Matayu 17

Yesu Eŋe Bonagao Magakŋo Qeli Tanik Mange

1Kaiwe siks qoeki, ŋadino Yesuŋo Petoro so tatiŋon Yakop so Yohane eŋerop weneŋ arikei wane ebuke, eso eŋe iwen-ongi, bonaga kiroine maneo enŋeneka wakoi. 2Wau paki, kau kau eyaka solaine qeingeke, paki eŋine kaitine qilaunerop kepe deine yale okange, eso takotineŋo wakokoine, kiwa yale okange. 3Pakiso, dokoine karewe eŋe pore otpi, Mose so Elaiya ere Yesurop don aukoi. 4Eso Petoro eŋe Yesu olale rake. “Waom, ŋene iwa geŋem maine okanmaike, eya wane ge detnom, na kise karewe iwa baŋ makale, mane geŋane, mane Mose wane, so mane Elaiya wane.”

5Eŋe yale rakiso, eyaka kezoŋ qilaunerop eyaŋo sari kawet-onge, pakiso kezoŋ koto ŋine boka woka mane iwa yale raki ketke. “Iwamo nae Gipon Maepne, na eŋane simile nanmaike, ŋine donine desikei!”

6Dokoine eŋe boka woka eya detpi paki, eŋe zok manerop zonomene oreki, kaitene kepo maingeu ketki umi qe pakoi. 7Yale okanbi, Yesuŋo osoeno sari ebu more rake, “Kaŋzaŋ wiyeu, ŋine misuk kaet-ŋungep!” 8Eso eŋe wiyeu paki, pore ŋei mane mi kakoi, Yesu eŋineka weku okoraki kakoi.

9Eŋe bonagao ŋine ketpi paki, Yesuŋo rawot-one rake, “Ŋine masi iwa wakongi kamami, eya wane donkisi ŋei mane misuk edanikei, yeine qeligeu pamageki, Ŋei Wawainane Gipole seuseuwo ŋine ma wirik-kaki wisikae wiyeyake, naso yewao don kisiine maine edanikei.”

10Pakiso, dokoine eŋe Yesu olale rakoi, “Kine ŋedannom desikene, ra rokop don kito ebo ebon ŋei, eŋe ra okanmami, Elaiyaŋo Mesiya wane alakane sariyake.”

11Rau Yesuŋo edange, “Elaiya eŋe welekatne alakane sariyake, paki eŋe kine kine korop matok qetok mawareyake. 12Ŋo na welekatne iwa ŋidanbe, Elaiya eŋe mo sarike, pakimo ŋei ŋerep eŋe kau paki mi detkakoi, ŋo siluŋ enŋene simile eya mogare more, masi kine kine korop okankakoi. Numa yewaka, Ŋei Wawainane Gipole eŋe baŋ yaleka edo qe matali qetali okankakei.”

13Yale rakiso, dokoine eŋe mo detkoi, eŋe Yohane Doku Tau Tau wane ramaike.

Yesuŋo Medep Mane Asu Qotkoinerop Eya Ma Menaŋkake

14Dokoine karewe so Yesu eŋine eŋe koso ŋei ŋerep magu suwaine eŋano zinge ari lotkeu, ŋei maneŋo sari Yesu wane kino wawetine qeke. 15Paki rake, “Suwaine, ge naŋane giponnane wetŋone borikep! Eŋe naso baŋem seuke wisikae okane, wikile zok det okanmaike, paki waraŋ-kaki gerepko me dokuwo ket okanmaike. 16Na geŋane dokoŋone eŋano mo ma sarikole, ŋo siluŋ edo eŋe maine mi ma menaŋ-kakoi, eŋe ŋaŋaekoi.”

17Yesuŋo mainge rake, “O mali malip midaine, so sot korop ŋine ŋei iwa! Na naso kiroine ŋineropka ge arikale me? Na naso baŋem ŋinerop ge more umat kine kine ŋinane kau, bisi okan-ŋune more ŋibu gekale me? Medep eya naŋano ma sariu!” 18Raki, ma sariu, Yesuŋo asu qotkoine eya don olatki, eŋe saket arike, eso medep eya eŋe naso yewaoka menaŋkake.

19Pakiso dokoine eŋe bonepko Yesu wano sari olale rakoi, “Kine ŋedannom desikene, eŋe daleo wane asu qotkoine eya mogatŋem mi aŋaze teweke saket arike?”

20Rau Yesuŋo mainge rake, “Eyamo onoka wane mida. Ŋine mali malip zok mi ma gemami, eya wane. Wane iwa yale detpi! Ŋine mali malipŋine nigagatne mastet wounane rokop ma gekeiwo, yemo ŋine bonaga iwa maine olale rau rap, ‘Iwa ŋine eriwa arinom!’ Rau, eso eŋe baŋ ariki rap. Ŋine mali malip korop kine kine maine okangei, misuk ŋaŋaekei! 21Asu qotkoine yaline yemo numa weku meŋe meŋen so kisi maep wane ra more sawe gegeŋo maine mogatkaki, saket ariyake, kine kine maneŋo mi mogasiyake.”

Yesu Eŋe Seuke More Koso Wisikae Wiyeyakane Don Edangi Atak Etke Okange

22Dokoine eŋe korop Galili kepeo sariwareu, Yesuŋo edane rake, “Ŋei Wawainane Gipole yemo mo ŋei ŋaba eŋane meteeno birakau wayakane nasoine bomilemaike, 23waki, ŋei edo baŋ qeu seukeyake, ŋo siluŋ, kaiwe karewe eyao eŋe baŋ ma wirik-kaki wisikae wiyeyake.” Ŋo eŋine dokoine eŋe don eya wane zok manerop qomene umareki qom borik suwaine detkoi.

Yesuŋo Bakom Urum Wane Takis Motke

24Yesu eŋine so dokoine eŋe Kaperneyam matko sarikoi, pakiso Bakom Urum wane takis mama ŋei eŋe Petoro wano sari olale rakoi, “Ŋinane kito ŋibo ŋibon eŋe Bakom Urum wane takis mot okanmaike me ŋedannom desikene.”

25Petoroŋo edane rake, “O, mot okanmaike.” Petoro eŋe mat koto ari wake, naso eyao Yesuŋo mikepka Petoro qesonka rake, “Saimon, ge nolatnom daleo detmaine? Maŋo opesi me takis kepe iwa wane ŋei waom qole-on okanmaike? Kepe mat welaine ŋei ŋerep eya edo me ŋei lobo edo?”

26Petoroŋo mainge rake, “Ŋei lobo edo.”

Yesuŋo mainge rake, “Eya mo mayakatne, eya wane kine yemo iwa yale, kepe mat welaine edo mi qolekei, 27ŋo siluŋ ŋei ŋerep iwa eŋe ŋenane misuk detpi boriyake, eso eya wane ge doku namugo arinom paki, mewen mane biranom ketkep paki, zawon mikepka qadek-kene, eya tebanom sayake, saki meune eya mam aŋaŋgi aŋaino ge baŋ wesi mane marat-kakene, yemo lewine naŋane Bakom Urum wane takis wane rokop so geŋane, eya weneŋ mam pakiso ma sarinom ŋere takis eyaŋo baŋ qolekete.”

Currently Selected:

Matayu 17: onsNT

Highlight

Copy