Luka 19

Yesu Eŋe Zakius Maratkake

1Yesu eŋe ari more, Yeriko mat suwainane keunoka ari mat qeliŋkayakane okangiso, 2takis mama so baliŋa ŋei mane, eŋetine Zakius, eŋe mat suwaine yewa wane kotino geke. 3Zakius eŋe ŋei ŋerep magu suwaine one more Yesu eŋe ma me eŋe daleo eya desiyakane zok manerop wetkeke, ŋo eŋe ŋei bamgo, eya wane Yesu maine mi kake. 4Pakiso, eŋe magu lewine alakane biririke ari yuwanone more, Yesu kayakane eki maneo wake, 5pakimo Yesu eŋe eki bano lotke, deine potki waki eki kutno Zakius kaki paki olatke, “Zakius, ge ikop kesikene, na matŋono ukude gerop mesikale.”

6Zakius eŋe aŋaine teweke ikop ket more, bakom kito Yesu iwenkaki matine koto waketkoik. 7Kine kine eya wakongi, ŋei ŋerep natne eŋe kau paki, detpi boriki rakoi, “Eŋe ŋei sotinerop wane matko eya mo daleo wane waket metmaike?”

8Zakius eŋe mat koto wiye okora Waom olale rake, “Waom, ge detnom, na aboŋne keuwoka mapokewe magu etke lelemamik, na ŋei ŋerep aboŋene midaine magu weku ebonikale, so na ŋei ŋerep natne mo sogino isione more takis wesiene setne weku kobu omaongoleo, na eŋe ukude wesi setne etke so etke ebonikale.”

9Yesu eŋe dere more olatke, “Ukude Kaisaleŋo mat iwa wane kotino ŋei ŋerep eŋane wetene mo maki zingemaike, ŋo yewa eŋane keuwo ŋine ŋei iwa eŋe na malip nanmaike, eya wane na ŋidanmaile, eŋe mo Abraham wane ŋaboine solaŋoka, ŋo ukude eŋe Abraham ŋaboine sola so kotorop weneŋ wakonmaike. 10Ŋei Wawainane Gipole, eŋe ŋei ŋerep siuk siukine eya ziyaŋone more, wetene ma menaŋ oniakane sarimaike.”

Goli Wesi Setne Eya Wane Don Rokop

11Ŋei ŋerep eŋe don eya detkau mere edange, so Yesu eŋe takotke don rokop mane edange. Onoka wane? Yesu eŋe mo Yerusalem mat osino lotkekimo, ŋei ŋerep eŋe wetke rakoi, “Mo iwaka Kaisale wane qeli ewe zonomine wakonlukki kaikene mane.”

12Eya wane Yesu eŋe don rokop mane edane rake, “Naso maneo ware ware mane eŋe, kepe kiroino Ŋei Waom suwainano ariwe, oŋo ŋei wawaine biranangi, so koso zinge sarikale, eŋe yalewa raki paki, kepe kiroino arike. 13Eŋe eya ariyakane okane more, urata medewekoune 10 qedugu one more, goli wesi setne mane, so goli wesi set mane korop ebone more rake, ‘Ŋine wesi iwa mau paki, bisnis urata ma, ma suwaeu na koso zinge sarikale.’ 14Ŋei suwaine eŋe arikimo, matkoune eŋe eŋane bauene waki, qelit biraonbi ari, Ŋei Waom suwaine iwa yale olatkoi, ‘Eŋe kepe ware wareze mi geyakane ŋene ramaine!’

