Mareko 12

Waing uaac gareng

Mat 21:33-46; Ruk 20:9-19

1 # Yes 5:1-2 Yesungo monggoc yoac heima yofi edeyunuec, “Ngic mongngo waing ua gboria mong homecma oda dzegeec. Dzegema waing tidzoc tidzohoac teng usuma gareng yeneac kicfifiac amaherec meec. Meu wisickeu waing ua garenggegecdeac ngic meficyunuma yenigoc yoac dedzege anggec nga yengenaoc ine bangec hereau kenec. 2Kemma kecmanu fora kpememe naso hau wanacngiha mong sueu waingngic yenearunac waing uaac fora noboha yeac anec, imoc meudeac kenec. 3Kensikemanu waingngic yeni wanacngic mema dzoboya kpema entegeng suegec kenec. 4Kenu minginango wanacngic mong yenearu sueu kenu yeneng ye kpekpatanggema desofoc ammigec.

5Ifi ammigec ua minginango serima wanacngic monggoc mong sueu yenearu kenu ye kpehomegec. Kpehomegec ua minginango wanacngic homac sueyunuu kenggec uangic yeneng medac goa dzoboyunugec nga goa ine yunuhomegec. 6Wisic wisickeau ua minginango songomedacyombonga mocgu kefec, ye yofi negemma sueec, ‘Yeni sifu medacyombonna eweheimigecde.’ 7Ifi negemma sueu uangic yeneng ine medacyombonga hemma denegeng amma edeemegec, ‘Yeng kecma ua yomoc tiu enude, imocac ngeni hagec kpeni bangeha nga maridzominga imoc nenang ambeso.’ 8#Heb 13:12Yeni ifi dema ua minginaac medacyombonga mema kpehomema farenga waing ua ngadeau ukugec kemema feec. 9Anu ua minginango dafi anude? Ye hama waing uangic yunuhomema waing uaya imoc uangic areng mong yemmeude.

10Mitikibiu yoac yofi oho ohoya fede,

‘Amameme ngic yeneng hoc mong mangana dema ukugec. Nga hoc imocngo amaac hoc wotung amma seria nanude nga nambesande. 11Kebu yengenaoc faka imoc meu imocngo nenang kicfu wiac bibiagoc ande.’ Ngeni yoac imoc osonegeng angandae.” (Myeg 118:22-23)

12Nga Yesungo enara yeneac negemma yoac imoc heima deec, yeni imoc bic negenggec. Nga yeneng ye mendanggegecdeac sing ine hofocgec. Nocac yeni ngicngac yeneac kengecyunuu wama kenggec.

Takesi

Mat 22:15-22; Ruk 20:20-26

13 # Ruk 11:53-54 Ngicenara yeneng Yesu tobanggegec yoacdedeau makpeu yoacfu faigecdeac negemma yofi anggec. Yeni farisaio nga Herodeac arennunac ngic goa yearu sueyunugec 14yeneng Yesuaru hama degec, “Kpoukpou, yoac fora dema ngic engena me mamea yeneac mi negensiannec. Ge ngicngacareng socfungoc ayemmekecnec, imoc negendimbe. Nga ge Anutuac sing dindingac edekpou anemmekecnec. Ifi anu ngictau Sisa takesi mibesonga me mi mibesonga, singngo dafi dede? Nenang ngictau Sisa takesi naric minide me kpac?”

15Ifi degec Yesungo ikocfakangina negentegecma yofi edeyunuec, “Ngeni nocac faitobannu fainudae? Ngeni dzo mong meficgema edzacnugec hemba.” 16Ifi deu yeni dzo mong migec yeng imoc hemma yofi kpesiyemmeec, “Onga nga kibi yoc, imoc meracac?” kpesiyemmeu degec, “Imoc Sisaac.” 17#Rom 13:7Ifi degec Yesungo yofi edeyunuec, “Imocac ngeni Sisaac wiac, imoc Sisa mibisia nga Anutuac wiac, imoc Anutu mibisia!” Ifi edeyunuu negemma kpidohogec.

Homecfunac yacyac

Mat 22:23-33; Ruk 20:27-40

18 # Aps 23:8 Sadukaio areng yeni homecfunac yacyac mi fede, ifi dekecdae. Nga yenearunac ngic goa Yesuaru hama kpesimigec, 19#Dser 25:5“Kpoukpou, Mosengo dedeseriyoac yofi ohonemmeec, ‘Ngic mong ye ngac mema gboriha mong mi kpeficge kecma homeudeu ngac ye kefu muneango daraac hotsec mema gboric kpeficgema daraac kpac miacbeso.’

20Naso monnu daramuna seweng yeni kecgec. Nga waracdacnginango ngac mong mema gboriha kpac kecma homeec. 21Homeu muneango ngac imoc mema ye ifingoc gboriha kpac kecma homeec. Homeu munea mongngo faka imocngoc anec. 22Nga daramuna seweng yeni ngac imocngoc mema gboricfocngina kpac kecma homedacgec. Homedacgec hotsecngina kecma ngade homeec. 23Homeu ngic seweng yeneng ngac imocngoc megecac kecma yacyac nasou homecfunac yacgecde, imohai ngac imoc meracac enema ambesande?”

