Matayu 11

Yohane Doku Tautauŋo Qelit Raongi Yesu Wano Arikoi

1Yesu eŋe don iwa korop dokoine 12 ebon wareki qoeki, ŋadino mat eya qelige, so kisi maep don kito eboniyakane so edaniyakane, mat osop osop mere arike, yewa arike.

2Yohane Doku Tautau eŋe mulap urumgo mere, Kristoŋo urata kine kine make, eya wane don kisiine eya detke paki eŋe dokoine natne raongi Yesu wano arikoi. 3Ari qesonka rakoi, “Ŋedannom, ge sarikenane Yohaneŋo mo rake, ge weku mo iwa Kaisaleŋo biragangi ketkone, me ŋene mane wane ra tomaka gekene?”

4Yesuŋo edange, “Zinge ariu paki, kine kine onokaka detmami so kamami, eya Yohane olatpi. 5De pilikŋo de ene maine potmami, kiye wawetene qoi qoineŋo maine numa arimami, kubet togole eŋe solaene piridaŋge libe qeki gemami, ketene wonwoleŋo don maine detmami, seuseuneŋo wisikae wiye more gemami, so kisi maep don mayakakatne eya, ŋei ŋerep ket qeqineŋo detmami. 6Mane eŋe naŋane wet etkeka mi okaniyake, eŋe wet pese desiyake!”

Yesuŋo Yohane Wane Kine Ra Qelaŋange

7Yohane dokoine eŋe koso zinge ariu, eyaka Yesu eŋe Yohane wane don kisi ŋei ŋerep magu edane rake, “Ŋine kepe yaup papaino Yohane wano onokaka kakei wane arikoi ŋine gim mane metine momoŋo ma ari ma sari okangi kakei wane arikoi me? 8Ŋine ari onokaka kakoi, ŋei mane takotine kibi maep korop augeki, eŋe kaikei wane arikoi? Mida! Ŋei takot kibi maep korop yaline auge okanmami, eŋe ŋei waom urum eyaoka ge okanmami! 9Nolatpi, ŋine onokaka kakei wane arikoi? Propet mane me? O welekatne, na ŋidanbe detpi, ŋine kakoi, yemo propet mane wane rokop yuwanmaike, oŋo yemo rokop mane eŋe kakoi. 10Yohane eŋe weku eŋane Kaisale wane ekapŋo iwa yale ramaike, ‘Iwa eŋe naŋane siron rara ŋei, Kaisaleŋo ramaike, na baŋ eŋe talekawe, oŋo lewine alakangi paki, geŋane numa lalageyake.’ 11Iwa ŋidanbe detpi, Yohane Doku Tau Tau eŋe eŋet biŋekine zok kakapa suwaine, eŋe kepe ŋei korop mo sogino wakonbi, ge mage naso iwao gemami, eŋe yuwan one more gemaike. Ŋo mane eŋe baŋ ŋado qeli gege togon wakongi, eya wane kotino ketkele gekeŋo gemaike, oŋo siluŋ Yohane yuwan kayake. 12Yohane Doku Tau Tauŋo kisi maep don kiyeke edange, naso yewao ŋineka sarimage, ukude kaiwe iwa qeli gege togonŋo zonom gorop wakonge wakone pamaike, pakimo ŋei sorin borin gorop, eŋe togole more eya makei wane soringemami. 13Propet korop eŋe so Mose wane ra rokop don eŋe qeli gege togon wane don rau paki qe sari mageu, Yohane wane nasoo don eya raki qoeke. 14So ŋine eweke more propet eŋane don desikei wane ŋunmaikeo, detlutkei, Yohane eŋe Elaiya, oŋo sariyakane raraine. 15Eya wane ŋine ketŋine-ropŋo don iwa misuk ŋaŋaekei!

16“Naso iwao ŋei ŋerep gemami, na eŋe onokakao kineene rokop onbe? Eŋe ŋerep medep nigatne edo nalu qole qole sobego metmami, eya yale. Magu mane edo magu mane eŋane boka iwa yale ra okanmami. 17‘Ŋene geŋane zokit mama mulup puwanmaine, ŋo ge eŋet mi oremaine! ŋene seuseu eŋet kitomaine, ŋo ge mi arokmaine!’ 18Eya wane ra more na ramaile, Yohane sarike, so eŋe sawe geke, paki eŋe wain mi neke, bat midaine geke, eso ŋei eŋe kau paki rakoi, ‘Eŋe asu qotkoineŋo kotino ket gemaike!’ 19Ŋei Wawainane Gipole sarike, eŋe ŋara neke so doku neke, so ŋei ŋerep keuwo ewekine geke, eso ŋei eŋe kau paki rakoi, ‘Kau ŋei iwa! Eŋe mep qot so wain nene, takis mama so borikine mama natne eŋane kimaene mane!’ Na ramaile, ŋinane dereretŋine yemo wele midaine pamaike, ŋo Kaisale wane dereretŋo yemo welekatne welerop okangi, kine sikanŋon okanmaike.”