15Pakimo ŋei Waom eŋe siluŋ kepe ware ware birakaki zinge sarike. Zinge more qelit medep wesi ebonge, eŋe iwa yale ra more edora waraŋonge, ‘Na wesi ŋibongole, eya ŋine urataine ma more ma louleu darap wakonge?’ 16Ŋei maneŋo alakane sari rake, ‘Waomne, na geŋane goli wesi setne wekuŋo bisnis ma more goli wesi setne 10 marat ongole.’ 17Ŋei suwaine eŋe olatke, ‘Ge wekumane okangone, ge qelit ŋei wele, ge wesi nigatne wareluk kamaine, eya wane na ge mat suwaine 10 ware onikenane biraganikale.’ 18Qelit ŋeiine mane sari olatke, ‘Waomne, na geŋane goli wesi setne wekuŋo bisnis ma more, goli wesi setne 5 marat ongole.’ 19Eŋe qelit ŋei yewa olatke, ‘Na ge mat suwaine 5 ware onikenane biraganikale.’

20Ŋo, qelit ŋei maneŋo sari olatke, ‘Waomne, geŋane goli wesi setne iwamo, na laplap koto motkekole, 21ge ŋei gereune aboŋ kine kine ŋei natneŋo mau wakongi, aboŋ eya ge ma okanmaine, ŋei maneŋo eu ebotkiso, ge eu eya wane ŋara wele omaon okanmaine, eya wane na geŋane kaetnange.’ 22Ŋei suwaine eyaŋo olatke, ‘Ge qelit ŋei qotkoine, na geŋone don eyaŋoka mainge more, koso don uratao biraganikale. Na ŋei gereune. Na ŋei mane wane aboŋ ma okanmaile. Me ŋei mane wane euwo ŋine ŋara ma okanmaile, ge eya korop detkone. 23Ge wesi eya onoka wane wesi urumgo mi motkone? Wesi eya paki, ŋei maneŋo yewa ŋine ma more bisnis mayake. Maki wakone paki, na zinge sarikaleo, eŋe wesi natne kutno niniyake.’

24Ŋei waom eŋe ŋei natne yewao okorakoi, eya zinge edange, ‘Ŋine eŋano ŋine wesi setne eya omaka more, ŋei wesi setne 10 pa manmaike, eŋe manbi.’ 25Ŋo, ŋei eŋe olatkoi, ‘Waomze, eŋe wesi setne 10 mo pa manmaike!’ 26Ŋei waomŋo mainge edane rake, ‘Na ŋidanbe detpi, ŋei mane eŋe kine kine mo man mane, ŋo eŋe maine mage more urataine ma, ma louleki, na ŋei yewa koso takotke manikale. Ŋo ŋei mane eŋe kine kine mo man mane eya nigatnemde magemaike, na eya omakkaikale. 27Ŋo naŋane ŋabakopne diyao gemami, ŋei ŋerep eyaŋo na wareonikalane mi siminonge, paki ŋei waom wano don mo motkoi, ŋine ŋei ŋerep eya korop ebu sari more, iwa naŋane kaitno enguwi korop seukwarekei!’ ”

Yesu Eŋe Ware Ware Suwaine Yale Okane Yerusalem Matko Waketke

28Yesu eŋe yale ra more, ŋei ŋerep eŋano ŋine Yerusalem goken alakane arike. 29Eŋe Betpage matko so Betani mat osino bonaga mane Oliwa eya lotke more, dokoine eŋano ŋine etke alakane biraore, iwa yale etange, 30“Ŋire matko eriwa wa more doŋki nigatne mane medeune mulapko lukkau okoraki kaikei, doŋki eya ŋei maneŋo kutno mi metmele, ŋire eya ka more mulap siloke more, ma sarikeik. 31Ŋo ŋei maneŋo qesonŋure rayake, ‘Ŋire eya onoka wane okanmamik?’ Rakiso, ŋire iwa yale olale raikeik, ‘Waomseŋo raki sari mamaite.’ ”

32Yale ra etane more biraotki, ere ari Yesu eŋe don etane more kine kine rake, eya wane rokopko korop ongoik. 33Ere doŋki silokkauk so doŋki welaine eŋe etane rakoi, “Ei, ŋire dalino okanikeik wane doŋki eya silokkamamik?”