24Ifi degec Yesungo meremma yofi edeyunuec, “Ngeni mitikibi nga Anutuac kuc, imoc mi negentegecdae, imocac amma yoac desufudae. 25Kecma homegec yeneng homecfunac yacgecde, imohai ngicngac yeni mi meemegecde. Nga manggac mongngo ‘Ni naroanna ngic mibade.’ imoc naric mi deude. Yeni imohai kurumenggac angero, yeni isoc anggecde. 26Nga homecfunac yacyac deba, ngeni yoac yomoc Moseac kibiu imoc osoandae, Mosengo icfu gerecborang fingeru hemma ihai kenu Anutungo yofi edeec,

‘Ni Abrahang nga Isaka amma Yakobo, yeneac Anutu.’ (Mke 3:2, 6)

27Nga ye ngic homemea yeneac Anutu kpac. Ye ngic gbori kecdae, yeneac Anutu. Ngeni sing homac yombong segema kecdae.”

Dedeseriyoac engena

Mat 22:34-40; Ruk 10:25-28

28 # Ruk 10:25-28 Anu Yesugoc demereng anggec, yeng turunga gombunga merengyemmeu mitiac negen negengngic yenearunac mongngo imoc hemma Yesuaru hama kpesimiec, “Dedeseriyoac damocngo engena yombong ande?” 29Ifi kpesimiu Yesungo yofi deec, “Dedeseriyoac engenangina yofi fede,

‘Israengic ngeni negenggec, Kebu Anutunina ye mocgu nga 30ge ubaherega nga ongaga amma negen negengga nga kucga sasawa, imoc hafoangoc Kebu Anutugaac heresongo negemma kecbesena.’ (Dser 6:4-5)

31Nga mong yofi,

‘Ge geangga anggengande, siriha imocngoc ngicngac gegoc wegenac kecdae, yeni heresongogoc hoangyunubesena.’ (Sese 19:18)

Dedeseriyoac imoc yereac engena mong mi fede.”

32Ifi deu mitiac negen negengngicngo meremmiec, “Gombunga kpoukpou, ge fora yombong denec. Anutu ye mocgu, mongngo ye isoc mi kecde.#12:32 Yesaia 45:21 33#1Sm 15:22; Hos 6:6Nga ubaherega hafoangoc nga negen negengga hafoangoc amma kucga hafoangoc yeac songo heregoc negemma kecbesena amma geangga anggengande, siriha imocngoc ngicngac gegoc wegenac kecdae, yeni heresongogoc hoangyunubesena, wiac imocngonoc Anutuac hosuc heihei amma sese hania hania ferahade.”

34Ngic ye gombunga yombong merenu Yesungo negemma yofi edeec, “Ge Anutuac eucererenggac hereau mi kecnec.” Ifi deu yeni Yesu monggoc kpesimigecdeac kengecyunuu wagec.

Yesungo Messiaac kpesiyemmeec

Mat 22:41-46; Ruk 20:41-44

35Yesungo Anutuac womonnu edekpou ayemmema yofi kpesiyemmeec, “Mitiac negen negengngic yeneng Messia ye Dawidiac kisicfunac nocac deandae?” 36Dawidi ye Asungo meefaiu yengenaoc yofi deec,

“Kebungo neac Kebu edeec, ‘Ge foinaugeng tacmana ngabafocga hanigaac bageau faiyunuba yeni hanititiga ambesandae.’ (Myeg 110:1)

37Dawidi yengenaoc ‘Neac Kebu,’ kparec. Nga Messia ye dafiu Dawidiac bangeha ande?” Ifi deu ngicngac habutoa yeneng negendzidziegec.

Mitiac negen negengngicac nono deec

Mat 23:1-36; Ruk 11:37-54; 20:45-47

38Ifi anggec Yesungo edekpou ayemmema yoac yofi torokpema edeyunuec, “Ngeni mitiac negen negengngic yeneac henghomema kecbisia. Yeni songonginaac amma ngakpi herea heima kecgec ngicngac yeneng wenacngerec deyemmegecdeac emenecfu kenghaandae. 39Amma kpekpeturang amau nga yakatoa nasou warac warac tatacfu tacbesonga songongina angkecde. 40Amma yeni ine ngachotsec ewefocngina homemea yeneac ama wangecyunuandae. Amma negen ngereengunugecdeac nunumu herea here numuandae. Yeni ikocfaka ifia angandaeac turunga ebiriangoc megecde.”

Ngachotsecac sese

Ruk 21:1-4

41Anu Yesungo womonggac sesekatapa nobohau tacma henu ngicngac homacngo dzo imohai faigec kemeu ngic finactoagoc homacngo hama dzo ebiriangoc faigec kemeec. 42Anu ngachotsec ewea homemea mongngo ifingoc hama hocdzo sacsac yohockang faiu kemeec, imoc toea mong kapianecsac. 43#2Kor 8:12Faiu Yesungo medacfora deu hagec yofi edeyunuec, “Foracngoc, ngachotsec hiedzoya kpac yombong dzo faidacmoc, yeng ngicngac sasawa sese faidau, yeni feracyunude, imoc edengunuduae. 44Ngicngac tosea sasawa, yeneng finactoangina wakema made, imohacnac sesengina faidau. Nga ngac ye ine wiac femidac, imocnoc hafoangoc faidacma entegeng kecde.”

Currently Selected:

Mareko 12: Ded

Highlight

Copy