Mat Natne Mali Malipene Midaine Eŋane Girem Don Rake

20Mat natno Yesuŋo masi togogole loutne manerop maki, ŋei ŋerep eŋe kau paki wetene mainge more, sotene mi ŋadek-kakoi, eya wane Yesuŋo girem don edange, 21“Yai, Korazin welaine! Ŋinano umat kakapa suwaine baŋ wakon-ŋuniyake. Yai, Betsaida Yuda welaine! ŋinano umat kakapa suwaine yaleka baŋ wakon-ŋuniyake. Ŋinano masi togogole zok manerop makole, masi togogole eyaŋo Tire So Sidon, qelaŋ ŋei ŋerep eŋano mane mama ra, mokaka ŋei ŋerep yewa eŋe kau paki, wetŋo takot yale birau ketki, kaitko zepeŋo edomka qak naguwi paki, sotenane wet borik detpi paki, borikineene ŋadek-kamami, eya wane kine yale qe wakonbirap! 22Eya wane iwa yale desikei, kine ma wakon ma wakon kaiwe naso yewao, Kaisaleŋo Tire so Sidon qelaŋ ŋei ŋerep baŋ manerop sese-oniyake, paki eŋe wikile sisinimde desikei, ŋo ŋine yemo kakarauk suwaine sikan-ŋuniyake! 23So Kaperneyam Yuda welaine ŋine! ŋine ŋinŋineka qeliwo mawa wetika weti maine bira nagukei me? Yemo midakaka! Na ramaile, ŋine baŋ ma biraŋungi, qeika qei ŋei seuseune eŋano sola gerepko kesikei! ŋei mane eŋe Sodom, borikine mama matko ariki paki, noŋo masi togogole ŋinane keuwo makole, yalewaka masi togoleŋo ŋei ŋerep qelaŋ eŋano maki, eŋe masi eya kau paki, borikineene ŋadekau rap eyamo mat eya mi siukki paki, naso iwao eŋe mere waki rap! 24Eya wane iwa yale rawe desikei, kine ma wakon ma wakon kaiwe naso suwaine yewao, Kaisaleŋo Sodom qelaŋ ŋei ŋerep manerop baŋ sese-ongi paki, wikile sisinemde ebongi desikei, ŋo ŋine yemo kakarauk suwaine manerop sikan-ŋungi, wikile suwaine baŋ desikei!”

Ŋei Ŋerep Yesu Wano Sari Wet Pesek Suwaine Desikei

25Naso yewao Yesuŋo rake, “Magak, qeli so kepe eya wane Waom! Na bakomŋone kitomaile, onoka wane ge dereretenane detpi wawaine okanmaike, eŋe kisi maep donŋone mi sikanone more, motone okanmaine, ŋo medep nigatne yale dereretenane detpi ketkele okanmaike, eŋe yemo ra wakone ebon okanmaine. 26O Magak, iwa yemo geŋone simile so wet dereretŋonane wele yale mogatnom wakone pa ariyakane, detnom mo menaŋge.”

27“Maganeŋo yeye kine kine korop more ninwareke, ŋei maneŋo Gipolane wet dereretinane kine mi detmaike, eyamo Magakŋoka weku detkamaike. So ŋei maneŋo Magak wane wet dereretinane kine mi detmaike, Gipoleŋoka weku detkamaike. So ŋei mane Gipoleŋo Magak wane kine rawakone olatki, ŋei eya eŋe maine desiyake.

28“Ŋei ŋerep ŋine wikile dere umatŋine kakapa suwaine teweke geu, umatne ŋidotki zonomŋine mida lelemaike, eya korop naŋano sariwareu, noŋo baŋ dan gunut so riwe moriyan ŋibon-warekale, paki ŋine wet pesek desikei. 29Ŋine naŋane umat kabut eya mau paki, ŋinŋino birau ketkep, paki naŋane kinene detlukkei, onoka wane na asuneŋo wet pesesekatne so ketkele gemailane, ŋine baŋ oŋa oŋaŋinane metmet maratkau metki, menaŋkayake. 30Na umat yewa kabut pa baŋ kutŋino more ŋibongale, eyamo ewekine gemaine tewekkene, so na umatpa kine kine ŋido tewekkei wane, na baŋ kutŋino motkale, yemo ewekine so ponoŋ kiridiŋ, ŋine maine baŋ tewek warekei.”

Currently Selected:

Matayu 11: onsNT

Highlight

Copy