọmọ môkirọ ikeme otutuuk ene,

otutuuk ene mêkirọ si ikeme ọmọ.

Ọmọ môluk me agba lek otutuuk ebi ngwan̄

me ochicha chieen̄.”

13Ega oneninyi Okumugwem ogwu òtumu ikọ melek kan̄ erieen̄ ibe, “Owu ìre Awaji òmọọn̄ inu,” mije, ìtumu ibe, “Ìre emi gwa ǹkimọọn̄ inu me ere yi si, mgbọ mmun̄be ogwu òmumun̄ emi isan̄a?” 14Mije keyi ke ekigwen udọn̄ mun̄ ya Bie Layai Rọi.#16:14 Me usem Iburu, erieen̄ yi ìre, ‘Udọn̄ Mun̄ Awaji Ogwu Òkup Me Ugwem, Ogwu Òmumun̄ Emi.’ Ogbuuruk ya ìkup me etete ama Kades mè ama Beredi.

15Ega oneniman gwun̄ enerieen̄ inyi Eberam. Eberam ogwegwen gwun̄ ya Isimen. 16Eberam ìre akọp acha jeeta mè gweregwen mgbọ Ega omanbe Isimen.

Currently Selected:

Ibeb 16: ANNa

Highlight

Copy