Mareko 15

Yesu Piratoaru mekenggec

Mat 27:1-2, 11-14; Ruk 23:1-5; Yoh 18:28-38

1 # Ruk 22:66 Asoacngoc yombong womonggareng enara nga yudangic enarafocngina amma mitiac negen negengngic nga yudangic yeneac tutumangtoa memba sasawa, yeneng yoac deserigec. Deserima Yesu maria dedeckema Piratoaru mekenggec. 2Mekenggec Piratongo Yesu kpesimiec, “Ge yudangic yeneac ngictau me?” ifi deu merenec, “Imocnoc geanggaoc denec.”

3Nga womonggareng enara yeneng Yesu yoacfu faima yeac haniaya homac degec. 4Ifi degec Piratongo monggoc kpesimiec, “Yeni geac yoac homac yombong dedaemoc, imoc negemma turunga mong mi merennade me?” 5#Yes 53:7; Mrk 14:61Ifi deu Yesungo turunga monggoc mi merenu Piratongo negen negeng ua homac meec.

Yesu kpegecdeac deseriec

Mat 27:15-26; Ruk 23:13-25; Yoh 18:38–19:16

6Anu makekeng nasousoc ngic mong witicamau takefu yudangic yeneng yeac kpara kpacgec Piratongo yenoc witicamaunac wau makefec. 7Amma ngic goa warac ngicngac here miac miac faka amma ngic goa yunuhomegec witicamau faiyunugec, yenearunac ngic mong kpara Baraba. 8-10Nga womonggareng enara yeni Yesuac keracmangang amma yeac mariu mekenggec, Piratongo imoc bic negenec. Ifi negenu habutoa yeneng hama Piratongo angkefec, ifi isoc anudeac kpesimigec yeng meremma yofi kpesiyemmeec, “Yudangic ngeneac ngictau yungecngemmebadeac negendae me?” 11#Aps 3:13-14Ifi deu womonggareng enara yeneng habu fenggeyemmegec yeneng Yesu wama ine Baraba naric yungecyemmegecdeac degec.

12Ifi degec Piratongo monggoc meremma kpesiyemmeec, “Anu ni yudangic ngeneac ngictau dedae, yeac dafi ambade?” 13Kpesiyemmeu yeneng arohogec, “Ge ye mariponnu kpena homeu.” 14Ifi degec Piratongo monggoc kpesiyemmeec, “Nga ye noc kopocsic meec?” deu ine yeneng monggoc seriangoc arohogec, “Ye mariponnu kpebesena.” 15Ifi degec Piratongo habu yeneac negen negeng modarudeac negemma Baraba wau kenec. Nga yeni Yesuac sebia dzikacngo kpemaguc mariponnu kpegecdeac wasai maringinau wayemmeec.

Deendema ammigec

Mat 27:27-31; Yoh 19:2-3

16Anu wasaingic yeneng Yesu mema gawamang yeneac amaoda manau emma wasaingic sasawa hafoangoc kpedzucnegec. 17Kpedzucnedacma ngakpiherec mong giweng giweng heimima somang batihema ira isoc oruhau heimigec kemeec. 18Kemeu eweheihei siricfu kpacma edegec, “Ohec, yudangic yeneac ngictau.” 19Dema yasungo oruhau kpema sofohoma haniau fafoc heima numumigec. 20Anu yeni defagoc ammigec wisickeu ngakpiherec sacsac imoc hesima yengena wamba heimigec kemeu mariponnu kpegecdeac mema ngadeau kenggec.

Mariponnu kpegec

Mat 27:32-44; Ruk 23:26-43; Yoh 19:17-27

21 # Rom 16:13 Kemmagec Kirene taonnunac ngic mong kpara Simong, ye Aresande nga Rufu yereac mangngira, yeng semeng uaunac sinnu hamanu wasaingic yeneng Yesuac maripong tofohoudeac ngombonggegec tofohoec. 22Tofohou yeni bangec buma mong kpara Gorigata, titiha hatasic, imohai Yesu mekenggec. 23Mekemma sopo mong aengagoc kpara mira, imoc wainggoc yerecgema migec nga yeng ine imoc waec.