34Ere don eya dere more edangoik, “Waomzeŋo raki sari mamaite.” 35Yale ra more doŋki eya Yesu wano ma sarikoik. Pakiso, eŋe momo takotetne doŋki kutno lameke more, Yesu qesiŋkauk doŋki kutno wa metke. 36Yesu eŋe doŋki kutno arikiso, ŋei ŋerep eŋe takotene eya kito qoke numao doŋki kine gesoke ariyake, eyao lameke arikoi.

37Pakimo, Yesu eŋe Yerusalem osino, Oliwa bonaga oken duma ket magekoi, eyao lotkeki, yewao Yesu wane dokokoune magu suwaine eŋe masi kine kine togole ongoi, eya wane eŋe Kaisale wane eŋetine don aro uŋalan so oi bakom suwaineŋo bukeu waki rakoi, 38“Kepe ware ware iwa eŋe Waomŋo eŋine tungo birakaki sarimaike! Kaisaleŋo mosopkakep! Qeliwo peyam pakep!”

39Pakiso, Kaisale wane papa togon welaine ŋei natne, Parisi, eŋe ŋei ŋerep magu keuweno ŋine sari Yesu olatkoi, “Kito ebo ebon, ge dokoŋone eya edannom, doŋ manbi!”

40Yesu eŋe donene turuŋine mainge edane rake, “Na ŋidanmaile, eŋe doŋ manikeiwo, yemo wesi edo iwa koso wiye boka more Waom wane eŋet ora oi bakom okane rau, naŋane eŋetne wayake.”

Yesu Eŋe Yerusalem Mat Wane Ra More Arokke

41Yesu eŋe Yerusalem mat osino ari more, Yerusalem so ŋei ŋerep eŋane ra more aroke more, 42rake, “O Yerusalem, ŋine Kaisale wane duma peyamine ukude detluk kaikeiwo, ŋine maine numao eya mogare arikei, ŋo ŋine maine mi desikei! 43Yemo boaŋ ŋabakopŋine eŋe mat lolike sen qeŋunbi, ŋine matko ŋine maine mi sakesikei. 44Eŋe mat so ŋei ŋerep medewekopŋine korop matali ŋunwarekei, eŋe wesi mane mi qeligeu weti wesi kimainane kutno mesiyake. Kaisaleŋo ŋine qesiŋ ŋuniyakane sarike, ŋo, eya ŋine mi detluk kakoi, eya wane ŋabakopŋine eŋe ŋine matali ŋunwareu qamen qe payake!”

Yesu Eŋe Kaisale wane Bakom Urumgo Waket Ŋei Nalu Qolenaguwi Esoponge

45Pakiso, Yesu eŋe Kaisale wane Bakom Urumgo waket more, ŋei ŋerep nalu qole qole urata ma metkoi, eya kiyeke esopone more, 46edane rake, “Kaisale wane ra rokop donŋo iwa yale ramaike, ‘Kaisale wane Bakom Urum eya mo eŋine eŋetine ora raikei, meŋen meŋen urum okaniyake,’ ŋo ŋine yemo yale okanbi, mo kobu ŋei eŋane mat okanmaike!”

47Boaŋ Yesu eŋe Kaisale wane Bakom Urumgo kaiwe baŋem waket more, ŋei ŋerep kito ebonge. Mosop ŋei Suwaine ŋetne so Kaisale wane papa togon welaine ŋei, Skribe so ŋei ŋerep eŋane ŋetne, eŋe koropŋo numa mane maratka Yesu qeu seukeyakane ziya ziyaŋ urata makoi, 48Ŋo numa mi maratkakoi. Ŋei ŋerep magu eŋe Yesu wane don detokangoi, eŋe don rake, yewa mi qeliŋ kawarekoi, eya wane Yesu wane ŋabakoune eŋe numa ziyageu paki maine mi qekoi.

Currently Selected:

Luka 19: onsNT

Highlight

Copy