24 # Myeg 22:18 Anu yeni ye mariponnu kpema wambaya mederema wiac mong me mong merang meude, imocac kpeing kpegec. 25Yeni asoac 9 kirocfu Yesu mariponnu kpegec. 26Kpema ye yoacfu faigec, imocac hania tafebisicfu yofi ohogec, “Yudangic yeneac ngictau.” 27-28Anu yeni godzungic yohockang, mong foiau nga mong kanayau yegoc mariponnu momoc yunugec. Ifi anggec yoac mitikibiu oho ohoya yomoc seriec,

“Ye manganameme yenearunac mong, ifi negenggec.” (Yes 53:12)

29 # Myeg 22:7; 109:25; Mrk 14:58 Anu ngic ihai kengha anggec, yeni Yesu deendema ammima orucngina kpatitickema degec, “Ngeni ngic imoc henggec, yeng womong hembarackema wenac harebecac manau monggoc meudeac deec. 30Ge geanggaoc onggongemema mariponnunac mesiemema mana!”

31Anu womonggareng enara nga mitiac negen negengngic, yeneng ifingoc ye desusuic ammima denegeng amma degec, “Ye ngic goa onggongyunukefec nga yengena ine naric mi onggongemeude. 32Ye Messia, Isracel neneac ngictau kecdengo yaguc mariponnunac mau hemma negensinggenide.” Nga ngic yohockang mariponnu ifingoc yurugec, yereng ifingoc deendema ammioc.

Yesu homeec

Mat 27:45-56; Ruk 23:44-49; Yoh 19:28-30

33Wenac dzongiau 12 kiroc ammanu imohai ama kundung kpema kundungngo bangec sokoma fekemmanu 3 kiroc marai anec. 34#Myeg 22:1Imohai Yesungo ubaudumeng kunengngoc kpacma yofi deec, “Eroi, Eroi rama sabaktani.” Imocac titiha yofi, “Anutuna Anutuna, ge nocac wanudang.”

35Ye ifi kparu ngic wegenac nanggec, yenearunac goango imoc negemma degec, “Negenggec, ye Eria kpacsambic ammide.”

36 # Myeg 69:21 Ifi degec ngic mongngo nedzikemma kondung sobing mong mema waing aengagocfu nemuruckema yasuu faiu Yesuac enarau enu deec, “Tomai namma henni, Eriango hama mesiude me kpac!” 37Ifi demanu Yesungo ine ubaudumeng kunengngoc kparu asuya ereec. 38Ereu womonggac kporuc kuneng#15:38 Kporuc imoc ama kpetiac nga ama kpataning yombong, yereac botucngirau faifaia. imoc dzongiausing wihacnac tohoma mau yohockang anec.

39Anu wasaigareng yeac kicfu nanec, yeng Yesungo kparec nga homeec, imoc hemma yofi deec, “Foracngoc, ngic yomoc ye Anutuac medacnoc.” 40#Ruk 8:2-3Nga ngac goa ifingoc hereau namma faka fingerec, imoc henggec, yeneac botucfu Maria kpara mong Madara nga Maria, Yakobo mong munea deandae, ye nga Yosec yereac nonggongira amma Sarome, yeni yenahafoc nanggec. 41Yesungo Gariraia bangecfu kefu ngac imoc yenennoc ye modacma meficgekecgec. Amma ngac tosea homac, yeni Yerusalennu yegoc bic kemma ihai ye hemma nanggec.

Yesu tonggogec

Mat 27:57-61; Ruk 23:50-55; Yoh 19:38-42

42Marai bic anu hombanggac memengereac naso wegene hau sabataac naso femanu 43Yosefe Arimataia taonnunac, yeng ihai haec. Ngic ye kpactoayagoc yudangic yeneac tutumangtoa, imocac membangina mong amma ye Anutuac eucererenggac tomai kefec. Yeng kengeha kpac Piratoaru kemma Yesuac fareng meudeac kpesimiec. 44Kpesimiu Pirato ye Yesungo bic homeec, imocac kpidohoma wasaienara kpacma Yesu bic homedac me kpac, imocac kpesimiec. 45Kpesimiu Yesu bic homedac deu Yesuac fareng Yosefe desimiec.

46Desimiu Yosefengo linengkporuc mong bummema Yesuac farenga mariponnunac mesiu mau kporucngo tembonggema kicsereu mekenec.#15:46 Lineng imoc kpindzing mong ambiac ogea, imocngo wamba mekecgec. Kicsere imoc hocsirau singa usu usuya, imohai farenga faima hoctoa mong kpedidinggeu singa hedzickeec. 47Anu Maria Madara nga Maria Yosec nonggea, yereng Yesuac farenga dahai faiec, imoc henoc.

Currently Selected:

Mareko 15: Ded

Highlight

Copy